နေပြည်တော် အောက်တိုဘာ ၃ဝ
ဧရာဝတီတိုင်းဒေသကြီး ပုသိမ်မြို့၌ရောက်ရှိနေသော ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတ ဦးသိန်းစိန်သည် ပြည်ထောင်စုဝန်ကြီး ဦးသိန်းညွန့်၊ ဒုတိယဗိုလ်ချုပ်ကြီးကျော်ဆွေ၊ ဦးအုန်းမြင့်၊ ဒေါက်တာသန်းအောင်၊ ကာကွယ်ရေးဦးစီးချုပ်ရုံး(ကြည်း)မှ ဗိုလ်ချုပ်အောင်ကျော်ဇော၊ ဒုတိယဝန်ကြီးများ၊ တာဝန်ရှိသူများနှင့်အတူ ယနေ့နံနက်ပိုင်းတွင် အထူးလေယာဉ်ဖြင့် ရန်ကုန်မြို့သို့ရောက်ရှိကြရာ တိုင်းဒေသကြီးဝန်ကြီးချုပ် ဦးမြင့်ဆွေနှင့် တာဝန်ရှိသူများက ကြိုဆိုနှုတ်ဆက်ကြသည်။
ထိုမှတစ်ဆင့် နိုင်ငံတော်သမ္မတသည် အဖွဲ့ဝင်များနှင့်အတူ ရဟတ် ယာဉ်များဖြင့် ပဲခူးတိုင်းဒေသကြီး ပဲခူးမြို့နယ်အတွင်းရှိ မဇင်းရေလှောင် တမံသို့ရောက်ရှိရာ ပဲခူးတိုင်းဒေသကြီးဝန်ကြီးချုပ် ဦးဥာဏ်ဝင်း၊ တိုင်းဒေသကြီးလွှတ်တော်ဥက္ကဋ္ဌ ဦးဝင်းတင်၊ တောင်ပိုင်းတိုင်းစစ်ဌာနချုပ်တိုင်းမှူး ဗိုလ်မှူးချုပ်မြတ်ကျော်၊ တိုင်းဒေသကြီး ဝန်ကြီးများနှင့် ဒေသခံပြည်သူများက ကြိုဆိုနှုတ်ဆက်ကြသည်။
ထို့နောက် နိုင်ငံတော်သမ္မတသည် မဇင်းရေလှောင်တမံစီမံကိန်းရှင်းလင်းဆောင်သို့ မော်တော်ယာဉ်ဖြင့် ဆက် လက်ထွက်ခွာရာ တမံတစ်လျှောက် တွင်လည်း ဒေသခံပြည်သူများက နိုင်ငံတော်အလံငယ်များကိုဝှေ့ယမ်း၍ သောင်းသောင်းဖြဖြ ကြိုဆိုနှုတ်ဆက်ကြသည်။
နိုင်ငံတော်သမ္မတသည် အဖွဲ့ဝင်များနှင့်အတူ ရှင်းလင်းဆောင်သို့ ရောက်ရှိရာ ဒုတိယဝန်ကြီး ဦးခင်ဇော်နှင့် တိုင်းဒေသကြီးဝန်ကြီးချုပ် ဦးဥာဏ်ဝင်းတို့က မဇင်းရေ လှောင်တမံဆိုင်ရာ အချက်အလက် များ၊ စီမံကိန်းရည်ရွယ်ချက်၊ နှစ်အလိုက် မိုးရေချိန်၊ ရေဝင်ရောက်မှု၊ ရေထုတ်လွှတ်ပေးနိုင်မှုနှင့် ပဲခူးမြို့ ရေကြီးရေလျှံမှုမှကာကွယ်ရန် ဆောင်ရွက်ထားရှိမှု အခြေအနေများကို ရှင်းလင်းတင်ပြကြသည်။
ယင်းနောက် နိုင်ငံတော်သမ္မတက မဇင်းရေလှောင်တမံမှ ပဲခူးမြို့သို့ သောက်သုံးရေနှင့် စိုက်ပျိုးရေပေး ဝေနေမှုနှင့်ပတ်သက်ပြီး မှာကြားရာတွင် မဇင်းရေလှောင်တမံနှင့် ဇလတ် ထော်ရေလှောင်တမံတို့သည် အသစ်တည်ဆောက်မည့်ဟံသာဝတီလေဆိပ်အနီးတွင် တည်ရှိနေသည့်အတွက် နောင်ဖွံ့ဖြိုးတိုးတက်လာမည့် မြို့ပြနှင့် လူဦးရေကို မျှော်မှန်း၍ ကြိုတင်တွက်ဆဆောင်ရွက်သွားရန်နှင့် ဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ(JICA)နှင့် ပူးပေါင်းဆောင်ရွက်နေသည့်လုပ်ငန်းများကိုလည်း ဆောလျင်စွာ အကောင်အထည်ဖော် ဆောင်ရွက်ကြရန် ပြောကြားသည်။
