လတ်တလော ပြင်ပတွင် ထွက်ပေါ်နေသည့် မြန်မာနိုင်ငံသတင်းမီဒီယာကောင်စီဝင်အချို့၏ တစ်ဖက်သတ် ကောက်ချက်ချ ဝေဖန်ပြောဆိုနေမှုများ၊ ထိုမှ ဆက်၍ အခြားသူများကပါ ထင်မြင်ရာကို ဝင်ရောက်ဆွေးနွေးပြောဆိုနေမှုများနှင့် ပတ်သက်၍ နိုဝင်ဘာ ၂၆ ရက်တွင် မြန်မာနိုင်ငံသတင်းမီဒီယာကောင်စီမှ တာဝန်ရှိသူများထံ တွေ့ဆုံ မေးမြန်းခဲ့သည်များကို ဖော်ပြလိုက်ပါသည်-
မေး။ ။ နိုဝင်ဘာ ၂၃ ရက်က မြန်မာနိုင်ငံ သတင်း မီဒီယာကောင်စီဥက္ကဋ္ဌနဲ့ သတင်းမီဒီယာ
ကောင်စီဝင်တွေ နိုင်ငံတော်သမ္မတအိမ်တော်မှာ ကတိသစ္စာပြုခဲ့တဲ့အခမ်းအနားသတင်းတွေကို တွေ့မြင်ဖတ်ရှု ရပါတယ်။ အဲဒီမှာ နိုင်ငံတော်သမ္မတကြီးက လက်ဖက်ရည် ဝိုင်းနဲ့တည်ခင်းပြီးတစ်ဦးချင်းစီကို ရင်းရင်းနှီးနှီး လိုက်လံ နှုတ်ဆက်ခဲ့တာကိုလည်း ကြားသိရပါတယ်။ ညနေပိုင်း မှာလည်း သတင်းမီဒီယာကောင်စီဝင်တွေကို ဂုဏ်ပြု ညစာနဲ့ ဧည့်ခံပွဲမှာ နိုင်ငံတော်၏ အတိုင်ပင်ခံပုဂ္ဂိုလ်က နှုတ်ခွန်းဆက်စကားပြောခဲ့တာ၊ သတင်းမီဒီယာကောင်စီဝင် တွေရဲ့ စားပွဲဝိုင်း တစ်ဝိုင်းချင်းစီကို လိုက်လံနှုတ်ဆက်ပြီး အလွတ်သဘော ရင်းရင်းနှီးနှီးပြောဆိုခဲ့ကြတဲ့ သတင်းတွေ ကိုလည်း တွေ့မြင်ဖတ်ရှုရပါတယ်။
အဲဒီအခမ်းအနား၊ တွေ့ဆုံပွဲနဲ့ပတ်သက်ပြီး တက်ရောက်ခဲ့တဲ့ ကောင်စီဝင်အချို့က သူတို့ရဲ့ တစ်ဖက်သတ် ကောက်ချက်ချ ဝေဖန်ပြောဆိုတာတွေ မီဒီယာတွေမှာပျံ့နှံ့လာတာ၊ အဲဒီ အပေါ်မှာ ဝေဖန်ပြောဆို နေတာတွေ ကြားသိနေရပါတယ်။ အဲဒီသဘောထား ထုတ်ပြန်သူတွေက ကောင်စီရဲ့အလုပ်အမှုဆောင်မှာ တာဝန်ယူထားသူတွေဆိုတော့ အဲဒါ မြန်မာနိုင်ငံ သတင်း မီဒီယာကောင်စီရဲ့သဘောထားလား၊ ညှိနှိုင်းထုတ်ပြန် တာလား၊ ဒါတွေအပေါ် သတင်းမီဒီယာကောင်စီအနေနဲ့ သဘောထားထုတ်ပြန်ချက်တစ်ရပ် ထုတ်ပြန်ဖို့ရော ရှိပါသလားဆိုတာ သိချင်ပါတယ်။
ဟံသာဝတီဦးအုန်းကြိုင် (ဥက္ကဋ္ဌ၊ မြန်မာနိုင်ငံသတင်းမီဒီယာ ကောင်စီ)
ဖြေ။ ။ ကျွန်တော် ကိုယ်တိုင် ဘာတွေမှန်းမသိသေးဘူး။ ဒီလိုပြောရင် ကျွန်တော်ညံ့ရာကျပါတယ်။
တကယ်တမ်းလည်း ကျွန်တော်ဘာမှန်းမသိသေးပါဘူး။ ဘာဖြစ်လို့လဲဆိုတော့ အဲဒီနေ့က ကျွန်တော်တို့ ညစာ စားပွဲတည်ခင်းတဲ့နေရာမှာ ထိပ်ဝိုင်းတစ်ဝိုင်းရှိပါတယ်။ အဲဒီဝိုင်းမှာ ကျွန်တော်ရယ်၊ ဒေါက်တာ မျိုးသန့်တင်ရယ်၊ ဆရာ ထက်မြက်ရယ်၊ နောက်ထပ်နှစ်ယောက် ဘဏ္ဍာ ရေးမှူးရယ်၊ ကောင်စီဝင်ထဲက အမျိုးသမီး ဒေါ်သင်းသင်းသာရယ်၊ ပြန်ကြားရေးဝန်ကြီးရယ်၊ ကျွန်တော်တို့ စားပွဲဝိုင်းသပ်သပ်ထိုင်ရတယ်။ ကျန်တဲ့ သုံးဝိုင်းက သီးခြားဖြစ်ပါတယ်။ နိုင်ငံတော်၏ အတိုင်ပင်ခံ ပုဂ္ဂိုလ်က ကျွန်တော်တို့နဲ့ ရင်းရင်းနှီးနှီး နှုတ်ဆက်စကား တွေပြောပါတယ်။ ရှင်းရှင်းပြောမယ်ဆိုရင် ဒါကသူနဲ့ ကျွန်တော်တို့နဲ့ ပထမဆုံးအကြိမ်တွေ့ဆုံခြင်းပါ။
