ပြည်ထောင်စုဝန်ကြီး ဒေါက်တာဖေမြင့် ဂျပန်နိုင်ငံ ယဉ်ကျေးမှုရေးရာကော်မရှင်နာနှင့် တွေ့ဆုံဆွေးနွေးပြီး ဂျပန်ရင်သွေးရုပ်ရှင်ဇာတ်ကားပြသမှုအစီအစဉ် တက်ရောက်

တိုကျို အောက်တိုဘာ ၂၆

ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်နှင့် အဖွဲ့သည် ယနေ့ နံနက် ၁၁ နာရီတွင် ဂျပန်နိုင်ငံယဉ်ကျေးမှုရေးရာဌာန၌ ယဉ်ကျေးမှုရေးရာကော်မရှင်နာ မစ္စတာ မီရတကိုဟေ ဦးဆောင်သည့်အဖွဲ့နှင့် တွေ့ဆုံသည်။

တွေ့ဆုံစဉ် မြန်မာ-ဂျပန် နှစ်နိုင်ငံပူးပေါင်း ၍ ရုပ်ရှင်ဇာတ်ကားများရိုက်ကူးခဲ့မှု၊ ရုပ်ရှင် ဖလင်များ ပြန်လည်ပြုပြင်ထိန်းသိမ်းသည့် လုပ်ငန်းသည် ရုပ်ရှင်ဖွံ့ဖြိုးတိုးတက်ရေး အတွက် အရေးပါမှု၊ မြန်မာ့ရုပ်ရှင်လောက ဖွံ့ဖြိုးတိုးတက်ရေးအတွက် စီစဉ်ဆောင်ရွက် နေမှုနှင့် လိုအပ်သည့် အကူအညီများ ပံ့ပိုးပေး စေလိုမှုတို့ကို ဆွေးနွေးကြသည်။

ဂျပန်ရင်သွေးဇာတ်ကားပြသ

ပြည်ထောင်စုဝန်ကြီးနှင့် အဖွဲ့သည် မွန်းတည့် ၁၂ နာရီတွင် ယဉ်ကျေးမှုရေးရာဌာန၌ ဂျပန်အမျိုးသား ရုပ်ရှင်မော်ကွန်းတိုက်မှ ဒစ်ဂျစ်တယ်စနစ်သို့ ပြုပြင်ထိန်းသိမ်းခဲ့သည့် ဂျပန်ရင်သွေးအမည်ရှိ မြန်မာရုပ်ရှင်ဇာတ်ကား ကို ပြသမှုအစီအစဉ်သို့ တက်ရောက်ကြသည်။

ရှေးဦးစွာ ဂျပန်အမျိုးသားရုပ်ရှင် မော်ကွန်းတိုက်မှ ဂျပန်နိုင်ငံယဉ်ကျေးမှုရေးရာ ဌာနမှ ကော်မရှင်နာ မစ္စတာ မီရတကိုဟေနှင့် ဂျပန်ရုပ်ရှင်မော်ကွန်းတိုက်မှ ညွှန်ကြားရေးမှူး မစ္စတာ အိုကဂျီးမား ဟီဆာရှီ တို့က နှုတ်ခွန်း ဆက်စကား ပြောကြားကြသည်။

ဆက်လက်၍ ပြည်ထောင်စုဝန်ကြီးက နှုတ်ခွန်းဆက်စကားပြောကြားရာတွင် ဂျပန် နိုင်ငံနှင့် ပြည်ပတွင် ပထမဆုံးရိုက်ကူးခဲ့သည့် မြန်မာရုပ်ရှင်ဇာတ်ကားကို ဖလင်စနစ်မှ ဒစ်ဂျစ်တယ်စနစ်သို့ ပြုပြင်ပြောင်းလဲ ထိန်းသိမ်းပေးနိုင်ခဲ့ခြင်းသည် မြန်မာနှင့် ဂျပန် နိုင်ငံတို့ ပူးပေါင်းဆောင်ရွက်မှုမှ ထွက်ပေါ်လာ သည့် ရလဒ်ဖြစ်ပါကြောင်း၊ ထိုပြုပြင်ထိန်းသိမ်း ထားသော ရုပ်ရှင်ဇာတ်ကားကို ၂၀၂၀ ပြည့်နှစ် မြန်မာ့ရုပ်ရှင် ရာပြည့်အထိမ်းအမှတ်ကာလ တွင် မြန်မာနိုင်ငံသို့ လွှဲပြောင်းပေးမည်ဖြစ်ရာ မြန်မာတို့အတွက် တန်ဖိုးရှိသည့် အနုပညာ ပစ္စည်းတစ်ခု ဖော်ထုတ်ထားရှိမှုကို ပြန်လည် ရရှိခြင်းဖြစ်ပါကြောင်း၊ ထိုဇာတ်ကားကို ပြသ နိုင်ခြင်းဖြင့် မြန်မာတို့အတွက် တန်ဖိုးရှိသည့် အနုပညာပစ္စည်းများကို ထိန်းသိမ်းရန် လိုအပ်မှု အသိရရှိကြမည်ဖြစ်၍ အကျိုးကျေးဇူး ရရှိပါကြောင်း။

