တောင်သူများအတွက် အခြေခံဈေးနှုန်း

၂၀၁၈ ခုနှစ် မတ်လက နေပြည်တော်တွင် ပြုလုပ်ခဲ့သည့် လယ်ယာကဏ္ဍဆွေးနွေးပွဲ၌ ဆန်စပါး အခြေခံဈေးနှုန်းအဖြစ် သတ်မှတ်အရည်အသွေး ပြည့်စုံသည့် စပါးတင်းတစ်ရာကို ငွေကျပ် ငါးသိန်းနှုန်း ကြေညာဆောင်ရွက် ပေးရန် နိုင်ငံတော်၏အတိုင်ပင်ခံပုဂ္ဂိုလ်က အထူးအလေးပေး တိုက်တွန်း ခဲ့ရာ အဆိုပါအခြေခံဈေးနှုန်းအတိုင်း သတ်မှတ်ကြေညာ၍ ရောင်းဝယ် ဖောက်ကားခဲ့ကြသည်။

ဆန်စပါးအခြေခံဈေးနှုန်း သတ်မှတ်ပေးခဲ့ခြင်းသည် ထိုအချိန် ကာလက စပါးစိုက်တောင်သူဦးကြီးများ ၎င်းတို့စိုက်ပျိုးသော ဆန်စပါး ရောင်းဝယ်ဖောက်ကားရေးတွင် ဈေးနှုန်းကျမှုဒဏ်ကိုကာမိစေရန် ဖြစ်နိုင်ခြေရှိသည့် ခန့်မှန်းဈေးနှုန်းတစ်ခုကို တောင်သူလယ်သမား ဦးကြီးများ၏ အကျိုးစီးပွားအတွက် သတ်မှတ်ပေးခဲ့ခြင်း ဖြစ်သည်။ သို့သော် မည်သည့်အရာဝတ္ထုပစ္စည်းမဆို အခြေအနေ အချိန်အခါအလိုက် ပြောင်းလဲတတ်သည့်သဘောရှိရာ နောက်စိုက်စပါးရာသီတွင် အဆိုပါ စပါးဈေးနှုန်းမှာ တောင်သူတို့အဖို့ တွက်ခြေမကိုက်ဖြစ်ရသည်။

၂၀၁၉ ခုနှစ် ဇွန်လ ၂၈ ရက်နေ့က နိုင်ငံတော်၏အတိုင်ပင်ခံပုဂ္ဂိုလ် ဧရာ၀တီတိုင်းဒေသကြီး ဓနုဖြူမြို့နယ်အတွင်းရှိ   ဒေသခံတောင်သူ လယ်သမားများနှင့်တွေ့ဆုံဆွေးနွေးပွဲတွင် ဒေသခံတောင်သူဦးကြီး တစ်ဦးက စပါးသီးနှံအခြေခံသတ်မှတ်ဈေးနှုန်းနှင့်စပ်လျဉ်း၍ ၎င်းတို့၏အခက်အခဲများကိုတင်ပြခဲ့ရာ၌     နိုင်ငံတော်၏အတိုင်ပင်ခံပုဂ္ဂိုလ်က "အခြေခံဈေးနှုန်း သတ်မှတ်ရေးဆိုတာ ဈေးကွက်အခြေအနေ၊ ထုတ်လုပ် မှုအနေအထား စတဲ့ အခြေခံအကြောင်းရင်းတွေကိုအခြေပြုပြီး ရေရှည် အားဖြင့် စဉ်ဆက်မပြတ် ပြောင်းလဲပြင်ဆင်သွားရမယ့် လုပ်ငန်းစဉ် တစ်ရပ်ဖြစ်တယ်ဆိုတာကို အလေးထားပြီးတိုက်တွန်းမှာကြားလိုပါ တယ်" ဟု ပြောကြားခဲ့သည်။

သီးနှံဈေးကွက်သည် ငွေကြေးဈေးကွက်ကဲ့သို့ နေ့စဉ်ပြောင်းလဲ နေသဖြင့် တစ်ရာသီပြီးလျှင် တစ်ရာသီ၊ တစ်နှစ်ပြီးလျှင်တစ်နှစ် ပြောင်း လဲသတ်မှတ် ကြေညာပေးနေရမည်သာ ဖြစ်သည်။ နိုင်ငံတကာတွင် စိုက်ပျိုးရာသီမတိုင်မီ ပြည်တွင်း၊ ပြည်ပဈေးကွက် အခြေအနေများအား လေ့လာသုံးသပ်ပြီး ကြိုတင်ကြေညာ ပေးလေ့ရှိသည်။ ကြေညာပေးသော အခြေခံစိုက်ပျိုးသီးနှံဈေးနှုန်းကိုလေ့လာပြီး စိုက်ပျိုးသူတောင်သူများက ၎င်းတို့တွက်ခြေကိုက်သော သီးနှံများကို ရွေးချယ်စိုက်ပျိုးလေ့ရှိသည်။

နိုင်ငံတော်၏အတိုင်ပင်ခံပုဂ္ဂိုလ်က တောင်သူလယ်သမားများ အကျိုးစီးပွားကိုရှေးရှု၍ သီးနှံအားလုံးအတွက် အခြေခံဈေးနှုန်း မသတ် မှတ်နိုင်သေးမီ တောင်သူလယ်သမားအများစု စိုက်ပျိုးနေကြသော မြေပဲ၊ နှမ်း၊ ပြောင်း၊ ကြံ စသည့် အဓိက စိုက်ပျိုးသီးနှံများကို အခြေခံဈေးနှုန်း သတ်မှတ်နိုင်ရန် အဆိုပါအခမ်းအနားတွင် အကြံပြုပေးထားသည်။ ဆန်စပါးနှင့်ပတ်သက်၍ ယမန်နှစ်အခြေခံဈေးနှုန်းကြေညာခဲ့ပြီးနောက် ကြုံတွေ့ရသော အားသာချက်၊ အားနည်းချက်များကို ပြန်လည်သုံးသပ်ပြီး ကဏ္ဍအလိုက် ဝိုင်းဝန်းအဖြေရှာ ဆောင်ရွက်ရမည် ဖြစ်သည်။ 

နိုင်ငံတော်အစိုးရအနေဖြင့် တောင်သူလယ်သမားများ၏ အကျိုး စီးပွား၊ နိုင်ငံ့အကျိုးစီးပွားတို့အတွက်  စိုက်ပျိုးရေးထွက်ကုန်များ ပြည်တွင်း၊ ပြည်ပဈေးကွက်ဝင်ရေးအတွက် အလေးထား၍ အစဉ်အမြဲကြိုးပမ်း ဆောင်ရွက်နေသည်။ နိုင်ငံအချင်းချင်း၊ အဖွဲ့အစည်းအချင်းချင်း ညှိနှိုင်း ဆောင်ရွက်ပေးနေသည်။ ဈေးမှန်ရရှိရေး၊ ဈေးကွက်ပွင့်လင်းရေး ချိတ်ဆက်ဆောင်ရွက်ပေးနေသည်။ ထိုသို့ဆောင်ရွက်ပေးသော်လည်း အခြေအနေအကြောင်းကြောင်းကြောင့် သီးနှံဈေးနှုန်းကျဆင်းပါက ဝယ်ယူရေး၊ သိုလှောင်ရေး အစီအစဉ်များကို အစိုးရနှင့် အဖွဲ့အစည်းများ ပူးပေါင်းဆောင်ရွက်နေသည်။

သို့ဖြစ်ရာ နိုင်ငံတော်၏အတိုင်ပင်ခံပုဂ္ဂိုလ် လမ်းညွှန်မှာကြားသည့် အတိုင်း တောင်သူလယ်သမားများ၊ ကျေးလက်နေပြည်သူများ အကျိုး စီးပွားကို ရှေးရှု၍ စိုက်ပျိုးသီးနှံအထွက်တိုးရေး၊ ဈေးကွက်ဝင်ရေးတို့ကို တစ်ရာသီတည်းအတွက်၊ တစ်နှစ်တည်းအတွက် မဟုတ်ဘဲ တစ်ရာသီပြီး တစ်ရာသီ၊ တစ်နှစ်ပြီးတစ်နှစ် စဉ်ဆက်မပြတ် အားလုံးဝိုင်းဝန်းပူးပေါင်း ဆောင်ရွက်သွားကြရမည်ဖြစ်ပါကြောင်း။         ။

မြန်မာ့အလင်း အယ်ဒီတာအာဘော်

စိုက်ပျိုးရေးထုတ်ကုန် တန်ဖိုးမြှင့်

စက်မှုလုပ်ငန်းများထူထောင်

====================

အိမ်နီးချင်းနိုင်ငံများမှထုတ်လုပ်သည့် စိုက်ပျိုးရေးအခြေခံစားသောက် ကုန်များ မိမိတို့၏ ပြည်တွင်းဈေးကွက်သို့ ဝင်ရောက်နေရာယူနေကြသည်။ ဆန်စပါး၊ ပဲ၊ ပြောင်း၊ ဆီထွက်သီးနှံများ၊ ဟင်းသီးဟင်းရွက်နှင့် သစ်သီး ၀လံများ စသည်တို့ကို မိမိတို့နိုင်ငံတွင် အမြောက်အမြား စိုက်ပျိုးထုတ်လုပ် နိုင်စွမ်းရှိပါလျက်နှင့် စားသောက်ကုန်(ကုန်ချော)များ ထုတ်လုပ်နိုင်မှု အားနည်းချက်ကြောင့်ဟု ယူဆမိသည်။

မိမိတို့က ဆန်တစ်မျိုးတည်းကိုသာ အဓိကထုတ်လုပ်နေချိန်တွင် ဆန်ကို အခြေပြု၍ အဆင်သင့်စားသုံးနိုင်သည့် ဆန်ပြုတ်၊ ဆန်ပြား၊ ဆန်ခေါက်ဆွဲ၊ ဆန်မှုန့်၊ ဆန်ကွတ်ကီး စသည့် စားသောက်ကုန်များ မိမိတို့ဈေးကွက်တွင်းသို့ ပြည်ပမှ ဝင်ရောက်နေသည်။ ဆီတွင်လည်း ထိုနည်းနှင်နှင်။ ပြည်တွင်းမှ မြေပဲဆီ၊ နှမ်းဆီကုန်အမှတ်တံဆိပ်များကို ပြည်ပမှဝင်ရောက်လာသည့် ဟင်းရွက်ဆီ၊ နေကြာဆီ၊ ပဲပိစပ်ဆီ၊ ပြောင်းဖူးဆီ စသည်ဖြင့် ကုန်အမှတ် တံဆိပ်မျိုးစုံ၊ ရွေးချယ်စရာအမယ်မျိုးစုံတို့က ဝန်းရံထားကြသည်။ အရည် အသွေး၊ ထုပ်ပိုးမှု၊ ဈေးနှုန်းနှင့် အစားအသောက်လုံခြုံဘေးကင်းမှု အာမခံချက်စသည်ဖြင့် ဝယ်ယူစားသုံးမည့်သူတို့ကို ဆွဲဆောင်နိုင်စွမ်း ရှိကြသည်။

မိမိတို့နိုင်ငံသည် စိုက်ပျိုးရေးအခြေခံသော စက်မှုနိုင်ငံအဖြစ် ဖော်ဆောင်မည်ဟူသော ရည်မှန်းချက်ထားရှိသည့် နိုင်ငံဖြစ်သည်။ အမှန်တကယ်လုပ်ကိုင်မည်ဆိုပါက မြေယာများရှိသည်။ လုပ်သားလည်း ပေါသည်။ ပြည်တွင်း ပြည်ပဈေးကွက်များကလည်း အဆင်သင့်ရှိသည်။ ပြည်တွင်းစက်မှုလုပ်ငန်းများ၏ ၆၀ ရာခိုင်နှုန်းမှာ စားသောက်ကုန် ထုတ်လုပ်နေကြခြင်းဖြစ်ပြီး စားသောက်ကုန်ထုတ်လုပ်ငန်း၏ ၉၀ ရာခိုင် နှုန်းခန့်မှာ အသေးစားနှင့်အလတ်စားလုပ်ငန်းများ ဖြစ်ကြသည်ဟုဆိုသည်။ ရင်းနှီးမြှုပ်နှံမှုနှင့် နည်းပညာအားနည်းချက်တို့ကြောင့် ပြည်တွင်း စားသောက်ကုန်များစွာတို့မှာ အရည်အသွေးများစွာ နိမ့်ကျနေကြပြီး အစားအစာ ဘေးကင်းလုံခြုံမှုအတွက် အာမခံချက်မပေးနိုင်ကြ။ ထုပ်ပိုးမှု အားနည်းချက်များ ရှိနေကြသည်။ ပြည်ပဈေးကွက်သို့ ထိုးဖောက်နိုင်ရန် မှာလည်း သတ်မှတ်စံချိန်စံòန်းများ မမီ။ စံချိန်စံòန်းမီသည့် ကုန်ပစ္စည်း များမှာလည်း ပြည်ပဈေးကွက်မှ တောင်းဆိုသည့်ပမာဏကို မဖြည့်ဆည်း နိုင်။ ဈေးကွက်က တောင်းဆိုသည့် ပမာဏ အမြောက်အမြားကို ဖြည့်ဆည်းကြသည့်အခါတွင်လည်း အရေအတွက်များလာသည်နှင့်အမျှ အရည်အသွေးတို့ လျော့ကျလာရသည်ဟု ဆိုသည်။ ယင်းအခြေအနေတို့မှာ စိုက်ပျိုးရေးထွက်ကုန် (ကုန်ကြမ်း) တို့ကို တန်ဖိုးမြှင့်ထုတ်လုပ်နိုင်မည့် စက်မှုအခြေခံ အားနည်းချက်နှင့်လည်း ဆက်စပ်နေသည်။

မကြာသေးမီ ရက်ပိုင်းအတွင်းက ဂျပန်နှင့် မြန်မာ စီးပွားရေး အဖွဲ့အစည်း နှစ်ခုတို့က မြန်မာနိုင်ငံမှထွက်သည့် စိုက်ပျိုးရေးထုတ်ကုန် များကို အခြေခံပြီး တန်ဖိုးမြှင့်စားသောက်ကုန်များ ထုတ်လုပ်မည့် စက်မှုဇုန်တစ်ခုကို ထူထောင်သွားရန် နားလည်မှုစာချွန်လွှာတစ်ရပ်ကို လက်မှတ်ရေးထိုးလိုက်ကြသည်။ အဆိုပါ စက်မှုဇုန်ကို ဒေါ်လာသန်း ၁၅၀ အထိ ရင်းနှီးမြှုပ်နှံကာ ရန်ကုန်တွင် ဖော်ဆောင်သွားမည်ဟုလည်းဆိုသည်။ ယင်းကဲ့သို့သော စက်မှုဇုန်များ ထူထောင်ခြင်းအားဖြင့် ပြည်တွင်းမှ စိုက်ပျိုးထုတ်လုပ်သူ တောင်သူများအတွက် ကုန်ကြမ်းဈေးကွက်များ ဖြစ်ပေါ်လာမည်ဖြစ်သလို လူငယ်များအတွက် အလုပ်အကိုင်အခွင့်အလမ်း များလည်း ထပ်မံပေါ်ပေါက်လာနိုင်မည်ဟု ရှုမြင်မိသည်။

စိုက်ပျိုးရေးစားသောက်ကုန်တန်ဖိုးမြှင့်ထုတ်လုပ်မှုများမှာ ရန်ကုန် တွင်သာမက အခြေခံအဆောက်အအုံ၊ လျှပ်စစ်၊ ရေ၊ မီး၊ လမ်းတံတား ဆက်သွယ်ရေးတို့ ပြည့်စုံပြီး လုပ်သားအင်အား အလွယ်တကူရရှိနိုင်သည့် မြန်မာနိုင်ငံအတွင်းရှိ ဒေသအနှံ့အပြားတို့တွင် ထူထောင်နိုင်သည်နှင့်အမျှ နိုင်ငံစီးပွားကို ကြီးမားစွာ အထောက်အကူပြု မြှင့်တင်နိုင်မည်ဟု ယုံကြည် မိပါကြောင်း။ ။

၂၀၁၈-၂၀၁၉ ဘဏ္ဍာနှစ် မေ ၃၁ ရက်အထိ ကုန်သွယ်မှုပမာဏ အမေရိကန်ဒေါ်လာ (၂၃ ဒသမ ၄၉၀)ဘီလီယံအထိရရှိ ယခင်နှစ် အလားတူကာလထက် အမေရိကန်ဒေါ်လာ (သုည ဒသမ ၄၆၄)ဘီလီယံ ပိုမိုဆောင်ရွက်နိုင်ခဲ့

ရန်ကုန် ဇွန် ၂၉

မြန်မာ့စီးပွားရေးလုပ်ငန်းရှင်များနှင့် (၂၈)ကြိမ်မြောက် လစဉ်ပုံမှန်တွေ့ဆုံ ဆွေးနွေးပွဲကို ယနေ့ နံနက် ၉ နာရီက ရန်ကုန်မြို့ လမ်းမတော်မြို့နယ် မင်းရဲကျော်စွာ လမ်းရှိ ပြည်ထောင်စုသမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင် များ အသင်းချုပ် (UMFCCI) အစည်းအဝေးခန်းမ၌ ကျင်းပရာ ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီဥက္ကဋ္ဌ ဒုတိယသမ္မတ ဦးမြင့်ဆွေ တက်ရောက်အမှာစကား ပြောကြားသည်။

ဆွေးနွေးပွဲသို့ ပုဂ္ဂလိကကဏ္ဍဖွံ့ဖြိုးတိုးတက်ရေးကော်မတီ ဒုတိယဥက္ကဋ္ဌ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာ သန်းမြင့်၊ စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်း၊ ရင်းနှီး မြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသောင်းထွန်း၊ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ ဒုတိယဝန်ကြီးများ ဖြစ်ကြသည့် ဦးအောင်ထူး၊ ဦးဝင်းမော်ထွန်းနှင့် ဦးမောင်မောင်ဝင်း၊ ရန်ကုန် တိုင်းဒေသကြီး ဝန်ကြီးများ၊ ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် ဥက္ကဋ္ဌ၊ ဒုတိယဥက္ကဋ္ဌများနှင့် ဗဟိုအလုပ် အမှုဆောင်အဖွဲ့ဝင်များ၊ ရှမ်းပြည်နယ်၊ ပလောင် ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ဥက္ကဋ္ဌ၊ လုပ်ငန်းကော်မတီ (၅)ရပ်မှ တာဝန်ရှိသူများ၊ ဌာနဆိုင်ရာ အကြီးအကဲများ၊ မြန်မာနိုင်ငံငါးလုပ်ငန်း အဖွဲ့ချုပ်၊ မြန်မာနိုင်ငံ မြေဩဇာ၊ မျိုးစေ့ နှင့် စိုက်ပျိုးရေး ဆေးလုပ်ငန်းရှင်များ အသင်းတို့မှ တာဝန်ရှိသူများနှင့် ဌာန ဆိုင်ရာ တာဝန်ရှိသူများ တက်ရောက် ကြသည်။

အခက်အခဲများ ဖြေရှင်းပေး

ရှေးဦးစွာ ဒုတိယသမ္မတ ဦးမြင့်ဆွေ က အမှာစကား ပြောကြားရာတွင် ပုဂ္ဂလိက ကဏ္ဍ ဖွံ့ဖြိုးတိုးတက်ရေး မူဘောင်ပါကိစ္စရပ်များကို ပိုမိုထိရောက် စွာ အကောင်အထည် ဖော်ဆောင်ရွက် နိုင်စေရန်အတွက် ပုဂ္ဂလိကကဏ္ဍ ဖွံ့ဖြိုး တိုးတက်ရေးကော်မတီကို ဖွဲ့စည်း ပြီးနောက် ပုဂ္ဂလိကစီးပွားရေးလုပ်ငန်းရှင် များ၏ အခက်အခဲများကို ပြည်ထောင်စု သမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် ရုံး၌ ၂၀၁၆ ခုနှစ် ဒီဇင်ဘာလမှ စတင်ပြီး တွေ့ဆုံဖြေရှင်း ဆောင်ရွက်ပေးလျက်ရှိရာ ယခု တွေ့ဆုံပွဲသည် (၂၈)ကြိမ်မြောက် ဖြစ်ပါကြောင်း၊ ပြီးခဲ့သည့် (၂၇)ကြိမ် မြောက်တွေ့ဆုံ ဆွေးနွေးပွဲအထိ စီးပွား ရေးလုပ်ငန်းရှင်များ၏ အခက်အခဲ အကြံပြုတင်ပြချက် စုစုပေါင်း ၃၄၉ ချက် ကို ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်း ရှင်များ အသင်းချုပ်မှတစ်ဆင့် သက်ဆိုင် ရာ စီးပွားရေးလုပ်ငန်းရှင်များထံသို့ အကြောင်းပြန်ကြားပေးခဲ့ပြီး ဖြစ်ပါ ကြောင်း၊ အဆိုပါ ပြန်ကြားချက်များတွင် လုံး၀ပြီးပြတ်အောင် ဆောင်ရွက်ပေးနိုင် ခဲ့သည်များရှိသကဲ့သို့ အချို့အချက်များ သည် အချိန်ယူ၍ ဆက်လက်ဆောင်ရွက် ပေးရမည့်လုပ်ငန်းများ ဖြစ်ပါကြောင်း။

