မန္တလေး မတ် ၂
မြန်မာနိုင်ငံတွင် ပထမဆုံးကလေး ကျောက်ကပ်အစားထိုးခြင်းကို မန္တလေးမြို့ ခုတင်(၃ဝဝ)ဆံ့ ကလေးဆေးရုံမှ နာတာရှည် ကျောက်ကပ်ဝေဒနာရှင် နှစ်ဦးအား ဖေဖော်ဝါရီ ၂၄ ရက်နှင့် ၂၅ ရက်တွင် မန္တလေးဆေးရုံကြီး ဆီးနှင့် ကျောက်ကပ်ခွဲစိတ်ကုသဆောင်၌ ကျောက်ကပ်အစားထိုးခွဲစိတ်ကုသခြင်း ပြုလုပ်ခဲ့ရာ အောင်မြင်မှုရရှိခဲ့သဖြင့် ဆေးပညာသမိုင်းတွင် မှတ်ကျောက် တင်နိုင်ခဲ့ကြောင်း ကလေးကျောက်ကပ် ဆရာဝန် ဒေါက်တာကျော်သူရက ပြောသည်။
ဖေဖော်ဝါရီ ၂၄ ရက်နှင့် ၂၅ ရက် တွင် ခွဲစိတ်အစားထိုးခဲ့သူ လူနာနှစ်တွဲ တွင် ၁၆ နှစ်အရွယ်နှင့် ၁၂ အရွယ်ဖြစ်၍ ကျောက်ကပ်ပေးလှူသူ မိခင်များမှာ ဆေးရုံမှဆင်းသွားပြီဖြစ်ပြီး ကလေးများခန္ဓာကိုယ်မှ လက်ခံထားသည့် ကျောက်ကပ်များကလည်း ပုံမှန်အတိုင်းအလုပ်လုပ်နေပြီး ဆက်လက်၍ ဆေးရုံတွင် တစ်လခန့် စောင့်ရှောက်ရမည် ဖြစ်သည်။
''ပထမအတွဲခွဲစိတ်မှုမှာ ခုနစ်နာရီကြာတယ်။ နောက်ရက် ဒုတိယအတွဲ ခွဲစိတ်မှုမှာ ခြောက်နာရီကြာတယ်။ ဒီက ဆရာဝန်တွေနဲ့ စင်ကာပူက ကလေးကျောက်ကပ်ဆရာဝန်ကြီး တစ်ယောက်ကလည်း ဆက်လက်စောင့်ရှောက်သွားမယ်။ လူတစ်ယောက်မှာ ပုံမှန်ရှိတဲ့အတိုင်း ကျောက်ကပ် အလုပ်လုပ်နေပြီ။ လှူတဲ့မိခင်တွေရော ကလေးတွေပါ ပုံမှန်ရှိပြီး အစာလည်း စားနေပြီဖြစ်လို့ အောင်မြင်မှုက ရာနှုန်းပြည့်နီးပါးပဲ''ဟု ၎င်းက ပြောသည်။
ယခု အစားထိုးခွဲစိတ်ကုသမှုကို ကျန်းမာရေးနှင့် အားကစားဝန်ကြီးဌာနမှ ခွင့်ပြုချက်ရယူပြီး ဆေးပညာကျွမ်းကျင်ပညာရှင် ၂၂ ဦး ပါဝင်သည့် လုပ်ငန်းကော်မတီ ဖွဲ့စည်းခဲ့ကာ လိုအပ်သည့် ပြင်ဆင်မှုများကြောင့် အခက်အခဲမရှိခဲ့ကြောင်း၊ ယခုကဲ့သို့ အောင်မြင်ခဲ့သဖြင့် ကလေးကျောက်ကပ် အစားထိုးကုသမှုများကို မတ်လ (သို့မဟုတ်) ဧပြီလတွင် ဆက်လက်အစားထိုးခွဲစိတ်ကုသပေးသွားမည်ဖြစ်ကြောင်း သိရသည်။
''ခုလို အောင်မြင်ခဲ့လို့ ပုံမှန်ကျောက်ကပ် အမြဲသန့်စင်နေရတဲ့ နာတာရှည်ကျောက်ကပ်ဝေဒနာရှင် ကလေးတွေကို ကျောက်ကပ်လဲလှယ် ပေးနိုင်တော့မှာပါ။ ဒါကလည်း မြန်မာနိုင်ငံမှာ ကလေးကျောက်ကပ် အစားထိုးမှုပထမဆုံးဖြစ်ပါတယ်'' ဟု ကလေးကျောက်ကပ်ဌာန တာဝန်ခံဆရာဝန် ဒေါက်တာချောစုခိုင်က ပြောသည်။
မန္တလေးဆေးရုံကြီး ဆီးနှင့် ကျောက်ကပ်ခွဲစိတ်ကုသဆောင်၌ မြန်မာနိုင်ငံတွင် ပထမဆုံးအကြိမ် ကလေးကျောက်ကပ်အစားထိုးခွဲစိတ် ကုသခြင်းကို ကလေးကျန်းမာရေး ပညာဌာန၊ ကလေးခွဲစိတ်ပညာဌာန၊ မန္တလေး ကျောက်ကပ်အစားထိုးအဖွဲ့နှင့် စင်ကာပူနိုင်ငံမှ အထူးကုဆရာဝန် များပါဝင်သည့် Organ Transplant Team တို့ ပူးပေါင်းဆောင်ရွက်ခဲ့ရာ ဆေးကုသမှုအပိုင်းတွင် မှတ်တိုင်တစ်ခုစိုက်ထူနိုင်ခဲ့ကြောင်း သိရသည်။
မင်းထက်အောင်(မန်းကိုယ်ပွား)
No comments:
Post a Comment