တွေ့တဲ့အခါမှာ သူက လူရင်းတွေလို၊ အကြိမ်ကြိမ် တွေ့ထားတဲ့သူတွေလို ရင်းရင်းနှီးနှီးဆက်ဆံတယ်၊ ရင်းရင်း နှီးနှီးပြောတာကို တွေ့ရပါတယ်။ ကျွန်တော်တို့ ပြောရင်းဆိုရင်း၊ စားရင်းသောက်ရင်းနဲ့ ဒေါ်အောင်ဆန်း စုကြည်က ကျွန်မဟိုဘက်ဝိုင်းတွေလည်း သွားပြီးနှုတ်ဆက် လိုက်ဦးမယ်၊ ပြန်လာမှ ထမင်းစားမယ်ဆိုပြီး ဝိုင်းတွေကို သွားပြီးနှုတ်ဆက်တယ်။
အဲဒီမှာဘာတွေပြောလို့ ဘာတွေဆိုကြတယ်ဆိုတာကို ကျွန်တော်တို့ မသိလိုက်ဘူး။ ပြန်လာတော့ ကျွန်တော်တို့ ကားပေါ်မှာ သတင်းနည်းနည်းကြားတယ်။ နောက်နေ့ ပြန်ကြားရေးဝန်ကြီးဌာနမှာ မီဒီယာဖွံ့ဖြိုးတိုးတက်ရေး အတွက် အစည်းအဝေးတစ်ခုလုပ်တယ်။ အဲဒီမှာလည်း သူ့အမြင်၊ သူ့အယူအဆကို ဒီသူငယ်က ထပြောတယ်။ ဘာလဲဆိုတော့ ကျွန်တော်ကြားလိုက်တာတော့ ဆိုရှယ် မီဒီယာကMainstream မီဒီယာအပေါ်မှာ လွှမ်းမိုးနေတာ များတယ်ဆိုတဲ့အကြောင်း ဒီလိုပဲကျွန်တော် နားလည်လိုက် တယ်။ သာမန်ပဲထင်လိုက်တယ်၊ နောက်တော့ သူတို့က ဖေ့စ်ဘွတ်မှာ တင်တယ်လို့ပြောတယ်။ ကျွန်တော်တော့ မဖတ်လိုက်ရဘူး။ ဘာတွေရေးလို့ ဘာတွေဖြစ်ကြမှန်း ကျွန်တော်မသိလိုက်တာအမှန်ပဲ။ သို့သော် ဒီလိုပြောကြ ဆိုကြတယ်။ ဆိုရှယ်မီဒီယာအပေါ်မှာ တင်ကြတာ ကျွန်တော်တို့ မသိဘူး။ ကောင်စီအနေနဲ့ ဆုံးဖြတ်ထား တာလည်း မရှိဘူး။ ညှိနှိုင်းထားတာလည်း မရှိဘူး။
ကောင်စီအနေနဲ့က ဒီနေ့ နိုင်ငံတော်မှာ ကျွန်တော် တို့ ရပ်တည်ရတဲ့အပိုင်းမှာ မဏ္ဍိုင်ကြီးလေးရပ်အနေနဲ့ စတုတ္ထမဏ္ဍိုင်အနေနဲ့ရပ်တည်ပါတယ်။ ကျန်တဲ့မဏ္ဍိုင်ကြီး သုံးရပ်ဖြစ်တဲ့ ဥပဒေပြုရေး၊ အုပ်ချုပ်ရေး၊ တရားစီရင်ရေး မဏ္ဍိုင်တွေကို ကျွန်တော်တို့ကစောင့်ကြည့်ပြီး ဝေဖန်မယ်၊ အကဲဖြတ်မယ်၊ ပြုပြင်စရာရှိရင် ပြုပြင်မယ်၊ အကြံဥာဏ် တွေပေးမယ် ဒီသဘောပဲရှိတယ်။ ဒါက အခြေခံဥပဒေက ပေးတဲ့အခွင့်အရေးဖြစ်ပါတယ်။ နောက်ပြီး ကျွန်တော်တို့ရဲ့ ၂ဝ၁၄ ခုနှစ်ကပြဋ္ဌာန်းတဲ့ သတင်းမီဒီယာဥပဒေအရလည်း ပေးထားတဲ့ တာဝန်နဲ့ အခွင့်အရေးတွေအတိုင်း ကျွန်တော် တို့ ဆောင်ရွက်ပါတယ်။ ဒီလိုသဘောပါပဲ။
