မန္တလေး ဒီဇင်ဘာ ၃ဝ
မန္တလေးမြို့ ဧရာဝတီမြစ်ဆိပ်ကမ်းသည် မြို့ခံလုပ်သားများနှင့် နယ်ပေါင်းစုံမှ လာရောက်လုပ်ကိုင်သည့်လုပ်သားများကို အလုပ်အကိုင် အခွင့်အလမ်းများစွာပေးထားသည်။ မန္တလေးမြို့ ဧရာဝတီမြစ်ဆိပ်ကမ်း တွင် ပေပင်ဆိပ်၊ ချော်ဆိပ်၊ ထင်းဝင်းဆိပ်၊ ဂေါဝန်ဆိပ်၊ မရမ်းခြံဆိပ်တို့ တည်ရှိသည်။ ဆိပ်ကမ်းများထဲမှ ချော်ဆိပ်သည် ဆောက်လုပ်ရေးသုံး သဲများကို အဓိကတင်ပို့ကာ ဆောက်လုပ်ရေးလုပ်ငန်းအတွက် များစွာအကျိုးပြုလျက်ရှိသည်။
သဲစုပ်လုပ်ငန်းကို စနစ်တကျလုပ်ကိုင်ကြရသည်။ သဲထုတ်ရန်အတွက် ရေယာဉ်လုပ်ငန်း လိုင်စင်ပြုလုပ်ခြင်း၊ ဓာတ်သတ္တုတူးဖော် ရေးဥပဒေအရ အခွန်ဆောင်ပေးခြင်း၊ ဆိပ်ကမ်းခွန်နှင့် စုပုံခွန်၊ဆောက်လုပ်ရေးသုံးပစ္စည်းသိုလှောင်ရောင်းချခြင်းဆိုင်ရာ လိုင်စင်များ ပြုလုပ်ခြင်းများကို စနစ်တကျပြုလုပ်ပြီး ရေအရင်းအမြစ်ဦးစီးဌာနမှသတ်မှတ်ပေးသည့်နေရာတွင် စနစ်တကျတူးဖော်သည့်အတွက် တိုင်းပြည်အတွက်ပါ အခွန်ဝင်ငွေတိုးပွားလျက်ရှိသည်။
ချော်ဆိပ်တွင် သဲတင်ကားများ နေ့စဉ်ပြည့်နှက်ကာ အလုပ်ဖြစ်လျက်ရှိသည်။ သဲလုပ်ငန်းရှင်များ သဲများရောင်းချရာတွင် အထိုင်ဈေး နှင့် အရောက်ပို့ဈေးဟူ၍ နှစ်မျိုးခွဲခြားရောင်းချသည်။ သဲများကို အထိုင်ဈေးတွင် တစ်ကျင်းလျှင် ကျပ် ငါးထောင်ဖြင့်ရောင်းချပြီး အရောက်ပို့ဈေးတွင် သဲတစ်ကျင်းလျှင် ကျပ် တစ်သောင်းအထိရှိသည်။ ရာသီအချိန်အခါ၊ နေရာအနီးအဝေးအလိုက် ဈေးနှုန်းအပြောင်းအလဲ ရှိနေကြောင်း သိရသည်။
သဲတင်ကားများသည် နံနက်ခင်းမှ ညနေအထိ အဆက်မပြတ် တင်ဆောင်ကြသည်။ အများစုတင်သောကားများမှာ ငါးတန်၊ ခြောက်တန် ခြောက်ဘီးကားများ၊ ကားငယ်များ၊ ထော်လာဂျီများဖြင့် လာရောက် တင်ဆောင်ကြသည်။ ငါးတန်၊ ခြောက်တန်ခြောက်ဘီးကားများတွင်သဲလေးကျင်းအထိ တင်ဆောင်ပြီး ထော်လာဂျီများမှာ သဲတစ်ကျင်းခွဲအထိ တင်ဆောင်ကာ ဒိုင်နာကားများမှာသဲနှစ်ကျင်းအထိ သယ်ဆောင်ကြသည်။
ယခုအခါ ချော်ဆိပ်တွင် သဲထုတ်လုပ်မှုမြင့်မားကာ ဆောက်လုပ် ရေးလုပ်ငန်းအတွက် အကျိုးပြုသလို ဒေသခံလုပ်သားများစွာ၊ နယ်မှ လာရောက်လုပ်ကိုင်သော လုပ်သားများစွာတို့ကို အလုပ်အကိုင်အခွင့် အလမ်းပေးရုံသာမက နိုင်ငံတော်အတွက် အခွန်ဝင်ငွေတိုးပွားစေကာ ပြည်သူ့အကျိုးပြုလုပ်ငန်းတစ်ခုအဖြစ် တည်ရှိနေကြောင်း သိရသည်။
(တိမ်တမန်)
No comments:
Post a Comment