ပြည်ထောင်စုငြိမ်းချမ်းရေးညီလာခံ-(၂၁)ရာစုပင်လုံ တတိယအစည်းအဝေးအတွက် ကဏ္ဍအလိုက် ဆွေးနွေးပွဲများ ကျင်းပပြီးစီး

နေပြည်တော် ဇွန် ၂၈

ပြည်ထောင်စုငြိမ်းချမ်းရေးညီလာခံ-(၂၁)ရာစုပင်လုံ တတိယအစည်းအဝေးအတွက် နိုင်ငံရေး၊ လူမှုရေး၊ စီးပွားရေး၊ လုံခြုံရေး၊ မြေယာနှင့် သဘာဝပတ်ဝန်းကျင် စသည့် ကဏ္ဍကြီး ငါးရပ်နှင့်ပတ်သက်သည့် ဆွေးနွေးပွဲ များကို ယနေ့နံနက် ၁ဝ နာရီတွင် နေပြည်တော်ရှိ မြန်မာ အပြည်ပြည်ဆိုင်ရာကွန်ဗင်းရှင်းဗဟိုဌာန-၂ ၌ ဆက်လက် ကျင်းပသည်။

အဆိုပါ ဆွေးနွေးပွဲများကို ဇွန် ၂၆ ရက်မှ ၂၈ ရက် အထိ ကျင်းပခဲ့ပြီး တိုင်းရင်းသားလူနည်းစုများ၏ အခွင့်အရေးများ ကာကွယ်ခြင်း၊ ဒီမိုကရေစီအခွင့်အရေး၊ အခြေခံလူ့အခွင့်အရေး၊ ကျား၊ မ တန်းတူညီမျှရေး၊ ဖက်ဒရယ်စနစ်တွင် စီးပွားရေးနှင့် ဒေသဖွံ့ဖြိုးရေးဆိုင်ရာ အခြေခံရမည့်မူများ၊ ဈေးကွက်စီးပွားရေးစနစ် ပီပြင်စွာ ဖော်ဆောင်ရေး၊ တိုင်းရင်းသားစာပေသင်ကြားရေး၊ တိုင်းရင်းသားဘာသာစကား၊ စာပေ၊ ရိုးရာဓလေ့၊ ထုံးတမ်း စဉ်လာ၊ ဝတ်စားဆင်ယင်မှု၊ သမိုင်းအမွေအနှစ်များနှင့် ယဉ်ကျေးမှုအမွေအနှစ်များ ဖော်ထုတ်ကာကွယ်ထိန်းသိမ်း ရေး၊ လူတိုင်းအကျုံးဝင်သော ပညာရေးစနစ်၊ လူတိုင်း လက်လှမ်းမီ လွှမ်းခြုံနိုင်သည့် ကျန်းမာရေးစနစ် ဖော်ဆောင်ရေး၊ အနာဂတ်တွင် ဒီမိုကရေစီနှင့် ဖက်ဒရယ် စနစ်ကို
အခြေခံသည့်ပြည်ထောင်စုတွင် တပ်မတော်တစ်ခုတည်းထားရှိရေး အဆိုပြု ချက်များကို ဆွေးနွေးခဲ့ကြသည်။