ဆရာကြီး ဒေါက်တာ မျိုးသန့်တင်ဆိုရင် ကျွန်တော့် ထက် သူကပိုပြီး ဒီလုပ်ငန်းမှာ အတွေ့အကြုံများတယ်။ ဘာဖြစ်လို့လဲဆိုတော့ စာနယ်ဇင်းကောင်စီ ယာယီဘဝ ကတည်းက ဒီဥပဒေရေးဆွဲထားတာရော၊ ဒီလုပ်ငန်းတွေ လုပ်ရတာရော သူပါဝင်ခဲ့တယ်။ ကျွန်တော်တို့ မီဒီယာကောင်စီ မှာ ဖွဲ့စည်းတာ ထောင့်စုံကပါဝင်တယ်။ အဖွဲ့စုံကပါတယ်။ သတင်းမီဒီယာသမားကြီးပဲ မဟုတ်ဘူး၊ ပညာရှင် အသိုင်း အဝိုင်းလည်း ပါတယ်၊ တစ်ဖက်ကလည်း လူငယ်တွေပါတဲ့ သတင်းမီဒီယာအဖွဲ့အစည်းတွေက ကိုယ်စားလှယ်တွေ၊ သတင်းစာသမားတွေ၊ သတင်းထောက်တွေ၊ စာရေးဆရာ တွေ၊ ကာတွန်းဆရာတွေ စသည့် အလွှာစုံက အသီးသီး ပါတော့ အမျိုးလည်းစုံတယ်။
ကျွန်တော်ပြောချင်တာတော့ လူငယ်တွေလည်း ဖြစ်တယ်။ တက်ကြွလွန်းအားကြီးနေတယ်၊ ဒါတွေ ကျွန်တော်တို့တွေ့ကြုံရပါတယ်။ ပထမကောင်စီ သက်တမ်း မှာ ဒါမျိုးတွေသိပ်မရှိဘူး။ အခု သက်တမ်းစတာနဲ့ ဒါတွေ ရင်ဆိုင်ရတယ်။ ဒါလေးတွေက ကျွန်တော်တို့ ကိုင်တွယ် သွားဖို့၊ ရှေ့လျှောက် ထိန်းသိမ်းသွားဖို့ ရှိပါတယ်။
ကျွန်တော်ပြောချင်တာက နိုင်ငံတော်သမ္မတနဲ့တွေ့တဲ့ အချိန်မှာ နိုင်ငံတော်သမ္မတက ကျွန်တော်တို့ကို လမ်းညွှန် သွားတဲ့အချက်တွေ အင်မတန်ကောင်းပါတယ်။ နိုင်ငံတော် သမ္မတက ဘာပြောသလဲဆိုရင် ကျွန်တော်တို့နိုင်ငံသည် ခေတ်ဟောင်း၊ စနစ်ဟောင်းမှ စနစ်သစ်ကို ကူးပြောင်းစ နိုင်ငံဖြစ်ပါတယ်။ လမ်းရိုးလမ်းဟောင်းမှ လမ်းသစ်ကို ဖောက်ထွက်နေရတဲ့အခါ ရှောင်လို့မရတဲ့ အခက်အခဲ အကျပ်အတည်းတွေလည်းရှိတယ်။ ဒီလိုအခြေအနေ အချိန်အခါမျိုးမှာ အရင်းအနှီးကြီးကြီးပေးပြီး ရှားရှားပါးပါး ရရှိထားတဲ့ ဒီမိုကရေစီအပင်ပေါက်လေး ရှင်သန် ကြီးထွားရေးကို ကျွန်တော်တို့က အလေးအနက် ထားကြ စေလိုပါတယ်။ ဒီမိုကရေစီအသွင်ကူးပြောင်းရေးကို အောင်မြင်အောင် ကျွန်တော်တို့အားလုံးရဲ့ စုပေါင်း အင်အားနဲ့မလုပ်နိုင်ကြရင် အနာဂတ်နိုင်ငံရဲ့ နောင် မျိုးဆက်သစ်တွေအပေါ် ကျွန်တော်တို့ တာဝန်မကျေရာ ရောက်ပါတယ်လို့ ဒီလိုပြောကြားခဲ့ပါတယ်။
ဒါဟာ ကျွန်တော်တို့နဲ့ တစ်သဘောတည်းပဲ ထပ်တူကျပါတယ်။ ကျွန်တော်တို့ အစိုးရအနေနဲ့ ဒီမိုကရေစီအသွင်ကူးပြောင်းရေး အောင်မြင်ရမယ်ဆိုတဲ့ ယုံကြည်ချက်၊ ခံယူချက်နဲ့ ရေကိုသား အကြားမထင်သကဲ့သို့ ပြည်သူနဲ့အတူ ညီညီညွတ်ညွတ်ဖြင့် အားသွန်ခွန်စိုက် ကြိုးပမ်းပြီး ဒီမိုကရေစီပန်းတိုင်ရောက်သည်အထိ ကြံ့ကြံ့ခံ ရပ်တည်သွားမှာဖြစ်ပါတယ်ဆိုတဲ့စကားဟာ ကျွန်တော် အခုကိုယ်စားပြုပြီး ပြောနေတဲ့ သတင်းမီဒီယာကောင်စီတင်မဟုတ်ပါဘူး။ ကျွန်တော့်ဘဝ တစ်ဦးတည်းအမြင်နဲ့ ပြောရင်လည်း ဒီဦးတည်ချက်က ကျွန်တော်ငယ်ငယ် လေးထဲက ပါခဲ့တယ်။ ဘာ့ကြောင့် ဒီလိုပြောသလဲ ဆိုတော့ ကျွန်တော်ဟာ အသက် ၁၈ ၊ ၁၉ ၊ ၂ဝ အရွယ်လောက် ကတည်းက ဒုတိယကမ္ဘာစစ်ပြီးစ ဟံသာဝတီသတင်းစာ စထုတ်တော့ ၁၉၄၅ ခုနှစ် နိုဝင်ဘာ ၉ ရက်၊ ၂၅ နှစ်မြောက် ငွေရတု အမျိုးသားအောင်ပွဲနေ့မှာ ဟံသာဝတီ သတင်းစာထုတ်ပါတယ်။ အဲဒီကတည်းက ကျွန်တော် စပါတယ်။
