ပြည်ထောင်စုငြိမ်းချမ်းရေးညီလာခံ ပထမနေ့ကျင်းပနိုင်ငံရေး၊ လူမှုရေး၊ စီးပွားရေး၊ လုံခြုံရေး၊ မြေယာနှင့် သဘာဝပတ်ဝန်းကျင်ဆိုင်ရာ ကိစ္စရပ်များ ဆွေးနွေး

နေပြည်တော် ဇန်နဝါရီ ၁၂
ပြည်ထောင်စုငြိမ်းချမ်းရေးညီလာခံ ပထမနေ့ကို နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန အမှတ်(၂)၌ ယနေ့မွန်းလွဲပိုင်းတွင် ဆက်လက်ကျင်းပရာ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ အတွင်းရေးမှူးများအဖွဲ့ဝင် ရဲဘော်မျိုးဝင်းက အစုအဖွဲ့များမှ ရွေးချယ်တင်မြှောက်ထားသော ညီလာခံသဘာပတိ (၄၅)ဦးကို ဖတ်ကြားတင်သွင်းပြီး ညီလာခံကိုယ်စားလှယ်များ၏ဆန္ဒကို ရယူအတည်ပြုသည်။

ထို့နောက် ညီလာခံပထမနေ့ အကျိုးဆောင်သဘာပတိများအဖြစ် အစိုးရကိုယ်စားလှယ်များအစုအဖွဲ့မှ ပြည်ထောင်စုဝန်ကြီး ဦးအောင်မင်း၊ လွှတ်တော်များမှကိုယ်စားလှယ်များအစုအဖွဲ့မှ ပြည်သူ့လွှတ်တော်ကိုယ်စားလှယ် ဦးသိန်းဇော်၊ တပ်မတော်သား ကိုယ်စားလှယ်အစုအဖွဲ့မှ ဒုတိယ ဗိုလ်ချုပ်ကြီးရဲအောင်၊ တိုင်းရင်းသားလက်နက်ကိုင်အဖွဲ့ အစည်းများမှ ကိုယ်စားလှယ်များအစုအဖွဲ့မှ ပဒို စောကွယ်ထူးဝင်းနှင့် နိုင်ငံရေးပါတီများမှ ကိုယ်စားလှယ်များ အစုအဖွဲ့မှ ဦးစိုင်းအိုက်ပေါင်းတို့က ဆောင်ရွက်ကြသည်။

ယင်းနောက် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ အတွင်းရေးမှူးများအဖွဲ့ဝင် ဦးလှမောင်ရွှေ၊ ဗိုလ်ချုပ်စိုးနိုင်ဦးနှင့် ဦးခက်ထိန်နန်တို့က ညီလာခံကျင်းပ မည့်ပုံစံ၊ ညီလာခံတွင် ဆွေးနွေးမည့် အကြောင်းအရာ များနှင့် အစီအစဉ်များ ရှင်းလင်းတင်ပြခြင်း၊ ညီလာခံ စည်းမျဉ်းစည်းကမ်းများကို ရှင်းလင်းတင်ပြခြင်းနှင့် အကြောင်းအရာအလိုက် ဆွေးနွေးရန်အတွက် အကျိုးဆောင်များ သတ်မှတ်ခြင်းတို့ကို ဆောင်ရွက်ကြသည်။

ထို့နောက် အစုအဖွဲ့(၇)ဖွဲ့မှ ကိုယ်စားလှယ်များက ပြည်ထောင်စုငြိမ်းချမ်းရေးညီလာခံ၌ နိုင်ငံရေး၊ လူမှုရေး၊ စီးပွားရေး၊ လုံခြုံရေး၊ မြေယာနှင့် သဘာဝပတ်ဝန်းကျင် ဆိုင်ရာ မူဝါဒကိစ္စရပ်များနှင့်စပ်လျဉ်း၍ ကဏ္ဍအလိုက် ပါဝင်ဆွေးနွေးကြမည့်သူများနှင့် အဓိကထားဆွေးနွေးရမည့် အကြောင်းအရာများကို သီးခြားသတ်မှတ်ထားသော အခန်းများ၌ နှီးနှောတိုင်ပင် ဆွေးနွေးကြသည်။

ပြည်ထောင်စုငြိမ်းချမ်းရေးညီလာခံ အစုအဖွဲ့ အလိုက် ဆွေးနွေးပွဲများကို ဇန်နဝါရီ ၁၃ ရက် နံနက်ပိုင်း တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန (၂)၌ ဆက်လက်ကျင်းပသွားမည် ဖြစ်ကြောင်း သိရသည်။

(သတင်းစဉ်)