ပြီးပြတ်သည်အထိ ဆောင်ရွက်ပေး

တချို့ဆက်လက် ဖြေရှင်း ဆောင်ရွက်ပေးရမည့် လုပ်ငန်းများကို လည်း လုပ်ငန်းကော်မတီ (၅)ရပ်မှ တာဝန်ရှိသူများအနေဖြင့် သက်ဆိုင် သည့် ဝန်ကြီးဌာနများနှင့် ပုဂ္ဂလိက စီးပွားရေးလုပ်ငန်းရှင်များ တွေ့ဆုံ၍ ဆွေးနွေးပွဲ (Public-Private Dialo-gue) များ ပြုလုပ်၍ ပြီးပြတ်သည်အထိ အဆင့်ဆင့် ဖြေရှင်းဆောင်ရွက်ပေးလျက် ရှိပါကြောင်း။

နိုင်ငံတော်၏ စီးပွားရေး ဖွံ့ဖြိုး တိုးတက်အောင် ဆောင်ရွက်သည့် နေရာ တွင် ကုန်သွယ်ရေးကဏ္ဍသည် အရေးကြီး သောအခန်းကဏ္ဍတွင် တည်ရှိပြီး နှစ်စဉ် ကုန်သွယ်မှုပမာဏ တိုးတက်အောင် အစိုးရနှင့် ပုဂ္ဂလိကကဏ္ဍများမှ တက်ညီ လက်ညီ ပူးပေါင်းဆောင်ရွက်လျက်ရှိ သည့်အတွက် ၂၀၁၈-၂၀၁၉ ဘဏ္ဍာနှစ် မေ ၃၁ ရက်အထိ ကုန်သွယ်မှုပမာဏသည် အမေရိကန်ဒေါ်လာ (၂၃ ဒသမ ၄၉၀) ဘီလီယံအထိရရှိခဲ့ပြီး ယခင်နှစ်အလားတူ ကာလထက် အမေရိကန်ဒေါ်လာ (သုည ဒသမ ၄၆၄)ဘီလီယံ ပိုမိုဆောင်ရွက် နိုင်ခဲ့ပါကြောင်း၊ အဆိုပါကုန်သွယ်မှု ပမာဏတွင် ပုဂ္ဂလိကကဏ္ဍအနေဖြင့် အမေရိကန်ဒေါ်လာ (၁၉ ဒသမ ၅၀၁)ဘီလီယံပါဝင်သည့်အတွက် ၈၃ ရာခိုင် နှုန်းအထိ ဆောင်ရွက်နိုင်သည်ကို တွေ့ရှိရ ပါကြောင်း။

ဆုငွေချီးမြှင့်မှုများ တိုးမြှင့်ထား

နယ်စပ်ဒေသများမှ တရားမဝင် ကုန်ပစ္စည်းများ ဝင်ရောက်လာမှုကြောင့် အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ရပ်တည်ရန် ခက်ခဲလာနိုင်သည့်အတွက် တိုင်းဒေသ ကြီးနှင့် ပြည်နယ် ကိုးခုတွင် တရားမဝင် ကုန်ပစ္စည်းများကို တားဆီးထိန်းချုပ် နိုင်ရေးအတွက် အထူးအဖွဲ့များဖွဲ့စည်း ပြီး ဖမ်းဆီးအရေးယူလျက်ရှိပါကြောင်း၊ ၂၀၁၉ ခုနှစ်၊ မေလအထိ ဖမ်းဆီးအရေးယူ မှု ၅၉၄ ကြိမ်၊ ခန့်မှန်းတန်ဖိုးငွေကျပ်ကျပ် (၁၀ ဒသမ ၃၇၁) ဘီလီယံ ဖမ်းဆီးနိုင် ခဲ့ပါကြောင်း၊ နိုင်ငံတော်အစိုးရအနေဖြင့် လည်း တရားမဝင်ကုန်စ္စည်းများ ကို တားဆီးထိန်းချုပ်နိုင်ရန်အတွက် ပြည်ထောင်စုဝန်ကြီးဌာနများ၊ ပူးပေါင်း စစ်ဆေးရေးအဖွဲ့ စခန်းများမှ ဖမ်းဆီး ကုန်ပစ္စည်းများကို ပြည်သှူဘဏ္ဍာအဖြစ် သိမ်းဆည်းပြီး ထုခွဲရောင်းချရရှိ ငွေ အပေါ်တွင် ပြည်ထောင်စု ဘဏ္ဍာရန်ပုံ ငွေသို့ ၅၀ ရာခိုင်နှုန်း၊ သတင်းပေးသူအား ၂၀ ရာခိုင်နှုန်း၊ ရှာဖွေဖမ်းဆီးသည့်အဖွဲ့ အစည်းများအား ၃၀ ရာခိုင်နှုန်းဖြင့် လည်းကောင်း၊ တိုင်းဒေသကြီး (သို့မဟုတ်) ပြည်နယ်အစိုးရအဖွဲ့၏ အစီအစဉ်ဖြင့် ဖမ်းဆီးရမိသည့် ကုန်ပစ္စည်းများအနေဖြင့် တိုင်းဒေသကြီး (သို့မဟုတ်) ပြည်နယ်ဘဏ္ဍာရန်ပုံငွေသို့ ၃၀ ရာခိုင်နှုန်း၊ ပြည်ထောင်စု ဘဏ္ဍာ ရန်ပုံငွေသို့ ၂၀ ရာခိုင်နှုန်း၊ သတင်းပေးသူ အား ၂၀ ရာခိုင်နှုန်း၊ ရှာဖွေဖမ်းဆီးသည့် အဖွဲ့အစည်းများအား ၃၀ ရာခိုင်နှုန်းဖြင့် လည်းကောင်း ဆုငွေချီးမြှင့်မှုများကို ခေတ်နှင့်လျော်ညီစွာ တိုးမြှင့်ထား ပါကြောင်း။

ပြည်ပရင်းနှီးမြှုပ်နှံမှုဖိတ်ခေါ်

မြန်မာနိုင်ငံသား ရင်းနှီးမြှုပ်နှံမှု ကဏ္ဍတွင် ပြည်တွင်းလုပ်ငန်းရှင်များ အနေဖြင့် ရေရှည်တည်တံ့ပြီး တိုးတက်ရန် ဆိုလျှင် ပြည်တွင်းဈေးကွက်တွင်သာမက ပြည်ပ ဈေးကွက်များသို့ပါ ဈေးကွက် အသစ်ရှာဖွေရန် လိုပါကြောင်း၊ Iညအနမ-ညအေငသညalငဖန လုပ်ရန် လိုပါကြောင်း၊ ယခုဆိုလျှင် မြန်မာနိုင်ငံတွင် အခြားနိုင်ငံ များက လာရောက်ရင်းနှီးမြှုပ်နှံခြင်း များရှိပြီး မိမိလုပ်ငန်းရှင်များအနေဖြင့် လည်း အခြားနိုင်ငံများကို သွားရောက် လုပ်ကိုင်ရန် တိုက်တွန်းလိုပါကြောင်း၊ မိမိတို့အစိုးရအနေဖြင့် တရုတ်နိုင်ငံ၊ စင်ကာပူနိုင်ငံ၊ ထိုင်းနိုင်ငံ၊ ဟောင်ကောင်၊ ဘယ်လ်ဂျီယံနိုင်ငံ၊ အမေရိကန်နိုင်ငံ၊ တောင်ကိုရီးယားနိုင်ငံ၊ ဂျပန်နိုင်ငံ၊ အိန္ဒိယ နိုင်ငံစသည့် နိုင်ငံကိုးနိုင်ငံတွင် စီးပွားရေး သံမှူးများကို စေလွှတ်တာဝန်ပေးအပ် ထားပါကြောင်း၊ လုပ်ငန်းရှင်များအနေဖြင့် ပြည်ပတွင် ရင်းနှီးမြှုပ်နှံမှု လုပ်ငန်းများ ကို ဆောင်ရွက်နိုင်ရန်အတွက် စီးပွားရေး သံမှူးများနှင့် ချိတ်ဆက်ဆောင်ရွက် နိုင်သလို သတင်းအချက်အလက်များ ရယူလိုပါကလည်း စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနက တစ်ဆင့်ဆက်သွယ်ရယူနိုင်ပါကြောင်း။

မြန်မာနိုင်ငံ၏ စီးပွားရေးဖွံ့ဖြိုးမှု သည် ၂၀၁၉ ခုနှစ်နှင့် ၂၀၂၀ ပြည့်နှစ် တို့တွင် တိုးတက်နိုင်မည်ဟု ကမ္ဘာ့ ဘဏ် နှင့် အာရှဖွံ့ဖြိုးရေးဘဏ်တို့က ခန့်မှန်း ထားသည်ကို အားလုံးအသိပင်ဖြစ်ပါ ကြောင်း၊ နိုင်ငံဖွံ့ဖြိုးတိုးတက်ရန် တစ်ဖက် ကနေ ပြည်ပရင်းနှီးမြှုပ်နှံမှု လုပ်ငန်းများ ကို ဖိတ်ခေါ်ရန် ကြိုးစားနေသကဲ့ သို့ ပြည်တွင်းလုပ်ငန်းရှင်များအတွက် လုပ်ငန်းလုပ်ကိုင်ရာတွင် အဆင်ပြေစေ ရေးကို ဦးတည်ချက်ထားကာ ကြိုးစား ဆောင်ရွက်နေပါကြောင်း၊ အစိုးရ၏ ဝန်ဆောင်မှုများကို အများပြည်သူများ သိရှိစေရန်နှင့် ပွင့်လင်းမြင်သာမှု ရှိစေရန် တို့အတွက် အားလုံးပါဝင်လာနိုင်အောင် ဆောင်ရွက်ကြရမည် ဖြစ်ပါကြောင်း။

အခက်အခဲများ ဆွေးနွေးတင်ပြ

ယနေ့ဆွေးနွေးပွဲတွင် ပါဝင်ဆွေးနွေး မည့် အသင်းအဖွဲ့များအနေဖြင့်ဆွေးနွေး မည့်ကဏ္ဍများနှင့် သက်ဆိုင်သည့် ပြည်ထောင်စုဝန်ကြီးများ၊ ဒုတိယဝန်ကြီး များနှင့် တာဝန်ရှိသူများ တက်ရောက် လာကြသည့်အတွက်မိမိတို့ အသင်းအဖွဲ့ များ၏ တွေ့ကြုံနေရသော အခက်အခဲ များကို ပွင့်ပွင့်လင်းလင်းဆွေးနွေးတင်ပြ ကြစေလိုပါကြောင်း ပြောကြားသည်။

ထို့နောက် စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန ပြည်ထောင်စု ဝန်ကြီး ဒေါက်တာသန်းမြင့်က လက်ရှိ မြန်မာနိုင်ငံ၏ ကုန်သွယ်မှုအခြေအနေ များနှင့် စပ်လျဉ်း၍ လည်းကောင်း၊ ပို့ကုန် များ ပိုမိုတင်ပို့နိုင်ရေးနှင့် တရားမဝင် ကုန်သွယ်မှုများ တားဆီးထိန်းချုပ်နိုင် ရေးအတွက် စီစဉ်ဆောင်ရွက်ထားရှိမှု အခြေအနေများနှင့် စပ်လျဉ်း၍ လည်းကောင်း ရှင်းလင်းပြောကြားသည်။

ယင်းနောက် စီမံကိန်းနှင့် ဘဏ္ဍာ ရေးဝန်ကြီဌာန ပြည်ထောင်စုဝန်ကြီး ဦးစိုးဝင်းက ပုဂ္ဂလိကကဏ္ဍဖွံ့ဖြိုးတိုးတက် ရေးအတွက် စီးပွားရေးဝန်းကျင်ကောင်း များ ဖန်တီးပေးမှု အခြေအနေ၊ စိုက်ပျိုး ရေးနှင့် မွေးမြူရေးကဏ္ဍများအတွက် ချေးငွေများ ထုတ်ချေးထားရှိမှု အခြေ အနေ၊ Project Bank ဆိုင်ရာလုပ်ငန်း များကို အောင်မြင်စွာ အကောင်အထည် ဖော် ဆောင်ရွက်နိုင်ရန်အတွက် Public Private Partnership Center (PPPCenter) ဖွင့်လှစ်ဆောင်ရွက် ထားရှိမှု အခြေအနေများနှင့် စပ်လျဉ်း၍ ရှင်းလင်းပြောကြားသည်။

ယင်းနောက် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီး ဌာန ပြည်ထောင်စုဝန်ကြီး ဦးသောင်း ထွန်းက ရင်းနှီးမြှုပ်နှံသူများအတွက် အကျိုးရှိသည့် စီးပွားရေးဝန်းကျင်ကောင်း များကို ဖန်တီးပေးနိုင်ရန်အတွက် Cor-porate Governance စီစဉ် ဆောင်ရွက်ထားရှိမှု အခြေအနေများ၊ ရင်းနှီးမြှုပ်နှံမှု အခြေအနေများနှင့် စပ်လျဉ်း၍ ရှင်းလင်း ပြောကြားသည်။

ထို့နောက် ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း က တိုင်းဒေသ ကြီးအတွင်း စိုက်ပျိုးရေးနှင့် မွေးမြူ ရေးကဏ္ဍများ တိုးတက်ရေးအတွက် စီစဉ် ဆောင်ရွက်ထားရှိမှုအခြေအနေများနှင့် ပို့ကုန်များ ပိုမိုတင်ပို့နိုင်ရေးအတွက် စီမံဆောင်ရွက်ထားရှိမှု အခြေအနေများ နှင့် စပ်လျဉ်း၍ ရှင်းလင်းပြောကြားသည်။

ယင်းနောက် ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှု လက်မှုလုပ်ငန်းရှင်များအသင်းချုပ် ဥက္ကဋ္ဌ ဦးဇော်မင်းဝင်းက ယခင်အစည်းအဝေး ဆုံးဖြတ်ချက်များအပေါ် အကောင် အထည်ဖော် ဆောင်ရွက်နေမှု အခြေ အနေ၊ ပုဂ္ဂလိကကဏ္ဍ ဖွံ့ဖြိုးတိုးတက်ရေး အတွက် အစိုးရနှင့် ပုဂ္ဂလိကပူးပေါင်း ဆောင်ရွက်သွားမည့် ဆွေးနွေးပွဲများ၊ ပို့ကုန်မြှင့်တင်ရေးဆိုင်ရာ ကိစ္စရပ်များနှင့် ကဏ္ဍအလိုက် လုပ်ငန်းဆောင်ရွက်မှု အခြေအနေများကို ရှင်းလင်းတင်ပြသည်။

ထို့နောက် မြန်မာနိုင်ငံငါးလုပ်ငန်း အဖွဲ့ချုပ်မှ ဒုတိယဥက္ကဋ္ဌ ဒေါက်တာ ဒေါ်တိုးနန္ဒာတင်နှင့် အထွေထွေ အတွင်း ရေးမှူး ဦးဝင်းကြိုင်၊ မြန်မာနိုင်ငံမြေဩဇာ၊ မျိုးစေ့နှင့် စိုက်ပျိုးရေး ဆေးလုပ်ငန်းရှင် များအသင်းမှ တွဲဖက်အတွင်းရေးမှူး ဦးမောင်မောင်ခိုင်၊ ရှမ်းပြည်နယ် ပလောင်ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ဥက္ကဋ္ဌ ဦးဝင်းကျော်နှင့် ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ဒုတိယဥက္ကဋ္ဌ ဦးရဲမင်း အောင်တို့က သက်ဆိုင်ရာလုပ်ငန်းကဏ္ဍများအလိုက် ကြုံတွေ့နေရသည့် အခက် အခဲများနှင့် အကြံပြုချက်များကို ရှင်းလင်းဆွေးနွေးတင်ပြကြသည်။

အကြံပြုချက်များနှင့် စပ်လျဉ်း၍ ဒုတိယသမ္မတ၊ ပြည်ထောင်စုဝန်ကြီးများ၊ ရန်ကုန်တိုင်းဒေသကြီး ဝန်ကြီးချုပ်၊ ဒုတိယဝန်ကြီးများနှင့် တာဝန်ရှိသူများက ပေါင်းစပ်ညှိနှိုင်းဖြေရှင်းပေးသည်။

ယင်းနောက် ဒုတိယသမ္မတက နိဂုံးချုပ် အမှာစကားပြောကြားပြီး တွေ့ဆုံပွဲ အခမ်းအနားကို ရုပ်သိမ်းလိုက်သည်။

သတင်းစဉ်

လက်နက်ကိုင်အဖွဲ့အစည်းများအားလုံး ငြိမ်းချမ်းရေးညီလာခံစားပွဲဝိုင်းတွင် ပါဝင်လာရေး နိုင်ငံတော်အစိုးရက တံခါးအမြဲဖွင့်လှစ်ထား

ပြည်ထောင်စုသမ္မတမြန်မာနိုင်ငံတော်

အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန ဥက္ကဋ္ဌ ဒေါ်အောင်ဆန်းစုကြည်ထံမှ အထူးဒေသ(၄) မိုင်းလားတွင် ကျင်းပသော အထိမ်းအမှတ်ပွဲတော်သို့ ပေးပို့သည့် သဝဏ်လွှာ

(၂၀၁၉ ခုနှစ်၊ ဇွန်လ ၃၀ ရက်)

(၁၃၈၁ ခုနှစ်၊ နယုန်လပြည့်ကျော် ၁၃ ရက်)

 

 

မြန်မာသက္ကရာဇ် ၁၃၈၁ ခုနှစ်၊ နယုန်လပြည့်ကျော် ၁၃ ရက်၊ ခရစ်သက္ကရာဇ် ၂၀၁၉ ခုနှစ်၊ ဇွန်လ ၃၀ ရက်နေ့၌ အထူးဒေသ(၄)၊ မိုင်းလားတွင် ကျင်းပသော အထိမ်းအမှတ်မင်္ဂလာအခါသမယတွင် အထူးဒေသ(၄)၊ မိုင်းလားခေါင်းဆောင်များနှင့်တကွ တိုင်းရင်းသားညီအစ်ကိုမောင်နှမ မိသားစုများအားလုံး ကိုယ်စိတ်နှစ်ဖြာကျန်းမာရွှင်လန်းပါစေကြောင်း ဦးစွာနှုတ်ခွန်းဆက်သ အပ်ပါသည်။

လွန်ခဲ့သော နှစ်(၃၀)ကစတင်၍ ယနေ့အချိန်ထိ အထူးဒေသ(၄)၊ မိုင်းလားအနေဖြင့် နိုင်ငံတော်အစိုးရနှင့် လက်တွဲကာ ငြိမ်းချမ်းရေးလမ်းစဉ်ဖြင့် ပစ်ခတ်တိုက်ခိုက်မှုရပ်စဲပြီး နှစ်ဦးနှစ်ဖက်အပြန်အလှန်လေးစားစောင့်ထိန်းကာ တည်ငြိမ်အေးချမ်းမှုကို ရရှိထားပြီးဖြစ်ပါသည်။ ယခုအခါတည်ငြိမ်အေးချမ်းမှုကြောင့် ရရှိလာသည့် ဒေသဖွံ့ဖြိုးတိုးတက်မှုအသီးအပွင့်များကို အထူး ဒေသ(၄)၊ မိုင်းလားအတွင်းရှိ တိုင်းရင်းသားပြည်သူများခံစားနေရသည်ကို မြင်တွေ့ရ၍ ဝမ်းမြောက်ပါသည်။ အထူးဒေသ(၄)၊ မိုင်းလားခေါင်းဆောင်များနှင့် တိုင်းရင်းသားပြည်သူတို့၏ ငြိမ်းချမ်းရေးနှင့် ဒေသဖွံ့ဖြိုးရေးအပေါ် ထားရှိသည့် စိတ်ရင်းစေတနာ အမှန်ကို မြင်တွေ့ရ၍လည်း ဝမ်းမြောက်ပါသည်။

ဒီမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့် အခွင့်အရေးများ အာမခံချက်များ အပြည့်အဝရှိသော ဒီမိုကရေစီဖက်ဒရယ်ပြည်ထောင်စုကို တည်ဆောက်ရာတွင်ရရှိထားသည့် တည်ငြိမ်အေးချမ်းမှုကို ရေရှည်ခိုင်ခိုင်မာမာ ထိန်းသိမ်းထားနိုင်ပြီး တိုင်းရင်းသားများ၏ အခွင့်အရေးများ၊ လိုလားချက်များကို ဖော်ဆောင်ပေးနိုင်မည့် အမျိုးသားအဆင့် နိုင်ငံရေးဆွေးနွေးပွဲများ ကျင်းပရန် လိုအပ်ပါသည်။ ထိုသို့သော အမျိုးသားအဆင့် နိုင်ငံရေးဆွေးနွေးပွဲများအား တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (Nationwide Ceasefire Agreement-NCA) ပါ ပြန်ဋ္ဌာန်းချက်များနှင့် အညီ ကျင်းပလျက်ရှိသဖြင့် အထူးဒေသ(၄)၊ မိုင်းလားအနေဖြင့် NCA တွင် ပါဝင်လက်မှတ်ရေးထိုးပြီး နိုင်ငံရေးဆွေးနွေးပွဲ ရလဒ်များနှင့်အညီ ဒီမိုကရေစီဖက်ဒရယ်ပြည်ထောင်စုကို အတူတကွဖော်ဆောင်ရန် ဖိတ်ခေါ်ပါသည်။ အထူးဒေသ(၄)၊ မိုင်းလား ဒေသခံတိုင်းရင်းသားပြည်သူများ၏ ရင်တွင်းစကားသံများ၊ သဘောထားအမြင်များကို အမျိုးသားအဆင့်နိုင်ငံရေး ဆွေးနွေးပွဲများမှတစ်ဆင့် ပြည်ထောင်စုငြိမ်းချမ်းရေးညီလာခံ-(၂၁)ရာစု ပင်လုံအစည်းအဝေးများတွင် ဖက်ဒရယ်အခြေခံမူ များအဖြစ် ရရှိအောင်ကြိုးပမ်းရန် အချိန်ရောက်ပါပြီ။ အထူးဒေသ(၄)၊ မိုင်းလားအပါအဝင် ကျန်ရှိနေသည့် တိုင်းရင်းသား လက်နက်ကိုင်အဖွဲ့အစည်းများအားလုံး ငြိမ်းချမ်းရေးညီလာခံစားပွဲဝိုင်းတွင် ပါဝင်လာရေး နိုင်ငံတော်အစိုးရက တံခါးအမြဲ ဖွင့်လှစ်ထားပါသည်။ နှစ်ဦးနှစ်ဖက် အပြန်အလှန်စောင့်ထိန်းမှုဖြင့် လက်ရှိတည်ဆောက်ထားသော ပစ်ခတ်တိုက်ခိုက်မှုရပ်စဲရေး သဘောတူညီချက်အဆင့်မှ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ်အဆင့်သို့ တက်လှမ်းကာ စစ်မှန်ပြီး ရေရှည်တည်တံ့ခိုင်မြဲသော ထာ၀ရငြိမ်းချမ်းရေးတည်ဆောက်ရန် အလေးအနက်ထား တိုက်တွန်းလိုပါသည်။

