ရန်ကုန် ဇူလိုင် ၃ဝ
ပြန်ကြားရေးဝန်ကြီးဌာနက ကြီးမှူးကျင်းပသည့် ပထမအကြိမ် နိုင်ငံရေးစာပေ စာတမ်းဖတ်ပွဲနှင့် မိုးရာသီစာအုပ်ဈေးရောင်းပွဲ ဒုတိယနေ့ကို ယနေ့ နံနက် ၉ နာရီတွင် ရန်ကုန်မြို့ သိမ်ဖြူလမ်းရှိ ပုံနှိပ်ရေးနှင့်ထုတ်ဝေရေးဦးစီးဌာန ဗဟိုပုံနှိပ်စက်ရုံ၌ ဆက်လက်ကျင်းပသည်။
စာတမ်းဖတ်ပွဲ ဒုတိယနေ့ နံနက်ပိုင်းတွင် သဘာပတိများအဖြစ် ဦးကိုလေး(ကိုလေး-အင်းဝဂုဏ်ရည်)၊ ဦးမြဟန်(မြဟန်)နှင့် ဦးကျော်နိုင် (ထက်မြက်)တို့က ဆောင်ရွက်ကြပြီး စာတမ်းရှင် ဒေါက်တာခင်အေး(မောင်ခင်မင်-ဓနုဖြူ)က ''ရှေးခေတ်မြန်မာ့နိုင်ငံရေးစာပေ''၊ ဦးသန်းဌေး (သင့်နော်)က ''လက်လှမ်းမီသမျှ မြန်မာ့နိုင်ငံရေး စာပေအင်အားစုသို့ချဉ်းကပ်ခြင်း''နှင့် ဦးအောင်မြင့်ဦး(အောင်မြင့်ဦး-လူထု)က ''ဆရာကြီးသခင်ကိုယ်တော်မှိုင်းရဲ့ မိန့်ခွန်းများထဲမှ နိုင်ငံရေးအဘိဓမ္မာ''စာတမ်းတို့ကို ဖတ်ကြားကြသည်။
မွန်းလွဲပိုင်းတွင် သဘာပတိများအဖြစ် ဦးတင်လှိုင်(လယ်တွင်းသား စောချစ်)၊ ဒေါက်တာခင်အေး(မောင်ခင်မင်-ဓနုဖြူ)နှင့် ဦးကိုကို(ကို-တက္ကသိုလ်)တို့က ဆောင်ရွက်ကြပြီး စာတမ်းရှင် ဦးအေးမောင်(အေးမောင်ကျော်)က ''လစ်ဘရယ်ဒီမိုကရေစီကောက်ကြောင်းနှင့် မြန်မာ့အကူးအပြောင်း''၊ ဦးမိုး မြင့်ဝင်း(မိုးမြင့်ဝင်း-နည်းပညာ)က ''ဖဆပလဝန်ကြီးချုပ် သခင်နု၏ ပြည်တွင်း ငြိမ်းချမ်းရေးဆောင်ရွက်မှုကို လေ့လာသုံးသပ်ချက်''နှင့် ဦးကျော်ဇံလှ (ညီစေမင်း)က ''နိုင်ငံရေးစာပေများကပြောတဲ့ တိုင်းရင်းသားလက်နက်ကိုင်လှုပ်ရှား မှုများ''စာတမ်းများကိုဖတ်ကြားကြပြီး တက်ရောက်လာကြသူများ၏ မေးမြန်းချက်များကိုပြန်လည်ဖြေကြားကာ ဒုတိယနေ့စာတမ်းဖတ်ပွဲကို ရပ်နားသည်။
ထို့နောက် ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်၊ အမျိုးသားဒီမိုကရေစီအဖွဲ့ချုပ် နာယက သူရဦးတင်ဦးနှင့် တာဝန်ရှိသူများက သဘာပတိများနှင့်စာတမ်းရှင်များအား ဂါရဝပြုလက်ဆောင်များနှင့် ဥာဏ်ပူဇော်ခများကို ပေးအပ်ချီးမြှင့်ကြသည်။
မိုးရာသီစာအုပ်ဈေးရောင်းပွဲ ဒုတိယနေ့တွင် စာအုပ်တိုက်များမှစာအုပ်ဆိုင် ၁၇၁ ဆိုင်ကို ဖွင့်လှစ်ရောင်းချပေးလျက်ရှိရာ စာပေပညာရှင်များ၊ စာပေဝါသနာရှင် ရဟန်းရှင်လူပြည်သူများနှင့် ဆရာ ဆရာမများ၊ ကျောင်းသား ကျောင်းသူများ အထူးများပြားပြီး တစ်နေရာတည်းတွင် လိုချင်သည့်စာအုပ်များကို တစုတစည်းတည်း လာရောက်ဝယ်ယူအားပေးခဲ့ကြ၍ ပထမနေ့ထက်ပင် ပိုမိုစည်ကားများပြားလျက်ရှိကြောင်း တွေ့ရသည်။
ဒုတိယနေ့ စာတမ်းဖတ်ပွဲနှင့်စာအုပ်ဈေးရောင်းပွဲတော်သို့ ပညာရှင်များ၊ စာပေဝါသနာရှင်များ၊ နိုင်ငံရေးနှင့် နိုင်ငံရေးစာပေစိတ်ဝင်စားသူများ၊ ဖိတ်ကြား ထားသူများနှင့် ဆရာ ဆရာမများ၊ ကျောင်းသား ကျောင်းသူများ တက်ရောက် ကြသည်။
ပထမအကြိမ် နိုင်ငံရေးစာပေစာတမ်းဖတ်ပွဲနှင့် မိုးရာသီစာအုပ် ဈေးရောင်းပွဲကို ဇူလိုင် ၃၁ ရက်တွင် တတိယနေ့ အပြီးသတ်ဆက်လက်ကျင်းပသွားမည်ဖြစ်ရာ စာတမ်းဖတ်ပွဲတွင် စာတမ်းရှင် ဦးမောင်မောင်ဦး(ဟိန်းလတ်)က ''နိုင်ငံတကာနိုင်ငံရေးခေါင်းဆောင်များ၏ အတ္ထုပ္ပတ္တိ(ပြည်ပ)''၊ ဦးသန်းအုန်း (မောင်ဇေယျာ)က ''မြန်မာ့နိုင်ငံရေးအတ္ထုပ္ပတ္တိစာပေ (၁၉၃၇-၁၉၈၇)''၊ ဦးရဲနိုင်အောင်(ကိုဝ)က ''နိုင်ငံရေးဘောဂဗေဒစာပေများ၏ နိုင်ငံရေးအကျိုး သက်ရောက်မှု''၊ ဦးမော်လင်း(မော်လင်း)က ''မြန်မာ့နိုင်ငံရေးနှင့် စာနယ်ဇင်းများ''၊ ဦးဇော်လင်း (လင်းအေး)က ''မြန်မာနိုင်ငံအမျိုးသားလွတ်မြောက်ရေး လှုပ်ရှားမှုများနှင့် နိုင်ငံရေးစာပေ (၁၉ဝဝ-၁၉၄ဝ)''နှင့် ဦးကိုကိုလှိုင် (ကိုကိုလှိုင်)က ''ခေတ်ပြိုင်နိုင်ငံတကာ နိုင်ငံရေးအတွေးအခေါ်များ'' စာတမ်းများကို ဖတ်ကြားကြမည်ဖြစ်သည်။
သတင်း- ရီရီမြင့်၊ ဥမ္မာသန့်၊ ဓာတ်ပုံ- ဇော်မင်းလတ်
No comments:
Post a Comment