နိုင်ငံရေးကဏ္ဍဆွေးနွေးပွဲနှင့်စပ်လျဉ်း၍ ကချင်ပြည်နယ် ဒီမိုကရေစီ ပါတီဥက္ကဋ္ဌ ဒေါက်တာ တူးဂျာက ''နိုင်ငံရေးကဏ္ဍနဲ့ပတ်သက်ပြီး တိုင်းရင်းသား အရေး၊ တိုင်းရင်းသားအခွင့်အရေးနဲ့ လူနည်းစုတိုင်းရင်းသားတွေရဲ့ အကြောင်း အရာတွေကို ဆွေးနွေးခဲ့ပါတယ်။ အဲဒီအပြင် ရှေ့ဆက်သွားမယ့် လုပ်ငန်းစဉ်ထဲ မှာပါတဲ့ နိုင်ငံရေးဆိုင်ရာကိစ္စရပ်တွေ၊ ဖွဲ့စည်းပုံရေးဆွဲရာမှာ ထည့်သွင်းသင့်တဲ့ အချက်တွေကို ဆွေးနွေးခဲ့ပါတယ်။ တိုင်းရင်းသားလက်နက်ကိုင်အဖွဲ့များ (EAO)နဲ့ နိုင်ငံရေးပါတီတွေကတင်တဲ့ စာတမ်းတွေကို တစ်ချက်ချင်း ဆွေးနွေး ပါတယ်။ တူတဲ့အမြင်တွေရှိသလို ကွဲလွဲတဲ့အမြင်တွေလည်းရှိပါတယ်။ ဒါတွေကို မှတ်ချက်အနေနဲ့ရေးထားပါတယ်။ သုံးပွင့်ဆိုင်ကိုယ်စားလှယ်တွေရဲ့ သဘောထားတစ်ခုတည်း ရရှိတယ်ဆိုရင်တော့ မှတ်ချက်မှာ မပါတော့ပါဘူး။ စာတမ်းတွေကို မနက်ဖြန် ကျင်းပမယ့် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ-UPDJC ကို တင်မှာဖြစ်ပါတယ်။UPDJC ကနေ ပြန်ချပေး လိုက်တဲ့အချက်တွေကို ဇူလိုင် ၄ ရက်ကနေ ၆ ရက်အထိ ကျင်းပမယ့် လုပ်ငန်း ကော်မတီအစည်းအဝေးမှာ ပြန်ပြီးဆွေးနွေးမှာဖြစ်ပါတယ်။ တိုင်းရင်းသား လူနည်းစုအခွင့်အရေးမှာ သဘောတူညီထားတာတွေ တော်တော်များများ ရှိပါတယ်''ဟု ပြောသည်။

ခေါင်းစဉ် ၁ဝ ခု ဆွေးနွေး

ထို့အတူ ဦးအောင်ကြည်ညွန့်က ''ဒီသုံးရက်အတွင်းမှာ ဆွေးနွေးခဲ့တာတွေ ကို စုစည်းပြီး UPDJC ကို တင်ပြသွားမှာပါ။ နိုင်ငံရေးပါတီက ဆွေးနွေးဖို့ ကျန်ခဲ့တဲ့ ခေါင်းစဉ် ၁ဝ ခုရှိပါတယ်။ အဲဒီထဲက ခေါင်းစဉ် နှစ်ခုကိုပဲ ဆွေးနွေးခဲ့ ပါတယ်။ တိုင်းရင်းသား လူနည်းစုတွေရဲ့အခွင့်အရေးကို ကာကွယ်ခြင်းနဲ့ ဒီမိုကရေစီအခွင့်အရေး၊ လူ့အခွင့်အရေး၊ ကျား၊ မ တန်းတူညီမျှရေးဆိုတဲ့ အချက်တွေကို ဆွေးနွေးခဲ့ပါတယ်''ဟု ပြောသည်။