နိဂုံးချုပ်အနေဖြင့် အထူးဒေသ(၄)၊ မိုင်းလားခေါင်းဆောင်များနှင့်တကွ တိုင်းရင်းသားညီအစ်ကိုမောင်နှမများအားလုံး အိပ်မက်ဖြစ်သော စစ်မှန်သည့် ငြိမ်းချမ်းရေးနှင့် ဒီမိုကရေစီဖက်ဒရယ်ပြည်ထောင်စုတည်ဆောက်ရေးအတွက် ပူးပေါင်းပါဝင် ကြိုးပမ်းဆောင်ရွက်ပေးကြပါရန် အလေးအနက်ဆန္ဒပြုတိုက်တွန်းရင်း ဤသဝဏ်လွှာကို ပေးပို့အပ်ပါသည်။

အထူးဒေသ(၄)၊ မိုင်းလားအတွင်းရှိ တိုင်းရင်းသားပြည်သူအားလုံး ကိုယ်စိတ်နှစ်ဖြာ ကျန်းမာချမ်းသာစွာဖြင့် ငြိမ်းချမ်း သာယာကြပါစေကြောင်း ဆုတောင်းမေတ္တာ ပို့သအပ်ပါသည်။

အောင်ဆန်းစုကြည်

ဥက္ကဋ္ဌ

အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန

မြန်မာ့အလင်း အယ်ဒီတာအာဘော်

ဘေးအန္တရာယ် ကင်း၍ အာဟာရပြည့်၀သည့်

စားနပ်ရိက္ခာသီးနှံများ စိုက်ပျိုးထုတ်လုပ်

========================

ကမ္ဘာ့ လူဦးရေ တိုးတက်များပြားလာသည်နှင့်အမျှ စားနပ်ရိက္ခာပိုမိုလိုအပ် လာခြင်း၊ စိုက်ပျိုးမြေဧရိယာနှင့် သဘာ၀အရင်းအမြစ်များ လျော့နည်း ရှားပါးလာခြင်း စသည့် အရင်းခံအကြောင်းတရားများကြောင့် သီးနှံများ စိုက်ပျိုးထုတ်လုပ်ရာတွင် ဓာတ်မြေဩဇာနှင့် အခြားဓာတုဆေးဝါးများကို အဓိကအားထားသုံးစွဲလာခြင်း၊ သီးနှံများ၊ သစ်သီး၀လံများကို မျိုးဗီဇ ပြုပြင်မှုများပြုလုပ်ခြင်း စသည်တို့ကို ပြုလုပ်ခဲ့ကြသည်။ တစ်ဖက်တွင် အထွက်နှုန်းများ မယုံကြည်နိုင်လောက်စရာ တိုးတက်ခဲ့ကြသလို သစ်သီး ၀လံ၊ သီးနှံတို့၏ အရောင်အသွေးနှင့် အရွယ်အစားတို့မှာလည်း ဈေးကွက် တွင် ရောင်းပန်းလှသည့်အသွေးအမွေးနှင့် ပမာဏတို့ကို ထုတ်လုပ်နိုင်ခဲ့ ကြသည်။

ခေတ်မီဓာတ်မြေဩဇာ၊ ဓာတုဆေးဝါး၊ မျိုးဗီဇနည်းဖြင့် ပြုပြင် ထုတ်လုပ်ထားသည့် သီးနှံများနှင့် သစ်သီး၀လံများကို ကာလတစ်ရပ်ထိ ရောင်းဝယ်စားသုံးခဲ့ကြပြီးသည့်နောက်တွင်မူ ယင်းအစားအစာများကို စားသုံးခြင်းနှင့်စပ်လျဉ်း၍ ဘေးအ္တရာယ်ကင်းရှင်းမှုအပေါ် မေးခွန်းထုတ် လာခဲ့ကြသလို ပြန်လည်ဆန်းစစ်မှုများ၊ သုတေသနပြုမှုများနှင့်အတူ သဘာ၀နည်းဖြင့် ထုတ်လုပ်ထားသည့် အော်ဂဲနစ်အစားအစာများက ရှေ့တန်းသို့ ပြန်ရောက်လာသည်။ သစ်သီး၀လံတွင် ပိုးပေါက်ကလေးပါမှ ဓာတုပိုးသတ်ဆေးတို့ ကင်းလွတ်သည်ဟူသော အမြင်မျိုးပင်ရှိလာသည်။ မည်သို့ပင်ဆိုစေကာမူ စိုက်ပျိုးရေးထုတ်ကုန်သီးနှံများ စိုက်ပျိုးထုတ်လုပ် ရာတွင် မြေဧကနည်းနည်းတွင် များများစိုက်ပျိုးထုတ်လုပ်ရန်မှာလည်း မဖြစ်မနေ လုပ်ရမည်ဖြစ်သည့်အလျောက် ဓာတ်မြေဩဇာနှင့် ပိုးသတ် ဆေးများအပါအဝင် အခြားစိုက်ပျိုးရေးသုံးဆေးဝါးများကို အတိုင်းအတာ တစ်ရပ်အထိ သုံးစွဲရန် လိုအပ်နေဆဲဖြစ်ခြင်းကြောင့် စိုက်ပျိုးရေးဆိုင်ရာ အလေ့အကျင့်ကောင်းများကို ကျင့်သုံးရန်လိုအပ်လာသည်။

စိုက်ပျိုးရေးဆိုင်ရာ အလေ့အကျင့်ကောင်းများ GAP (Good Agricultural Practices) ၏ ရည်ရွယ်ချက်မှာ စားသုံးသီးနှံများကို ဘေးအ္တရာယ်ကင်းရှင်းစွာနှင့် အာဟာရပြည့်၀စွာ ထုတ်လုပ်နိုင်ရေးပင် ဖြစ်သည်။ တောင်သူများအနေဖြင့် သီးနှံများစိုက်ပျိုးကြရာတွင် အချက် ၁၆ ချက်ပါ စိုက်ပျိုးရေးအလေ့အကျင့်ကောင်းများကို လိုက်နာကျင့်သုံးခြင်း အားဖြင့် ဘေးအ္တရာယ်ကင်းရှင်းပြီး အာဟာရပြည့်၀သည့် သီးနှံများကို စိုက်ပျိုးထုတ်လုပ်နိုင်မည်ဖြစ်ကာ ဈေးကွက်တွင်လည်း ဈေးကောင်းရရှိ နိုင်မည်ဖြစ်သည်။ လက်ရှိတွင် စိုက်ပျိုးရေးဆိုင်ရာ အလေ့အကျင့်ကောင်း များကို ဥယျာဉ်ခြံသီးနှံများဖြစ်သည့် သရက်၊ ကျွဲကော၊ သခွားမွှေး၊ ဖရဲသီး၊ ခရမ်းချဉ်သီး၊ ငရုတ်သီး၊ ကြက်သွန်နီ၊ ဂေါ်ဖီထုပ်၊ ထောပတ်သီး၊ လယ်ယာသီးနှံများဖြစ်သည့် အစေ့ထုတ်ပြောင်း၊ ပဲမျိုးစုံ (မတ်ပဲ၊ ပဲတီစိမ်း၊ ပဲလွန်း)၊ နှမ်း၊ မြေပဲ၊ စပါး၊ ကော်ဖီတို့အတွက် လမ်းòန်ချက် (Guide Line)များ ရေးဆွဲထုတ်ပြန်ထားပြီးဖြစ်သည်။

ကျွန်မတို့က တစ်ကမ္ဘာလုံးနဲ့ ယှဉ်နေရတာ ဖြစ်ပါတယ်။ တစ်ကမ္ဘာလုံးက သတ်မှတ်ထားတဲ့စံကို မီဖို့လိုပါတယ်။ ဖွံ့ဖြိုးပြီး ကြွယ်၀ချမ်းသာတဲ့ နိုင်ငံတွေမှာ သူတို့ရဲ့ ကျန်းမာရေးအတွက် ဂရုစိုက်ပါတယ်။ သူတို့သုံးတဲ့ အစားအစာတွေဟာ ကျန်းမာရေးနဲ့ကိုက်ညီရဲ့လားဆိုတာ အလေးထားပြီး လေ့လာပါတယ်။ ကျွန်မတို့နိုင်ငံကထွက်တဲ့ စိုက်ပျိုးရေးထုတ်ကုန်တွေဟာ ကမ္ဘာက သတ်မှတ်ထားတဲ့စံနှုန်းတွေနဲ့ မကိုက်ညီဘူးဆိုရင် ကမ္ဘာ့ ဈေးကွက်မှာ ထဲထဲဝင်ဝင်တိုးဖို့ဆိုတာ ခက်သွားပါလိမ့်မယ်ဟူ၍ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဧရာ၀တီ တိုင်းဒေသကြီး ဓနုဖြူမြို့နယ်မှ ဒေသခံတောင်သူလယ်သမားများနှင့် တွေ့ဆုံဆွေးနွေးရာတွင် ထည့်သွင်းပြောကြားထားသည်။ နိုင်ငံတစ်ဝန်း လုံးတွင်ရှိနေသည့် စားနပ်ရိက္ခာစိုက်ပျိုးထုတ်လုပ်သူ တောင်သူလယ်သမား ကြီးများအားလုံးကို အသိပေးပြောကြားခြင်းလည်း ဖြစ်သည့်အလျောက် မိမိတို့ ထုတ်လုပ်လိုက်သည့် စားသုံးသီးနှံများ ဘေးကင်းအာဟာရပြည့်၀ ဈေးကောင်းရခြင်းဖြင့် အတ္တပရနှစ်ဖက်အကျိုးစီးပွားတို့ကို ရရှိနိုင်ကြ ပါစေကြောင်း။ ။

ဒုတိယသမ္မတ ဦးမြင့်ဆွေ (၇၂) နှစ်မြောက် အာဇာနည်နေ့အခမ်းအနားကျင်းပရေး ဗဟိုကော်မတီ၏ ဒုတိယအကြိမ် လုပ်ငန်းညှိနှိုင်းအစည်းအဝေးတက်ရောက်၊ အာဇာနည်နေ့အခမ်းအနား ပြင်ဆင်ဆောင်ရွက်ထားရှိမှု လှည့်လည်ကြည့်ရှု

ရန်ကုန် ဇွန် ၂၈

၂၀၁၉ ခုနှစ်၊ (၇၂)နှစ်မြောက် အာဇာနည်နေ့ အခမ်းအနား ကျင်းပရေး ဗဟိုကော်မတီ၏ ဒုတိယအကြိမ် လုပ်ငန်းညှိနှိုင်း အစည်းအဝေးကို ယနေ့နံနက် ၉ နာရီတွင် ရန်ကုန်မြို့ ဗဟန်း မြို့နယ်ရှိ အာဇာနည်ဗိမာန်ကွပ်ကဲရေးရုံး အစည်းအဝေးခန်းမ၌ ကျင်းပရာ ဗဟိုကော်မတီ နာယက၊ ဒုတိယသမ္မတ ဦးမြင့်ဆွေ တက်ရောက်အမှာစကား ပြောကြားသည်။

ညှိနှိုင်းအစည်းအဝေးသို့ (၇၂) နှစ်မြောက် အာဇာနည်နေ့ အခမ်းအနားကျင်းပရေးဗဟိုကော်မတီဥက္ကဋ္ဌ၊ သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရဦးအောင်ကို၊ ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်း၊ ဒုတိယ ဝန်ကြီးများ ဖြစ်ကြသည့် ဗိုလ်ချုပ်မြင့်နွယ်နှင့် ဦးကြည်မင်း၊ ရန်ကုန်တိုင်းဒေသကြီး ဝန်ကြီးများ၊ တပ်မတော်မှ အရာရှိကြီး များ၊ ဌာနဆိုင်ရာအကြီးအကဲများနှင့် တာဝန်ရှိသူများ တက်ရောက်ကြသည်။

ရှေးဦးစွာ ဗဟိုကော်မတီနာယက ဒုတိယသမ္မတ ဦးမြင့်ဆွေက ယနေ့ကျင်းပသည့် အစည်းအဝေးသည် ၂၀၁၉ ခုနှစ်၊ (၇၂)နှစ်မြောက် အာဇာနည်နေ့အခမ်းအနား အောင်မြင် စွာ ကျင်းပနိုင်ရေးအတွက် ဗဟိုကော်မတီ၏ ဒုတိယအကြိမ် လုပ်ငန်းညှိနှိုင်းအစည်းအဝေးဖြစ်ပါကြောင်း၊ ယခုနှစ်တွင် ကျင်းပမည့် (၇၂)နှစ်မြောက် အာဇာနည်နေ့ အခမ်းအနားကို အဆင်ပြေချောမွေ့စွာကျင်းပနိုင်ရေးအတွက် (၇၂) နှစ်မြောက်

အာဇာနည်နေ့ အခမ်းအနားကျင်းပရေး ဗဟိုကော်မတီ၊ လုပ်ငန်းကော်မတီ၊ လုံခြုံရေးကော်မတီနှင့် ဆပ်ကော်မတီ (၈) ခုတို့ကို ဖွဲ့စည်းခဲ့ပြီး အဆိုပါ ကော်မတီများနှင့် ဆပ်ကော်မတီများ အနေဖြင့်လည်း သတ်မှတ်ပေးထားသည့် လုပ်ငန်းတာဝန်များကို အချိန်မီပြီးစီးရေး ပူးပေါင်းညှိနှိုင်းဆောင်ရွက်နေသည်ကို တွေ့ရှိရပါကြောင်း။

သတ်မှတ်ချိန်အတွင်း ပြီးစီးရေး

(၇၂) နှစ်မြောက် အာဇာနည်နေ့ အခမ်းအနားအောင်မြင်စွာ ကျင်းပနိုင်ရန် အတွက် ဗဟိုကော်မတီ၏ပထမအကြိမ် လုပ်ငန်းညှိနှိုင်းအစည်းအဝေးကို ဇွန် ၆ ရက်တွင် နေပြည်တော်၌ ကျင်းပခဲ့ပြီး အစည်းအဝေးဆုံးဖြတ်ချက် (၂၄)ချက် ချမှတ်ခဲ့ပါကြောင်း၊ အဆိုပါအစည်းအဝေး ဆုံးဖြတ်ချက်များနှင့် ချမှတ်ထားသည့် လုပ်ငန်းတာဝန်များကို သတ်မှတ်ချိန် အတွင်း အမြန်အကောင်အထည်ဖော် ဆောင်ရွက်ရန်အတွက် (၇၂) နှစ်မြောက် အာဇာနည်နေ့ အခမ်းအနား ကျင်းပရေး လုပ်ငန်းကော်မတီနှင့် ဆပ်ကော်မတီ များ အစည်းအဝေးကို ဇွန်၂၀ ရက်တွင် လုပ်ငန်းကော်မတီဥက္ကဋ္ဌ၊ ရန်ကုန် တိုင်းဒေသကြီးဝန်ကြီးချုပ် ဦးဖြိုးမင်းသိန်း ဦးဆောင်၍လည်းကောင်း၊ ဇွန် ၂၄ ရက် တွင် ဗဟိုကော်မတီဥက္ကဋ္ဌ၊ သာသနာရေး နှင့်ယဉ်ကျေးမှုဝန်ကြီးဌာန ပြည်ထောင်စု ဝန်ကြီး သူရဦးအောင်ကို ဦးဆောင်၍ လည်းကောင်း အစည်းအဝေးများ ကျင်းပပြုလုပ်ခဲ့သည်ကို တွေ့ရှိရပါ ကြောင်း၊ အစည်းအဝေးဆုံးဖြတ်ချက် များနှင့် ဆောင်ရွက်ဆဲလုပ်ငန်းများကို သတ်မှတ်ချိန်အတွင်း ပြီးစီးရေး အမြန် ဆောင်ရွက်ကြရန် တိုက်တွန်းပြောကြား လိုပါ ကြောင်း။

အာဇာနည်နေ့အခမ်းအနားကို နိုင်ငံ ၏ လွတ်လပ်ရေးအတွက် အသက်ပေး ခဲ့ကြသည့် အမျိုးသားခေါင်းဆောင်ကြီး ဗိုလ်ချုပ်အောင်ဆန်းနှင့်အတူ ကျဆုံးခဲ့ သည့် ခေါင်းဆောင်ကြီးများ၏ စွန့်လွှတ်အနစ်နာခံဆောင်ရွက်ခဲ့မှုများနှင့် ကျေးဇူး တရားများကို မမေ့မလျော့စေရန်အတွက် နှစ်စဉ် ကျင်းပပြုလုပ်ရခြင်းဖြစ်ပါ ကြောင်း၊ လွတ်လပ်ရေးသည် အသက် သွေးချွေးများကို စတေးပြီးမှ ခက်ခက်ခဲခဲ ရယူခဲ့ရသည်ကို နောင်လာနောက်သား များ သိရှိစေရန်နှင့် မျိုးချစ်စိတ်ဓာတ်များ ရှင်သန်ထက်မြက်စေရန် ရည်ရွယ်၍ ကျင်းပရခြင်းဖြစ်ပါကြောင်း။

အာဇာနည်နေ့အခမ်းအနားသည် နှစ်စဉ်နှစ်တိုင်း ဆောင်ရွက်နေကျဖြစ် သော်လည်း တစ်နှစ်ထက်တစ်နှစ် ပိုမို အနှစ်သာရပြည့်၀အောင် ဆောင်ရွက် လျက်ရှိရာ ယခုနှစ်တွင် မြန်မာနိုင်ငံ တစ်ဝန်းလုံးရှိ မြို့နယ်အသီးသီး၌ ပိုမို လှုပ်ရှားအသက်ဝင်အောင် စနစ်တကျ ဆောင်ရွက်သွားကြရန် ၂၀၁၉ ခုနှစ်၊ ဇူလိုင် ၁၆၊ ၁၇၊ ၁၈ ရက်များတွင် ဗိုလ်ချုပ်အောင်ဆန်း၏ မိန့်ခွန်းများ၊ အာဇာနည်နေ့နှင့် သက်ဆိုင်သည့် တေးသီချင်းများနှင့် တွေ့ဆုံမေးမြန်းမှု အစီအစဉ်များ စသည်တို့ကို အသံချဲ့စက် အသုံးပြု၍ သတ်မှတ်ဥပဒေနှင့်အညီ အများပြည်သူများ ကျယ်ကျယ်ပြန့်ပြန့် သိရှိစေရေးအတွက် နှိုးဆော်ဆောင်ရွက် သွားရန် ညွှန်ကြားထားပြီးဖြစ်ပါ ကြောင်း။

ပြန်ကြားရေးဝန်ကြီးဌာန အနေ ဖြင့်လည်း အာဇာနည်နေ့နှင့် သက်ဆိုင် သည့် အကြောင်းအရာများကို ပြည်သူ များသိရှိနိုင်ရန်အတွက် ယခင်နှစ်များ နည်းတူ သတင်းဆောင်းပါးများ၊ တွေ့ဆုံ မေးမြန်းမှုအစီအစဉ်များ၊ ဗိုလ်ချုပ် အောင်ဆန်း၏ မိန့်ခွန်းများ၊ သီချင်းများ၊ လွတ်လပ်ရေးရရှိအောင် ကြိုးပမ်းခဲ့သည့် မှတ်တမ်းများ၊ ဓာတ်ပုံများ၊ ရုပ်ရှင်များ စသည်တို့ကို သတင်းစာ၊ ရုပ်မြင်သံကြား နှင့်ရေဒီယိုများတွင် ကြိုတင်ထုတ်လွှင့်နိုင် ရေး စီမံဆောင်ရွက်သွားရန်နှင့် ပညာ ရေးဝန်ကြီးဌာန အနေဖြင့်လည်း တက္ကသိုလ်၊ ကောလိပ်နှင့် အခြေခံပညာ အဆင့် ကျောင်းများတွင် အာဇာနည်နေ့ နှင့်သက်ဆိုင်သည့် စာစီစာကုံးပြိုင်ပွဲများ၊ ဟောပြောပွဲများ၊ ကျပန်းစကား ပြောပြိုင်ပွဲများနှင့် ပန်းချီပြိုင်ပွဲများကို ကျင်းပပြုလုပ်သွားကြရန် ညွှန်ကြား ထားပြီးဖြစ်ပါကြောင်း။

