ငါးထမင်းနယ်ဆိုတဲ့အမည်ကြားလိုက်ရုံနဲ့ ရှမ်းလူမျိုး တွေရဲ့ ဒေသအစာလို့ ခန့်မှန်းမိကြမှာပါ။ ဒေသစာလို့ ဆိုရာမှာတော့ မူရင်းဒေသက ထွက်ကုန်တွေနဲ့ အသုံး ပြုမှသာ ဒေသအရသာနဲ့ အနံ့အစစ်ကို ရနိုင်တာပါ။ ဥပမာပြောရရင် ထားဝယ်၊ မြိတ်ဘက်မှာ အချဉ်ရည် သုံးတဲ့ ပအုံးရည်ကို ရှာလကာရည်နဲ့ အစားထိုးပေ မယ့် ချဉ်ပုံချဉ်နည်း အရသာနဲ့ အနံ့ကတော့ တခြားစီ ပါပဲ။
ငါးထမင်းနယ်လုပ်ရာမှာ ရှမ်းဆန်စစ်စစ်ကို သာ သုံးသင့်ပါတယ်။ ငါးကိုတော့ ငါးဖိန်း၊ ရွှေဝါ ငါးကြင်းနဲ့ ငါးရံ့တို့ သုံးနိုင်ပေမယ့် ငါးရံ့က အသား များပြီး အရသာပိုချိုလို့ ငါးရံ့ကို သုံးကြပါတယ်။ ကြက်သွန်ဖြူဆိုရင်လည်း တရုတ်ကြက်သွန်ဖြူဥကြီး တွေအစား ရှမ်းကြက်သွန်ဖြူအမြွှာလေးတွေက ပိုပြီး မွှေးတာပေါ့။ ခရမ်းချဉ်သီးဆိုလည်း အချဉ်စူး၊ အစေ့ များပြီး အသားပါးတဲ့ ကိုင်းသီးကို ရှောင်ရပါမယ်။ အင်းသီးလို့ခေါ်တဲ့ အင်းလေးဒေသထွက် ခရမ်းချဉ် သီးက အစေ့နည်းပြီး အသားထူလို့ အင်းသီးကိုသာ သုံးသင့်ပါတယ်။
ငါးထမင်းနယ်လုပ်စားမယ်ဆိုရင် ရှမ်းဆန်ကို ဆားနည်းနည်းနဲ့ နနွင်းခတ်ပြီး အနေတော် ရေခန်း ချက်ထားပါ။ ငါးကို သန့်စင်ပြီး ဆား၊ နနွင်းနဲ့ ရေခန်း အောင် ပြုတ်ပြီး အသားနွှာထားရပါမယ်။ ပြီးရင် ကြက်သွန်ဖြူဆီချက် ချက်ရပါမယ်။ နောက်တစ်မျိုး က ခရမ်းချဉ်သီးအနှစ်ပါ။ ခရမ်းချဉ်သီးကိုပြုတ် အခွံ နွှာပြီး ငါးအသားထဲက သုံးပုံတစ်ပုံလောက်နဲ့ ဆီပြန် အောင် ချက်ပြီး အနှစ်လုပ်ထားရပါမယ်။
အားလုံးအသင့်ပြင်ပြီးတဲ့အခါ ပူနွေးနွေး ရှမ်းဆန်ထမင်းကို နွှင်ထားတဲ့ ငါးအသားနဲ့ အိုး သန့်သန့်တစ်လုံးမှာရောပြီး အစေ့ပျောက်အောင် နယ် ပါမယ်။ တချို့က ကျည်ပွေ့အရှည်ကို ဆီသုတ်ပြီး နယ်ပါတယ်။ သတိထားဖို့အချက်က ထမင်း အနေ အထားက ပူနွေးနေမှသာ ငါးနဲ့ရောနယ်တဲ့အခါ ထမင်းနဲ့ငါး တစ်သားတည်းဖြစ်ပြီး ကြေလွယ်တာပါ။ ထမင်းအေးနေရင် နယ်လို့အဆင်မပြေတော့ပါ။ အသင့်ဖြစ်တဲ့အခါ ငါးထမင်းကို အလုံးလေးတွေလုံး သို့မဟုတ် နှစ်သက်ရာပန်းကန်လေးတွေနဲ့ ပုံစံသွင်း ပြီး ငှက်ပျောဖက်လေးခင်းကာ ပြင်ဆင်ကြပါတယ်။
ပန်းကန်ထဲမှာ ပြင်ထားတဲ့ ငါးထမင်းနယ်က နနွင်းရောင်ဝါဝါကလေးနဲ့ပါ။ အဲဒီ ငါးထမင်းနယ်အပေါ် ကြက်သွန်ဖြူဆီချက်နဲ့ ခရမ်းချဉ်သီးဆီပြန် အနှစ် ကလေးပုံ၊ ကုလားအော်ငရုတ်သီးခြောက် အတောင့် ကြော်၊ မြေပဲဆန်ကြော်နဲ့ လတ်လတ်ဆတ်ဆတ် ဂျူးမြစ် လေးတွေထည့်ပြီး အသင့်တွဲဖက်စားသုံးလို့ရပါပြီ။ ရှမ်းလူမျိုးများသာမက လူမျိုး၊ ဘာသာမရွေး ကြိုက် နှစ်သက်ကြတဲ့ ဒေသစာတစ်မျိုးပါ။
စံလွင် (ငါးဦးစီး)
No comments:
Post a Comment