နိုင်ငံတစ်နိုင်ငံ၏ ဓနအင်အားတောင့်တင်းခိုင်မာမှုသည် ထိုနိုင်ငံ၏ လူမှုစီးပွားဘဝ မြင့်မားတိုးတက်ရေးကို ထိရောက်စွာ အကောင်အထည် ဖော်နိုင်သည်။ ယင်းဖြစ်ထွန်းမှုကို ဖွံ့ဖြိုးတိုးတက်သည့်နိုင်ငံများတွင် မြင်တွေ့နိုင်သည်။ လူမှုဘဝမြင့်မားရေး၊ တိုင်းပြည်ဖွံ့ဖြိုးတိုးတက်ရေး တို့ကို ဆောင်ရွက်ရာ၌ ဓနအင်အား၊ ဘဏ္ဍာငွေအင်အားနည်းခြင်း၊ များခြင်းထက် သင့်တင့်လုံလောက်သောပမာဏဖြင့် ပြည်သူလူထုအတွက် အကျိုးရှိ ထိရောက်သော လုပ်ငန်းအတိုင်းအတာဖြင့် ဆောင်ရွက်နိုင်ခြင်း သည် အဓိကကျသည်ဟု ယူဆပါသည်။
နိုင်ငံနှင့် ပြည်သူအတွက် ဆောင်ရွက်ခဲ့ကြသော စီမံကိန်းများကို ပြန်ကြည့်မည်ဆိုလျှင် အကျိုးရှိထိရောက်မှုများရှိသလို အကျိုးနည်း၊ ထိရောက်မှုနည်းသော စီမံကိန်းများလည်းရှိသည်ကို လေ့လာဆန်းစစ် ကြည့်ဖို့ လိုမည်ဖြစ်သည်။ နိုင်ငံတော်အနေဖြင့် ဓနအင်အားဘဏ္ဍာငွေ နည်းပါးသည့်ကြားမှ နိုင်ငံနှင့်ပြည်သူ လိုအပ်သည့် စီမံကိန်းများကို ဆောင်ရွက်ပေးနေရာ လုပ်ငန်းများအတွက် ဘဏ္ဍာငွေများသာမက ချေးငွေများကိုပါ ခွဲဝေချထားပေးနေသည်ကို ပွင့်လင်းမြင်သာစွာမြင်တွေ့ နေရသည်။
နိုင်ငံတော်က ခွဲဝေပေးထားသည့် ဘဏ္ဍာငွေတို့ကို ပွင့်လင်းမြင်သာ စွာဖြင့် အကျိုးရှိထိရောက်အောင် အသုံးပြုဆောင်ရွက်ကြရန် လိုအပ် မည်ဖြစ်သည်။ ယင်းသုံးစွဲမှုအခြေအနေကို သက်ဆိုင်ရာတို့က ပိုမို၍ အသေးစိတ်သိရှိကြပြီး ပွင့်လင်းမြင်သာစွာ ရှင်းလင်းပြသပေးရန် လိုအပ် သည်။ ယခုအခါ ပြည်သူ့ကိုယ်စားလှယ်များက စီမံကိန်းလုပ်ငန်းများ နှင့်ပတ်သက်၍ ရှာဖွေစေ့ငုလေ့လာကြည့်ရှုပြီး လွှတ်တော်များတွင် သက်ဆိုင်ရာများနှင့် ပြည်သူများအား ချပြဆွေးနွေးပေးနေကြသည်မှာ နိုင်ငံနှင့် ပြည်သူအကျိုးအတွက်ဖြစ်၍ လျော်ကန်သင့်မြတ်သည်ဟု ရှုမြင်ပါသည်။