စနစ်တကျ စစ်ဆေးကြပ်မတ်

(၇၂) နှစ်မြောက်အာဇာနည်နေ့တွင် အာဇာနည်ခေါင်းဆောင်ကြီးများအား ရည်စူး၍ ဆွမ်းဆက်ကပ်လှူဒါန်းပွဲကို ယခင်နှစ်များနည်းတူ နေပြည်တော်နှင့်ရန်ကုန်မြို့တို့တွင် ကျင်းပပြုလုပ်မည်ဖြစ် သဖြင့် နိုင်ငံတော်အဆင့်ကျင်းပနိုင်ရေးအတွက် သက်ဆိုင်ရာကော်မတီနှင့် ဆပ်ကော်မတီများအနေဖြင့် လိုအပ် သည်များကို အသေးစိတ်ပေါင်းစပ်ညှိနှိုင်း ဆောင်ရွက်သွားကြစေလိုပါကြောင်း၊ ထို့အပြင် အခမ်းအနားများတွင် ဧည့်ခံ ကျွေးမွေးမည့် အစားအသောက်များ သန့်ရှင်းလတ်ဆတ်ပြီး ကျန်းမာရေးနှင့် ညီညွတ်အောင် စနစ်တကျ စစ်ဆေး ကြပ်မတ် ဆောင်ရွက်သွားကြရန် လိုအပ် မည်ဖြစ်ပါကြောင်း။

အာဇာနည်ဗိမာန်တွင် ကျင်းပမည့်အာဇာနည်နေ့အခမ်းအနားသို့ တက် ရောက်လာကြမည့် အာဇာနည် ခေါင်းဆောင်ကြီးများ၏ မိသားစုဝင် များအပါအဝင် တက်ရောက်လာကြသူ များကို ကြိုဆိုနေရာချထားခြင်းအပိုင်း နှင့် ဂါရ၀ပြုခြင်းအပိုင်းတို့တွင် လစ်ဟာမှု မရှိစေရေး၊ တစ်ဖွဲ့နှင့်တစ်ဖွဲ့ အဝင်အထွက် အချိန်ကိုက်ဖြစ်စေရေးတို့အတွက် စေ့စပ် သေချာစွာ စီမံဆောင်ရွက်သွားရန်နှင့် စနစ်ကျပြီး အချိန်ကိုက်ဖြစ်အောင် ကြိုတင်ဇာတ်တိုက် လေ့ကျင့်ခြင်းများ ကိုလည်း ဆောင်ရွက်သွားရမည်ဖြစ်ပါ ကြောင်း၊ ထို့အပြင် ကြိုတင်ဇာတ်တိုက် လေ့ကျင့်သည့်ရက်များနှင့် အခမ်းအနား ကျင်းပသည့် ရက်များတွင် ကားလမ်းများ ပိတ်ဆို့မှုမဖြစ်အောင် လမ်းလွှဲများ စီမံ ဆောင်ရွက်ပေးထားရန်နှင့် ပြည်သူလူထု ကိုလည်း ကြိုတင်အသိပေးထားရန် လိုအပ်မည်ဖြစ်ပါကြောင်း။

နိုင်ငံတော်အကြီးအကဲများ တက် ရောက်သော အခမ်းအနားဖြစ်သည့် အတွက် တက်ရောက်ဂါရ၀ပြုသည့်အခါ ပြည်ထောင်စုအဂ¯စဉ်နှင့်အညီ စီစဉ် ဆောင်ရွက်ရန်နှင့် နိုင်ငံခြားသံရုံးများကို လည်း ဝါစဉ်အတိုင်း စီစဉ်ဆောင်ရွက်ပေး ရန် လိုအပ်ပါကြောင်း၊ ထို့အပြင် မိုးရာသီ ဖြစ်သည့်အတွက် ဂါရ၀ပြုသူများ အဆင် ပြေချောမွေ့စေရေး လိုအပ်သည်များကို ကြိုတင်စီမံ ဆောင်ရွက်ထားရမည်ဖြစ်ပြီး ပြည်သူများ လာရောက်ဂါရ၀ပြုလေ့လာ ကြည့်ရှုနိုင်မည့် အချိန်နှင့် ဆောင်ရန် ရှောင်ရန်အချက်များကိုလည်း ကြိုတင် သိရှိနိုင်ရေးအတွက် ရုပ်မြင်သံကြား၊ သတင်းစာများနှင့် ရေဒီယိုများမှတစ်ဆင့် ကျယ်ကျယ်ပြန့်ပြန့် ထုတ်ပြန်ကြေညာ ပေးသွားရမည် ဖြစ်ပါကြောင်း။

အတွင်းဝန်ရုံး (ယခင်ဝန်ကြီးများရုံး)၌ ကျင်းပမည့် အလံတင်ခြင်းနှင့် အလေးပြုခြင်းအခမ်းအနား အောင်မြင် စွာ ကျင်းပနိုင်ရေး စနစ်တကျစုဖွဲ့၍ ကြိုတင်ဇာတ်တိုက် လေ့ကျင့်သွားကြရန်၊ တိုင်းပြုပြည်ပြုလွှတ်တော် အစည်း အဝေးခန်းမ ကို ယခင်အတိုင်း ပြန်လည် ခင်းကျင်းပြသနိုင်ရေး မွမ်းမံပြင်ဆင် ဆောင်ရွက်သွားကြရန်နှင့် အာဇာနည် ခေါင်းဆောင်ကြီးများ လုပ်ကြံခံရသည့် အခန်း ကိုလည်း ယခင်နှစ်များအတိုင်း ပြသနိုင်ရေး စီမံဆောင်ရွက်သွားကြစေလို ပါကြောင်း။

ထို့အတူ ဗိုလ်ချုပ်အောင်ဆန်း ပြတိုက်တွင် ဗိုလ်ချုပ်အောင်ဆန်းအသုံးပြုခဲ့သည့် အသုံး အဆောင်ပစ္စည်းများကို ယခင်နှစ်များအတိုင်း ခင်းကျင်းပြသနိုင် ရေး၊ ခြံဝင်းအတွင်း သန့်ရှင်းသပ်ရပ် တင့်တယ်စေရေး၊ ဗိုလ်ချုပ် အောင်ဆန်း သက်ရှိထင်ရှားရှိစဉ်ကကဲ့သို့ ရာသီသီးနှံ များ စိုက်ပျိုးထားရှိရေးနှင့် အဆောက် အအုံ၏ ကြံ့ခိုင်မှုအပေါ် မူတည်ပြီး ဝင်ရောက်လေ့လာသူများ အဆင်ပြေစေ ရေးအတွက် စနစ်တကျစီမံဆောင်ရွက် သွားရန် လိုအပ်ပါကြောင်း။

နိုင်ငံတော်အဆင့်အခမ်းအနားဖြစ် သည့်အတွက် လုံခြုံရေးအပိုင်းကို အထူး အလေးထားဆောင်ရွက်ရန်နှင့် လုံခြုံရေး တာဝန်ရှိသူများအနေဖြင့် လုံခြုံရေး လုပ်ငန်းတာဝန် (၁၂) ချက်နှင့် အညီ စနစ်တကျ စီမံချက်များ ရေးဆွဲကာ လစ်ဟာမှုများမရှိအောင် ဟန်ချက်ညီညီ ပေါင်းစပ်ညှိနှိုင်းဆောင်ရွက်သွားကြရ မည်ဖြစ်ပါကြောင်း။

(၇၂) နှစ်မြောက် အာဇာနည်နေ့ အခမ်းအနားကို အနှစ်သာရပြည့်၀စွာဖြင့် အောင်မြင်စွာ ကျင်းပပြုလုပ်နိုင်ရေး အတွက် ယခင်နှစ်များက ဆောင်ရွက်ခဲ့ သည့် အတွေ့အကြုံများအပေါ် ပြန်လည် သုံးသပ်ပြီး လုပ်ငန်းကော်မတီများနှင့် ဆပ်ကော်မတီများအချင်းချင်း ပေါင်းစပ် ညှိနှိုင်းကာ ချို့ယွင်းအားနည်းချက်များ မရှိစေရန် စနစ်တကျဆောင်ရွက်သွားရ မည်ဖြစ်ပါကြောင်း၊ ယခုအစည်းအဝေး တွင် ဗဟိုကော်မတီ၊ လုပ်ငန်းကော်မတီ များနှင့် ဆပ်ကော်မတီများမှ တာဝန်ရှိ သူများအနေဖြင့် သက်ဆိုင်ရာကဏ္ဍများအလိုက် လုပ်ငန်းဆောင်ရွက်ထားရှိမှု အခြေအနေများ၊ ဆက်လက်ဆောင်ရွက် သွားမည့် အစီအမံများ၊ တွေ့ကြုံရသည့် အခက်အခဲများနှင့် လိုအပ်သည့် အကြံပြု ချက်များကို ပွင့်ပွင့်လင်းလင်းဆွေးနွေး ပေးကြရန်ပြောကြားသည်။

ဆောင်ရွက်မည့်အစီအမံများ ရှင်းလင်း

ထို့နောက် (၇၂) နှစ်မြောက် အာဇာနည်နေ့အခမ်းအနားကျင်းပရေး ဗဟိုကော်မတီဥက္ကဋ္ဌ၊ သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စု ဝန်ကြီး သူရဦးအောင်ကိုက အစည်း အဝေးဆုံးဖြတ်ချက်များအပေါ် ဆောင် ရွက်ပြီးစီးမှုအခြေအနေများ၊ ဆောင်ရွက် ဆဲလုပ်ငန်းများနှင့် ဆက်လက်ဆောင်ရွက် သွားမည့် အစီအမံများကို ရှင်းလင်း ပြောကြားသည်။

ဆက်လက်၍ (၇၂) နှစ်မြောက် အာဇာနည်နေ့အခမ်းအနားကျင်းပရေး ဗဟိုကော်မတီ ဒုတိယဥက္ကဋ္ဌ၊ ရန်ကုန် တိုင်းဒေသကြီး ဝန်ကြီးချုပ် ဦးဖြိုးမင်း သိန်းက အာဇာနည်နေ့ အခမ်းအနား အောင်မြင်စွာ ကျင်းပနိုင်ရေးအတွက် လုပ်ငန်းကော်မတီ၊ ဆပ်ကော်မတီ များ၏ အကောင်အထည်ဖော် ဆောင်ရွက်ထား ရှိမှုအခြေအနေများကို ရှင်းလင်းတင်ပြ သည်။

ယင်းနောက် အခမ်းအနားကျင်းပ ရေးလုပ်ငန်းကော်မတီ ဒုတိယဥက္ကဋ္ဌ၊ သာသနာရေးနှင့် ယဉ်ကျေးမှုဝန်ကြီးဌာန၊ ဒုတိယဝန်ကြီး ဦးကြည်မင်းက အာဇာနည်နေ့ အခမ်းအနားကို မြန်မာ နိုင်ငံတစ်ဝန်းလုံးရှိ မြို့နယ်အသီးသီးတွင် အောင်မြင်စွာ ကျင်းပနိုင်ရေးအတွက် ပေါင်းစပ်ညှိနှိုင်းဆောင်ရွက်ထားရှိမှု အခြေအနေ၊ ကော်မတီများနှင့် ဆပ်ကော်မတီများ၏ ပူးပေါင်းဆောင်ရွက် နေမှုအခြေအနေများကို ရှင်းလင်းတင်ပြ သည်။

လုံခြုံရေးဆောင်ရွက်ထားရှိမှု တင်ပြ

ထို့နောက် ပြည်ထဲရေးဝန်ကြီးဌာန၊ မြန်မာနိုင်ငံရဲတပ်ဖွဲ့ ဒုတိယရဲချုပ် ရဲဗိုလ်ချုပ် မျိုးဆွေဝင်းနှင့် ရဲမှူးချုပ် တင်ကိုကိုတို့က လုံခြုံရေးဆောင်ရွက် ထားရှိမှု အခြေအနေများနှင့် စပ်လျဉ်း၍ ရှင်းလင်းတင်ပြကြသည်။

ယင်းနောက် အခမ်းအနားပြင်ဆင် ရေးနှင့် စီစဉ်ရေးဆပ်ကော်မတီ အတွင်းရေးမှူး ဒေါ်လှိုင်မော်ဦးနှင့် တွဲဖက် အတွင်းရေးမှူး ဦးတင်မောင်ကြည်၊ ဖိတ်ကြားရေး၊ ပြန်ကြားရေးနှင့် မှတ်တမ်း ပြုစုရေးဆပ်ကော်မတီ ဥက္ကဋ္ဌ ဦးဇော် အေးမောင်နှင့် အတွင်းရေးမှူး ဒေါ်သန်း မြင့်အောင်၊ ဗိုလ်ချုပ်အောင်ဆန်း ပြတိုက်ပြသရေးဆပ်ကော်မတီ အတွင်း ရေးမှူး ဦးကျော်ဦးလွင်၊ လွမ်းသူ့ ပန်းခွေချအလေးပြုအခမ်းအနား စီစဉ် ရေး ဆပ်ကော်မတီ ဥက္ကဋ္ဌ ဦးဟံထွန်းနှင့် အတွင်းရေးမှူး ရဲမှူးချုပ် မျိုးမင်းထိုက်၊ ကျန်းမာရေးဆပ်ကော်မတီ မှ ဒေါက်တာ ခင်ဇော်၊ စည်းကမ်း ထိန်းသိမ်းရေးဆပ်ကော်မတီ ဥက္ကဋ္ဌ ဗိုလ်မှူးကြီးအောင်စိုးမိုး၊ ဆွမ်းဆက်ကပ် ရေးနှင့် ဧည့်ခံကျွေးမွေးရေး ဆပ်ကော်မတီနှင့် အတွင်းဝန်ရုံး (ယခင် ဝန်ကြီးများရုံး) အလံတင် အခမ်းအနား ကျင်းပရေးဆပ်ကော်မတီ ဥက္ကဋ္ဌ ဦးမောင်မောင်စိုးနှင့် အတွင်းရေးမှူး ဦးသန်းတို့က သက်ဆိုင်ရာဆပ်ကော်မတီ များအလိုက် လုပ်ငန်းဆောင်ရွက်ပြီးစီး မှုနှင့်ဆောင်ရွက်နေမှု အခြေအနေများ နှင့်စပ်လျဉ်း၍ ရှင်းလင်းတင်ပြကြသည်။

ထို့နောက် အစည်းအဝေးသို့ တက်ရောက်လာကြသည့် ကာကွယ်ရေး ဝန်ကြီးဌာန ဒုတိယဝန်ကြီး ဗိုလ်ချုပ် မြင့်နွယ်၊ ပြန်ကြားရေးဝန်ကြီးဌာန အမြဲတမ်းအတွင်းဝန် ဦးမျိုးမြင့်မောင်၊ နိုင်ငံခြားရေးဝန်ကြီးဌာန ညွှန်ကြားရေး မှူးချုပ် ဦးမင်းသိမ်း၊ ရန်ကုန်တိုင်းစစ်ဌာန ချုပ်မှ ဗိုလ်မှူးကြီး သန်းထူးဇော်တို့က လိုအပ်သည်များကို ဖြည့်စွက်ရှင်းလင်း တင်ပြကြသည်။

ယင်းနောက် တင်ပြချက်များနှင့် စပ်လျဉ်း၍ ဒုတိယသမ္မတက လိုအပ် သည်များကို ပေါင်းစပ်ညှိနှိုင်းဆောင်ရွက် ပေးပြီး နိဂုံးချုပ်အမှာစကားပြောကြား သည်။

ကြိုတင်ပြင်ဆင်ထားမှု ကြည့်ရှု

ဆက်လက်၍ ဗဟိုကော်မတီ နာယက၊ ဒုတိယသမ္မတ ဦးမြင့်ဆွေသည် တာဝန်ရှိသူများနှင့်အတူ အာဇာနည် ဗိမာန်သို့ သွားရောက်ပြီး အာဇာနည်နေ့ အခမ်းအနား အောင်မြင်စွာ ကျင်းပနိုင် ရေးအတွက် ကြိုတင်ပြင်ဆင်ဆောင်ရွက် ထားရှိမှု အခြေအနေများကို ကြည့်ရှု သည်။

ထို့နောက် ဒုတိယသမ္မတနှင့် တာဝန်ရှိသူများသည် ဗဟန်းမြို့နယ်ရှိ ဗိုလ်ချုပ် အောင်ဆန်း ပြတိုက်သို့ ရောက်ရှိ ပြီး ဗိုလ်ချုပ်အောင်ဆန်း အသုံးပြုခဲ့သည့် အသုံးအဆောင်ပစ္စည်းများ ခင်းကျင်း ပြသထားရှိမှုအခြေအနေ၊ ပြတိုက် အဆောက်အအုံ မွမ်းမံပြင်ဆင်ထားရှိမှု အခြေအနေနှင့် ခြံဝင်းအတွင်း ရာသီ သီးနှံများ စိုက်ပျိုးထားရှိမှုအခြေအနေ တို့ကို ကြည့်ရှုစစ်ဆေးသည်။

ပြည်သူများ လေ့လာကြည့်ရှုနိုင်ရေး

ယင်းနောက် ဒုတိယသမ္မတနှင့် တာဝန်ရှိသူများသည် ဗိုလ်တထောင် မြို့နယ်ရှိ အတွင်းဝန်ရုံး (ယခင်ဝန်ကြီး များရုံး) သို့ ရောက်ရှိပြီး လွတ်လပ်ရေး ရသည့်နေ့တွင် ယူနီယံဂျက်အလံကို ဖြုတ်ချ၍ ပြည်ထောင်စုမြန်မာနိုင်ငံတော် အလံကို ပြန်လည်လွှင့်တင်ခဲ့သည့် အလံတိုင်နေရာ၊ အာဇာနည်ခေါင်းဆောင် ကြီးများ၏ သမိုင်းဝင်မော်ကွန်း ကျောက် စာတိုင်နေရာ၊ တိုင်းပြုပြည်ပြု လွှတ်တော်အစည်းအဝေးခန်းမနှင့် အာဇာနည်ခေါင်းဆောင်ကြီးများ လုပ်ကြံ ခံရသည့် အခန်းတို့ကို အများ ပြည်သူများ လေ့လာကြည့်ရှုနိုင်ရေးအတွက် မွမ်းမံ ပြင်ဆင်ဆောင်ရွက်ထားရှိမှု အခြေအနေ တို့ကို လှည့်လည် ကြည့်ရှုခဲ့သည်။

သတင်းစဉ်

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဓနုဖြူမြို့နယ် ဒေသခံတောင်သူလယ်သမားများနှင့် တွေ့ဆုံ

တောင်သူလယ်သမားအများစု စိုက်ပျိုးနေကြတဲ့ အဓိကသီးနှံတွေကို အခြေခံဈေးနှုန်းသတ်မှတ်နိုင်ဖို့ လုပ်ဆောင် ဈေးကွက်အခြေအနေ၊ ထုတ်လုပ်မှုအနေအထားစတဲ့ အခြေခံအကြောင်းရင်းတွေကို အခြေပြုပြီး စဉ်ဆက်မပြတ် ပြောင်းလဲပြင်ဆင် 