အထူးသဖြင့် ဗိုလ်ချုပ်အောင်ဆန်းနဲ့ တွဲရပါတယ်၊ ဗိုလ်ချုပ်အောင်ဆန်းသတင်းကို ကျွန်တော်လိုက်ရပါတယ်။ ဗိုလ်ချုပ်တို့ သွားနေတဲ့လမ်းကြောင်း၊ နောက်ပြီး ကျွန်တော် တို့လူငယ်တွေ လေ့လာခဲ့တဲ့လမ်းကြောင်း၊ ဒီမိုကရေစီ ရရှိရေးကို ဦးတည်တယ်၊ အမျိုးသားလွတ်မြောက်ရေး ရရှိဖို့ကို ဦးတည်ကြတယ်။ ဒီအပေါ်မှာ ဝိုင်းပြီးကြိုးစား လာကြတယ်။ ဒီနေ့ခေတ်အထိ ကျွန်တော်တို့နိုင်ငံကို သတ္တုချပြောကြည့်မယ်ဆိုရင် ဒီမိုကရေစီအပြည့်အဝ မရှိသေးဘူး။ လွတ်လပ်ရေးလည်း အပြည့်အဝ မရှိသေး ဘူး။ ကျွန်တော်တို့ ဖြတ်သန်းခဲ့တဲ့ကာလတစ်လျှောက်မှာ အစိုးရတွေ အမျိုးမျိုးနဲ့လည်း ရင်ဆိုင်ရတယ်။ အထူးသဖြင့် ကျွန်တော်တို့ သတင်းမီဒီယာလောကမှာ သတင်း လွတ်လပ်ခွင့်ဆိုတာဟာ ဆိတ်သုဉ်းခဲ့တာကြာပြီ။ ဒီဘက် ၂ဝ၁၁ ခုနှစ် ပါတီစုံရွေးကောက်ပွဲပြီးတဲ့နောက်မှာ ဆင်ဆာ ဖြတ်တာတွေ ဖျက်သိမ်းပြီး သမ္မတကြီး ဦးသိန်းစိန် လက်ထက်မှာ မီဒီယာလွတ်လပ်ခွင့်တွေ စရတယ်။ ရတာ ကို ကျွန်တော်တို့အမိအရယူပြီး ဒီ သတင်းမီဒီယာကောင်စီ ပေါ်ပေါက်လာတယ်။
သတင်းမီဒီယာကောင်စီအနေနဲ့လည်း ခိုင်ခိုင်မာမာ ပြည်ထောင်စုလွှတ်တော်က ပြဋ္ဌာန်းပေးတဲ့ဥပဒေနဲ့ ပေါ်ပေါက်လာတယ်။ လမ်းဘေးက ရေးဆွဲပေးတဲ့ စည်းမျဉ်းမဟုတ်ဘူး။ ကျွန်တော်တို့ကိုပေးတဲ့ အာဏာ၊ တာဝန်သည် အင်မတန်ပြီးပြည့်စုံတဲ့ တာဝန်တစ်ရပ် ဖြစ်တယ်။ ဘာလဲဆိုတော့ ပုဒ်မ ၁၂ ကောင်စီသည် စာနယ်ဇင်းသမားများ၏ ပြဿနာအရပ်ရပ်ကို ဖြေရှင်းပေး နိုင်သော တစ်ဦးတည်းသော အဖွဲ့အစည်းဖြစ်သည် ဆိုတာ ပေါ့ပေါ့လေးမဟုတ်ဘူး။ သတင်းမီဒီယာလောကကြီး တစ်ခုလုံးရဲ့ ပြဿနာတွေဖြေရှင်းဖို့ဆိုပြီး ကျွန်တော်တို့ လက်ထဲကို အာဏာအပ်တာပဲ။
မေး။ ။ သတင်းမီဒီယာကောင်စီအပေါ် သတင်းသမား တွေနဲ့ အများပြည်သူ ယုံကြည်အားထားလာ စေဖို့အတွက် ဥပမာ-အငြင်းပွားမှုတွေ တိုင်ကြားမှု အပေါ်မှာ ညှိနှိုင်း။ ဖြေရှင်းပေးတာ၊ အရည်အသွေးရှိတဲ့ သြဇာရှိတဲ့ သတင်းသမားတွေ ထွက်ပေါ်လာစေဖို့၊ သတင်း မီဒီယာဖွံ့ဖြိုးတိုးတက်ဖို့ ဆွေးနွေးပြောဆိုကြတာတွေလည်း ကြားသိရပါတယ်။ ဒါနဲ့ ပတ်သက်ပြီးလည်း အကောင် အထည်ဖော်ဆောင်ရွက်မယ့် အခြေအနေကို သိလိုပါတယ်။
