တရုတ်နိုင်ငံ ကူမင်းမြို့၌ ကျင်းပသည့် တရုတ်ကုန်စည်ပြပွဲတွင် မြန်မာကုန်သည်များအနေဖြင့် ရောင်းချရန်ထက် ကုန်သည်ချင်းတိုက်ရိုက်ချိတ်ဆက် ဈေးကွက်ချဲ့ထွင်နိုင်ရန် သွားရောက်ပြသရောင်းချခြင်းဖြစ်

တွေ့ဆုံမေးမြန်း - ရဲခေါင်ညွန့်၊ ဓာတ်ပုံ - ဖိုးထောင်

ပဉ္စမအကြိမ်မြောက် တရုတ်-တောင်အာရှ ကုန်စည်ပြပွဲနှင့် (၂၅)ကြိမ်မြောက် တရုတ်နိုင်ငံ ကူမင်း သွင်းကုန်၊ ထုတ်ကုန် ကုန်စည်ပြပွဲကို ဇွန် ၁၄ ရက်မှ ၂ဝ ရက်အထိ တရုတ်နိုင်ငံ ယူနန်ပြည်နယ် ကူမင်းမြို့ရှိ စတုရန်းဧရိယာ ၁၉ဝဝဝဝ ကျော် ကျယ်ဝန်းသည့် Kuming Dianchi International Convention and Exhibitionစင်တာတွင် ကျင်းပခဲ့သည်။ တရုတ်-တောင်အာရှ ကုန်စည်ပြပွဲတွင် နိုင်ငံပေါင်း ၈ဝ ကျော်မှ ကုန်ပစ္စည်းများကို အဆင့်မီပြခန်းပေါင်း ၈၅ဝဝ ကျော်ဖြင့် ပါဝင်ပြသလျက်ရှိပြီး မြန်မာနိုင်ငံသည် ဂုဏ်ထူးဆောင်တိုင်းပြည်အဖြစ် ပါဝင်ပြသခွင့်ရရှိကာ မြန်မာနိုင်ငံမှ လုပ်ငန်းရှင် ၂၈၉ ဦးတို့သည် ကုန်စည်ပြခန်း ၆၄ ခန်းတွင် မြန်မာနိုင်ငံ၏ ကုန်ပစ္စည်းများကို ပြသရောင်းချခဲ့သည်။

အဆိုပါ ကုန်စည်ပြပွဲတွင် မြန်မာကုန်သည်များအနေဖြင့် ရောင်းချရန်ထက် ကုန်သည်ချင်းတိုက်ရိုက်ချိတ်ဆက်နိုင်ရန်နှင့် ဈေးကွက်ချဲ့ထွင်ရန် သွားရောက်ပြသရောင်းချခြင်းဖြစ်ပြီး ပြသရောင်းချလျက်ရှိသည့် မြန်မာနိုင်ငံမှ လုပ်ငန်းရှင်အချို့နှင့် တာဝန်ရှိသူတို့ကို မြန်မာ့သတင်းစဉ်မှ သွားရောက်တွေ့ဆုံမေးမြန်းခဲ့သည်-

ဦးဝင်းသန်း (ဒုတိယညွှန်ကြားရေးမှူးမြန်မာကုန်သွယ်မှုမြှင့်တင်ရေးအဖွဲ့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန)