တန်ဖိုးရှိသည့် အနုပညာပစ္စည်း

ဂျပန်နိုင်ငံအတွက်လည်း ထိုခေတ် ထိုအချိန်က အခြေအနေများကို ပြန်လည် မြင်တွေ့ရပြီး သုံးသပ်ဆောင်ရွက်နိုင်သည့် အပြင် တန်ဖိုးရှိသည့် အနုပညာပစ္စည်းတစ်ခုကို ပြန်လည်ဖော်ထုတ်ထိန်းသိမ်းနိုင်ခြင်း ဖြစ်ပါ ကြောင်း၊ ရုပ်ရှင်အနုပညာသည် ချစ်ကြည် ရင်းနှီးမှုနှင့် နားလည်မှုကို ဆောင်ရွက်ပေး နိုင်သည့် Soft Power အဖြစ် နိုင်ငံတကာတွင် သတ်မှတ်ပြောဆိုလျက်ရှိရာ နှစ်နိုင်ငံ၏ ရုပ်ရှင် အနုပညာနှင့် ယဉ်ကျေးမှုဆိုင်ရာ ပူးပေါင်း ဆောင်ရွက်မှုသည် နိုင်ငံရေး၊ လူမှုရေး၊ စီးပွား ရေး စသည့် ကဏ္ဍများစွာတွင် ပူးပေါင်း ဆောင်ရွက်မှုများ တိုးတက်လာရန်အတွက် အထောက်အကူပြုမည်ဟု ယုံကြည်ပါကြောင်း ပြောကြားသည်။

စကားဝိုင်းဆွေးနွေး

ထို့နောက် ပြည်ထောင်စုဝန်ကြီးနှင့် အဖွဲ့သည် ဂျပန်ရင်သွေး ရုပ်ရှင်ဇာတ်ကား ပြသမှုနှင့် ၎င်းရုပ်ရှင်ဇာတ်ကားဆိုင်ရာ စကားဝိုင်းတွင် အေဝမ်းဖလင်ကုမ္ပဏီမှ ဒါရိုက်တာ ဦးသိန်းထွဋ်နှင့် Save Myanmar Film မှ စီမံကိန်းဒါရိုက်တာ ဦးဥက္ကာတို့၏ ဆွေးနွေးမှုကို ကြည့်ရှုအားပေးကြသည်။

“ဂျပန်ရင်သွေး”အမည်ရှိ မြန်မာရုပ်ရှင် ဇာတ်ကား၏ ဂျပန်အမည်မှာ “နိပွန်မူဆူမီ” (Japanese Daughter) ဖြစ်ပြီး ၁၉၃၅ ခုနှစ်က ဂျပန်နိုင်ငံ တိုကျိုမြို့တွင် မြန်မာနိုင်ငံမှ မြန်မာ အဆွေ-အေဝမ်း ဖလင်ကုမ္ပဏီနှင့် ဂျပန်နိုင်ငံမှ ပီစီအယ်လ်ကုမ္ပဏီတို့ ပူးပေါင်းရိုက်ကူးခဲ့ခြင်း ဖြစ်ကြောင်း၊ မြန်မာနိုင်ငံမှ ဒါရိုက်တာ ဦးညီပုနှင့် ဦးမောင်မောင်စိုးတို့သည် ဂျပန်နိုင်ငံ တွင် ရုပ်ရှင်ပညာသင်ယူစဉ် ၁၉၃၄ ခုနှစ် အတွင်း ပါဝင်သရုပ်ဆောင်ရိုက်ကူးခဲ့ရာ ဂျပန် အစိုးရ၏ အကူအညီများစွာ ရရှိခဲ့ကြောင်း သိရသည်။