ဖြေ။ ။ ကောင်စီရဲ့ အဓိကတာဝန်သည် ဒီနေ့ တိုင်းပြည်အုပ်ချုပ်နေတဲ့ မဏ္ဍိုင်ကြီးသုံးရပ်နဲ့ သတင်းမီဒီယာတွေ၊ သတင်းမီဒီယာသမားတွေ နေ့စဉ် ထိတွေ့ပွတ်တိုက်မှုတွေကို စာနယ်ဇင်းကောင်စီတွေက ပြေငြိမ်းအောင် ကြားဝင်ဖြေရှင်းပေးတယ်။ တက်လာတဲ့ တိုင်ကြားတဲ့အမှုတွေ အများကြီးပါ။ ကျွန်တော်တို့ စာနယ်ဇင်းကောင်စီက ဖြေရှင်းပေးခဲ့တာ ဆရာကြီးတွေ လက်ထက်ကတည်းက စတယ်။ ရုံးသာရောက်မယ်ဆိုရင် အများကြီးပဲ။ သတင်းထောက်တွေလည်း ထောင်ထဲ ရောက်မှာအများကြီးပဲ။ ကျွန်တော်တို့တွေ ဖြေရှင်းပေးတဲ့ အတွက် အမှုတွေက တော်တော်ပပျောက်ပါတယ်။ကြီးကျယ်တဲ့အမှုတွေသာ တစ်ဖက်နဲ့တစ်ဖက် တင်းမာ ပြီးဖြစ်တာ။
ဒီကနေ့ဆိုရင် ရန်ကုန်တိုင်းဒေသကြီးအစိုးရနဲ့ Eleven မီဒီယာနဲ့ဖြစ်တဲ့ကိစ္စ၊ မန္တလေးတိုင်းဒေသကြီး အစိုးရအဖွဲ့ ဝန်ကြီးချုပ်ကို စွပ်စွဲရေးသားတဲ့ကိစ္စ စတဲ့ ပြဿနာတွေ ကျွန်တော်ဖြေရှင်းပေးတယ်။ ဟိုတစ်နေ့ကပဲ နိုင်ငံတော်သမ္မတအိမ်တော်မှာ ကျွန်တော်တို့ ကတိသစ္စာ ဆိုတဲ့အခါမှာ ကျွန်တော်တို့ကို တိုင်စာတစ်ခုပေးလိုက်တယ်။ ဘာလဲဆိုတော့ သတင်းဂျာနယ်တစ်စောင်က အစိုးရအဖွဲ့ မှာ ဝန်ကြီးတွေ အပြောင်းအလဲဖြစ်တော့မယ်၊ အကုန် ထွက်ရမယ်၊ နှစ်ယောက်ပဲ ကျန်တော့မယ်ဆိုပြီး ရေးထား လို့ ဒါကိုဖြေရှင်းဆောင်ရွက်ပေးပါဆိုပြီး ကျွန်တော်တို့ကို တိုင်တာဖြစ်ပါတယ်။ ဒါတွေကို ဖြေရှင်းနေတဲ့ကြားထဲမှာ ကျွန်တော်တို့အထဲက ခုနလို ဖေ့စ်ဘွတ်တင်တဲ့ပြဿနာတွေ ထွက်လာတယ်။ ကျွန်တော်တို့လည်း စိတ်မကောင်းပါဘူး။ ကျွန်တော်တို့ကောင်စီဝင်တွေနဲ့ ပြန်မတွေ့ရသေးပါဘူး။ လပတ်အစည်းအဝေးက ဒီဇင်ဘာ ၃ ရက်မှာ ဖြစ်ပါတယ်။ မှုခင်းများညှိနှိုင်းဖြေရှင်းမှုကော်မတီက လာမယ့် ကြာသပတေးနေ့မှာ ရှိပါတယ်။ အဲဒီမှာ ပြန်တွေ့ကြမယ်။ ပြောသင့်တာတွေ ပြောပါမယ်။
ခက်တာက ဒီနေ့ ဒီမိုကရေစီခေတ်ဆိုတော့ လူတိုင်း က တက်ကြွနေတယ်။ ပြောချင်တာတွေပြော၊ ဆိုချင်တာတွေ ဆို ဖြစ်လာတယ်။ အဲဒီကနေ ဖြစ်တယ်လို့ ကျွန်တော်တော့ ယူဆပါတယ်။ ဒီလိုဖြစ်တဲ့အပေါ်မှာ သတင်းမီဒီယာ ကောင်စီအနေနဲ့ ထုတ်ပြန်ချက် ထုတ်ပြန်ဖို့ရှိသလားဆိုတော့ ကျွန်တော်တို့ ဒါကိုကောင်စီမှာ တင်ပြီးဆွေးနွေးပြီးမှ ပြောလို့ရမယ့်ကိစ္စပါ။ ဘာဖြစ်လို့လဲဆိုတော့ ဒါဟာ တော်တော်လေး ကိုင်တွယ်ရမယ့်ကိစ္စပါ။ ကျွန်တော်တို့ လည်းကောင်စီဝင်ပဲ။ အားလုံးကလည်း ကောင်စီဝင်တွေပဲ။ ဒါလေးတွေ နားလည်မှုရှိရအောင် ကျွန်တော်တို့ ကြိုးစား ရပါမယ်၊ ပြေလည်အောင်လည်း ဖြေရှင်းရပါမယ်။ အစိုးရ လုပ်တဲ့လုပ်ထုံးလုပ်နည်းမျိုးနဲ့တော့ ကျွန်တော်တို့ သွားလို့ မရပါဘူး။ ပြေလည်အောင်၊ ညီညွတ်အောင် ကျွန်တော်တို့ ကိုင်တွယ်ရပါမယ်။ လူကြီးလူငယ်ပြဿနာ ကလည်းရှိပါ တယ်။ နောက်ပြီး အမျိုးသမီး အမျိုးသားပြဿနာတွေလည်း ရှိပါတယ်။