နေပြည်တော် ဇွန် ၂၈
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ပြည်ထောင်စုဝန်ကြီးများဖြစ်ကြသည့် ဒုတိယဗိုလ်ချုပ်ကြီး ကျော်ဆွေ၊ ဒုတိယဗိုလ်ချုပ်ကြီးရဲအောင်၊ ဦးမင်းသူ၊ တာဝန်ရှိသူများနှင့်အတူ ယနေ့နံနက်ပိုင်းတွင် ရဟတ်ယာဉ်များဖြင့် ဧရာ၀တီ တိုင်းဒေသကြီး ဓနုဖြူမြို့သို့ ရောက်ရှိသည်။
နိုင်ငံတော်၏ အတိုင်ပင်ခံပုဂ္ဂိုလ်နှင့်အဖွဲ့အား ဧရာ၀တီတိုင်း ဒေသကြီး ဝန်ကြီးချုပ် ဦးလှမိုးအောင်၊ တိုင်းဒေသကြီး အစိုးရ အဖွဲ့ဝင်ဝန်ကြီးများ၊ လွှတ်တော်ကိုယ်စားလှယ်များနှင့် ဒေသခံ ပြည်သူများက ဓနုဖြူမြို့နယ်အားကစားကွင်း၌ ကြိုဆိုနှုတ်ဆက် ကြသည်။
တက်ရောက်
ထို့နောက် နိုင်ငံတော်၏အတိုင်ပင်ခံပုဂ္ဂိုလ်သည် ဓနုဖြူမြို့ လယ်ယာဝန်ဆောင်မှုစင်တာ၌ ကျင်းပသည့် ဧရာ၀တီတိုင်း ဒေသကြီး ဓနုဖြူမြို့နယ် ဒေသခံတောင်သူ လယ်သမားများနှင့် တွေ့ဆုံဆွေးနွေးပွဲသို့ တက်ရောက်သည်။
တွေ့ဆုံဆွေးနွေးပွဲသို့ ပြည်ထောင်စုဝန်ကြီးများ ဖြစ်ကြ သည့် ဒုတိယဗိုလ်ချုပ်ကြီး ကျော်ဆွေ၊ ဒုတိယဗိုလ်ချုပ်ကြီး ရဲအောင်၊ ဦးမင်းသူ၊ ဒေါက်တာအောင်သူ၊ ဧရာ၀တီတိုင်းဒေသ ကြီး ဝန်ကြီးချုပ် ဦးလှမိုးအောင်၊ ဒုတိယဝန်ကြီး ဦးအောင်ထူး၊ ဦးမောင်မောင် ဝင်း၊ တိုင်းဒေသကြီး အစိုးရအဖွဲ့ဝင်ဝန်ကြီးများ၊ လွှတ်တော်ကိုယ်စားလှယ်များ၊ ဌာနဆိုင်ရာအကြီးအကဲများ၊ စီးပွားရေးလုပ်ငန်းရှင်များ၊ ဒေသခံတောင်သူများနှင့် တာဝန် ရှိသူများ တက်ရောက်ကြသည်။
တွေ့ဆုံဆွေးနွေးပွဲတွင် နိုင်ငံတော်၏ အတိုင်ပင်ခံပုဂ္ဂိုလ်က ဒီနေ့ တွေ့ဆုံပွဲကို ဒေသခံတောင်သူလယ်သမား နှစ်ထောင် နီးပါး တက်ရောက်ကြတယ်လို့ သိရပါတယ်။ ဒါ့အပြင် ပုဂ္ဂလိက လုပ်ငန်းရှင်တွေ၊ အသင်းအဖွဲ့တွေနဲ့ ကုန်သည်၊ စက်ပိုင်ရှင်တွေ တက်ရောက်လာတယ်ဆိုတာ သိရပါတယ်။ အုပ်ချုပ်ရေးပိုင်းက ပြည်ထောင်စုနဲ့ တိုင်းဒေသကြီးအဆင့် တာဝန်ရှိသူတွေလည်း တက်ရောက်ကြပါတယ်။ ကျွန်မတို့နိုင်ငံရဲ့ လယ်ယာကဏ္ဍ ဖွံ့ဖြိုး တိုးတက်ဖို့ဆိုရင် ဒီကနေ့ တက်ရောက်လာတဲ့သူတွေအချင်းချင်း ပူးပေါင်းဆောင်ရွက်ကြဖို့၊ တစ်ဦးနဲ့တစ်ဦး စာနာနားလည်စိတ်နဲ့ ရိုင်းပင်းကူညီကြဖို့ အထူးပဲအရေးကြီးလှပါတယ်။ အထူးသဖြင့် ကျွန်မတို့ရဲ့ တောင်သူလယ်သမားတွေနဲ့ ကုန်သည်၊ စက်ပိုင် လုပ်ငန်းရှင်တွေအကြားမှာ ခိုင်မာပြီး ရေရှည်တည်တံ့တဲ့ ဆက်ဆံမှု၊ နားလည်မှု၊ စာနာမှုတွေ ရှိရမှာ ဖြစ်ပါတယ်။
ရင်းနှီးနွေးထွေးစွာ ကူညီပေးဖို့လို
ဒီလိုဆက်ဆံမှုမျိုးတွေ တည်ဆောက်နိုင်အောင် အစိုးရ ဌာနဆိုင်ရာတွေကလည်း တောင်သူလယ်သမားတွေရဲ့ လိုအပ် ချက်၊ လယ်ယာစီးပွားရေးလုပ်ငန်းရှင် ကုမ္ပဏီတွေရဲ့ လိုအပ်ချက် တွေကို နည်းမှန်လမ်းမှန် ကူညီဆောင်ရွက်ပေးဖို့ လိုအပ်ပါတယ်။ ဌာနဆိုင်ရာအပိုင်းမှာဆိုရင် မြေစာရင်းဌာန၊ ဆည်မြောင်းဌာန၊ စိုက်ပျိုးရေးဌာန၊ စက်မှုလယ်ယာဌာနတွေဟာ တောင်သူ လယ်သမားတွေနဲ့ တိုက်ရိုက်ထိတွေ့ဆက်ဆံပြီး နိုင်ငံတော်အစိုးရ ကိုယ်စား ဝန်ဆောင်မှုပေးနေရတာဖြစ်လို့ ဒီဌာနတွေအနေနဲ့ တောင်သူလယ်သမားတွေကို ရင်းနှီးနွေးထွေးစွာ ကူညီပေးဖို့ လိုပါတယ်။ နီးနီးစပ်စပ် အတူတစ်ကွ ပုံမှန်ထိတွေ့ဆက်ဆံပြီး လုပ်ပေးနိုင်တာတွေကို လုပ်ပေးရမှာဖြစ်ပါတယ်။ လုပ်ပေးရမှာ တွေကို နှောင့်နှေးကြန့်ကြာမှုမရှိဘဲ လုပ်ဆောင်ပေးဖို့၊ မလုပ် ပေးနိုင်သေးတဲ့ ကိစ္စတွေကိုဆိုရင်လည်း မလုပ်ပေးနိုင်ရတဲ့ အကြောင်းရင်းကို ရိုးရိုးသားသားနဲ့ ပွင့်ပွင့်လင်းလင်း ရှင်းပြပေးဖို့ လိုအပ်ပါတယ်။
နိုင်ငံတော်အစိုးရအနေနဲ့ ငွေကြေး၊ ဘတ်ဂျက်နဲ့ ဓန အင်အား အကန့်အသတ်ရှိတာကြောင့် ဦးစားပေးအလိုက် သုံးသပ်ရွေးချယ်ပြီးမှ ကြိုးပမ်းဆောင်ရွက်ပေးနေရတဲ့ အနေ အထားဖြစ်ပါတယ်။ ဒီအခြေအနေကိုလည်း ကျွန်မတို့ရဲ့ တောင်သူလယ်သမားကြီးတွေ သိရှိကြဖို့နဲ့ နားလည်လက်ခံပေး ကြဖို့ မေတ္တာရပ်ခံလိုပါတယ်။ ကိစ္စတွေတော်တော်များများက လုပ်ဖို့ဆိုရင် နောက်ကနေ ငွေလိုက်ဖို့က အင်မတန်မှ လိုအပ်ပါ တယ်။ ကျွန်မတို့နိုင်ငံလို ဖွံ့ဖြိုးဆဲနိုင်ငံတစ်ခုအနေနဲ့ လုပ်ချင်တာ လုပ်ဖို့ဆိုတာ ငွေအား၊ ဓနအင်အားက မရှိသေးပါဘူး။ ရှိဖို့ဆိုတာ အားလုံးဝိုင်းဝန်းပြီးကူညီမှ ဖြစ်ပါလိမ့်မယ်။ ဒီတော့ အခု မဖြစ်နိုင် သေးဘူးဆိုရင် ကျွန်မတို့အစိုးရကတော့ ပွင့်ပွင့်လင်းလင်းပဲ ရှင်းပြပါတယ်။ အခုအချိန်မှာတော့ မဖြစ်နိုင်သေးပါဘူး၊ ဘာဖြစ် လို့လဲဆိုတော့ အခြေအနေတွေက မပေးလို့၊ ဘာတွေလိုအပ် ချက်တွေ ရှိတယ်ဆိုတာ ကျွန်မတို့ ရှင်းပြပါတယ်။ အဲဒါတွေ ရှင်းပြရမှာက အစိုးရရဲ့ တာဝန်ဖြစ်သလို ဒီလိုရှင်းပြချက်တွေကို ရဖို့ဆိုတာကလည်း တောင်သူလယ်သမားတွေရဲ့ အခွင့်အရေး ဖြစ်ပါတယ်။ အခွင့်အရေးနဲ့ တာဝန်ဆိုတာ လူတိုင်းမှာ ရှိပါတယ်။ ကျွန်မတို့အစိုးရဘက်မှာလည်း တာဝန်ရှိတယ်။ အခွင့်အရေး ရှိတယ်။ တောင်သူလယ်သမားကြီးတွေဘက်မှာလည်း အခွင့် အရေးရှိတယ်။ တာဝန်ရှိတယ်။ နှစ်ဦးနှစ်ဖက်က အခွင့်အရေး ကိုရော၊ တာဝန်ကိုရော တန်းတူညီမျှတန်ဖိုးထားပြီး လုပ်သွား မယ်ဆိုရင် ဘယ်လိုပဲပြဿနာတွေရှိရှိ ဖြေရှင်းန်ိုင်မှာ ဖြစ်ပါတယ်။
တောင်သူလယ်သမားများအတွက် မြေယာကိစ္စ ဦးစားပေး
ကျွန်မတို့ရဲ့ တောင်သူလယ်သမား ဦးကြီးများအတွက် ဆိုရင် အဓိကကျတဲ့ မြေအသုံးချမှုနဲ့ပတ်သက်တဲ့ ဥပဒေ၊ နည်းဥပဒေတွေကို လွယ်ကူရှင်းလင်းအောင်၊ လက်တွေ့ လုပ်ဆောင်ရာမှာ အခက်အခဲမရှိအောင် တတ်နိုင်သမျှ ဦးစားပေးပြီး ပြင်ဆင်ရေးဆွဲတာတွေ ဆောင်ရွက်နေပါတယ်။ အထူးသဖြင့် လယ်ယာမြေ ဥပဒေ၊ မြေလွတ်၊ မြေလပ်၊ မြေရိုင်း ဥပဒေတွေကို အထူးဦးစားပေးပြီး လွှတ်တော်အဖွဲ့အစည်း အသီးသီးက အစိုးရဌာနတွေနဲ့ ညှိနှိုင်းပြီး လုပ်ကိုင်နေတာဖြစ်ပါ တယ်။ တစ်ဖက်မှာလည်း အရင်တုန်းက အကြောင်းအမျိုးမျိုးနဲ့ သိမ်းဆည်းခဲ့တဲ့ လယ်ယာမြေတွေကို မူလပိုင်ရှင်တွေထံ အမြန်ဆုံး ပြန်လည်လွှဲပြောင်းပေးအပ်နိုင်ဖို့ကိုလည်း နိုင်ငံတော် သမ္မတရုံးက ဦးစီးပြီးတော့ အလေးပေးဆောင်ရွက်လျက် ရှိပါတယ်။
အမြန်ဆုံးပြီးပြတ်အောင် ဆောင်ရွက်ပေး
ကျွန်မအနေနဲ့ နိုင်ငံအနှံ့အပြားကပြည်သူတွေနဲ့ တိုက်ရိုက် ထိတွေ့ဆက်ဆံရတဲ့အခါမှာ ဘယ်နေရာပဲရောက်ရောက် လူထု က တင်ပြတဲ့အထဲမှာ လယ်ယာမြေကိစ္စက ထိပ်ဆုံးက အများဆုံး ဖြစ်နေတာကို ကိုယ်တိုင်ကိုယ်ကျ တွေ့ရှိရပါတယ်။ ဒါ့ကြောင့် လည်း လယ်ယာမြေပြဿနာတွေကို အမြန်ဆုံးပြီးပြတ်အောင် ဆောင်ရွက်ပေးဖို့ တွန်းအားပေးနေရတာ ဖြစ်ပါတယ်။ အချိန် ကာလ သတ်မှတ်ချက်တွေ သတ်မှတ်ထားပေမယ့် လက်တွေ့ မြေပြင်မှာ နှစ်နဲ့ချီပြီး စောင့်ဆိုင်းနေရတဲ့ ကိစ္စရပ်တွေ အများကြီး ကျန်နေသေးတယ်ဆိုတာကိုလည်း စိစစ်တွေ့ရှိရပါတယ်။ ဝန်ထမ်းအင်အား မလုံလောက်လို့လား၊ လုပ်ထုံးလုပ်နည်းတွေ ကပဲ ကြန့်ကြာနေတာလား၊ တာဝန်ယူ၊ တာဝန်ခံမှုမရှိဘဲ ဟိုဘက် ဒီဘက် စာတွေလွှဲနေလို့ မပြီးပြတ်တာလား၊ ဒါတွေကို သေသေ ချာချာ သုံးသပ်လေ့လာပြီး လိုအပ်တာမှန်သမျှ ဖြည့်ဆည်း ဆောင်ရွက်ဖို့ သက်ဆိုင်ရာဝန်ကြီးဌာနတွေ၊ တိုင်းဒေသကြီးနဲ့ ပြည်နယ်အစိုးရတွေကို တိုက်တွန်းအားပေးနေရပါတယ်။