အခုက (၅)ကြိမ်မြောက် တရုတ်-တောင်အာရှ ကုန်စည်ပြပွဲနဲ့ (၂၅) ကြိမ်မြောက် တရုတ်နိုင်ငံ ကူမင်း သွင်းကုန်၊ ထုတ်ကုန် ကုန်စည်ပြပွဲ ဖြစ်ပါတယ်။ ဒီနှစ် ကုန်စည်ပြပွဲမှာ တော့ မြန်မာနိုင်ငံက ပြသတဲ့ ကုန် ပစ္စည်းအသစ်အနေနဲ့ လျှော်ဖြူနဲ့ ဆေးကုလားမကို ပြသရောင်းချပါ တယ်။ နောက်တစ်ခါ ငါးသေတ္တာလို အစားအသောက်နဲ့ ရွှေလုပ်ငန်းရှင် များ အသင်းကနေ မြန်မာနိုင်ငံရဲ့ စနစ်တကျ ထွက်ရှိတဲ့ ရွှေ အကြောင်း ပြသနိုင်ပါတယ်။ နောက် စီးပွားရေး ဦးပိုင်လီမိတက်၊ မြဝတီ ထရိတ်ဒင်းကနေ ဦးဆောင်ပြီး မြန်မာ ဘီယာနဲ့ မြန်မာစီးကရက်တွေကိုလည်း ပထမဦးဆုံးအကြိမ် ပြသပါတယ်။ ကျောက်စိမ်းနဲ့ ကျောက်မျက်ရတနာ အဓိကပါဝင်ပြီး အခြားပစ္စည်းတွေ အနေနဲ့ မြန်မာ့လက်မှုထည် ပစ္စည်း များ၊ ကြိမ်ထည်များ၊ မြန်မာ့ စားသောက်ကုန်များ၊ လက်ဖက်နဲ့ လက်ဖက်ခြောက်၊ မြန်မာ့တိုင်းရင်း ဆေး၊ ချင်းပြည်နယ်ထွက် မြန်မာ့ ထောပတ်သီး၊ ဝ ဥခြောက်၊ ငရုတ်သီး ခြောက် စတဲ့ပစ္စည်းတွေ ပြသဖို့ ခေါ်ယူခဲ့ပါတယ်။ မြန်မာ့လက်မှု ပစ္စည်းတွေအပြင် သစ်ပရိဘောဂ အနေနဲ့ ကျွန်းပါကေးပြား ကုမ္ပဏီ တစ်ခုကို ခေါ်ဆောင်ပြီး ပြသပါတယ်။

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှာ ကျွန်တော်တို့က မြန်မာကုန်သွယ်မှု မြှင့်တင်ရေးအဖွဲ့ ဆိုပြီး ၂ဝ၁၆ ခုနှစ် ဧပြီ ၁ ရက်မှာ အစိုးရသစ်နဲ့အတူ ဌာနသစ်ကို ဖွဲ့စည်းခဲ့ပါတယ်။ ဌာနသစ်ဖွဲ့စည်းတဲ့ ရည်ရွယ်ချက်က ကုန်သွယ်မှု မြှင့်တင်ရေးကို အထူးပြုဆောင်ရွက် နိုင်ဖို့ပါ။ နောက်တစ်ခါ မြန်မာ့ ထွက်ကုန်ပစ္စည်းတွေကို ပြည်ပ နိုင်ငံများက သိရှိပြီးတော့ ဈေးကွက်ထိုးဖောက် ဝင်ရောက်နိုင်ဖို့ ကြိုးစားသွားမှာ ဖြစ်ပါတယ်။

ဦးမောင်မောင်ဆန်း(ဗဟိုအလုပ်အမှုဆောင်မြန်မာနိုင်ငံကျောက်မျက်ရတနာလုပ်ငန်းရှင်များအသင်း)