နောက်တစ်ခု ကျွန်တော့်ရဲ့ တစ်ဦးတည်းသဘော ထားနဲ့ ပြောမယ်ဆိုရင် ဒီနေ့ ကျွန်တော်တို့ သတင်း မီဒီယာကောင်စီသည် ဆရာတွေ စုထားတာဖြစ်ပါတယ်၊ တပည့်မပါ ပါဘူး။ သတင်းစာဆရာ၊ စာရေးဆရာတွေပါ။ ဆရာက တစ်ပြားသားမှ မလျှော့ပါဘူး။ အဲဒီတော့ အားလုံးက ဆရာတွေဖြစ်ပါတယ်။ အဲဒီတော့ အားလုံး ကို ညီညွတ်အောင် ပြေလည်အောင် သမမျှတအောင် ဆောင်ရွက်ဖို့ ရှိပါတယ်။ သို့သော် တစ်ခုရှိတာက ဒီပြဿနာဖြစ်ကြတာက ဒီကနေ့ နိုင်ငံတော်မှာ အဓိက ပုဂ္ဂိုလ်၊ ရှေ့ဆောင်ပုဂ္ဂိုလ် တစ်နည်းအားဖြင့် ပြောမယ် ဆိုရင် အမျိုးသားခေါင်းဆောင်နဲ့ သွားပြီးထိတဲ့ပြဿနာ။ ဒါကို ကျွန်တော်တို့ကြားရတာကို စိတ်ထဲမှာ မကောင်း ပါဘူး။ ဘာဖြစ်လို့လဲဆိုတော့ ကျွန်တော်တို့နဲ့ အကြီးအကဲ တွေနဲ့ စပြီးထိတွေ့တဲ့အချိန်မှာ ဒီလိုလာဖြစ်တာ။ ဒါလေး လည်း ကျွန်တော်တို့ လူကြီးတွေအနေနဲ့ နည်းနည်း ခွင့်လွှတ် သည်းခံရတဲ့သဘောလေးတွေတော့ ရှိပါတယ်။
ကျွန်တော်ထင်ပါတယ်။ နိုင်ငံတော်၏အတိုင်ပင်ခံပုဂ္ဂိုလ် အနေနဲ့လည်း နားလည်မှုရှိပါလိမ့်မယ်။ ဘာဖြစ်လို့လဲ ဆိုတော့ သူဟာ သာမန်ပုဂ္ဂိုလ် မဟုတ်ပါဘူး။ သူဟာ အင်မတန် စူးစမ်းဆင်ခြင်ဥာဏ်နဲ့ပြည့်စုံတဲ့ ပညာရှင် တစ်ယောက်ဖြစ်ပါတယ်။ သူက ရင်ဖွင့်ပြီး အားလုံးကို ဆက်ဆံတဲ့နေရာမှာ အဆက်အဆံခံရတဲ့ ပုဂ္ဂိုလ်က ငယ်တဲ့အတွက် နားလည်မှုလွဲတယ်လို့ ဒီလိုပဲ ကျွန်တော် မြင်ပါတယ်။ ဒါတွေဟာ သာမန်ကိစ္စတစ်ခုလို့ပဲ ပြောပါ ရစေ။ ကျွန်တော်တို့က ရှေ့လျှောက်ဒီလိုအဖြစ်မျိုးတွေ မဖြစ်အောင် တတ်နိုင်သလောက် ထိန်းသိမ်းသွားပါမယ်။
ကျွန်တော်တို့ မန္တလေးတိုင်းဒေသကြီး ဝန်ကြီးချုပ်ကို စွပ်စွဲရေးသားတဲ့ သတင်းတုကိစ္စနဲ့ ဖော်ထုတ်နေမှုနဲ့ ပတ်သက်ပြီး နိုင်ငံတော်သမ္မတကြီးနဲ့တွေ့တုန်းက ပြောပြ တယ်။ သမ္မတကြီးက မန္တလေးတိုင်းဒေသကြီးဝန်ကြီးချုပ် ပြဿနာဟာ တရားစွဲမယ်လို့ ကျွန်တော်တို့ကို ခွင့်တောင်း ပါတယ်။ ကျွန်တော်က တရားမစွဲပါနဲ့၊ သတင်းမီဒီယာ ကောင်စီကို တိုင်ပါ၊ သူတို့ ဖြေရှင်းပေးပါလိမ့်မယ်ဆိုလို့ တိုင်တာပါတဲ့။ ဆိုတော့ နိုင်ငံတော်သမ္မတကြီးရဲ့ သဘောထားက ကျွန်တော်တို့ သတင်းမီဒီယာဥပဒေကို လေးစားတယ်၊ ဥပဒေအတိုင်း ဖြစ်စေချင်တဲ့စိတ်ရှိတယ်။ ရန်ကုန်တိုင်းဒေသကြီးအစိုးရနဲ့ဖြစ်တဲ့ ပြဿနာမှာ ကျွန်တော်တို့ဆီကိုသွားဖို့ သူညွှန်ကြားတယ်။ သူက ကျွန်တော်တို့ကို အလေးထားတဲ့ သဘောရှိတယ်။ နိုင်ငံတော်သမ္မတရဲ့ သဘောထား အင်မတန်မြင့်မြတ် ပါတယ်။ ဒီအခွင့်အရေးကို ကျွန်တော်အားလည်းထားပါ တယ်။
