နေပြည်တော် ဇန်နဝါရီ ၃
နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ယနေ့ နံနက်ပိုင်းတွင် Ms. Albertina Soliani ဦးဆောင်သည့် အီတလီ-မြန်မာချစ်ကြည်ရေးအသင်းဝင် ၃၈ ဦးအား နေပြည်တော်ရှိ ၎င်း၏နေအိမ်၌ မြန်မာ့ရိုးရာ အစားအစာများဖြင့် တည်ခင်းဧည့်ခံသည်။
ရှေးဦးစွာ နိုင်ငံတော်၏အတိုင်ပင်ခံပုဂ္ဂိုလ်သည် အီတလီ-မြန်မာ ချစ်ကြည်ရေးအသင်းဝင်များအား ရင်းနှီးနွေးထွေးစွာ တစ်ဦးချင်း လိုက်လံနှုတ်ဆက်သည်။
ထို့နောက် နိုင်ငံတော်၏အတိုင် ပင်ခံပုဂ္ဂိုလ်သည် အီတလီ-မြန်မာ ချစ်ကြည်ရေးအသင်းဝင်များနှင့်အတူ မြန်မာ့ရိုးရာအစားအစာများကို အတူတကွသုံးဆောင်ပြီး အမှတ်တရ လက်ဆောင်ပစ္စည်းများ အပြန်အလှန်ပေးအပ်ကာ စုပေါင်းမှတ်တမ်းတင် ဓာတ်ပုံရိုက်သည်။
အီတလီ-မြန်မာချစ်ကြည်ရေး အသင်းတွင် အီတလီနိုင်ငံမှ လွှတ်တော်ကိုယ်စားလှယ်များ၊ ကဏ္ဍအလိုက်ပညာရှင်များ၊ ရှေ့နေများ၊ အင်ဂျင်နီယာများ၊ ဆရာ ဆရာမများနှင့် ကျောင်းသားလူငယ်များ ပါဝင်ပြီး မြန်မာနိုင်ငံ၏ ဒီမိုကရေစီ အရေး၊ ပညာရေး၊ ကျန်းမာရေးနှင့် စီးပွားရေးကဏ္ဍများအား ကူညီထောက်ပံ့မှုများ ပေးအပ်နိုင်ရေး ပူးပေါင်းဆောင်ရွက်နေသည့် အသင်းဖြစ်ကြောင်း သိရသည်။
အဆိုပါ တည်ခင်းဧည့်ခံပွဲသို့ တက်ရောက်ခဲ့သည့် အီတလီ-မြန်မာ ချစ်ကြည်ရေးအသင်း မြန်မာနိုင်ငံတာဝန်ခံ ဦးသူရထွန်းက ''ဒီအသင်းကို ၂ဝဝ၄ ခုနှစ် အီတလီနိုင်ငံ ပါးမားမြို့မှာ စပြီးတော့တည်ထောင်ဖွဲ့စည်းခဲ့ပါတယ်။ အသင်းရဲ့ရည်ရွယ်ချက်ကတော့ မြန်မာနိုင်ငံရဲ့ပညာရေး၊ အမျိုးသမီးနဲ့ ကလေးသူငယ်များ ဖွံ့ဖြိုးတိုးတက်ရေးအပြင် ဒီမိုကရေစီ စနစ်နဲ့ပတ်သက်ပြီးတော့ ပိုမိုခိုင်မာလာအောင် မြန်မာနိုင်ငံနဲ့အတူ ပူးပေါင်းဆောင်ရွက်သွားဖို့ ရှိပါတယ်။
ပညာရေးနဲ့ပတ်သက်ပြီး မိဘမဲ့ ကလေးတွေအတွက် စာသင်ကျောင်း တည်ဆောက်ဖို့ ငွေကြေးလှူဒါန်းခြင်း၊ ကျန်းမာရေးနဲ့ပတ်သက်ပြီး HIV Center တည်ဆောက်ရေးအတွက် ကူညီပံ့ပိုးခြင်းတွေ ပြုလုပ်ပေးပါတယ်။ အခုဒီခရီးစဉ်ကတော့ နောက်ထပ် ပူးပေါင်းဆောင်ရွက်ဖို့အတွက် တွေ့ဆုံဆွေးနွေးမှု၊ လေ့လာမှုတွေ လာလုပ်တာပါ။
အဓိကကတော့ ကဏ္ဍ(၃)ရပ်ပါ။ ပညာရေးပူးပေါင်းဆောင်ရွက်မှု၊ အမျိုးသမီးနှင့် ကလေးသူငယ်ဖွံ့ဖြိုး တိုးတက်ရေး ပူးပေါင်းဆောင်ရွက်မှု၊ ဒီမိုကရေစီ ပိုမိုခိုင်မာလာရေးအတွက် ပူးပေါင်းဆောင်ရွက်မှုတို့ဖြစ်ပါတယ်''ဟု ပြောသည်။
(သတင်းစဉ်)
No comments:
Post a Comment