ကျွန်တော်တို့ ကျောက်မျက်အသင်းက ဆိုင်ခန်းပေါင်း ၃၂ ဆိုင် လာရောက် ပြသရောင်းချပါတယ်။ ပြသတဲ့ ရည်ရွယ်ချက်က ကျောက်မျက် အကြမ်းထည်ကနေ အချောထည် အထိ မြန်မာနိုင်ငံ ဈေးကွက်ကို တစ်ကမ္ဘာလုံး သိအောင်ဆိုတဲ့ ရည်ရွယ်ချက်နဲ့ လာရောက်ပြသခြင်း ဖြစ်ပါတယ်။ နိုင်ငံတော်အတွက်လည်း အကျိုးရှိသလို ဝတ်ဆင်တဲ့သူက တိုက်ရိုက် ဝယ်ယူရတဲ့အတွက် ပိုမို နှစ်သက်ပါတယ်။ မနှစ်ကထက်စာရင် ဒီနှစ်က ပိုမိုရောင်းရသလို စိတ်ဝင် စားမှုလည်း ပိုရပါတယ်။ ပြသတဲ့ ဆိုင်ခန်းအားလုံးလိုလို ရောင်းရပါ တယ်။ ကျောက်စိမ်းကို အဓိက ဝယ်ကြပါတယ်။ အနီနဲ့ အပြာကို လည်း စိတ်ဝင်စားပြီးလိုက်ဝယ်တာ တွေ့ရပါတယ်။ ကျောက်စိမ်း လက်ကောက်နဲ့ ဆွဲပြား စတဲ့ လက်ဝတ်ရတနာတွေကို နှစ်သက်စွာ ဝယ်ယူကြပါတယ်။ တရုတ်-တောင် အာရှ ကုန်စည်ပြပွဲ ငါးကြိမ်စလုံး လာရောက်ရောင်းချ ပြသပါတယ်။MoUထိုးတာမရှိပေမယ့် နေပြည်တော် မှာ လုပ်မယ့် ပြပွဲအတွက်လည်း ဖိတ်ခေါ်ထားတာရှိပါတယ်။ အဲဒီမှာ အချောထည်သာမက အရိုင်းလည်း တရားဝင်ဝယ်ယူလို့ ရပါတယ်။ နောက်ထပ် ဇန်နဝါရီမှာလည်း ရန်ကုန်မှာလုပ်မယ့် ကျောက်မျက် ရတနာ အချောထည်ပြပွဲရှိပါတယ်။ အဲဒီအတွက်လည်း ဖိတ်ထားပါတယ်။ အခုလို နှစ်နိုင်ငံ ပူးပေါင်းခွင့်ရတဲ့ အတွက် အကျ
ိုးအမြတ်တွေရှိပါ တယ်။

ဦးကျော်သူ(အတွင်းရေးမှူးမြန်မာနိုင်ငံ သစ်သီးဝလံပန်းမန်နှင့် ဟင်းသီးဟင်းရွက် တင်ပို့ရောင်းချသူများအသင်း)

ကူမင်းကုန်စည်ပြပွဲမှာ မြန်မာနိုင်ငံ တစ်နိုင်ငံလုံးက ထွက်တဲ့ သစ်သီး ဝလံတွေစုပြီး လာရောက်ရောင်းချ တာပါ။ သစ်သီးအနေနဲ့ အခုချိန် ထွက်နေတာက သရက်သီးနဲ့ ထောပတ်သီးပါ။ ထောပတ်သီးက တော့ ချင်းပြည်နယ်က ထွက်တဲ့အသီး ပါ။ ဝဥ၊ ကယန်းငရုတ်၊ ဖာလာ၊ မျှစ်ချဉ်၊ နနွင်းမှုန့်နဲ့ ချင်းတောင်ထွက် ကော်ဖီတွေ ပါပါတယ်။ နောက် မိချောင်းကွမ်းဖက်ကို စိတ်ဝင်စားလို့ လာမေးပါတယ်။ အဓိကကတော့ ဈေးကွက်ချဲ့တာပါ။ ကျွန်တော်တို့ ကုန်တွေကို နယ်စပ်ကနေ ရောင်းနေ ရတဲ့ အခြေအနေထက် တကယ့် ဝယ်ယူမယ့်သူကို တိုက်ရိုက်ချိတ်ပြီး ရောင်းနိုင်ရင် ဈေးကွက်တစ်ခုကို ခိုင်ခိုင်မာမာရမယ်ဆိုတဲ့ ရည်ရွယ် ချက်ပါ။

အခုပြပွဲမှာ ရောင်းရခြင်းဆိုတာ ထက် ဈေးကွက်ချိတ်ဆက်နိုင်ဖို့ အဓိကပါ။ ဝ ဥ ဆိုရင် ဒီက ကုမ္ပဏီ တစ်ခုနဲ့ ဇွန် ၇ ရက်မှာMoUထိုးပါ တယ်။ ကျန်တဲ့သီးနှံတွေကိုလည်း ဆွေးနွေးလို့ အဆင်ပြေရင် အရောင်း အဝယ်စာချုပ်တွေ ချုပ်သွားပြီးတော့ ရောင်းချနိုင်ဖို့ ဆောင်ရွက်မှာပါ။ ကျွန်တော်တို့ သစ်သီးဝလံ ပန်းမန် ကဏ္ဍမှာဆိုရင် တရုတ်ပြည်ကို နံပါတ် တစ်အနေနဲ့ ဖရဲသီး အများဆုံးပို့တယ်။ တစ်နှစ်ကို တန်ချိန် ခြောက်သိန်းနဲ့ ခုနစ်သိန်းကြားသွားတယ်။ ဒုတိယက သခွားမွှေး တန်ချိန် တစ်သိန်းခွဲနဲ့ နှစ်သိန်းကြားသွားတယ်။ နောက် သရက်သီး၊ ဝဥ၊ ဖာလာ၊ ငရုတ် ပို့တယ်။ ချင်းထောပတ်သီးကတော့ အခုနည်းနည်းပဲ ထွက်သေးတယ်။ ကော်ဖီက ဒီကတစ်ဆင့် ရောင်းနေ တာလည်း ရှိတယ်။ ကော်ဖီက ဒီဘက်ရော အခြားနိုင်ငံတွေပါ နည်းနည်းစီ မျှပြီး ထွက်ပါတယ်။