မေး။ ။ သတင်းမီဒီယာကောင်စီအနေနဲ့ သတင်း မီဒီယာတွေကို စောင့်ကြည့်ပြီး သတင်းတု၊ သတင်းမှားတွေကို စိစစ်ထုတ်ပြန်ပေးဖို့ ဆွေးနွေးတာတွေ ကိုလည်း ကြားသိရပါတယ်။ အဲဒီအပေါ်မှာ ဆောင်ရွက် မည့် အစီအမံတွေလည်း သိချင်ပါတယ်။
ဖြေ။ ။ ရေရှည်အတွက်ကို သတင်းတု၊ သတင်းမှားတွေ ကို ကျွန်တော်တို့ ဘယ်လိုရှင်းကြမလဲဆိုတာ စောစောပိုင်းကတည်းက ကောင်စီဝင်အဟောင်းတွေ လက်ထက်ကတည်းက ကျွန်တော်တို့စဉ်းစားထားပါတယ်။ စောင့်ကြည့်လေ့လာရေးကော်မတီတစ်ခု ဖွဲ့မယ်။ အလုပ် များတဲ့အတွက် မလုပ်နိုင်သေးတာပါ။ အခုတော့ ကျွန်တော်တို့ ဒီကိစ္စနဲ့ဆက်စပ်ပြီး အကောင်အထည် ဖော်ကြဖို့ ပြင်ဆင်နေပါတယ်။ အခုလာမယ့် လပတ်အစည်း အဝေးမှာ စဖွဲ့ပါမယ်။ ဖွဲ့ရင်းနဲ့ ဒါတွေကို တတ်နိုင်တဲ့ ဘက်က ဖော်ထုတ်ပါမယ်။ ကျွန်တော်တို့အစီအစဉ်မှာ ဒါကို သီးခြားဝန်ထမ်းခန့်ပြီး ဆောင်ရွက်ဖို့ အားခဲထား ပါတယ်။ ဒါတွေက ကျွန်တော်တို့ကို၊ တိုင်းပြည်ကို ဒုက္ခပေးတယ်။ အဲဒီအတွက်ကို ကျွန်တော်တို့ Recover ဖြစ်အောင်ကြိုးစားမယ်လို့ ပြောချင်ပါတယ်။
မေး။ ။ သတင်းမီဒီယာကောင်စီဝင်များ ကတိသစ္စာ ပြုပွဲမှာ သမ္မတကြီးက မိန့်ခွန်းပြောကြားရာမှာ ''နိုင်ငံတကာအသိုင်းအဝိုင်းအလယ်မှာ ကျွန်တော်တို့အား မွေးဖွားပေးလိုက်တဲ့ အမိနိုင်ငံတော်ရဲ့ ပုံရိပ်မြင့်မားလာ အောင်၊ ကျွန်တော်တို့နိုင်ငံသားများရဲ့ ဂုဏ်သိက္ခာ ပို၍ မြင့်တက်လာအောင် သတင်းမီဒီယာရဲ့စွမ်းအားနဲ့ ပုံဖော် ပေးနိုင်ကြပါ''လို့ ပြောကြားမှုအပေါ် ဆရာတို့ရဲ့အမြင်နဲ့ သဘောထားကိုလည်း သိပါရစေ။
ဖြေ။ ။ ကတိသစ္စာပြုခြင်း အခမ်းအနားမှာ နိုင်ငံတော်သမ္မတကြီးက ကျွန်တော်တို့အစိုးရအနေနဲ့ ဒီမိုကရေစီအသွင်ကူးပြောင်းရေး အောင်မြင်ရမယ်ဆိုတဲ့ ယုံကြည်ချက်၊ ခံယူချက်နဲ့ ရေကိုသား အကြားမထင် သကဲ့သို့ ပြည်သူနဲ့အတူ ညီညီညွတ်ညွတ်နဲ့ အားသွန် ခွန်စိုက် ကြိုးပမ်းပြီး ဒီမိုကရေစီပန်းတိုင်ရောက်သည်အထိ ကြံ့ကြံ့ခံ ဆက်လက်ရပ်တည်သွားမှာ ဖြစ်ပါတယ်လို့ ပြောခဲ့ ပါတယ်။
