မြန်မာ့ရုပ်ရှင်ရိုက်ကူးထုတ်လုပ်မှုကို အဆင့်မြှင့်တင်နိုင်ရန် ရည်ရွယ်၍ ပြုလုပ်သည့် ကင်မရာရိုက်ကူးမှုဆိုင်ရာ စာတွေ့၊ လက်တွေ့ အသိပညာမျှဝေခြင်း အစီအစဉ်ကို ယနေ့ညနေ ၆ နာရီက ရန်ကုန်မြို့ ဗဟန်းမြို့နယ် ရွှေတောင်ကြား(၂)ရပ်ကွက်ရှိ ပြန်ကြားရေးဝန်ကြီးဌာန ပြန်ကြားရေးနှင့် ပြည်သူ့ဆက်ဆံရေးဦးစီးဌာန ရုပ်ရှင် မြှင့်တင်ရေးဌာနခွဲ စတူဒီယို (၁)တွင် ပြုလုပ်သည်။
အဆိုပါအစီအစဉ်ကို မြန်မာနိုင်ငံ ရုပ်ရှင်အစည်းအရုံး က ဦးဆောင်၍ မြန်မာ့ရုပ်ရှင်လုပ်ငန်း၏ ကူညီမှုတို့ဖြင့် စက်မှုအခြေခံ သာရေး၊ နာရေးအသင်းက စီစဉ်ပြုလုပ် ခြင်းဖြစ်ပြီး ရုပ်ရှင်ရိုက်ကူးခြင်းနှင့်ပတ်သက်၍ ကင်မရာ အပိုင်း၊ မီးအလင်းအမှောင်အပိုင်းနှင့် မီးပိုင်းဆိုင်ရာ အပိုင်းများတွင်ပါဝင်သော ကင်မရာနှင့် ပတ်သက်သည့် အကြောင်းအရာများဖြစ်သည့် နည်းပညာအပိုင်း၊ ကင်မရာ တည်ဆောက်ပုံနှင့် မှန်ဘီလူးတည်ဆောက်ပုံများကို ကင်မရာရိုက်ကူးသူများနှင့် အထောက်အကူပြုသူများကို သက်ဆိုင်ရာ ကဏ္ဍအလိုက် တာဝန်ယူရိုက်ကူးမှုပုံစံများ အား စာတွေ့လက်တွေ့ အသိပညာမျှဝေပေးခဲ့သည်။
ထိုသို့ အသိပညာမျှဝေရာတွင် ကင်မရာ အမျိုးအစား စုံလင်စွာ အသုံးပြုကာ ကင်မရာနှင့် မှန်ဘီလူးအမျိုးအစား အလိုက် အသုံးပြုမှုအပေါ် အားသာချက်၊ အားနည်းချက် များကိုလည်း စာတွေ့၊ လက်တွေ့ ရှင်းလင်းပြသခဲ့သည့် အပြင် တက်ရောက်လာကြသူများ၏ အမြင်များနှင့် ပတ်သက်၍လည်း ပြန်လည်ဆွေးနွေးမှုများ ပြုလုပ်ကြ သည်။
အစီအစဉ်နှင့်ပတ်သက်၍ ရုပ်ရှင်ဓာတ်ပုံအပိုင်း တာဝန်ခံ ကိုစိုင်းအောင်ထွန်းက ''ရှေ့ပိုင်းမှာလည်း ကင်မရာရိုက်ကူးမှုဆိုင်ရာ အတွေ့အကြုံ မျှဝေတဲ့ပွဲလေး လုပ်ခဲ့ပါတယ်၊ ဒီကနေ့မှာတော့ အဲဒီပွဲလေးရဲ့ နောက်ဆက် တွဲဖြစ်တဲ့ ကင်မရာပိုင်းဆိုင်ရာ လက်တွေ့ရိုက်ကူးမှုနဲ့ ပတ်သက်ပြီး သူ့ကဏ္ဍအလိုက် တာဝန်ပိုင်းခြားခွဲဝေယူမှု တွေကို မျှဝေခြင်းပဲဖြစ်ပါတယ်၊ အဓိကအားဖြင့် ရုပ်ရှင် ဇာတ်ကားကြီးရိုက်ကူးမှုကို ရည်မှန်းပြီးလုပ်တာပါ၊ အခုလို ပြုလုပ်ခြင်းဖြင့် ရုပ်ရှင်ရိုက်ကူးမှုအပိုင်းမှာ ပိုမို ထိရောက်မှု ရှိပြီး အရည်အသွေးမြင့်တက်လာစေမှာ ဖြစ်ပါတယ်'' ဟု ပြောသည်။
အဆိုပါ အသိပညာမျှဝေခြင်း အစီအစဉ်သို့ မြန်မာ့ ရုပ်ရှင်အနုပညာလောကမှ ဒါရိုက်တာများ၊ ကင်မရာ ရိုက်ကူးသူများနှင့် ရုပ်ရှင်အသိုင်းအဝိုင်းမှ ပုဂ္ဂိုလ်များ တက်ရောက်ကြသည်။ ယင်းကဲ့သို့ ဆောင်ရွက်ခြင်းအား ဖြင့် မြန်မာ့ရုပ်ရှင် ရိုက်ကူးထုတ်လုပ်မှုအပိုင်းတွင် သက်ဆိုင်ရာကဏ္ဍအလိုက် ကျွမ်းကျင်သူများ ပိုမိုများပြား လာနိုင်မည်ဖြစ်ကြောင်း သိရသည်။
သတင်းနှင့်ဓာတ်ပုံ-ဇော်ကြီး
No comments:
Post a Comment