လုံခြုံရေးကဏ္ဍဆွေးနွေးပွဲနှင့်စပ်လျဉ်း၍ ဦးမျိုးဝင်းက ''လုံခြုံရေးကဏ္ဍနဲ့ပတ်သက်ပြီး အစိုးရနဲ့တိုင်းရင်းသားလက်နက်ကိုင်အဖွဲ့များ (EAO)ကြားမှာ အလွတ်သဘော ဆွေးနွေးပွဲ လေးကြိမ်လုပ်ခဲ့ပါတယ်။ ဒီအလွတ်သဘော ဆွေးနွေးပွဲကနေ ရရှိတဲ့အချက်တွေနဲ့ သဘောထားစုစည်းချက်တွေကို အခု ဆွေးနွေးပွဲမှာ တင်ပြလာပါတယ်။ အလွတ်သဘော ဆွေးနွေးပွဲဆိုတာကလည်း တရားဝင်ဆွေးနွေးပွဲကို အထောက်အကူဖြစ်ဖို့ လုပ်ခဲ့ကြတာပါ။ လုံခြုံရေးကဏ္ဍမှာတော့ အနာဂတ်မှာ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုမှာ တပ်မတော်တစ်ခုတည်းထားရှိရေးကိစ္စကို တိုင်းရင်းသား လက်နက်ကိုင်အဖွဲ့များ(EAO)နဲ့ ဆွေးနွေးပါတယ်။ အနာဂတ်မှာ တည်ဆောက်မယ့် ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုမှာ ထားရှိမယ့်တစ်ခုတည်းသော တပ်မတော် ကိစ္စအပါအဝင် လုံခြုံရေးကဏ္ဍကို ဆွေးနွေးဖို့ အစိုးရနဲ့ EAO ကြားမှာ အလုပ်ရုံဆွေးနွေးပွဲတွေ ပြုလုပ်သွားပြီးတော့ မှ ဆောင်ရွက်သွားမယ်ဆိုတဲ့ နှစ်ချက်ကို ဆွေးနွေးခဲ့ပါတယ်။ အလွတ်သဘော ဆွေးနွေးပွဲက နှစ်ချက်ကို အပြုသဘောဆောင်တဲ့ ရလဒ်အဖြစ် ထားရှိပါတယ်။ တိုင်းပြည်တစ်ခုမှာ တပ်မတော်တစ်ခုတည်း ရှိရမယ်ဆိုတာ မူအားဖြင့် ရှိထားပြီးသားပဲ။ ဒါ Universal Truth အဖြစ်နဲ့ လက်ခံ
ထားပြီးသားပါပဲ။ အဲဒါနဲ့ပတ်သက်ပြီး အလုပ်ရုံ ဆွေးနွေးပွဲတွေကျင်းပကာ နှစ်ဖက်လက်ခံနိုင်တဲ့ ပညာရှင်တွေခေါ်ယူပြီး အတူတကွ လေ့လာမယ်၊ သဘောထားတွေ စုစည်း မယ်။ ဒါတွေကို ရေရှည်မှာ ဆောင်ရွက်သွားဖို့ သဘောထားစုစည်းသွားမှာ ဖြစ်ပါတယ်'' ဟု ပြောသည်။