ဦးမြင့်အောင် (ဒုတိယဥက္ကဋ္ဌချဉ်ပေါင်ဖာလာအသင်း)

ကျွန်တော်က ပဲခူးတိုင်းဒေသကြီး တောင်ငူမြို့ သံတောင်ကနေ ချဉ်ပေါင် ဖာလာကို ကရင်လူမျိုးတွေနဲ့ တောင်ငူ က ကုန်သည်တွေပေါင်းပြီး ကူမင်း ပြပွဲမှာ လာရောက်ပြသတာပါ၊ သံတောင်ကြီးမြို့နယ်မှာ ထွက်တဲ့ ကုန်ပစ္စည်းတွေထဲမှာ ချဉ်ပေါင် ဖာလာက အဓိက ထွက်ကုန် အသက် သွေးကြောပါပဲ။ အဓိက ရောင်းရတာ က တရုတ်ပြည်ပါ။ ကျွန်တော်တို့ နယ်စပ်ကိုပဲ ရောင်းရပါတယ်။ ရွှေလီ နဲ့ မန္တလေးဘက်က ကုန်သည်တွေက တောင်ငူမြို့မှာ အထိုင်ဝယ်ကြပါ တယ်။ ဈေးကွက်က မမှန်တဲ့အတွက် ဈေးကွက်သစ်ကို ရှာဖွေတဲ့အနေနဲ့ ပြပွဲတွေမှာ လာရောက်ပြသခြင်းဖြစ်ပါ တယ်။ ကျွန်တော်တို့ ပစ္စည်းက အော်ဂဲနစ်ဖြစ်ပေမယ့် လာအိုက ပစ္စည်းက ကျွန်တော်တို့ထက် ၁ဝ ဆ လောက် ဈေးကွာနေတယ်။ ဘာကြောင့်ကွာလဲ လေ့လာတော့ သူတို့နိုင်ငံရဲ့ စိုက်ပျိုးရေးဝန်ကြီး ဌာနကနေ နိုင်ငံခြားပညာရှင်တွေ ခေါ်ပြီးတော့ စိုက်ပျိုးထုတ်လုပ်မှုအစ ကနေ အဆုံးအထိ နည်းပညာတွေပေး ပြီး အဆင့်ဆင့် ပြုပြင်တဲ့အခါကျတော့ ပစ္စည်းက အရည်အသွေးမြင့်လာပြီး နိုင်ငံခြားဈေးကွက်ကို ထိုးဖောက်တဲ့ အခါ ကျွန်တော်တို့ မြန်မာနိုင်ငံထက် ဈေးက ၁ဝ ဆ လောက် ပိုရနေပါတယ်။