ယင်းနောက် နိုင်ငံတော်သမ္မတသည် မဇင်းရေလှောင်တမံကြံ့ခိုင်မှုအခြေအနေနှင့် ရေသိုလှောင်ထား ရှိမှုအခြေအနေများကို တမံရှုရပ်မှ ကြည့်ရှုစစ်ဆေးသည်။
မဇင်းရေလှောင်တမံသည် ပဲခူး မြို့၏ အနောက်ဘက်ရှိ မဇင်းချောင်းနှင့်ကြက်သောင်းချောင်းဆုံအထက် ပေ ၅ဝဝခန့်အကွာတွင် တည်ရှိပြီး ပဲခူးမြို့အတွက် သောက်သုံးရေနှင့် စက်ရုံ၊ အလုပ်ရုံသုံးရေ နေ့စဉ်ဂါလန် ၁၁ သန်းပေးဝေရန်၊ ပဲခူးမြို့အတွင်းရှိ မဲခုန်ကျေးရွာအုပ်စုနှင့် ဇိုင်းဂနိုင်းကြီး ကျေးရွာအုပ်စုရှိ လယ်မြေဧက ၆၅ဝ ခန့်ကို စိုက်ပျိုးရေပေးဝေရန်၊ ပဲခူးမြို့ နှင့်ပတ်ဝန်းကျင်ဒေသများ မိုးရာသီ မြစ်ရေကြီးမှုမှ တစ်စိတ်တစ်ဒေသ ကာကွယ်ပေးနိုင်ရန်၊ ပတ်ဝန်းကျင် ဒေသများ စိမ်းလန်းစိုပြည်ရန်နှင့် ပြည်သူလူထု၏ လူမှုစီးပွားဖွံ့ဖြိုးတိုးတက်စေရန် ရည်ရွယ်ချက်များဖြင့် တည်ဆောက်ထားသည့် မြေသားရေလှောင်တမံအမျိုးအစားဖြစ်သည်။
ပဲခူးမြို့သည် ပဲခူးမြစ်ကမ်းဘေး တွင်တည်ရှိပြီး မြေနိမ့်လွင်ပြင်ဖြစ်၍ ပဲခူးမြစ် ရေကြီးရေလျှံမှုကို နှစ်စဉ်ကြုံ တွေ့နေရသည့်အတွက် မဇင်းတမံမှ ပဲခူးမြစ်အထိ မဇင်းချောင်းတူးဖော် ခြင်းလုပ်ငန်းနှင့် ခေါင်းဆေးကျွန်း တံတားမှ ပဲခူးမြစ်အထိ ခေါင်းဆေးကျွန်းချောင်းတူးဖော်ခြင်းလုပ်ငန်းများ ဆောင်ရွက်နိုင်ခြင်းကြောင့် ပဲခူးမြို့ပေါ်ရပ်ကွက်များတွင် ရေကြီးရေလျှံ မှုနှင့် ခေါင်းဆေးကျွန်းတံတားအနီးရှိ ရန်ကုန်-မန္တလေးကားလမ်းရေကျော်ခြင်းတို့မှ လျော့ပါးသက်သာစေပြီး ဒေသခံပြည်သူများ၏ စီးပွားရေး၊ လူမှုရေးနှင့်ကျန်းမာရေးဆိုင်ရာ ထိခိုက်မှုများမှ ကာကွယ်ပေးလျက်ရှိသည်။
ယင်းနောက် နိုင်ငံတော်သမ္မတနှင့် အဖွဲ့ဝင်များသည် မဇင်းရေလှောင် တမံမှ နှစ်မိုင်အကွာတွင်တည်ရှိသည့် ဆည်မြောင်းပညာရပ်ဖွံ့ဖြိုးမှုလေ့ကျင့် ရေးဌာနခွဲသို့ မော်တော်ယာဉ်များဖြင့် ဆက်လက်ထွက်ခွာရာ လမ်းတစ်လျှောက် ဝဲယာမှ ဒေသခံပြည်သူများက ကြိုဆို နှုတ်ဆက်ကြသည်။