ရုပ်ရှင်ရာပြည့်တွင် ပြသရန်စီစဉ်

“ဂျပန်ရင်သွေး” ရုပ်ရှင်၏ ဇာတ်လမ်း အကျဉ်းမှာ ဂျပန်ရောက် မြန်မာလေယာဉ် မောင်း လူငယ်နှင့် ဂျပန်အမျိုးသမီးငယ်တို့၏ အချစ်ဇာတ်လမ်းဖြစ်ပြီး ဂျပန်နိုင်ငံနှင့် ပြည်ပ တွင် ပထမဆုံးရိုက်ကူးခဲ့သည့် မြန်မာ့ရုပ်ရှင် ဇာတ်ကားအဖြစ် မှတ်တမ်းတင်နိုင်ခဲ့သည်။ ၁၉၃၅ ခုနှစ် နိုဝင်ဘာ ၃၀ ရက်တွင် ရန်ကုန်မြို့ အိုလံပီယာနှင့် ဘုရင့်ရုပ်ရှင်ရုံများတွင် “လေးလရာသီ ဂျပန်ပြည်” ရုပ်ရှင်ဇာတ်ကား နှင့်တွဲ၍ တစ်ပြိုင်နက်ပြသ သကဲ့သို့ ဂျပန် နိုင်ငံနှင့် ထိုင်းနိုင်ငံတို့တွင်လည်း အချိန်ကိုက် ညှိနှိုင်း၍ ရုံတင်ပြသခဲ့ရာ ဂျပန်ပရိသတ်များ စိတ်ဝင်စားစွာဖြင့် အားပေးကြည့်ရှုခဲ့ကြပြီး ဂျပန်သတင်းစာများတွင်လည်း ကျယ်ကျယ် ပြန့်ပြန့် ရေးသားဖော်ပြခဲ့ကြသည်။ ထိုဇာတ်လမ်းကို ၁၉၉၂ ခုနှစ်တွင် ဂျပန်နိုင်ငံ၌ ကျင်းပခဲ့သည့် အရှေ့တောင်အာရှ ရုပ်ရှင် ပွဲတော်တွင်လည်း ပြန်လည်ပြသခဲ့ကာ ၂၀၂၀ ပြည့်နှစ် မြန်မာ့ရုပ်ရှင် ရာပြည့်အထိမ်း အမှတ် အခမ်းအနားတွင်လည်း ၎င်းဇာတ်ကား ကို ပြသရန် စီစဉ်ထားကြောင်း သိရသည်။

ယင်းနောက် မွန်းလွဲ ၃ နာရီတွင် ပြည်ထောင်စုဝန်ကြီးသည် ဂျပန်နိုင်ငံ၏ အကြီးဆုံးသတင်းစာဖြစ်သည့် ယူမီယူရီ ရှင်ဘွန်း သတင်းစာမှ သတင်းထောက်ဖြစ်သူ မစ္စ လီဆယူနေမ နှင့် အန်အိတ်ချ်ကေ ရုပ်သံ လိုင်း မြန်မာဘာသာအစီအစဉ်မှ ထုတ်လုပ်သူ ဒေါ်ခင်အေးငယ်တို့၏ တွေ့ဆုံမေးမြန်းမှုအပေါ် ဖြေကြားခဲ့သည်။

ညနေပိုင်းတွင် တိုကျိုမြို့ရှိ ဂျပန်ဘောလုံး ပြတိုက်သို့ ရောက်ရှိကြပြီး ၎င်းတွင် ဂျပန်နိုင်ငံ တိုကျိုစက်မှုတက္ကသိုလ်သို့ ၁၉၂၀ ပြည့်နှစ်က ပညာသင်ယူရန် ရောက်ရှိခဲ့သည့် ဦးကျော်ဒင် ၏ ဘောလုံးပညာသင်ကြားပေးမှု၊ ထူးချွန်သည့် ဘောလုံးသမားများ ရှာဖွေဖွဲ့စည်းပြီး ၁၉၃၀ ပြည့်နှစ်တွင် ကျင်းပခဲ့သည့် အရှေ့အာရှ ဘောလုံးပြိုင်ပွဲ၌ ဝင်ရောက်ယှဉ်ပြိုင်စဉ် ချန်ပီယံဆုရရှိအောင် အားထုတ်ကြိုးပမ်းပေးခဲ့မှုအပါအဝင် နိုင်ငံတကာဘောလုံးဆိုင်ရာ ဓာတ်ပုံများ၊ အသုံးအဆောင်ပစ္စည်းများကို လှည့်လည်ကြည့်ရှုလေ့လာကြသည်။

ထို့နောက် ပြည်ထောင်စုဝန်ကြီးနှင့် အဖွဲ့ သည် တိုကျိုမြို့ရှိ နာမည်ကျော်နေရာဖြစ်သော Ginza တစ်ဝိုက်ရှိ စာအုပ်ဆိုင်များတွင် လှည့်လည် ကြည့်ရှုလေ့လာကြသည်။

သတင်းစဉ်