တာဝန်ကို ကျေပွန်ဖို့ဟာ သိပ်အရေးကြီး
ကျွန်မတို့ တွေ့ရတာကတော့ ဒီလိုမြေတွေနဲ့ ပတ်သက်ရင် သိမ်းထားတဲ့သူတွေက ပြန်မပေးချင်လို့ အချိန်ဆွဲတာတွေလည်း ရှိပါတယ်။ တချို့ဟာတွေကျတော့ အုပ်ချုပ်ရေးပိုင်းဆိုင်ရာတွေက လုပ်ထုံးလုပ်နည်းတွေဟာ မပီပြင်လို့ မကြန့်ကြာသင့်ဘဲနဲ့ ကြန့်ကြာနေတာတွေလည်း ရှိပါတယ်။ အဲဒီအထဲမှာလည်း တစ်ခါတလေ မြေတွေနဲ့ပတ်သက်လို့ မူလပိုင်ရှင်ပါဆိုပြီးတော့ ပြန်ပြီးတော့ တောင်းတဲ့သူတွေကလည်း ပြည့်ပြည့်စုံစုံ အထောက် အထားမရှိတာတို့၊ တစ်ခါတလေလည်း မမှန်မကန်ဘဲနဲ့ တောင်းတာတို့ ဒါတွေလည်း ရှိပါတယ်။ အဲဒီတော့ အားလုံးဘက် ကနေပြီးတော့ ဖြောင့်ဖြောင့်မှန်မှန်နဲ့ ကိုယ်လုပ်ရမယ့်တာဝန်ကို ကျေပွန်ဖို့ဟာ သိပ်အရေးကြီးပါတယ်။ ဒါမှလည်း မြေယာကိစ္စ တွေကို အမြန်ဆုံးဖြေရှင်းနိုင်မှာပါ။ ဒီဧရာ၀တီတိုင်းမှာတော့ စောစောက ဧရာ၀တီတိုင်းဝန်ကြီးချုပ်က ဆွေးနွေးတဲ့အခါမှာ တချို့ပြန်ပေးရမယ့် ပုဂ္ဂိုလ်တွေ၊ အဖွဲ့အစည်းတွေက ပြန်ပေးတဲ့ နေရာမှာ နှောင့်နှေးနေတယ်ဆိုတာ ကြားရပါတယ်။ နှောင့်နှေး နေတဲ့ပုဂ္ဂိုလ်များ မနှောင့်နှေးဖို့ တိုက်တွန်းပါရစေ။ ကိုယ်မပိုင် ဆိုင်တဲ့ကိစ္စကို ဘာဖြစ်လို့ ကပ်ပြီး ဖက်တွယ်နေကြရမှာလဲ၊ မြန်မြန်ဆန်ဆန် ပြန်ပေးလိုက်တော့ အားလုံးအတွက်လည်း ကောင်းပါတယ်။ ကျွန်မတို့နိုင်ငံအတွက်လည်း ကောင်းပါတယ်။ ကျွန်မတို့နိုင်ငံဟာ အခုထက်ထိ စိုက်ပျိုးရေးကို အခြေခံတဲ့နိုင်ငံ ဖြစ်တာကြောင့် လယ်ယာမြေကိစ္စဟာ အင်မတန်မှ အရေးကြီးပါ တယ်။ ဒါကြောင့် ကိုယ်မပိုင်ဆိုင်တာ ကိုယ်ပြန်ပေးရမယ့် မြေတွေကို မြန်မြန်ဆန်ဆန် ပြန်ပေးခြင်းဟာ ကိုယ့်အတွက်လည်း သိက္ခာရှိတယ်၊ ကိုယ့်ရဲ့နိုင်ငံအတွက်လည်း အကျိုးရှိတယ်ဆိုတာ ကို နှလုံးသွင်းပြီးတော့ မြန်မြန်ဆန်ဆန်ဖြစ်အောင် သက်ဆိုင်သူ များက ပူးပေါင်းဆောင်ရွက်ပေးစေချင်ပါတယ်။
ဈေးကွက်ဝင်သီးနှံတွေ စိုက်ပျိုးနိုင်အောင်
တစ်ဆက်တည်းမှာပဲ လယ်ယာမြေနဲ့ ပတ်သက်လာရင် ကျွန်မတို့ရဲ့ တောင်သူလယ်သမားကြီးတွေ အခက်အခဲဖြစ်စေတဲ့ ကိစ္စတွေကိုလည်း လေ့လာသုံးသပ်နေပါတယ်။ ဥပမာအားဖြင့် မကြာသေးခင်ကပဲ ပြည်ပဈေးကွက် အပြောင်းအလဲတွေကြောင့် ပြည်တွင်းက စိုက်ပျိုးသီးနှံတွေ ရွေးချယ်စိုက်ပျိုးမှုအပေါ်မှာ ကြီးကြီးမားမား သက်ရောက်စေခဲ့ပြီး အခက်အခဲတွေ ဖြစ်ပေါ် စေခဲ့တာမျိုးတွေလည်း ကြုံတွေ့ခဲ့ကြရပြီး ဖြစ်ပါတယ်။ ဒါ့ကြောင့် လယ်ယာမြေတွေမှာ သီးနှံတစ်မျိုးကနေ အခြားတွက်ခြေကိုက်တဲ့ သီးနှံတစ်မျိုး ပြောင်းလဲပြီး စိုက်ပျိုးနိုင်အောင်၊ ဈေးကွက် အနေအထားအရ ဈေးကွက်ဝင်သီးနှံတွေ စိုက်ပျိုးနိုင်အောင် ကျွန်မတို့အစိုးရအနေနဲ့ မူဝါဒပိုင်းကနေ ကူညီပေးရမှာ ဖြစ်ပါ တယ်။
အမြန်ဆုံးပြောင်းလဲသင့်တဲ့နေရာမှာ ပြောင်းလဲစေချင်
တောင်သူလယ်သမားကြီးတွေ ကိုယ်တိုင်ကလည်း ကြိုးစားရမှာဖြစ်ပါတယ်။ မြန်မြန်ဆန်ဆန် ပြောင်းလဲနေတဲ့ ခေတ်ကြီးမှာ နှေးနေလို့မရပါဘူး၊ တစ်နှစ်နဲ့ တစ်နှစ်တောင် မဟုတ်ဘူး၊ တစ်လနဲ့တစ်လ၊ ရာသီဥတုရဲ့ အနေအထားအရ၊ က္ဘာ့ဈေးကွက်ရဲ့ အနေအထားအရ ကျွန်မတို့ရဲ့ တောင်သူ လယ်သမားကြီးတွေအတွက် အသင့်တော်ဆုံး၊ ကျွန်မတို့နိုင်ငံ အတွက်လည်း အကျိုးအမြတ်အရှိဆုံး ဘယ်လိုဟာမျိုးတွေ စိုက်သင့်သလဲဆိုတာ တစ်ချိန်လုံးလေ့လာနေဖို့ လိုပါတယ်။ အစိုးရပိုင်းကနေ အကူအညီပေးရမှာကတော့ ပေးရမှာပါပဲ၊ တောင်သူလယ်သမားကြီးတွေကိုယ်တိုင်က ကိုယ့်ဟာကိုယ် လေ့လာချင်တဲ့စိတ်ရှိဖို့ လိုပါတယ်။ ကြုံတုန်းပြောရရင် ရာသီဥတု ပြောင်းလဲမှုကြောင့် အရင်တုန်းက အင်မတန်မှဖြစ်ထွန်းတဲ့ သီးနှံ တွေက အခုဖြစ်ချင်မှဖြစ်မှာ၊ ဒါကြောင့် အရင်တုန်းက စိုက်ပျိုးပုံ စိုက်ပျိုးနည်းတွေနဲ့ အခုဖြစ်ချင်မှဖြစ်မှာ။ အဲဒါတွေကိုလည်း တစ်ချိန်လုံးသတိပြုပြီးတော့ ခေတ်နဲ့အညီ၊ ပြောင်းလဲလာတဲ့ ရာသီဥတုနဲ့အညီ ကိုယ်ကိုယ်တိုင်က စိုက်ပျိုးနည်းတွေ၊ စိုက်ပျိုး တဲ့ အပင်တွေ ဘာတွေပြောင်းလဲရမလဲဆိုတာကို တစ်ချိန်လုံး လေ့လာသုံးသပ်ပြီး အမြန်ဆုံးပြောင်းလဲသင့်တဲ့နေရာမှာ ပြောင်းလဲစေချင်ပါတယ်။ အဲဒါကို စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးဌာနက တတ်နိုင်သမျှ ပညာဖြန့်ဝေခြင်း အားဖြင့် ကူညီလိမ့်မယ်လို့ မျှော်လင့်ပါတယ်။
စိုက်ပျိုးရေး၊ မွေးမြူရေးနဲ့ ရေလုပ်ငန်းကို လုပ်ကိုင်အသက် မွေးတဲ့ တောင်သူလယ်သမားကြီးတွေဟာ ကျွန်မတို့နိုင်ငံရဲ့ စီးပွားရေးအတွက်သာမက ကျွန်မတို့ ပြည်သူတွေရဲ့ စားနပ်ရိက္ခာ ဖူလုံရေးအတွက်ပါ အင်မတန်အရေးကြီးပါတယ်။ ဒီလို အရေးကြီး တာကြောင့်လည်း တောင်သူလယ်သမားအခွင့်အရေး ကာကွယ် ရေးနဲ့ အကျိုးစီးပွားမြှင့်တင်ရေးဥပဒေကို ပြဋ္ဌာန်းထားရှိပြီး တောင်သူလယ်သမားတွေ ရသင့်ရထိုက်တဲ့ အခွင့်အရေးတွေ ရရှိအောင်၊ လယ်ယာထွက်ကုန်တွေအတွက် သင့်တင့်မျှတတဲ့ ဈေးကွက်ဈေးနှုန်းရရှိအောင်၊ တောင်သူလယ်သမားတွေရဲ့ အကျိုးစီးပွားကို တတ်နိုင်သမျှ ဖော်ဆောင်ပေးနိုင်အောင် ရည်ရွယ်ပြီးဥပဒေပြဋ္ဌာန်းထားတာ ဖြစ်ပါတယ်။
ဒီဥပဒေကို အကောင်အထည်ဖော်ဖို့အတွက် ဦးဆောင် အဖွဲ့ကို ဒုတိယသမ္မတ ဦးဟင်နရီဗန်ထီးယူ ခေါင်းဆောင်ပြီး ပြည်ထောင်စုဝန်ကြီး ဒေါက်တာအောင်သူက အတွင်းရေးမှူး ဖြစ်ပါတယ်။ တိုင်းဒေသကြီးများနဲ့ ပြည်နယ်ဝန်ကြီးချုပ်တွေ ကလည်း အဖွဲ့ဝင်တွေဖြစ်ပါတယ်။ ဥပဒေရဲ့ ရည်ရွယ်ချက်၊ ဥပဒေ မှာ ဖော်ပြထားချက်တွေကို အခြေခံပြီး ကျွန်မတို့ရဲ့ တောင်သူ လယ်သမားတွေအတွက် ကြိုးစားအားထုတ် ဆောင်ရွက်ပေးဖို့ ဖြစ်ပါတယ်။
တရားဥပဒေစိုးမိုးရေးက အင်မတန်အရေးကြီး
ဒီအဖွဲ့အနေနဲ့ ဥပဒေပါပြဋ္ဌာန်းချက်တွေကို အကောင် အထည်ဖော် ဆောင်ရွက်ပေးရန် လိုအပ်မှုတွေ ရှိနေသေးတယ် ဆိုရင်လည်း ကျွန်မတို့ တောင်သူလယ်သမားကြီးတွေအနေနဲ့ တောင်းဆိုပိုင်ခွင့်၊ တိုက်တွန်းပိုင်ခွင့်၊ ဝေဖန်ပိုင်ခွင့် ရှိရမှာ ဖြစ်ပါ တယ်။ ဥပဒေနဲ့ ပြဋ္ဌာန်းထားတဲ့ ဆောင်ရွက်ပေးရမယ့် လုပ်ငန်း တွေကို ကျွန်မတို့အနေနဲ့ မဖြစ်မနေ ဦးစားပေးဆောင်ရွက်ရမှာ ဖြစ်ပါတယ်။ ဒီနေရာမှာ တရားဥပဒေစိုးမိုးရေးနဲ့ ပတ်သက်လို့ နည်းနည်းပြောချင်ပါတယ်။ အစိုးရဟာ အုပ်ချုပ်ရေးတာဝန်ကို ယူကတည်းကစပြီး တရားဥပဒေစိုးမိုးရေးကို အဓိကလိုအပ်ချက် တစ်ခုလို့ သတ်မှတ်ထားပါတယ်။ နိုင်ငံတစ်နိုင်ငံရဲ့ တည်ငြိမ်မှု၊ အေးချမ်းမှုအတွက်ဆိုတာ တရားဥပဒေစိုးမိုးရေးက အင်မတန် အရေးကြီးပါတယ်။ နိုင်ငံတစ်နိုင်ငံ တည်ငြိမ်အေးချမ်းမှု မရှိဘူး ဆိုရင် ဘယ်လိုမှ တိုးတက်နိုင်မှာ မဟုတ်ပါဘူး။ ဥပဒေဆိုတာ တစ်ဖက်သတ်မဟုတ်ပါဘူး။ ဥပဒေဆိုတာ အားလုံးကို ကာကွယ် ထားဖို့ဖြစ်ပါတယ်။ ဥပဒေအထက်မှာက ဘယ်သူမှမရှိဘူး။ အားလုံးအတွက် မျှမျှတတဖြစ်ရမယ်။ ဥပဒေတွေဟာ အကယ်၍ မမျှတဘူး၊ ခေတ်နဲ့မညီဘူးလို့ထင်ရင် ဥပဒေပြုမဏ္ဍိုင်ဖြစ်တဲ့ လွှတ်တော်တွေက ပြောင်းသင့် ပြောင်းထိုက်တာကို ပြောင်းရမှာ ဖြစ်ပါတယ်။
ဥပဒေဟာ မျှမျှတတဖြစ်ရမယ်
အဲဒါကြောင့် တရားဥပဒေစိုးမိုးရေးကို အလေးထားပါ။ တည်ဆဲဥပဒေတွေကို လေးစားလိုက်နာဖို့ လိုပါတယ်။ အကယ်၍ တည်ဆဲဥပဒေတွေဟာ မမျှတဘူး၊ မသင့်တော်ဘူးလို့ထင်ရင် ပြည်သူပြည်သားအားလုံးဟာ ဥပဒေတွေ ပြင်သင့်ကြောင်း ကိုယ့်ရဲ့ လွှတ်တော်ကိုယ်စားလှယ်ကနေတစ်ဆင့် တင်ပြလို့ရပါ တယ်။ လွှတ်တော်ဆိုတာ ဥပဒေပြုမဏ္ဍိုင်ဖြစ်ပါတယ်။ ဥပဒေ တွေကို ပြင်ဖို့လိုရင် ဥပဒေဘောင်အတွင်းက ပြင်ရမယ်။ ဥပဒေ တွေဟာ ဟိုဖက်၊ဒီဖက် မျှမျှတတရှိတယ်ဆိုရင် အားလုံးက ဒီဥပဒေတွေကို လေးစားလိုက်နာရမှာ ဖြစ်ပါတယ်။ က်ိုယ်နိုင်မှ ဥပဒေကို လိုက်နာတယ်ဆိုတာ တရားဥပဒေစိုးမိုးရေး မဟုတ် ပါဘူး။ အဲဒါကိုတော့ ကျွန်မအားလုံးကို၊ နှစ်ဖက်ကို သတိပေးလို ပါတယ်။ ဥပမာ- မြေပိုင်ဆိုင်မှုနဲ့ ပတ်သက်ရင် ဟိုဖက်၊ ဒီဖက် ကိုယ့်ဘက်က နိုင်သွားရင် ဥပဒေကကောင်းတယ်လို့ ထင်ကြ တယ်၊ ကိုယ့်ဘက်ရှုံးသွားတယ်ဆိုရင် ဥပဒေကိုကန့်ကွက်ကြတယ်။ ဒီလိုလုပ်လို့ မရပါဘူး။ ဥပဒေဟာ မျှမျှတတဖြစ်ရမယ်။ မမျှတဘူး ထင်ရင် ဥပဒေပြုလွှတ်တော်ကနေတစ်ဆင့် ပြင်ဖို့ကို ဥပဒေပြု ဘောင်အတွင်းကနေ ကြိုးစားရမှာ ဖြစ်ပါတယ်။
ဆန်စပါး အခြေခံဈေးနှုန်းသတ်မှတ်ရေးလုပ်ငန်းစဉ်
ပြီးခဲ့တဲ့ ၂၀၁၈ ခုနှစ်၊ မတ်လတုန်းက နေပြည်တော်မှာ ပြုလုပ်ခဲ့တဲ့ တွေ့ဆုံဆွေးနွေးပွဲမှာ ဆန်စပါးအတွက် အခြေခံ ဈေးနှုန်းအဖြစ် သတ်မှတ်အရည်အသွေးပြည့်စုံရင် တင်းတစ်ရာ ကို ကျပ် ကျပ်ငါးသိန်းနှုန်း ကြေညာဆောင်ရွက်ပေးဖို့ ကျွန်မအနေနဲ့ အထူးအလေးပေး တိုက်တွန်းခဲ့ပါတယ်။ တိုက်တွန်းခဲ့တဲ့အတိုင်း လည်း အခြေခံဈေးနှုန်းအဖြစ် သတ်မှတ်ကြေညာနိုင်ခဲ့ပါတယ်။ ဒါပေမယ့် အခြေခံဈေးနှုန်းဆိုတာ တစ်ရာသီပြီးရင် တစ်ရာသီ၊ တစ်နှစ်ပြီးရင် နောက်တစ်နှစ် ပြောင်းလဲကြေညာပေးနေရမှာ ဖြစ်ပါတယ်။ နိုင်ငံတကာမှာတော့ စိုက်ပျိုးရာသီမတိုင်မီ ပြည်တွင်း၊ ပြည်ပဈေးကွက် အခြေအနေတွေကို လေ့လာသုံးသပ် ပြီး ကြိုတင်ကြေညာပေးရပါတယ်။ ဒီလိုကြေညာပေးတဲ့ အခြေခံ ဈေးနှုန်းကို လေ့လာပြီး တောင်သူတွေက သူတို့အတွက် တွက်ခြေကိုက်တဲ့သီးနှံကို ရွေးချယ်စိုက်ပျိုးကြတဲ့ ပုံစံမျိုးကို ဆောင်ရွက်ကြပါတယ်။
ကျွန်မတို့နိုင်ငံမှာလည်း သီးနှံအားလုံးအတွက် မလုပ်နိုင် သေးရင်တောင် တောင်သူလယ်သမားအများစု စိုက်ပျိုးနေကြတဲ့ မြေပဲ၊ နှမ်း၊ ပြောင်း၊ ကြံစတဲ့ အဓိကစိုက်ပျိုးသီးနှံတွေကို အခြေခံ ဈေးနှုန်းသတ်မှတ်နိုင်ဖို့ လုပ်ဆောင်သွားရမှာ ဖြစ်ပါတယ်။ မနှစ်က ဆန်စပါး အခြေခံ ဈေးနှုန်းကြေညာခဲ့ပြီးနောက် တစ်နှစ် ကျော်ကာလ အတွေ့အကြုံရဲ့ အားသာချက်၊ အားနည်းချက်တွေ ကို ပြန်လည်သုံးသပ်ပြီး အခြေခံဈေးနှုန်း ကြေညာတဲ့ လုပ်ငန်းစဉ် နဲ့ ဈေးကွက်အတွင်း ဖြစ်ပေါ်နေတဲ့ အခြေအနေတွေကို အစိုးရ အပိုင်း၊ ပုဂ္ဂလိကလုပ်ငန်းရှင်တွေအပိုင်းနဲ့ တောင်သူတွေအပိုင်းက မျက်ခြည်မပြတ် လေ့လာပြီး ရေရှည်ပူးပေါင်း ဆောင်ရွက်သွား ရမှာ ဖြစ်ပါတယ်။ နိုင်ငံတော်အစိုးရပိုင်းအနေနဲ့လည်း အခြေခံ ဈေးနှုန်းအောက် မရောက်အောင် မူဝါဒပိုင်းအရဖြစ်စေ၊ ပြည်ပ နိုင်ငံအစိုးရတွေနဲ့ ချိတ်ဆက်ပြီးတင်ပို့ ရောင်းချနိုင်အောင်ပဲဖြစ်စေ ကြိုးပမ်းလုပ်ဆောင်သွားရမှာဖြစ်ပါတယ်။
