စစ်ကိုင်းတိုင်းဒေသကြီး လူထုအခြေပြုခရီးသွားလုပ်ငန်း နှစ်ရွာအနက် နွယ်ငြိမ်းကျေးရွာတွင်သာ ဖော်ဆောင်မှုပီပြင်

မုံရွာ မေ ၂၈

ကျေးရွာလူထုပိုင် အသေးစားခရီးသွားလုပ်ငန်း၊ အသေးစားဟိုတယ်၊ မိုတယ် လုပ်ငန်းဟုခေါ်ဆိုနိုင်သော Community Base Tourism(CBT)လုပ်ငန်း ကို စစ်ကိုင်းတိုင်းဒေသကြီးတွင် ပြီးခဲ့သည့်နှစ်က နွယ်ငြိမ်းကျေးရွာနှင့် ဇလုံ တောင်ဒေသတို့တွင် စတင်ဖော်ဆောင်ခဲ့သော်လည်း နိုင်ငံခြားဧည့်သည် ဝင်၊ ထွက်ခွင့်ရသည့် နွယ်ငြိမ်းကျေးရွာတွင်သာ (CBT)လုပ်ငန်း ပီပြင်သေးကြောင်း ဟိုတယ်နှင့် ခရီးသွားညွှန်ကြားမှုဦးစီးဌာန စစ်ကိုင်းတိုင်းဒေသကြီး မုံရွာရုံးခွဲ ဦးစီးအရာရှိ ဦးအောင်ဖြိုးလွင်က ရှင်းပြသည်။

''ပြီးခဲ့တဲ့နှစ်ကစပြီး CBTအကောင်အထည်ဖော်ပေးတာ စစ်ကိုင်းတိုင်းဒေသကြီး အတွင်း နွယ်ငြိမ်းဒေသနဲ့ ဇလုံတောင်ဒေသကို ဖော်ဆောင်ပေးထားပေမယ့် လက်ရှိမှာ နိုင်ငံခြားသား ဧည့်သည် ဝင်၊ ထွက်လေ့လာခွင့်ရတဲ့ နွယ်ငြိမ်း ဒေသသာ CBTလုပ်ငန်း ပီပြင်တယ်လို့ပြောရင်ရပါတယ်၊ ဗန်းမောက်မြို့နယ် ဇလုံတောင်ဒေသက ကန့်သတ်နယ်မြေဖြစ်နေတော့ နိုင်ငံခြားသားဧည့်သည် လာလို့မရသေးဘူး၊ ပြည်တွင်းခရီးသွားတွေပဲ လက်ရှိမှာ ဝင်၊ ထွက်သွားလာ လို့ရတဲ့နေရာပါ၊ နိုင်ငံခြားသားလာလို့မရတဲ့ကိစ္စကို ဖြေလျှော့ဖို့အတွက် စစ်ကိုင်းတိုင်းဒေသကြီးအစိုးရကနေတစ်ဆင့် တင်ပြထားပါတယ်၊ ကန့်သတ် နယ်မြေသတ်မှတ်တာကနေ ဖြုတ်ချပေးလိုက်ရင်တော့ နိုင်ငံခြားသားတွေ အတွက်လည်း လေ့လာခွင့်ရသလို ခရီးသွားဝင်ငွေလည်း အခုထက်ပိုရလာမှာ ဖြစ်ပါတယ်၊ ဒေသတစ်ခုဖွံ့ဖြိုးဖို့ဆိုတာ နိုင်ငံခြားဧည့်သည်တွေဝင်ရောက် လေ့လာခွင့်ရမှသာ အဆင်ပြေတာပါ''ဟု ဦးအောင်ဖြိုးလွင်ကရှင်းပြသည်။

ဧရာဝတီမြစ်အတိုင်း မန္တလေးမြို့မှ ဗန်းမော်မြို့အထိ သွားရောက်ကြသည့် ပြည်ပဧည့်သည်များသည် နွယ်ငြိမ်းဒေသနှင့်အတူ ပျူဒေသဟန်လင်းနှင့် ငါးမည်ရရွှေဘိုဒေသသို့ပါ ဝင်ရောက်လေ့လာနိုင်ရန် ခရီးစဉ်လမ်းကြောင်းကို ရေးဆွဲထားရာ နွယ်ငြိမ်းရွာကို CBTအဖြစ်ဖော်ဆောင်ထားခြင်းသည် ပြည်ပ ခရီးသွားများနှင့် ဒေသအတွက် များစွာလက်တွေ့အကျိုးရှိနေကြောင်း သိရသည်။

''နွယ်ငြိမ်းဒေသကို နိုင်ငံခြားသားဧည့်သည်အဝင်၊ အထွက်ရှိတယ်၊ မန္တလေး ကနေ ဧရာဝတီမြစ်တစ်လျှောက်လာရင်း နွယ်ငြိမ်းမှာ ဝင်နားရင်း အိုးလုပ်ငန်း၊ စဥ့်ထည်လုပ်ငန်းတွေကိုဝင်ရောက်လေ့လာကြပါတယ်၊ လေ့လာရင်းရွာထဲက ဝါးစိုက်တာ၊ ဝါးနဲ့လုပ်တဲ့လုပ်ငန်းတွေကိုပါ လေ့လာကြတာပါ၊ နွယ်ငြိမ်းက တစ်ဆင့် ဟန်လင်းဘက်၊ ရွှေဘိုဘက်တွေကိုပါသွားပြီး လေ့လာနိုင်အောင် ခရီးသွားလမ်းကြောင်းလေးတွေဆွဲပြီး သွားကြပါတယ်''ဟု ဦးအောင်ဖြိုးလွင်က
ဆိုသည်။

နွယ်ငြိမ်းရွာသို့လာသည့် ပြည်ပဧည့်သည်များသည် ပြီးခဲ့သည့်ဧပြီလက ၄၂ ဦးသာရှိရာ အလွန်နည်းခဲ့သည်၊ နွယ်ငြိမ်းကျေးရွာသို့ ၂ဝ၁၇-၂ဝ၁၈ခုနှစ် တစ်နှစ်လုံး (အောက်တိုဘာလမှမတ်လအထိ) ပြည်ပဧည့်သည်ဝင်ရောက်မှု သည် ၇၇၃ ဦးဝင်ပြီး ဗြိတိန်နိုင်ငံသား အများဆုံးဖြစ်ကာ စပိန်နှင့်ပြင်သစ် နိုင်ငံသားလည်း အဝင်များကြောင်းသိရသည်။ နွယ်ငြိမ်းရွာတွင် ယခင်က တစ်ရွာလုံး စဥ့်လုပ်ငန်းလုပ်ကိုင်ကြသော်လည်း လက်ရှိတွင် ၁၂ ဦးသာ လုပ်ကိုင်ကြတော့ကြောင်း သိရသည်။

မျိုးဝင်းထွန်း(မုံရွာ)