မြန်မာ့အလင်းအယ်ဒီတာအာဘော်
မြန်မာနိုင်ငံ၏ လွတ်လပ်ရေးရခါနီး နယ်ချဲ့ဆန့်ကျင်ရေးတိုက်ပွဲ နောက်ဆုံး အချိန်များဟာ တော်လှန်ရေးတိုက်ပွဲဝင် ရဲဘော်ရဲဘက်များအကြား ဆုံးဖြတ်စရာများ၊ အငြင်းပွားစရာများအစုံစုံဖြင့် ရွေးချယ်စရာ လမ်းဆုံ လမ်းခွများနှင့် ကြုံကြရသည်။
လွန်ခဲ့သော အနှစ် ခုနစ်ဆယ်ကျော်ကာလ။
ဝင်ရိုးတန်းနိုင်ငံများဖြစ်သော ဂျာမနီ၊ အီတလီနှင့် ဂျပန်တို့ကို မဟာ မိတ်တို့က နိုင်ခဲ့သည့် က္ဘာ့အခြေအနေတွင်းကာလ။ မြန်မာနိုင်ငံမှာလည်း မဟာမိတ်တို့နှင့် ပူးပေါင်းကာ ဂျပန်တို့ကို တိုက်ထုတ်ခဲ့သည့် ဖက်ဆစ် တော်လှန်ရေးကို နိုင်ခဲ့ပြီ။
ဗြိတိသျှနယ်ချဲ့တို့နှင့် လွတ်လပ်ရေးကိစ္စက ရေရေရာရာ မဖြစ်သေး။ သို့သော်လည်း လက်တွေ့အားဖြင့်မူ က္ဘာ့နိုင်ငံရေး ရေစီးကြောင်းက ကိုလိုနီနိုင်ငံများကို လွတ်လပ်ရေးပေးမှ ရတော့မည်ဆိုသည်ကို ဗြိတိသျှ တို့က နားလည်ပြီးဖြစ်နေပြီ။ အင်္ဂလိပ်ပါလီမန်ထဲတွင် ¤င်းတို့၏ လက်အောက်ခံ ကိုလိုနီနိုင်ငံများကို မည်သို့လွတ်လပ်ရေးပေးရမည် ဆိုသည်ကို ဆွေးနွေးနေရပြီ။ လွတ်လပ်ရေး မပေးချင်ကြသည့် နိုင်ငံရေး ခေါင်းဆောင်များရှိသော်လည်း လွတ်လပ်ရေးပေးမှဖြစ်တော့မည် ဆိုတာကို နားလည်သော နိုင်ငံရေးခေါင်းဆောင်များက အသာစီးရနေသည့် အချိန်။ သို့သော်လည်း လွတ်လပ်ရေးကို ပေးကိုပေးမည် ဟူ၍တော့ မဖြစ်သေး။
သည်လို အခြေအနေက ဗြိတိသျှနိုင်ငံတွင်းမှာ ဖြစ်နေသကဲ့သို့ မြန်မာ နိုင်ငံတွင်းမှာလည်း ဓနသဟာယနိုင်ငံအဖြစ် ဆက်လက်နေမည်လော၊ လုံးဝလွတ်လပ်ရေး ရယူကြမည်လောဟူသည့် သဘောထားကိုလည်း ဆွေးနွေးနေကြသည့်အချိန်။
ဗိုလ်ချုပ်အောင်ဆန်းတို့ကို လန်ဒန်ဆွေးနွေးပွဲအတွက် ဖိတ်ခေါ် ထားပြီးဖြစ်သည်။ လွတ်လပ်ရေးအတွက် ဆွေးနွေးကြမည်။ စစ်တိုက်စရာ မလိုတော့ဘဲ စားပွဲဝိုင်းပေါ်မှာ ပြောဆိုဆွေးနွေး ညှိနှိုင်းကြပြီး လွတ်လပ်ရေးရယူနိုင်တော့မည်လား ဆိုသည့်အချိန်။
နိုင်ငံရေးအခြေအနေက ဗြိတိသျှတို့အနေဖြင့် ဖက်ဆစ်တော်လှန်ရေး တွင် ပါဝင်တိုက်ပွဲဝင်ခဲ့သည့်မြန်မာနိုင်ငံကို အသိအမှတ်ပြုရန် ရှိသလို က္ဘာ့နိုင်ငံရေးအရ လွတ်လပ်ရေးပေးရမည်ကဲ့သို့ ရှိသည်ဆိုသော်လည်း မြန်မာနိုင်ငံသားတို့အတွက်မူ မည်သည်ကမှ သေချာသည် မဟုတ်သေး။ ကာယကံရှင်များက ဘာကိုမှ လွယ်လွယ်ရလိမ့်မည်ဟုတော့ ယတိပြတ် သဘောမထားနိုင်သေး။