အခြေခံဈေးနှုန်းဟာ အခြေခံအကျဆုံး ဈေးနှုန်းဖြစ်လို့ ဒီအခြေခံဈေးအောက်ကို ရောက်မသွားအောင် သီးနှံတွေ စုပြုံ ပေါ်ထွက်ချိန်မှာ ဝယ်လိုအားတိုးမြှင့်မယ့် အစီအစဉ်တွေကို ပုဂ္ဂလိကနဲ့ အစိုးရက ပူးပေါင်းလုပ်ဆောင်သွားရမှာ ဖြစ်ပါတယ်။ ကျွန်မတို့က တခြားနိုင်ငံတွေနဲ့လည်း ဆွေးနွေးရတယ်ဆိုတာဟာ တစ်ခါတလေ ပြည်သူတွေက ဒီကိစ္စကို သိပ်ပြီးမသိကြဘူး။ တောင်သူလယ်သမားကြီးတွေကလည်း မသိကြဘူး။ ပဲဈေးတွေ ကျသွားတာဟာအိန္ဒိယနိုင်ငံက အရင်တုန်းက ယူသလောက် မယူလို့ဖြစ်သွားတာ ဖြစ်ပါတယ်။ အဲဒီတော့ ကျွန်မတို့က အိန္ဒိယ နိုင်ငံနဲ့ ညှိနှိုင်းရပါတယ်။ နှစ်နိုင်ငံအတွင်း မိတ်ဆွေပီပီ ညှိနှိုင်း ပြီးတော့ ဒီလိုကိစ္စတွေကို လုပ်ရပါတယ်။ တခြားနိုင်ငံတွေနဲ့ဆိုရင် လည်း ဒီအတိုင်းပါပဲ။ ကျွန်မတို့ဟာ ဘယ်နိုင်ငံနဲ့မဆို မိတ်ဖြစ် ဆွေဖြစ် ကောင်းကောင်းမွန်မွန်ဆက်ဆံပြီး ဟိုဘက်ဒီဘက် အကျိုးအမြတ်ရှိအောင် ညှိနှိုင်းပြီးလုပ်ရတဲ့ကိစ္စတွေ အများကြီး ရှိပါတယ်။
အကြောင်းကြောင်းကြောင့် အခြေခံဈေးနှုန်းအောက် ဈေးကျသွားမယ်ဆိုရင်လည်း ဝယ်ယူရေးအစီအစဉ်တွေ၊ သိုလှောင်ရေးအစီအစဉ်တွေကို အစိုးရ-ပုဂ္ဂလိက ပူးပေါင်းပြီး စနစ်တကျ လုပ်ဆောင်သွားရမှာ ဖြစ်ပါတယ်။ ဒီလုပ်ငန်းစဉ်တွေ ဟာ တစ်ရာသီတည်းအတွက်၊ တစ်နှစ်တည်းအတွက် မဟုတ်ဘဲ တစ်ရာသီပြီးတစ်ရာသီ၊ တစ်နှစ်ပြီးတစ်နှစ် စဉ်ဆက်မပြတ် ပူးပေါင်းဆောင်ရွက်သွားရမယ့် လုပ်ငန်းစဉ်တွေ ဖြစ်ပါတယ်။ ကျွန်မတို့ အစိုးရလက်ထက်မှာတင် မဟုတ်ပါဘူး၊ နောင်အစိုးရ အဆက်ဆက်ကလည်း တောင်သူလယ်သမားတွေအတွက်၊ ကျေးလက်နေပြည်သူလူထုအတွက် ဦးစားပေးပြီး ဥပဒေအရ ဆက်လက် လုပ်ကိုင် ဆောင်ရွက်ပေးသွားရမယ့် လုပ်ငန်းစဉ် လည်း ဖြစ်ပါတယ်။ ဒါ့ကြောင့် အခြေခံဈေးနှုန်းသတ်မှတ်ရေး ဆိုတာ ဈေးကွက် အခြေအနေ၊ ထုတ်လုပ်မှုအနေအထား စတဲ့ အခြေခံအကြောင်းရင်းတွေကို အခြေပြုပြီး ရေရှည်အားဖြင့် စဉ်ဆက်မပြတ် ပြောင်းလဲပြင်ဆင်သွားရမယ့် လုပ်ငန်းစဉ်တစ်ရပ် ဖြစ်တယ်ဆိုတာကို အလေးထားပြီး တိုက်တွန်းမှာကြားလို ပါတယ်။
စိုက်ပျိုးစရိတ်ချေးငွေ
ကျွန်မတို့အစိုးရအနေနဲ့ ရေတိုလုပ်ငန်းတွေကို တစ်ဖက်က လုပ်သလို၊ ရေရှည်အတွက် အကျိုးရှိမယ့် လုပ်ငန်းတွေကို ပိုမို ဦးစားပေးပြီး ဆောင်ရွက်လျက်ရှိပါတယ်။ ကျွန်မတို့ တောင်သူ လယ်သမားအများစု မှီခိုအားထားရတဲ့ မြန်မာ့လယ်ယာဖွံ့ဖြိုးရေး ဘဏ်ကို ရေရှည်မှာ အမှန်တကယ် ဖွံ့ဖြိုးရေးဘဏ်အဖြစ် ပီပီပြင်ပြင်ပေါ်ထွက်လာဖို့ ပြုပြင်ပြောင်းလဲရေးတွေကို နိုင်ငံတကာဖွံ့ဖြိုးရေး မိတ်ဖက်အဖွဲ့အစည်းတွေရဲ့ အကြံဉာဏ် တွေ၊ အကူအညီတွေရယူပြီး ကြိုးပမ်းဆောင်ရွက်နေပါတယ်။ ကျွန်မတို့ တောင်သူလယ်သမားကြီးတွေအတွက် မြန်မာ့ လယ်ယာဖွံ့ဖြိုးရေးဘဏ်ဟာ အလွန်ပဲအရေးကြီးတယ်ဆိုတာ ကျွန်မတို့ သိပါတယ်။ မြန်မာ့လယ်ယာဖွံ့ဖြိုးရေးဘဏ်ရဲ့ ဘဏ်ဝန်ဆောင်မှုလုပ်ငန်းတွေ နှစ်တို၊ နှစ်လတ် ချေးငွေတွေကို ယခုထက်ပိုပြီး တိုးချဲ့ဆောင်ရွက်နိုင်အောင်၊ ပိုမိုပြီး ကျယ်ကျယ် ပြန့်ပြန့် ဆောင်ရွက်နိုင်အောင် ကျွန်မတို့ ကြိုးစားနေပါတယ်။
ဒီနေရာမှာ ကျွန်မတို့အစိုးရ တာဝန်ရယူခဲ့တဲ့ ၂၀၁၆ ခုနှစ် မှာ မိုးစပါးအတွက် တစ်ဧကကို ယခင်တစ်သိန်းကနေ တစ်သိန်းခွဲ နှုန်း တိုးမြှင့်ပြီး ထုတ်ပေးသလို ယမန်နှစ်က စတင်ပြီးတော့ ဆန်စပါးမဟုတ်တဲ့ အခြားသီးနှံတွေအတွက် ယခင် ကျပ် ငါးသောင်းနှုန်းကနေ တစ်သိန်းနှုန်းအထိ တိုးမြှင့်ထုတ်ပေးခဲ့ပါ တယ်။ ဒါပေမယ့်လည်း တကယ်တမ်းကျတော့ ကျွန်မတို့ရဲ့ တောင်သူ လယ်သမားကြီးတွေအတွက် ပြည့်စုံလုံလောက်ဦးမှာ မဟုတ်သေးပါဘူး။ ဆက်လက်ပြီးတော့လည်း နိုင်ငံတော်ရဲ့ ဘဏ္ဍာငွေကြေးအခြေအနေအပေါ် မူတည်ပြီး စိုက်ပျိုးစရိတ် ချေးငွေတွေကို တိုးမြှင့်ထုတ်ပေးသွားနိုင်ဖို့ တစ်ဆင့်ပြီးတစ်ဆင့် စီစဉ်ဆောင်ရွက်သွားမှာဖြစ်ကြောင်း ပြောကြားချင်ပါတယ်။
ဒီနေရာမှာ ကျွန်မအနေနဲ့ ပုဂ္ဂလိကဘဏ်ကြီးတွေကို အထူးပဲ မေတ္တာရပ်ခံပြောကြားလိုပါတယ်။ လယ်ယာကဏ္ဍ အတွက်၊ ကျွန်မတို့ရဲ့ တောင်သူလယ်သမားကြီးတွေအတွက် လိုအပ်တဲ့ နှစ်တိုနှစ်ရှည်ချေးငွေတွေကို လုပ်ထုံးလုပ်နည်းတွေနဲ့ အညီ တတ်နိုင်သမျှ ဦးစားပေးပြီးတော့ ထုတ်ချေးပေးကြဖို့ တိုက်တွန်းလိုပါတယ်။ ပုဂ္ဂလိကဘဏ်ကြီးတွေဘက်ကလည်း ဘဏ်လုပ်ထုံးလုပ်နည်းနဲ့ ကိုက်ညီတဲ့ လယ်ယာစီးပွားရေးလုပ်ငန်း တွေကို ချေးငွေတွေ ထုတ်ပေးနိုင်မယ်ဆိုရင် နိုင်ငံပိုင်မြန်မာ့ လယ်ယာ ဖွံ့ဖြိုးရေးဘဏ်လိုမျိုးပဲ လုပ်ဆောင်နိုင်မှာ ဖြစ်ပါတယ်။ ကျွန်မအနေနဲ့ ယှဉ်ပြိုင်မှုကို အားပေးပါတယ်။ မျှတတဲ့ ယှဉ်ပြိုင်မှု၊ ကောင်းမွန်တဲ့ယှဉ်ပြိုင်မှု၊ ကျွန်မတို့ပြည်သူတွေ အကျိုးရှိစေမယ့် ယှဉ်ပြိုင်မှုမျိုးဖြစ်ဖို့ လိုအပ်ပါတယ်။ နိုင်ငံပိုင်ဘဏ်တွေကလည်း ပုဂ္ဂလိကဘဏ်တွေနဲ့ ယှဉ်ပြိုင်နိုင်ရမယ်၊ နိုင်ငံခြားဘဏ်တွေနဲ့ လည်း ယှဉ်ပြိုင်နိုင်ရမှာ ဖြစ်ပါတယ်။ ဒီလိုမျှတတဲ့ ယှဉ်ပြိုင်မှုတွေ ရှိလာမယ်ဆိုရင် တောင်သူလယ်သမားတွေ အပါအဝင် ကျွန်မတို့ ပြည်သူတစ်ရပ်လုံး အကျိုးရှိစေမှာဖြစ်ပါတယ်။
ကျွန်မတို့ တောင်သူလယ်သမားကြီးတွေကလည်း ကိုယ့် နိုင်ငံအတွင်းမှာ ယှဉ်ပြိုင်နေရမှာ မဟုတ်ဘူး။ ကမ္ဘာနဲ့ချီပြီး ယှဉ်ပြိုင်နေရတယ်ဆိုတာ သတိပြုစေချင်ပါတယ်။ အခုခေတ်က ကိုယ့်နိုင်ငံအတွင်းမှာပဲ ကြိုက်သလိုနေလို့မရပါဘူး။ တစ်ခြားနိုင်ငံ တွေရဲ့ အခြေအနေကို ကျွန်မတို့ ကြည့်ရပါတယ်။ တစ်က္ဘာလုံး နဲ့ ယှဉ်ပြိုင်နေရတဲ့ခေတ်ကြီးမှာ ရုန်းကန်နေရတာ၊ တစ်ကမ္ဘာလုံး နဲ့ ယှဉ်ပြိုင်ပြီး ဖွံ့ဖြိုးတိုးတက်ဖို့ လုပ်နေရတာဖြစ်ပါတယ်။ ဖွံ့ဖြိုး တိုးတက်မှုဆိုတာ သူ့အချိန်နဲ့သူ ရှိပါတယ်။ အရှေ့တောင်အာရှ အတွက် ဖွံ့ဖြိုးတိုးတက်ဖို့ကောင်းတဲ့ အချိန်တုန်းက မမီလိုက်တဲ့ အခါမှာ အခုမှ ကြိုးစားအားထုတ်ပြီး လိုက်နေရတာဖြစ်ပါတယ်။ သို့သော်ငြားလည်း ဒီလိုကြိုးစားပြီး လိုက်နေတဲ့အချိန်မှာ ကျွန်မ တို့ နိုင်ငံဟာ အရှေ့တောင်အာရှထဲမှာ ဖွံ့ဖြိုးမှုနှုန်း အမြန်ဆုံး နိုင်ငံဖြစ်မယ်ဆိုပြီး ကမ္ဘာ့ စီးပွားရေးအဖွဲ့အစည်းတွေက သတ်မှတ်ထားပါတယ်။ ဒါသည် ကျွန်မတို့အတွက် အားတက် စရာအချက်ဖြစ်သလို ကျွန်မတို့ကလည်း ကိုယ်လုပ်မှ ကိုယ်ရမယ် ဆိုတာကိုလည်း သတိပြုဖို့ လိုပါလိမ့်မယ်။ ငါတို့ကတော့ ဖွံ့ဖြိုးမှု နှုန်း အတိုးတက်ဆုံးနိုင်ငံဖြစ်ပြီဆိုပြီး အေးအေးဆေးဆေး လုပ်လို့မရပါဘူး။ အေးအေးဆေးဆေးပဲဆိုရင် အဲဒီနှုန်းက ပြန်ပြီး တော့ ကျသွားမှာဖြစ်ပါတယ်။ အားလုံးဝိုင်းပြီး ကြိုးစားကြမှာသာ တိုးတက်မှုနှုန်းကို ထိန်းသိမ်းထားနိုင်မှာ ဖြစ်ပါတယ်။ ကျွန်မတို့ တစ်ကမ္ဘာလုံးနဲ့ ယှဉ်ပြိုင်နေရတယ်ဆိုတဲ့ အသိလေးနဲ့ တောင်သူ လယ်သမားကြီးတွေဘက်ကရော၊ ဘဏ်တွေဘက်ကရော၊ လုပ်ငန်းရှင်တွေဘက်ကရော အားလုံးကိုယ်စား ပြောချင်ပါတယ်။
ပြည်ပရင်းနှီးမြှုပ်နှံမှု တိုးမြှင့်ဖိတ်ခေါ်
မကြာသေးခင်ကပဲ ကျွန်မတို့အစိုးရအနေနဲ့ နိုင်ငံတကာ လုပ်ငန်းရှင်တွေကို ကျွန်မတို့ရဲ့ လယ်ယာကဏ္ဍမှာ ဝင်ရောက်ပြီး ဝယ်ယူတင်ပို့ရောင်းချနိုင်ဖို့ မူဝါဒတွေ ခွင့်ပြုပေးခဲ့ပါတယ်။ အဓိကအားဖြင့် တန်ဖိုးမြှင့်ထုတ်လုပ်တဲ့ လယ်ယာထွက်ကုန်တွေ အတွက် ဈေးကွက်တိုးချဲ့ပြီး လမ်းဖွင့်ပေးတဲ့သဘော ဖြစ်ပါတယ်။ ဒီနေရာမှာလည်း ကျွန်မတို့ရဲ့ ပြည်တွင်းလုပ်ငန်းရှင်ကြီးတွေ အနေနဲ့ စိုးရိမ်ပူပန်စိတ်တွေ မဖြစ်စေလိုပါဘူး။ မျှတတဲ့ယှဉ်ပြိုင်မှု အတွက် အားလုံးက လုံ့လ၊ ဝီရိယ၊ ပညာ၊ သတ္တိတွေ စိုက်ထုတ်ပြီး ကြိုးပမ်းကြရမှာ ဖြစ်ပါတယ်။ တစ်ဖက်နဲ့တစ်ဖက် ပြိုင်ဖက်လို့ မမြင်ဘဲ မိတ်ဖက်လို သဘောထားဆောင်ရွက်ကြမယ်ဆိုရင် နိုင်ငံတကာအတွေ့အကြုံတွေ၊ ကျွန်မတို့ မလုပ်နိုင်သေးတဲ့ သုတေသနနဲ့ ဖွံ့ဖြိုးရေးလုပ်ငန်းတွေကို နိုင်ငံတကာလုပ်ငန်းရှင် တွေဆီကနေ လေ့လာသင်ယူနိုင်မှာ ဖြစ်ပါတယ်။ လယ်ယာကဏ္ဍ ဖွံ့ဖြိုးရေးအတွက် နိုင်ငံတကာနဲ့ စနစ်တကျ ပူးပေါင်းဆောင်ရွက် သွားရမှာဖြစ်သလို နိုင်ငံခြားရင်းနှီးမြှုပ်နှံမှုကိုလည်း လယ်ယာ ကဏ္ဍအတွက် တိုးမြှင့်ဖိတ်ခေါ် ဆောင်ရွက်သွားရမှာဖြစ်ပါတယ်။
စားနပ်ရိက္ခာ ဘေးကင်းလုံခြုံရေး
လယ်ယာလုပ်ငန်းလုပ်ကိုင်ကြတဲ့ တောင်သူလယ်သမား ကြီးတွေကို တွေ့ဆုံခွင့်ရခိုက်မှာ ကျွန်မအနေနဲ့ အထူးမေတ္တာရပ်ခံ လိုတာကတော့ စားနပ်ရိက္ခာ ဘေးကင်းလုံခြုံရေးပဲ ဖြစ်ပါတယ်။ အားလုံးသိတဲ့အတိုင်း လယ်ယာကဏ္ဍဟာ ကျွန်မတို့နိုင်ငံရဲ့ အဓိကအခြေခံဖြစ်ပါတယ်။ ကျွန်မတို့နိုင်ငံရဲ့ လယ်ယာထွက်ကုန် တွေဟာ ဂုဏ်သတင်းကောင်း၊ နာမည်ကောင်းတွေ ရှိခဲ့ပါတယ်။ လူတွေရဲ့ စားသောက်နေထိုင်မှုပုံစံတွေ ပြောင်းလဲတိုးတက် လာတာနဲ့အမျှ ဘေးကင်းလုံခြုံတဲ့ စားနပ်ရိက္ခာတွေကို ပိုမိုပြီး တောင်းဆိုလာကြပါတယ်။ ဒါ့ကြောင့် ကျွန်မတို့ရဲ့ တောင်သူ လယ်သမားကြီးတွေအနေနဲ့ ပိုးသတ်ဆေးတွေ၊ ဓာတုဆေးဝါး တွေကို မဖြစ်မနေလိုအပ်မှသာ ချင့်ချိန်သုံးစွဲကြဖို့ တိုက်တွန်း လိုပါတယ်။
ကျွန်မတို့က တစ်ကမ္ဘာလုံးနဲ့ ယှဉ်နေရတာဖြစ်ပါတယ်။ တစ်ကမ္ဘာလုံးက သတ်မှတ်ထားတဲ့စံကို မီဖို့လိုပါတယ်။ ဖွံ့ဖြိုးပြီး ကြွယ်၀ချမ်းသာတဲ့ နိုင်ငံတွေမှာ သူတို့ရဲ့ ကျန်းမာရေးအတွက် ဂရုစိုက်ပါတယ်။ သူတို့သုံးတဲ့ အစားအစာတွေဟာ ကျန်းမာရေးနဲ့ ကိုက်ညီရဲ့ လားဆိုတာ အလေးထားပြီး လေ့လာပါတယ်။ ကျွန်မ တို့နိုင်ငံကထွက်တဲ့ စိုက်ပျိုးရေးထုတ်ကုန်တွေဟာ က္ဘာက သတ်မှတ်ထားတဲ့ စံနှုန်းတွေနဲ့ မကိုက်ညီဘူးဆိုရင် ကမ္ဘာ့ ဈေးကွက်မှာ ထဲထဲဝင်ဝင်တိုးဖို့ဆိုတာ ခက်သွားပါလိမ့်မယ်။ ရေရှည်ကိုကြည့်ပြီးတော့ အမြန်ဖြစ်နိုင်မယ့်အရာကိုပဲ မစဉ်းစား ဘဲနဲ့ ပိုးသတ်ဆေးတွေ သုံးလိုက်တော့ မြန်မြန်ပိုးသေပေမယ့် အဲဒီရဲ့ အကျိုးဆက်က ကိုယ့်ရဲ့ထွက်ကုန်တွေကို ရသင့်သလောက် ဈေးလည်းမရဘူး။ ရောင်းလို့ရနိုင်တဲ့အဆင့်ထိလည်း ရောင်းလို့ မရဘူး ဖြစ်သွားမှာ ဖြစ်ပါတယ်။ ရေတိုကို မကြည့်ပါနဲ့၊ ရေရှည်ကို ကြည့်ပြီးတော့ ပိုမိုအပင်ပန်းခံပြီးတော့ ကမ္ဘာ့ စံနှုန်းနဲ့ ကိုက်ညီ မယ့် စားသောက်ကုန်တွေ ထွက်ဖို့ကို အလေးထားစေချင် ပါတယ်။