အခုလက်ရှိပေါက်ဈေးက သူတို့ နိုင်ငံမှာ တစ်ကီလိုဂရမ်ကို အမေရိကန် ဒေါ်လာ ၆ဝ နဲ့ ၇ဝ ကြားလောက် ရှိနေပေမယ့် ကျွန်တော်တို့မှာက ခြောက်ဒေါ်လာ၊ ခုနစ်ဒေါ်လာ လောက်ပဲ ရှိတယ်။ ဈေးကောင်းမရတဲ့ အချက်က မီးခိုးနံ့ပါတဲ့အတွက် ကြောင့်ပါ။ မီးခိုးနံ့မပါတဲ့ နည်းပညာကို ဒီနှစ်ကစပြီး အရည်အသွေးမြှင့်ပြီး ဈေးကွက်ကို ထိုးဖောက်မယ်။ အဲဒါမှ တောင်သူတွေဘဝမှာ အများကြီး ချောင်လည်သွားမယ်။ နှစ်ပေါင်း များစွာ မိရိုးဖလာနည်းနဲ့ လုပ်လာ တာတစ်ခုပဲသိတော့ ဆင်းရဲတွင်းက မထွက်နိုင်ဘူး ဖြစ်နေတယ်။ အရည် အသွေး မမှန်ဘူး။ အသေး၊အလတ်၊ အကြီး ပုံစံသုံးမျိုး ဖြစ်နေတယ်။ လာအိုက ပုံစံလည်းမှန်တယ်။ အရည် အသွေးလည်း မှန်တယ်။ ဒါကြောင့် ကျွန်တော်တို့က အသိပညာရော၊ နည်းပညာရော နှစ်ခုစလုံးသွားမှ အောင်မြင်မယ်။ ဒါကြောင့် အဖွဲ့အစည်းအားလုံးနဲ့ ပေါင်းပြီး နည်းပညာရော အတတ်ပညာပိုင်းပါ ကောင်းအောင် ကြိုးစားနေပါတယ်။

ဒေါ်နန်းမိုင်(ပိုင်ရှင်၊ လှပျိုဖြူ တိုင်းရင်းဆေးဝါးထုတ်လုပ်ရေး)
ရန်ကုန်က လာရောင်းတာပါ။ ကိုယ်တိုင်ဖော်စပ်ပြီး ကိုယ်တိုင် ထုတ်လုပ်တဲ့ မြန်မာတိုင်းရင်းဆေးတွေ လာရောင်းတာပါ။ သလိပ်ပျော် ချောင်းဆိုးပျောက်ဆေး၊ အရိုး ကျီးပေါင်းလိမ်းဆေး၊ စားဆေး၊ အမာရွတ်ပျောက် လိမ်းဆေးနဲ့ ဒဏ်ကြေလိမ်းဆေးတွေ လာရောက် ပြသ ရောင်းချတာပါ။ ၂ဝဝ၃ ခုနှစ်က စတင်ထုတ်လုပ်ပြီး ဒီမှာ လာရောက် ပြသ ရောင်းချတာက သုံးကြိမ်မြောက် ပါ။ အဓိက ရောင်းချတာက တရုတ် နိုင်ငံက အအေးပိုင်းဖြစ်တာကြောင့် လိမ်းဆေးကို အဓိကထား ဖြန့်ဖြူး ရောင်းချပါတယ်။ အိမ်နီးချင်းနိုင်ငံကို လည်း ကျွန်မတို့ရဲ့ မြန်မာတိုင်းရင်း ဆေးဝါးအစွမ်းတွေ သိအောင် ရောင်းချတာပါ။ တရုတ်နိုင်ငံက ကိုယ်စားလှယ်တွေနဲ့ ကျွန်မတို့က အချိတ်အဆက်ရှိပါတယ်။ အခု ၂ဝ၁၈ ကုန်စည်ပြပွဲမှာ ပိုမိုရောင်းချ နိုင်ပါတယ်။ အခုလို အိမ်နီးချင်းနိုင်ငံ မှာ လာရောက်ရောင်းချနိုင်အောင် နှစ်စဉ် ကုန်စည်ပြပွဲတွေ လုပ်ပေးလို့ ကျေးဇူးတင်ပါတယ်။ ရောင်းချခွင့်ပေး တဲ့အတွက် နိုင်ငံသားတစ်ယောက် အနေနဲ့ရော လှပျိုဖြူဆေးတိုက်အနေ နဲ့ပါ နိုင်ငံတော်ကို ကျေးဇူးတင်ပါ တယ်။ အမြဲဖိတ်ခေါ်တဲ့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ကိုလည်း ကျေးဇူးတင်ပါတယ်။

ဦးတင်ဝင်း
ဒါရိုက်တာ
မြန်မာ့စီးပွားရေးဦးပိုင်လီမိတက်
ငွေပင်လယ်မွေးမြူရေးနှင့်ရေလုပ်ငန်းကုမ္ပဏီလီမိတက်

