ကာရာကတ်စ် ဇွန် ၂၈
ဗင်နီဇွဲလားနိုင်ငံ မြို့တော် ကာရာကတ်စ်၌ ဇွန် ၂၇ ရက်က ရဲတပ်ဖွဲ့ ရဟတ်ယာဉ်တစ်စင်းက တရားရုံးချုပ် အဆောက်အအုံနှင့် ပြည်ထဲရေးဝန်ကြီးဌာန အဆောက်အအုံတို့ကို အတင့်ရဲစွာ တိုက်ခိုက်ခဲ့ကြောင်း၊ ယင်းတိုက်ခိုက်မှုသည် အာဏာသိမ်းရန် ကြိုးပမ်းမှုဖြစ်သည်ဟု သမ္မတ နီကိုလပ်စ် မာဒူရိုက ပြစ်တင်ရှုတ်ချခဲ့ပြီး ယင်းတိုက်ခိုက်မှု၏နောက်ကွယ်တွင် အကြမ်းဖက်သမားများ ရှိနေသည်ဟုလည်း ဝေဖန်ပြောကြားလိုက်ကြောင်း ဒေသဆိုင်ရာ သတင်းဌာနများက သတင်းထုတ်ပြန်သည်။
အဆိုပါ ရဟတ်ယာဉ်ကို ခိုးယူလာသည်ဟု ယူဆ ရပြီး ဗင်နီဇွဲလား စုံစမ်းစစ်ဆေးရေး ရဲတပ်ဖွဲ့မှ အရာရှိ တစ်ဦးဖြစ်သူ အော်စကာ ပီရက်ဇ်က မောင်းနှင်ခဲ့သည်ဆို၏။
ရဟတ်ယာဉ်ပေါ်ရှိ တိုက်ခိုက်သူများသည် ကာရာ ကတ်စ်မြို့ရှိ တရားရုံးချုပ် အဆောက်အအုံနှင့် ပြည်ထဲရေးဝန်ကြီးဌာန အဆောက်အအုံတို့ကို စက်သေနတ်များနှင့် လက်ပစ်ဗုံးများ အသုံးပြု၍ ပစ်ခတ် တိုက်ခိုက်ခဲ့ကြောင်း တာဝန်ရှိသူများက ပြောကြားကြသည်။
မည်သည့် ရည်ရွယ်ချက်အရ တိုက်ခိုက်မှုပြုလုပ်သည်ကို ရှင်းလင်းစွာ မသိရပေ။ သမ္မတ မာဒူရို၏ အစိုးရအဖွဲ့ကို ဖြုတ်ချရန် ရည်ရွယ်ခြင်း ရှိ၊မရှိ စုံစမ်းစစ်ဆေးမှု ပြုလုပ်သွားရန် လိုအပ်ကြောင်း တာဝန်ရှိသူများက ပြောကြားကြသည်။
ယင်းတိုက်ခိုက်မှုကြောင့် မည်သူတစ်ဦးတစ်ယောက်မျှ ထိခိုက်ဒဏ်ရာ မရခဲ့ပေ။ ပစ်ခတ်လိုက်သောလက် ပစ်ဗုံးများအနက် လက်ပစ်ဗုံးတစ်လုံးမှာ ပေါက်ကွဲမှု မရှိဟု ဆိုသည်။
တိုက်ခိုက်မှုမှာ နှစ်နာရီခန့်ကြာမြင့်ခဲ့သည်ဟု မျက်မြင်တွေ့ရှိသူများနှင့် ဒေသခံသတင်းသမားများက ပြောကြားကြသည်။ ရဲတပ်ဖွဲ့ပိုင် ရဟတ်ယာဉ်တစ်စင်းက အထင်ကရ အဆောက်အအုံများကို ဝေဟင်မှ တိုက်ခိုက် ခဲ့ခြင်းဖြစ်သော်လည်း ယင်းရဟတ်ယာဉ်ကို အဘယ်ကြောင့် ပစ်ချမှုမရှိသည်ကိုလည်း ရှင်းလင်းစွာ မသိရပေ။
တိုက်ခိုက်မှုတွင် ပါဝင်ပတ်သက်သူများအနက် မည်သူတစ်ဦးတစ်ယောက်ကိုမျှ ရှာဖွေတွေ့ရှိရခြင်း မရှိသေးကြောင်း၊ တိုက်ခိုက်ရာတွင် အသုံးပြုခဲ့သည့် ရဟတ်ယာဉ် မည်သည့်နေရာသို့ ရောက်ရှိနေသည်ကိုလည်း မသိရကြောင်း သတင်းတွင် ဖော်ပြသည်။
ရိုက်တာ။
No comments:
Post a Comment