အချက်ခြောက်ချက်ရှိ

စီးပွားရေးကဏ္ဍဆွေးနွေးပွဲနှင့်စပ်လျဉ်း၍ ဦးလှမောင်ရွှေက ''အရင် (၁ဝ)ကြိမ်မြောက် UPDJCအစည်းအဝေးက ကျွန်တော်တို့ ပြန်ဆွေးနွေးဖို့ ပို့ပေးလိုက်တဲ့ အချက်ခြောက်ချက်ရှိပါတယ်။ အဲဒါတွေ ကျွန်တော်တို့ အားလုံး ဆွေးနွေးပြီးပါပြီ။ နောက်တစ်ခုက တိုင်းရင်းသားလက်နက်ကိုင် ငါးဖွဲ့ ပေါင်းတင်တဲ့ ၂၄ ချက်ပါတဲ့ စာတမ်းတစ်ခုရှိပါတယ်။ အဲဒီထဲက ၁၃ ချက် ဆွေးနွေးပြီးပါပြီ။ မွန်အမျိုးသားအဆင့် နိုင်ငံရေးဆွေးနွေးပွဲကတင်တဲ့ အချက် ၇၁ ချက်နဲ့ နိုင်ငံရေးပါတီတွေက တင်တဲ့အချက် ရှစ်ချက်ကိုလည်း တစ်ဝက် ကျော် ဆွေးနွေးပြီးပါပြီ။ ယခုဆွေးနွေးချက်တွေအားလုံးကို တိုင်းရင်းသားတွေက သူတို့ရဲ့ တာဝန်ရှိတဲ့ သူတွေဆီ ပြန်ယူသွားမယ်။ လာမယ့် ဇူလိုင် ၄ ၊ ၅၊ ၆ ရက်မှာ ကျွန်တော်တို့ ပြန်ပြီး ဆွေးနွေးပါမယ်။ အဲဒါပြီးရင် UPDJC ကတစ်ဆင့် ပြည်ထောင်စုငြိမ်းချမ်းရေးညီလာခံ-(၂၁) ရာစုပင်လုံကို တင်မှာဖြစ်ပါတယ်။ အရင်ညီလာခံမှာတုန်းက စီးပွားရေး ကဏ္ဍကနေ စုစုပေါင်းအချက် ၁၁ ချက် မူဝါဒအဖြစ်ထွက်ခဲ့ပါတယ်။ အခုတစ်ခေါက်မှာလည်း အရင်တစ်ခါကထက် မနည်းတဲ့ အချက်တွေကို မူဝါဒအဖြစ် ထွက်လာမယ်လို့ မျှော်လင့်ပါတယ်။ စီးပွားရေးကဏ္ဍအတွက် အားရပါတယ်။ ညီလာခံကျင်းပမယ့်ရက်ကို မနက်ဖြန် UPDJC အစည်းအဝေးမှာ အတည်ပြုမှာပါ။ တတိယအကြိမ် ညီလာခံကို ဇူလိုင် ၁၁ ရက်မှာ ကျင်းပဖို့ အဆိုပြုထားပါတယ်။ ညီလာခံကိုတော့ ဇူလိုင် ၁၁ ရက်ကနေ ၁၅ ရက်အထိ ငါးရက်ကျင်းပဖို့တင်ပြမှာပါ။ တက်ရောက်မယ့် လက်နက်ကိုင်အဖွဲ့တွေကို ဖိတ်ကြားဖို့ကတော့ မနက်ဖြန်မှာ ကျင်းပမယ့်UPDJC မှာ ဆုံးဖြတ်မှာဖြစ်ပါတယ်''ဟု ပြောသည်။

တက်ရောက်

ယနေ့ ဆွေးနွေးပွဲများသို့ ပြည်ထောင်စုငြိမ်းချမ်းရေးဆွေးနွေးမှုပူးတွဲ ကော်မတီ (UPDJC)အတွင်းရေးမှူးများ ဖြစ်ကြသည့် ဒုတိယဗိုလ်ချုပ်ကြီး(ငြိမ်း) ဦးခင်ဇော်ဦး၊ ဦးအောင်စိုး၊ ဗိုလ်ချုပ်စိုးနိုင်ဦး၊ ဦးဇော်ဌေး၊ ဦးလှမောင်ရွှေ၊ ပဒိုစောတာဒိုမူး၊ ဦးမျိုးဝင်း၊ ဦးစိုင်းငင်း၊ စောမြရာဇာလင်း၊ ခွန်မြင့်ထွန်း၊ ဦးမြင့်စိုး၊ ဦးနိုင်ငံလင်း၊ စိုင်းကျော်ညွန့်၊ မင်းကျော်ဇေယျဦးနှင့် တာလှဖေ၊ ပူးတွဲကော်မတီဝင်များ၊ အစိုးရ၊ လွှတ်တော်၊ တပ်မတော် အစုအဖွဲ့တို့မှ ကိုယ်စားလှယ်များနှင့် အကျိုးတော်ဆောင်များ တက်ရောက်ကြသည်။

ထို့နောက် ပြည်ထောင်စုငြိမ်းချမ်းရေး ဆွေးနွေးမှုပူးတွဲကော်မတီ (UPDJC) အတွင်းရေးမှူးများ အစည်းအဝေးကို ဆက်လက်ကျင်းပခဲ့ကြောင်း သိရသည်။

ကျော်သူထက်၊ အေးအေးသန့်(သတင်းစဉ်)