ကျွန်တော်တို့ ဒီအခေါက် လာရောက်ပြသရောင်းချတဲ့အခါ ထူးထူးခြားခြား အနေနဲ့ မြန်မာဘီယာနဲ့ စီးကရက်ကို ပြသရောင်းချပါတယ်။ စိတ်ဝင်စားမှု ရပါတယ်။ ကျွန်တော်တို့အဖွဲ့မှာ ငွေပင်လယ်မွေးမြူရေးနှင့် ရေလုပ်ငန်း ကုမ္ပဏီလိမိတက်ပါတယ်။ အဓိပတိ ပါတယ်။ မြဝတီ ထရိတ်ဒင်းပါ ပါတယ်။ တရုတ်မှာက ဈေးကွက်အကြီးကြီးရှိတယ်။ သူတို့ဘက်ကလည်း အများကြီး ပြသတယ်။ ကျွန်တော်တို့ ဒီမှာ လာရောက်ပြသတဲ့အခါ လောလောဆယ် MoU နှစ်စောင် ထိုးဖြစ်ပါတယ်။ မြဝတီလီမိတက်က ပဲ၊ ပြောင်း၊ နှမ်း အမေရိကန်ဒေါ်လာ သန်း ၅ဝ ဖိုး ထိုးဖြစ်ပါတယ်။ ငွေပင်လယ်က ရေငန်ငါး မျိုးစုံ ဒေါ်လာ လေးသန်းဖိုးထိုးဖြစ်ပါတယ်။ ရည်ရွယ်ချက်က နှစ်ပိုင်းရှိပါတယ်။ ပထမအချက်က သူတို့ရဲ့ ခင်းကျင်းပြသရောင်းချမှုကို ချိတ်ဆက်ပြီး ကျွန်တော် တို့ရဲ့ ဈေးကွက်ကို ပိုမိုကောင်းမွန်စေဖို့၊ နောက်တစ်ခုက တိုင်းပြည်ရဲ့ အနာဂတ် အခြေအနေက စီးပွားရေးပြုပြင်ပြောင်းလဲမှုကို အများကြီး လုပ်ဆောင်နေ တာဖြစ်တဲ့အတွက် ကျွန်တော်တို့ရဲ့ အနာဂတ် ဈေးကွက်အခြေအနေကို ဘယ်လို ပြုပြင်ပြောင်းလဲလို့ရနိုင်မလဲဆိုတဲ့ ရည်ရွယ်ချက်နဲ့ လာရောက် လေ့လာတာပဲ ဖြစ်ပါတယ်။

ဒေါ်ခင်ဌေးကြွယ်
မြန်မာ့လက်မှုပညာပစ္စည်းများ
ရောင်းချသူ

မြန်မာ့လက်မှုပညာပစ္စည်းတွေဖြစ်တဲ့ ရွှေချည်ထိုးနဲ့ သစ်သား အသုံး အဆောင်ပစ္စည်းတွေကို ကုန်စည်ပြပွဲမှာ လာရောက်ရောင်းချတာ ၁၉ ကြိမ် ရှိပါပြီ။ လက်ရာကောင်းမွန်ပြီး သစ်သားဆိုလည်း သစ်သားအစစ်နဲ့ ပြုလုပ် တဲ့အတွက် ဝယ်ယူသူများပါတယ်။ စိတ်ဝင်စားပြီး အမြဲတမ်း မှာယူသူတွေလည်း ရှိပါတယ်။ မြန်မာနိုင်ငံနဲ့ တရုတ်က ယဉ်ကျေးမှုချင်းလည်းတူတော့ မြန်မာ့ ယဉ်ကျေးမှု လက်မှုပညာကို အားပေးကြတယ်။ မြန်မာနိုင်ငံ ပြန်ရောက်ရင်လည်း လာရှာပြီး မှာယူကြတဲ့အတွက် ပို့ပေးရပါတယ်။ အခု လာရောက်ရောင်းချတာ လက်မှုပစ္စည်း အမျိုးပေါင်း ၅ဝ လောက်ရှိပြီး ရောင်းအား ပိုကောင်းလာ ပါတယ်။ ။