မလိုအပ်ဘဲ ဓာတုဆေးဝါးတွေ အလွန်အကျွံသုံးစွဲရင် ကျွန်မတို့နိုင်ငံက လယ်ယာထွက်ကုန်တွေဟာ ပြည်တွင်း၊ ပြည်ပ ဈေးကွက်မှာ နာမည်ဂုဏ်သတင်းထိခိုက်စေမှာ ဖြစ်ပါတယ်။ ကုန်သွယ်မှုမှာပဲဖြစ်ဖြစ်၊ စီးပွားရေးလုပ်ငန်းတွေကို လုပ်ကိုင်ရာ မှာပဲဖြစ်ဖြစ် ယုံကြည်မှုနဲ့ စိတ်ချနိုင်မှုက အထူးပဲအရေးကြီးပါ တယ်။ ယုံကြည်မှုပျက်စီးသွားပြီ၊ စိတ်ချနိုင်မှုမရှိတော့ဘူးဆိုရင် ပျက်စီးသွားတဲ့ နာမည်၊ ဂုဏ်သတင်းကို ပြန်ပြီးတည်ဆောက် ရတာ အင်မတန်ခက်ခဲပါတယ်။ ကျွန်မတို့ စားသုံးသူတွေရဲ့ မျှော်မှန်းချက်၊ စားသုံးသူတွေရဲ့ ကျန်းမာရေးကိုလည်း ထုတ်လုပ် သူဖြစ်တဲ့ ကျွန်မတို့ရဲ့ တောင်သူလယ်သမားကြီးတွေက တာဝန်ယူ၊ တာဝန်ခံပေးဖို့ လိုအပ်ပါတယ်။
တောင်သူလယ်သမားများအတွက် ထိရောက်တဲ့
ဝန်ကြီးဌာနဖြစ်ရေး
ကျွန်မတို့ရဲ့ ကျေးလက်ဒေသ တောင်သူလယ်သမား အများစုဟာ စိုက်ပျိုးရေးနဲ့ မွေးမြူရေးကို ဒွန်တွဲပြီး လုပ်ဆောင် နေကြပါတယ်။ ရှေးမိရိုးဖလာ အစဉ်အလာအရလည်း ဒွန်တွဲပြီး လုပ်ကိုင်ခဲ့ကြတာ အားလုံးအသိပဲဖြစ်ပါတယ်။ အရင်တုန်းက ဆိုရင် စိုက်ပျိုးရေးဝန်ကြီးဌာန၊ မွေးမြူရေးဝန်ကြီးဌာနဆိုပြီး သက်သက်စီရှိခဲ့ပါတယ်။ လက်ရှိကာလမှာတော့ စိုက်ပျိုးရေးနဲ့ မွေးမြူရေးကို ပူးတွဲပြီးဖွဲ့ထားပါတယ်။ ကျေးလက်နေတောင်သူ တွေရဲ့ စိုက်ပျိုးရေး၊ မွေးမြူရေး လိုအပ်ချက်တွေအတွက် ဝန်ကြီး ဌာနတစ်ခုတည်းကနေ တာဝန်ယူပြီး ထိထိရောက်ရောက် စုစုစည်းစည်း လုပ်ကိုင်ပေးနိုင်ဖို့ ရည်ရွယ်ပြီး ဖွဲ့စည်းခဲ့တာပဲ ဖြစ်ပါတယ်။ ဒါ့အပြင် သမဝါယမကဏ္ဍပါ ပါဝင်တဲ့အတွက် ကျေးလက်တောင်သူတွေ စုပေါင်းလုပ်ဆောင်နိုင်မယ့် (၂၁)ရာစု နဲ့ ကိုက်ညီတဲ့ သမဝါယမစနစ်ကို ကျေးလက်ဒေသတွေမှာ စနစ်တကျ လုပ်ဆောင်သွားရမှာဖြစ်ပါတယ်။
မွေးမြူရေးနဲ့ ပတ်သက်ရင် အာဖရိက ဝက်တုပ်ကွေးရောဂါ (Africa Swine Flu) ကို သတိထားရဖို့ အခြေအနေမှာ ရှိနေပါတယ်။ အာဆီယံနိုင်ငံအချို့မှာ ဒီကပ်ဘေးဟာ ထိခိုက်မှု အလွန်ပဲကျယ်ပြန့်နေပါတယ်။ ကျွန်မတို့ရဲ့ တောင်သူလယ်သမား ကြီးတွေအနေနဲ့လည်း ဝက်မွေးမြူရေးကို အများအပြားလုပ်နေ ကြတော့ ဒီကိစ္စအပေါ်မှာ အထူးသတိထားပြီး ကာကွယ်မှုတွေ ကြိုတင်လုပ်ဆောင်ထားဖို့ အရေးကြီးပါတယ်။ ဝန်ကြီးဌာနနဲ့ တိုင်းဒေသကြီး အစိုးရကလည်း ကျွန်မတို့ရဲ့ တောင်သူလယ်သမား ကြီးတွေကို စနစ်တကျပညာပေးဖို့နဲ့ လိုအပ်တာတွေ ပြင်ဆင် ဆောင်ရွက်ထားဖို့ အရေးကြီးတဲ့အတွက် အထူးမှာကြားလိုပါ တယ်။ ဒီလိုမျိုး နိုင်ငံဖြတ်ကျော်ပြီး ကူးစက်မှုတွေ မဖြစ်အောင် ကြိုတင်သတိပေးချက်တွေ မြန်မြန်ဆန်ဆန် ထုတ်ပေးဖို့၊ သတိပြုသင့်တဲ့ အခြေအနေတွေကို မျှဝေပေးဖို့ လိုအပ် ပါတယ်။
လယ်ယာအခြေခံအရင်းအမြစ်များ တိုးတက်ရေး
လယ်ယာကဏ္ဍဖွံ့ဖြိုးရေးအတွက် လိုအပ်တဲ့ စီမံကိန်းတွေ၊ ကျေးလက်လမ်းပန်းဆက်သွယ်ရေး အပါအဝင် လိုအပ်တဲ့ သိုလှောင်ရုံတွေ၊ အခြောက်ခံစက်တွေ၊ မျိုးကောင်းမျိုးသန့်ရရှိရေး တွေ၊ ဈေးကွက်ရရှိရေးတွေဟာ အမြဲကြိုးပမ်းနေမယ့် လုပ်ငန်း တွေပဲ ဖြစ်ပါတယ်။ ကျွန်မတို့ရဲ့ တောင်သူလယ်သမားတွေအတွက် လိုအပ်တဲ့ ကုန်ထုတ်လမ်းတွေ၊ နည်းပညာတွေနဲ့ အခြားအရင်း အမြစ်တွေ တိုးတက်လာရေးကို အစိုးရပိုင်းက တတ်နိုင်သမျှ ဖြည့်ဆည်းဆောင်ရွက်နေသလိုပါပဲ၊ ဒီနေ့ကမ္ဘာကြီးနဲ့ ကမ္ဘာ့ ဈေးကွက်၊ ကမ္ဘာ့ နိုင်ငံရေး၊ စီးပွားရေးတွေဟာနေ့စဉ် ပြောင်းလဲ နေတာဖြစ်လို့ ဒါတွေကို မျက်ခြည်မပြတ်လေ့လာပြီး ကျွန်မတို့ရဲ့ တောင်သူလယ်သမားကြီးတွေအနေနဲ့ နိုင်ငံတော်အစိုးရနဲ့ အတူ ပူးပေါင်းပြီး ကြိုးပမ်းပေးပါလို့ အထူးမေတ္တာရပ်ခံ လိုပါတယ်။
ဒီကနေ့ ဒီနေရာကို ရောက်ရှိလာကြတဲ့ ပုဂ္ဂိုလ်အဖွဲ့အစည်း များရဲ့ တင်ပြချက်တွေကို အလေးအနက်ထားမှာ ဖြစ်ပါတယ်။ လယ်ယာကဏ္ဍနဲ့ အဓိကသက်ဆိုင်တဲ့ ပြည်ထောင်စုဝန်ကြီးတွေ၊ ဒုတိယဝန်ကြီးတွေ၊ တိုင်းဒေသကြီး အစိုးရတာဝန်ရှိသူတွေ လည်း ရောက်ရှိနေကြတာကြောင့် ပါဝင်ဆွေးနွေးဖြေကြားပေး ကြမှာ ဖြစ်ပါတယ် ဟု ပြောကြားသည်။
ဒေသခံများ၏ တင်ပြချက်များကို တာဝန်ရှိသူများက ပြန်လည်ရှင်းလင်း
ထို့နောက် အစုအဖွဲ့အသီးသီးမှ ဒေသခံတောင်သူ လယ်သမား ကိုယ်စားလှယ် လေးဦးဖြစ်ကြသည့် ဇလွန်မြို့နယ်မှ တောင်သူ ဒေါ်သန်းသန်းဦး တင်ပြသည့် လယ်ယာလုပ် သားများ ရှားပါးလာပြီး သီနှံများ ပိုးမွှားကျရောက်မှုများရှိနေသဖြင့် မြို့နယ် များအတွက် ဆေးဖျန်းစက်များ ဆောင်ရွက်ပေးရန်၊ သီးနှံပေါ် ချိန်တွင် ဈေးနှုန်းများ ကျဆင်းနေသည့်အတွက် ဈေးနှုန်းတစ်ခု သတ်မှတ်ပေးပြီး ဝယ်ယူနိုင်သည့် အကျိုးတူလယ်ယာစနစ် လုပ်ဆောင်နေသည့် အသင်းအဖွဲ့များကို မြို့နယ်တိုင်းတွင် ရောက်ရှိအောင် ဆောင်ရွက်ပေးရန်၊ မြေဩဇာကို ဈေးနှုန်း သက်သာစွာဝယ်ယူနိုင်ရေး ဆောင်ရွက်ပေးရန်၊ သီးနှံပြောင်းလဲ စိုက်ပျိုးမှုကို ခရိုင်၊ မြို့နယ်အဆင့်တွင် ပြီးပြတ်အောင်ဆောင်ရွက် ပေးရန်၊ စပါးစိုက်ဧက ၅၀၀၀ ကျော်ကို အကျိုးပြုသည့် တိမ်ကောနေသော အင်းကောမြောင်းကို အမြန်ဆုံး တူးဖော်ပေး ရန်၊ တစ်နှစ်တစ်ခါ ဝါးဖြင့် ဆောက်လုပ်နေရသည့် ချောင်းကူး တံတားကို အမြန်ဆုံး အခိုင်အမာ တည်ဆောက်ပေးရန် စသည့် ကိစ္စရပ်များကိုလည်းကောင်း။
ဆီဆုံကုန်းကျေးရွာမှ တောင်သူ ဦးလှနိုင်စိုး တင်ပြသည့် မျိုးကောင်းမျိုးသန့် စပါးဈေးနှင့် အရည်အသွေးမြင့် စပါးသီးနှံ ဈေးကွက်တစ်ခု ဖော်ဆောင်ပေးမည့် အသင်းအဖွဲ့များနှင့် ကုမ္ပဏီများအား ကျေးရွာများအရောက် စေလွှတ်ပေးရန်၊ သီးနှံဈေးနှုန်းများကို မစိုက်ပျိုးမီ သတ်မှတ်ကြေညာပေးရန်၊
စိုက်ဘဏ်ချေးငွေ ချေးယူခွင့်မရသည့် လယ်သမားများအား အတိုးနှုန်းသက်သာစွာဖြင့် ပုဂ္ဂလိကဘဏ်များမှ ချေးယူနိုင်ရေး ချိတ်ဆက်ဆောင်ရွက်ပေးရန်၊ စိုက်ပျိုးစရိတ်ချေးငွေကို လုံလောက်စွာ ထုတ်ချေးပေးရန်၊ မြစိမ်းရောင် ကျေးရွာစီမံကိန်းကို ကျေးရွာသစ်စီမံကိန်းကဲ့သို့ ပြောင်းလဲဆောင်ရွက်ပေးရန် ကိစ္စ ရပ်များကို လည်းကောင်း။
လှေဆွဲကျေးရွာမှ တောင်သူ ဦးတိုးတိုးဝင်း တင်ပြသည့် ပြည်ပဈေးကွက်ဝင် အထွက်ကောင်း မျိုးကောင်းမျိုးသန့်များကို တောင်သူလယ်သမားများလက်ဝယ်သို့ အချိန်မီဖြန့်ဖြူးပေးရန် နှင့် စိုက်ပျိုးသင့်သည့်မျိုးကို အချိန်မီကြေညာပေးရန်၊ စိုက်ပျိုး ရေးဦးစီးဌာနက မစိုက်ပျိုးမီ မြေဆီလွှာတိုင်းတာစစ်ဆေးမှုများ ပြုလုပ်ပေးရန်၊ တောင်သူလယ်သမားများ လက်ဝယ်သို့ မျိုးကောင်းမျိုးသန့်၊ နည်းပညာနှင့် အရင်းအနှီး မြန်မြန်ဆန်ဆန် ရောက်ရှိအောင် ဆောင်ရွက်ပေးရန်၊ ဧကကွက်များနှင့် အဆင့်မြင့်လယ်ယာများ ဖော်ထုတ်ပေးရန်၊ ကုန်ထုတ်လမ်းများ ရာသီမရွေးသွားလာနိုင်အောင် ဆောင်ရွက်ပေးရန်၊ နိုင်ငံတော်က စိုက်ပျိုးရေးဝန်ထမ်းများအတွက် လိုအပ်သော ပံ့ပိုးကူညီမှုများ ဆောင်ရွက်ပေးရန်၊ ဓာတ်မြေဩဇာ၊ စိုက်ပျိုးရေးဆေးများ အတွက် သွင်းအားစုအသုံးစရိတ်များ မြင့်မားနေသည့်အတွက် ပုဂ္ဂလိကဘဏ်များနှင့် နိုင်ငံတော်က ထဲထဲဝင်ဝင် ကူညီ ဆောင်ရွက်ပေးရန်၊ လယ်ယာမြေသီးနှံများတွင် ပိုးမွှားရောဂါကျ ရောက်လာပါက အချိန်မီကာကွယ်နိုင်ရေးအတွက် ကောင်းကင် ဆေးဖျန်းစက်များအား ဈေးနှုန်းသက်သာစွာဖြင့်ဌာနမှ ဖြစ်စေ၊ ပုဂ္ဂလိကမှဖြစ်စေ ငှားရမ်းအသုံးပြုနိုင်ရေး စီစဉ်ဆောင်ရွက် ပေးရန်၊ စပါးတင်ပို့ရောင်းချခွင့်အား လုံးလုံးပိတ်ပင်ထားခြင်းမျိုး မဟုတ်ဘဲ ဝယ်ယူသူရှိပါက ရောင်းချခွင့်ပေးရန် ကိစ္စရပ်များကို လည်းကောင်း။
ရွာသစ်တောင်ကျေးရွာမှ ဦးလှရွှေ တင်ပြသည့် ဆန်စက်ပိုင် များအနေဖြင့် စပါးအရည်အသွေးကောင်းမွန်စေရန်နှင့် လယ်သမားများထံမှ စပါးများ ပိုမိုဝယ်ယူထိန်းသိမ်းထားရန် အတွက် သိုလှောင်ရုံများ၊ ခေတ်မီအခြောက်ခံစက်များ တိုးချဲ့ ဆောင်ရွက်ရန်အတွက် အတိုးနှုန်းသက်သာသော နှစ်ရှည် ချေးငွေ စီစဉ်ပေးရန်၊ တရုတ်နိုင်ငံဈေးကွက်၊ အိန္ဒိယဈေးကွက် အပြင် အခြားအိမ်နီးချင်းနိုင်ငံ ဈေးကွက်များမှ ဈေးကွက်ဝေစု ရရှိရေးအတွက် နိုင်ငံတော်အစိုးရနှင့် ပုဂ္ဂလိကလုပ်ငန်းရှင်များ ပူးပေါင်းဆောင်ရွက်ပေးရန်၊ စပါးပေါ်ချိန်တွင် ကာလတိုချေးငွေ စီစဉ်ပေးရန်၊ နိုင်ငံတော်အစိုးရ အနေဖြင့် SME လုပ်ငန်းများ အား ကူညီပေးရန် ကိစ္စရပ်များကိုလည်းကောင်း ပြည်ထောင်စု ဝန်ကြီး ဒေါက်တာအောင်သူ၊ ဧရာ၀တီတိုင်းဒေသကြီး ဝန်ကြီးချုပ် ဦးလှမိုးအောင်၊ ဒုတိယဝန်ကြီးများဖြစ်ကြသည့် ဦးအောင်ထူး၊ ဦးမောင်မောင်ဝင်းနှင့် တာဝန်ရှိသူများက ဆောင်ရွက်ပေးနိုင်မည့် လုပ်ငန်းများနှင့် အချိန်ယူဆောင်ရွက် ရမည့် လုပ်ငန်းများကို ရှင်းလင်းဖြေကြားကြပြီး နိုင်ငံတော်၏အတိုင်ပင်ခံပုဂ္ဂိုလ်က ဖြည့်စွက်ရှင်းလင်းသည်။
ဖြည့်စွက်ရှင်းလင်း
ထို့နောက် ဆွေးနွေးတင်ပြရန် စာရင်းပေးထားသည့် ၂၅ ဦးအနက်မှ မဲပေါက်သူ သုံးဦးဖြစ်သည့် ပကွန်ကျေးရွာမှ တောင်သူ ဦးမောင်စိုး၏ တောင်သူလယ်သမားများအား နှစ်ရှည်ချေးငွေများ ထုတ်ချေးပေးနိုင်ရန်ကိစ္စရပ်ကို လည်းကောင်း၊ ရေကြည်မြို့နယ်မှ လုပ်ငန်းရှင် ဦးစိုးနိုင်၏ လယ်ယာမြေပေါင်နှံခွင့်နှင့် လယ်ယာမြေ၏ တန်ဖိုး ၃၀ ရာခိုင်နှုန်း အထိ ချေးယူပေါင်နှံခွင့်ရရှိရေး ကိစ္စရပ်ကိုလည်းကောင်း၊ ကျုံပျော်မြို့နယ်မှ တောင်သူ ဦးစိုးတင့်၏ ဟင်္သာတ၊ ဇလွန်၊ ဓနုဖြူ၊ ကျုံပျော်၊ ပန်းတနော်မြို့နယ် ငါးမြို့နယ်အား ဖြတ်သန်း စီးဆင်းသည့် ဗောဓိချောင်းရိုးကြီးသည် နွေရာသီတွင် ရေခန်း ခြောက်နေသည့်အတွက် ဒေသခံများ အခက်အခဲကြုံတွေ့နေ ရမှုနှင့် ချောင်းရိုးအတွင်း ရေမခန်းခြောက်အောင် ဆောင်ရွက် ပေးရန်ကိစ္စရပ်ကို လည်းကောင်း ပြည်ထောင်စုဝန်ကြီး ဒေါက်တာအောင်သူ၊ ဧရာ၀တီတိုင်းဒေသကြီး ဝန်ကြီးချုပ် ဦးလှမိုးအောင်၊ ဒုတိယဝန်ကြီး ဦးမောင်မောင်ဝင်းတို့က ဆောင်ရွက်ရမည့် လုပ်ငန်းစဉ်များနှင့် ဆောင်ရွက်ပေးနိုင်မည့် အခြေအနေများကို ရှင်းလင်းဖြေကြားကြပြီး နိုင်ငံတော်၏ အတိုင်ပင်ခံပုဂ္ဂိုလ်က ဖြည့်စွက်ရှင်းလင်းသည်။
ယင်းနောက် နိုင်ငံတော်၏ အတိုင်ပင်ခံပုဂ္ဂိုလ်က နိဂုံးချုပ် အမှာစကားပြောကြားရာတွင် ကျွန်မ အားလုံးခြုံငုံပြီး ပြောရမယ်ဆိုရင် အဓိကလိုအပ်ချက်ကတော့ တောင်သူလယ် သမားကြီးများနဲ့ အစိုးရအကြားမှာ ထိတွေ့မှုလိုတယ်လို့ မြင်ပါ တယ်။ တောင်သူလယ်သမားကြီးများ၊ အစိုးရနဲ့ လုပ်ငန်းရှင်များ ဒီဆွေးနွေးပွဲမှာ အားလုံးပါလာပါတယ်။ တောင်သူလယ်သမား ကြီးတွေဘက်ကလည်း အများစုပါလာတယ်။ လုပ်ငန်းရှင်တွေ လည်းပါလာတယ်။ အစိုးရဘက်ကလည်းပါတယ်။ ဒီလိုတွေ့ဆုံမှု မျိုးဆိုတာ တစ်ခါတစ်ခါတွေ့ဆုံရုံနဲ့မပြီးပါဘူး။ တစ်ချိန်လုံး ဆက်သွယ်မှုရှိနေဖို့လည်း လိုပါတယ်။ အဓိကတာဝန်ကတော့ တိုင်းအစိုးရမှာရှိပါတယ်။ ဘာဖြစ်လို့လဲဆိုတော့ ပြည်ထောင်စု အစိုးရအဆင့်က တစ်ချိန်လုံးဆင်းဖို့ဆိုတာ မဖြစ်နိုင်ပါဘူး။ တစ်တိုင်းပြည်လုံးကို မျှပြီးတော့ လုပ်ရပါတယ်။ ဧရာ၀တီတိုင်း တစ်ခုတည်းအတွက်တင် မဟုတ်ဘူး၊ အခြား တိုင်းနဲ့ပြည်နယ် (၁၃)ခုအတွက်ပါ လုပ်ရတာဖြစ်ပါတယ်။ ကျွန်မ ဆော်ဩချင်တာ ကတော့ အထူးသဖြင့် ဧရာ၀တီလို စိုက်ပျိုးမွေးမြူရေးကို အားကိုးအခြေခံနေရတဲ့ တိုင်းတစ်ခုမှာဆိုရင် တိုင်းအစိုးရအဖွဲ့ဝင် များ၊ တိုင်းအစိုးရရဲ့ အုပ်ချုပ်မှုဆိုင်ရာမှာရှိနေတဲ့ ဝန်ထမ်းများဟာ တောင်သူလယ်သမားအရေးတွေနဲ့ ပတ်သက်လို့ အမြဲထိတွေ့မှု ရှိနေဖို့လိုပါတယ်။ တချို့မေးသွားတဲ့ ကိစ္စတွေမှာ ဒေါက်တာ အောင်သူ ပြန်ဖြေတာ၊ ဦးမောင်မောင်ဝင်းတို့ ပြန်ဖြေတာမှာ ဆိုရင် တောင်သူလယ်သမားတချို့က သတ်မှတ်ထားတဲ့ စည်းမျဉ်း၊ စည်းကမ်းဥပဒေတွေကို တိတိကျကျ မသိတာလည်း ပါပါတယ်။ အဲဒါတွေကို သိအောင် လုပ်ပေးဖို့ဆိုတာဟာ အစိုးရ မှာ တာဝန်ရှိပါတယ်။ ဗဟိုအစိုးရထက် တိုင်းအစိုးရကနေ ကွင်းဆင်းထိတွေ့ပြီးတော့ ဒါလုပ်ချင်ရင် ဒီအဆင့်တွေကို ဖြတ်သန်းရမယ်ဆိုပြီးတော့ ရှင်းပြပေးဖို့လိုပါတယ်။
နောက်တစ်ခုကလည်း တောင်သူလယ်သမားတွေရဲ့ လိုအပ်ချက်တွေကို ဗဟိုအစိုးရကနေပြီးတော့ မသိဘူးဆိုရင် ဗဟိုအစိုးရဆီရောက်အောင် တင်ပြရမှာက တိုင်းအစိုးရရဲ့ တာဝန်ဖြစ်ပါတယ်။ တိုင်း၊ ပြည်နယ်အစိုးရတွေက တစ်နည်း အားဖြင့်ပြောရမယ်ဆိုရင် ဗဟိုအစိုးရနဲ့ ပြည်သူလူထုတွေကြားမှာ ရှိနေတဲ့ တံတားတစ်ခုပဲ ဖြစ်ပါတယ်။ အဲဒါကြောင့် ခြုံငုံပြီးတော့ အကြံပြုချင်တာက တိုင်းအစိုးရအဖွဲ့ဝင်များနဲ့ တိုင်းမှာရှိတဲ့ အုပ်ချုပ်ရေးယ္တရားက ဝန်ထမ်းများဟာ တောင်သူလယ်သမား များနဲ့ ပုံမှန်ထိတွေ့မှုရှိအောင် လုပ်ကြပါ၊ ကွင်းဆင်းပါ၊ လယ်သမားကြီးများဆီရောက်အောင်သွားပါ၊ ဒါမှမဟုတ် တစ်နေရာမှာ စုပြီးတော့ တွေ့ဆုံဆွေးနွေးပွဲတွေ လုပ်ပါ။ အခု ဓနုဖြူမှာဆိုပေမယ့်လည်း နေရာတော်တော်များများက လာတယ်ဆိုတော့ အားလုံးကနေပြီးတော့ အသေးစိတ် ကိုယ့်ရဲ့ ဒေသမှာ ဘာတွေဖြစ်နေတယ်၊ ဘာတွေလိုအပ်ချက် တွေရှိနေ တယ်ဆိုတာ တင်ပြနိုင်မှာမဟုတ်ပါဘူး။ ကျွန်မတို့ကလည်း ဒီလိုကန့်သတ်ထားတဲ့ အချိန်အတွင်းမှာ အားလုံးကို ပြည့်ပြည့်၀၀ ဖြည့်ပေးနိုင်မှာ မဟုတ်ပါဘူး။ တစ်ချိန်လုံး ထိတွေ့နေဖို့ကတော့ အင်မတန်မှ အရေးကြီးပါတယ်။
နောက်ပြီးတော့ တောင်သူလယ်သမားကြီးများအနေနဲ့ စိုက်ပျိုးရေး၊ မွေးမြူရေး နှင့်ဆည်မြောင်းဝန်ကြီးဌာနကနေပြီးတော့ ထုတ်ပြန်တဲ့ သတင်းအချက်အလက်တွေကို ရအောင်ယူကြ ပါ။ ကိုယ့်မှာ တယ်လီဖုန်းတစ်ခုရှိတယ်ဆိုရင် လုပ်လို့ရပါတယ်။ အဲဒါကို ဝါယမစိုက်ထုတ်ပြီးတော့ လုပ်ကြပါလို့ တိုက်တွန်းချင် ပါတယ်။ အဲဒီလိုလုပ်လိုက်ရင် ကိုယ့်ရဲ့ အသိအမြင်တွေလည်း အများကြီးကျယ်ပြန့်သွားမယ်။ နောက်ပြီးတော့ ပြဿနာလို့ မြင်နေတဲ့ကိစ္စတွေကိုလည်း ဘယ်လိုဖြေရှင်းရမလဲဆိုတဲ့ အဖြေ ကိုလည်း ရသွားမှာဖြစ်ပါတယ်။
တစ်ဆင့်ပြီးတစ်ဆင့် တန်ဖိုးတက်လာအောင်လုပ်
နိဂုံးချုပ်အနေနဲ့ ကျွန်မတို့ကို ဒီလိုလာရောက်တွေ့ဆုံတဲ့ အတွက် အများကြီးကျေးဇူးတင်ပါတယ်။ ကျွန်မတို့နိုင်ငံဟာ စိုက်ပျိုးရေးကို အခြေခံတဲ့နိုင်ငံလို့ ကျွန်မ ပြောသွားပါတယ်။ စိုက်ပျိုးရေးကို အခြေခံတဲ့နိုင်ငံဆိုတော့ တချို့တွေက ဒါကို အထင်သေးကြတယ်။ စက်မှုလက်မှုကိုအားကိုးတဲ့ နိုင်ငံတွေက သာ ဖွံ့ဖြိုးတယ်၊ တိုးတက်တယ်၊ ရှေ့ရောက်တယ်လို့ ထင်နေကြ ပါတယ်။ ဒီလိုမဟုတ်ပါဘူး။ ကမ္ဘာပေါ်မှာ အချမ်းသာဆုံး နိုင်ငံ တချို့ဆိုရင် စိုက်ပျိုးရေးကို အခြေခံတဲ့ စက်မှုလက်မှုတိုးတက်တဲ့ နိုင်ငံဖြစ်ပါတယ်။ သူတို့အခြေခံက စိုက်ပျိုးရေး၊ စိုက်ပျိုးရေး ကုန်ပစ္စည်းတွေကို သူတို့ကနေပြီးတော့ တစ်ဆင့်ပြီးတစ်ဆင့် ပိုပြီးတော့ တန်ဖိုးတက်လာအောင်လုပ်ပြီးတော့ အဲဒီကနေ ဖွံ့ဖြိုးတိုးတက်တာပါ။
ကျွန်မတို့နိုင်ငံကို ဒီလိုနိုင်ငံဖြစ်နိုင်မလားလို့ မကြာခဏ စဉ်းစားပါတယ်။ ဘာဖြစ်လို့လဲဆိုတော့ အခုခေတ်မှာ က္ဘာ့ရဲ့ လိုအပ်ချက်ကြီးတစ်ခုက စားနပ်ရိက္ခာ ဖူလုံရေးပါ။ အားလုံးက ဒါကို စိုးရိမ်လာကြပါတယ်။ စားနပ်ရိက္ခာဖူလုံကြပါ့မလား၊ တိုးတက်ဖွံ့ဖြိုးပါတယ်ဆိုတဲ့ နိုင်ငံတွေ တော်တော်များများမှာ သူတို့ရဲ့ စိုက်ပျိုးရေးကဏ္ဍက အင်မတန်မှ ကျဆင်းလာတယ်။ ကျဆင်းလာတဲ့အခါကျတော့ အစားအစာကို တခြားနိုင်ငံတွေက နေပြီးတော့ တင်သွင်းရတယ်၊ ပြောရမယ်ဆိုရင် ကျွန်မတို့လို စိုက်ပျိုးရေးကို အခြေခံပြီးတော့ အစားအစာထုတ်တဲ့ နိုင်ငံတွေ ဘက်ကို လှည့်ရမှာပဲဖြစ်ပါတယ်။
အဲဒီတော့ ကျွန်မတို့က ကမ္ဘာ့ရဲ့အခြေအနေတွေကို ကြည့်ပြီးတော့ ကျွန်မတို့နိုင်ငံရဲ့ ဖွံ့ဖြိုးတိုးတက်ရေးရော၊ တစ်က္ဘာလုံးရဲ့ လိုအပ်ချက်တွေကို ဖြည့်ဆည်းရေးရော နှစ်ခု အတွက် ကျွန်မတို့အကျိုးအတွက်ရော၊ အများအကျိုးအတွက်ရော ကြည့်ပြီးတော့ လုပ်သွားနိုင်မယ်ဆိုရင် တောင်သူလယ်သမားကြီး တွေအတွက်တင်မကဘဲ ကျွန်မတို့နိုင်ငံအတွက် အများကြီး အကျိုးရှိမယ်လို့ ယုံကြည်ပါတယ်။
မကြာခဏဆွေးနွေးပွဲတွေလုပ်စေချင်
ဒါကြောင့်မို့ ကျွန်မတို့ တောင်သူလယ်သမားကြီးတွေဟာ မိမိကိုယ်ကိုယ်ယုံကြည်မှုနဲ့ လုပ်ကြပါ။ ပြဿနာရှိရင် သက်ဆိုင်ရာ ဌာနတွေကို အသိပေးပါ။ ဘာမှမပြောဘဲနဲ့တော့ ဘာအဖြေမှ ရမှာမဟုတ်ပါဘူး။ ပြောစရာရှိရင်ပြောပါ၊ တိုင်းအစိုးရနဲ့ တိုင်း အုပ်ချုပ်ရေးဌာနတွေက ကွင်းဆင်းပါ၊ တောင်သူလယ်သမားကြီး တွေနဲ့ ထိတွေ့မှု အမြဲရှိစေချင်ပါတယ်။ နောက်ပြီးတော့ မကြာခဏဆွေးနွေးပွဲတွေ လုပ်စေချင်ပါတယ်။ အဲဒီလိုလုပ်မှ တစ်ဖက်ကစကားကို တစ်ဖက်က ကြားရမှာဖြစ်ပါတယ်။ အဲဒီတော့မှရှိတဲ့ပြဿနာတွေကို အမြန်ဆုံး အတူတူပူးတွဲပြီး တော့ ဖြေရှင်းနိုင်မှာ ဖြစ်ပါတယ် ဟု ပြောကြားသည်။
တွေ့ဆုံပွဲအပြီးတွင် နိုင်ငံတော်၏ အတိုင်ပင်ခံပုဂ္ဂိုလ်သည် တောင်သူလယ်သမားများနှင့်အတူ နေ့လယ်စာကို အတူတကွ သုံးဆောင်ပြီး ရင်းရင်းနှီးနှီး နှုတ်ဆက်စကားပြောကြားသည်။
ယနေ့တွေ့ဆုံပွဲ အခမ်းအနားသို့ ဒေသခံတောင်သူ လယ်သမား ၁၉၆၃ ဦး၊ ဒေသခံဆန်စက်လုပ်ငန်းရှင်များ၊ ဆန်ကုန်သည်များနှင့် ဖိတ်ကြားထားသည့် ဧည့်သည်တော် ၄၀၀ ၊ လွှတ်တော်ကိုယ်စားလှယ်များနှင့် ဌာနဆိုင်ရာ ဧည့်သည် တော်များ ၁၁၂ ဦး စုစုပေါင်း ၂၄၇၅ ဦး တက်ရောက်ကြသည်။
မွန်းလွဲပိုင်းတွင် နိုင်ငံတော်၏ အတိုင်ပင်ခံပုဂ္ဂိုလ်နှင့်အဖွဲ့ သည် ရဟတ်ယာဉ်များဖြင့် ဓနုဖြူမြို့မှ ပြန်လည်ထွက်ခွာကြပြီး ညနေပိုင်းတွင် နေပြည်တော်သို့ ပြန်လည်ရောက်ရှိကြသည်။
သတင်းစဉ်