နယ်ချဲ့အရင်းရှင်စနစ်ကို ဆုပ်ကိုင်ထားသော အင်အားကြီးနိုင်ငံ တစ်ခုက မြန်မာနိုင်ငံကို အလွယ်တကူ လက်လျှော့ကာ လွတ်လပ်ရေး ပေးပါမည်တဲ့လား၊ လွတ်လပ်ရေး ပေးသည်ဆိုသော်လည်း နိုင်ငံတွင်းက အရေးပါသော သယံဇာတများနှင့် စီးပွားရေးလွတ်လပ်ခွင့်တို့ကို ဆက်လက်ချုပ်ကိုင်ထားလေမည်လား အစရှိသည့် ဆွေးနွေးစရာများ အငြင်းပွားစရာများက နိုင်ငံရေးခေါင်းဆောင်များကြားတွင် ခေါင်းစဉ် အမျိုးမျိုးနှင့် ရှိနေကြသည်။
ဗိုလ်ချုပ်အောင်ဆန်းကိုယ်တိုင် သည်ပင်လျှင် 'လမ်းဆုံလမ်းခွ ရောက်နေသည့် မြန်မာပြည် ဘယ်လမ်းလိုက်မည်မသိ။ လုံးဝ လွတ်လပ်ရေး ကို တစ်နည်းနည်းနဲ့ ရအောင်ယူမည်ဟု ကြေညာပြီး ကျုပ်တို့ဟာ လုံးဝ လွတ်လပ်ရေးကို အေးအေးချမ်းချမ်းနှင့် ရအောင်ကြိုးစားနေကြတယ်၊ လန်ဒန်ဆွေးနွေးပွဲမှာ မပြီးပြတ်ရင် ရှေ့အဖို့ ကျုပ်တို့ ဘာဖြစ်မယ်ဆိုတာ မပြောနိုင်သေးဘူး' ဟူ၍ လန်ဒန်အသွား ပြောဆိုခဲ့ဖူးသည်။ အေးအေး ချမ်းချမ်းနည်းနဲ့ မရရင်တော့ လွတ်လပ်ရေးကို မရရအောင် လုပ်ရလိမ့်မည် ဟုလည်း သန္နိဋ္ဌာန်ချထားပြီးဖြစ်ကြောင်း ပြော၏။
သည်လိုနှင့် လွတ်လပ်ရေးဆွေးနွေးမှုကို ဆက်လက်ညှိနှိုင်းပြီး လွတ်လပ်ရေးအတွက် အတော်ပင် သေချာသွားသည့် အောင်ဆန်း- အက်တလီစာချုပ် ချုပ်ဆိုနိုင်ခဲ့ခြင်းဖြစ်သည်။
လွတ်လပ်ရေးတိုက်ပွဲဝင် ခေါင်းဆောင်များသည် နိုင်ငံရေး နည်းလမ်းကို အသေအချာဆုပ်ကိုင်ပြီး လိုအပ်ပါက တစ်ပြည်လုံး ပုန်ကန် ထကြွရန်လည်း ပြင်ဆင်ခဲ့ကြသည်။ သည်လိုနှင့် မြန်မာနိုင်ငံ လွတ်လပ်ရေး ရခဲ့သည်မှာ အနှစ်ခုနစ်ဆယ်ကျော်ခဲ့ပါပြီ။
နယ်ချဲ့အရင်းရှင်စနစ်ကြီးနှင့် ရင်ဆိုင်ယှဉ်ပြိုင်ခဲ့ကြရာတွင်ပင် နိုင်ငံရေးအရ ဆွေးနွေးညှိနှိုင်းနိုင်ခဲ့ကြသည်။ တိုင်းရင်းသားညီနောင်များ ကြားတွင် စစ်ရေးနည်းသက်သက်ကိုသာ အားကိုးကြခြင်း မဟုတ်ဘဲ နိုင်ငံရေးအရ ဆွေးနွေးညှိနှိုင်းရင်း အဖြေရှာနိုင်ကြမည်ဟူသော ယုံကြည် စိတ်ဖြင့် ပြည်တွင်းငြိမ်းချမ်းရေးပန်းတိုင်သို့ ချီတက်နိုင်ကြပါရန် တိုက်တွန်း နှိုးဆော်လိုက်ပါသည်။ ။
No comments:
Post a Comment