ဒါကိုလည်း ကျွန်တော်တို့က နိုင်ငံတော်သမ္မတကြီးနဲ့ တစ်သားတည်း ခံယူပြီး ကျင့်သုံးသွားမှာ ဖြစ်ပါတယ်။ ဒီထက်ပိုပြီး နိုင်ငံတော်သမ္မတကြီးမိန့်ကြားတဲ့ မိန့်ခွန်း မှာ ကျွန်တော်တို့ကို လမ်းညွှန်တာက ဒီမိုကရေစီ ဖက်ဒရယ်ပြည်ထောင်စု ဖြစ်ထွန်းပေါ်ပေါက်စေရေး အတွက် တွေ့ကြုံနေရတဲ့ အခက်အခဲ အကျပ်အတည်း များ ရင်ဆိုင်နေရတဲ့ စိန်ခေါ်မှုများကြားမှ ကဏ္ဍပေါင်းစုံ ပြုပြင်ပြောင်းလဲ ဆောင်ရွက်နေရတဲ့အချိန်ကာလမှာ အရေးကြီးတဲ့ အခန်းကဏ္ဍမှာ ပါဝင်နေတဲ့ မြန်မာ့မီဒီယာ လောကကို ဦးဆောင်ဦးရွက်ပြုကြရမယ့် သတင်းမီဒီယာ ကောင်စီဝင်များအနေနဲ့ (၁) သတင်းမီဒီယာဥပဒေပါ ပြဋ္ဌာန်းချက်များ၊ ရည်ရွယ်ချက်များကို အကောင်အထည် ဖော်နိုင်ကြပါစေ၊ (၂) သတင်းမီဒီယာသမားများရဲ့ ရပိုင်ခွင့်နဲ့လွတ်လပ်ခွင့်တွေကို ဥပဒေနဲ့အညီ ရရှိနိုင်ရေး ဆောင်ရွက်ပေးနိုင်ကြပါစေ၊ (၃)သတင်းမီဒီယာလောက သားများ ကျင့်ဝတ်စည်းကမ်းများနဲ့အညီ လုပ်ဆောင်နိုင် ရေးအတွက် ဦးဆောင်နိုင်ကြပါစေ၊ (၄)နိုင်ငံသားတိုင်း ရဲ့ သတင်းသိပိုင်ခွင့်ကို ပိုမိုဖြည့်ဆည်းပေးနိုင်ကြပါစေ၊ (၅)နိုင်ငံတကာအသိုင်းအဝိုင်းအလယ်မှာ ကျွန်တော် တို့အား မွေးဖွားပေးလိုက်တဲ့ အမိနိုင်ငံတော်ရဲ့ ပုံရိပ် မြင့်မားလာအောင်၊ ကျွန်တော်တို့ နိုင်ငံသားများရဲ့ ဂုဏ်သိက္ခာ ပို၍မြင့်တက်လာအောင် သတင်းမီဒီယာရဲ့ စွမ်းအားနဲ့ ပုံဖော်ပေးနိုင်ကြပါစေလို့ နိုင်ငံတော်သမ္မတ လမ်းညွှန်မိန့်ကြားပါတယ်။
အဲဒီ လမ်းညွှန်ချက်ငါးချက်ကို ကျွန်တော်တို့ကောင်စီ အနေနဲ့ အလေးအနက်ခံယူပြီး ဒီအတိုင်း အကောင်အထည် ဖော်ပါ့မယ်လို့ ကျွန်တော် ပြောကြားလိုပါတယ်။ ကျွန်တော် တို့ လာမယ့်လပတ်အစည်းအဝေးမှာ နိုင်ငံတော်သမ္မတ မိန့်ခွန်းကို တင်ပြီး ကျွန်တော်တို့ ဆွေးနွေးပါမယ်။ လမ်းညွှန်မှုတစ်ရပ်အနေနဲ့ ကျွန်တော်တို့ ခံယူသွားပါ မယ်လို့ ဒီကနေ ကျွန်တော် ထည့်သွင်းပြောချင်ပါတယ်။ အဲဒီထဲမှာ အကောင်းဆုံးက နံပါတ် ၅ အပိုဒ်ပါပဲ။ ကျွန်တော်တို့ ဒီနေ့ ရင်ဆိုင်နေရတဲ့ အခက်အခဲတွေ၊ အကျပ်အတည်းတွေ၊ နိုင်ငံတကာဖိအားတွေကို ကျွန်တော် တို့ဟာ နိုင်ငံသားတွေနဲ့အတူ ကျွန်တော်တို့ နိုင်ငံဂုဏ်သိက္ခာ ပိုမိုမြင့်တက်အောင် ဆောင်ရွက်ရမယ့်တာဝန်ဟာ ကျွန်တော် တို့ သတင်းသမားတွေ၊ မီဒီယာသမားတွေရဲ့ အဓိက တာဝန်လည်းဖြစ်ပါတယ်။ ဒီဟာကို အောင်မြင်အောင်လို့ ကျွန်တော်တို့ဝိုင်းဝန်းပြီး အကောင်အထည်ဖော် တည် ဆောက်သွားမယ်လို့ ပြောချင်ပါတယ်။ ကျေးဇူးတင်ပါ တယ်။
တွေ့ဆုံမေးမြန်း-ရဲခေါင်ညွှန့်၊ နန္ဒာဝင်း
(ဆက်လက်ဖော်ပြပါမည်)
(ဆက်လက်ဖော်ပြပါမည်)
No comments:
Post a Comment