သာဓကအားဖြင့် ယခုနှစ်တွင် ပြည်ထောင်စု၏သုံးစွဲငွေသည် ငွေကျပ် ၂၄၉၅၄ ဘီလီယံကျော်ရှိပြီး တိုင်းဒေသကြီးနှင့်ပြည်နယ်များသို့ ထောက်ပံ့ငွေနှင့်ချေးငွေသည် ဘီလီယံ ၂၁၆ဝ ကျော်သာရှိခြင်းအတွက် ပြည်နယ်ပြည်မဖွံ့ဖြိုးမှု အလှမ်းကွာဝေးနေမှု၊ ချေးငွေများရရှိမှုနှင့် သုံးစွဲမှု စသည်တို့ကို အပြုသဘောဆောင်ကာ ဝေဖန်ထောက်ပြမှုများ ရှိသလို အလုပ်အကိုင်အခွင့်အလမ်း ငါးသောင်းမှတစ်သိန်းအထိ ဖန်တီး ပေးနိုင်ခြင်း၊ စက်ရုံ ၂ဝဝ ခန့်မှ နှစ်စဉ်ဘဏ္ဍာအခွန်ငွေ အမေရိကန် ဒေါ်လာ ဆယ်သန်းခန့်ရရှိနိုင်ခြင်း၊ ဆက်သွယ်သွားလာ ပို့ဆောင်မှု လွယ်ကူခြင်း၊ ဒေသဖွံ့ဖြိုးမှုနှင့် ပြည်တွင်း၊ ပြည်ပ ဈေးကွက်ပိုမိုဖွံ့ဖြိုးတိုးတက် လာနိုင်ခြင်းစသည့် နိုင်ငံအတွက် အလားအလာကောင်းသော အခြေအနေများအား ရှင်းလင်းဆွေးနွေးကြသည်ကို မြင်တွေ့ကြားသိရပါ သည်။
ယင်းတို့သည် ဒီမိုကရေစီစနစ်၏ သရုပ်သကန်နှင့် ပွင့်လင်းမြင်သာ မှုကို ဖော်ဆောင်သည်။ အဖွဲ့အစည်းများ၊ ဌာနဆိုင်ရာများနှင့် အပြန်အလှန်ထိန်းညှိခြင်းဖြစ်သည်။ နိုင်ငံနှင့် ပြည်သူအကျိုးစီးပွားဖြစ် ၍ ပိုမိုကောင်းမွန်သော နည်းလမ်းများကို ဖော်ဆောင်ပေးနိုင်သည်။ ပြုပြင်ပြောင်းလဲဆောင်ရွက်ခြင်းဖြင့် အကျိုးရှိထိရောက်မှုကို ဖြစ်စေ သည်။ ပြည်သူ့ဘဏ္ဍာငွေများ ယိုဖိတ်မှုမရှိစေရေးကို ပြုပြင်တည့်မတ် ပေးနိုင်သည်။ ထိုသို့ဆောင်ရွက်မှုများကို အပြုသဘောဆောင်ပြီး အကောင်းမြင်စိတ်ထားရှိကာ အပြန်အလှန်နားလည်မှုရှိရှိဖြင့် ပြုပြင် တည့်မတ်ပေးကြမည့် စိတ်ထားများထားရှိကြမည်ဆိုလျှင် နိုင်ငံနှင့် လူမှု စီးပွားဘဝ တဖြည်းဖြည်းပြန်လည်မြင့်မားတိုးတက်လာမည်ဟု ယုံကြည်ပါ သည်။
မြန်မာနိုင်ငံတွင် ဒီမိုကရေစီစနစ်ကို အကောင်အထည်ဖော်နေသည် မှာ သက်တမ်းနုနယ်သေးသော်လည်း အတွေ့အကြုံများ တိုးတက်များပြား လာသည်ဟု ဆိုရမည်ဖြစ်သည်။ အထူးသဖြင့် ဒီမိုကရေစီစနစ်၏ အနှစ်သာရကို လှစ်ဟပြသသော ပွင့်လင်းမြင်သာမှုနှင့် ဝေဖန်ထောက်ပြမှု များအပေါ် နားလည်မှုရှိစွာဖြင့် လိုက်ပါပြုပြင်ပြောင်းလဲဆောင်ရွက်ကြမည်ဆိုလျှင် နိုင်ငံဖွံ့ဖြိုးတိုးတက်လာမည်ဖြစ်၍ အမျိုးသားအကျိုးစီးပွား အသိတရားဖြင့် ဝိုင်းဝန်းပူးပေါင်း လက်တွဲဆောင်ရွက်ကြရန် လေးစားစွာ တိုက်တွန်းအပ်ပါသည်။ ။
No comments:
Post a Comment