နိုင်ငံတော်သမ္မတနှင့် အဖွဲ့ဝင်များသည် ဆည်မြောင်းပညာရပ် ဖွံ့ဖြိုးမှုလေ့ကျင့်ရေးဌာနခွဲ (မဇင်း)ဘက်စုံသင်တန်းခန်းမသို့ ရောက်ရှိရာ ဆည်မြောင်းဦးစီးဌာန၊ လေ့ကျင့်ရေးဌာနခွဲ(မဇင်း)၏ နောက်ခံသမိုင်း၊ ဆည်မြောင်းနည်းပညာရပ်များ ဖွံ့ဖြိုးတိုးတက်ရေးနှင့် လူ့စွမ်းအားဖွံ့ဖြိုးတိုးတက်ရေး လုပ်ငန်းများ လေ့ကျင့်ပေးနေမှု၊ နည်းပညာပူးပေါင်း လုပ်ဆောင်မှုများနှင့် သင်တန်းများဖွင့်လှစ်ပို့ချနေမှု အခြေအနေများကို ဗီဒီယိုမှတ်တမ်းဖြင့် တင်ပြသည်။
ယင်းနောက် နိုင်ငံတော်သမ္မတသည် လေ့ကျင့် ရေးဌာနခွဲအတွင်းရှိ စာကြည့်တိုက်၊ အိပ်ဆောင်များနှင့် ဆည်မြောင်းတည်ဆောက်ရေးလုပ်ငန်းသုံး ပစ္စည်းများ အရည်အသွေးစမ်းသပ်ခန်း၊ ဓာတ်ခွဲခန်း များနှင့် ဆည်မြောင်းဒီဇိုင်းပုံစံငယ်အခန်းတို့အား လှည့်လည်ကြည့်ရှုစစ်ဆေးရာ တာဝန်ရှိသူများက လိုက်လံရှင်းလင်းပြသကြသည်။
ဆည်မြောင်းဦးစီးဌာနတွင် ဆည်မြောင်း ပညာရပ်ဖွံ့ဖြိုးမှုလေ့ကျင့်ရေးဌာနခွဲ(မဇင်း)နှင့် ဆည်မြောင်းပညာရပ်ဖွံ့ဖြိုးမှုလေ့ကျင့်ရေးဌာနခွဲ (ပုသိမ်ကြီး)တို့ ပါဝင်ဖွဲ့စည်းထားရှိပြီး (မဇင်း)ဌာနခွဲကို ဂျပန်နိုင်ငံအစိုးရ၏ အကူအညီဖြင့် နည်းပညာ ဖွံ့ဖြိုးတိုးတက်ရေးနှင့် လေ့ကျင့်ပညာပေးရေး လုပ်ငန်းများဆောင်ရွက်နိုင်ရန် ပဲခူးမြို့၌ ၁၉၈၈ ခုနှစ် မတ်လက ဖွင့်လှစ်ခဲ့ခြင်းဖြစ်သည်။
နည်းပညာပူးပေါင်းဆောင်ရွက်ရေးလုပ်ငန်းများကို ဂျပန်အပြည်ပြည်ဆိုင်ရာ ပူးပေါင်းဆောင်ရွက် ရေးအေဂျင်စီ(JICA)နှင့် ပူးပေါင်း၍ စီမံကိန်း အဆင့်(၁)ကာလတွင် ကွန်ပျူတာအသုံးပြုမှုဖွံ့ဖြိုးတိုးတက်ရေးဆောင်ရွက်ခြင်း၊ မြန်မာနိုင်ငံ၏ ရေ၊ မြေ၊ မိုးလေဝသ၊ သဘာဝတို့နှင့် လိုက်လျောညီထွေဖြစ်မည့် ဆည်မြောင်းလုပ်ငန်းများအတွက် ဒီဇိုင်း စံညွှန်းများ ပြုစုရေးဆွဲခြင်း၊ တည်ဆောက်ရေးပစ္စည်းများ ဓာတ်ခွဲစမ်းသပ်ခြင်းနှင့် ဗဟုသုတများ မြှင့်တင်ပေးရန်အတွက် သင်တန်းများဖွင့်လှစ်ပို့ချခြင်း၊ စီမံကိန်းအဆင့်(၂)ကာလတွင် နိုင်ငံတော်က လယ်ယာကဏ္ဍဖွံ့ဖြိုးတိုးတက်ရေးအတွက် ငွေကြေးမြောက်မြားစွာဖြင့် တည်ဆောက်ခဲ့သော ဆည်မြောင်း စီမံကိန်းများ၏ အကျိုးသက်ရောက်မှုများ စနစ်တကျတိုးတက်ကောင်းမွန်လာစေရန် အဓိက လေ့လာခြင်းတို့ကို ဆောင်ရွက်ခဲ့ကြောင်း သိရသည်။
ထိုမှတစ်ဆင့် နိုင်ငံတော်သမ္မတနှင့် အဖွဲ့ဝင်များသည် ရဟတ်ယာဉ်များဖြင့် ပြန်လည်ထွက်ခွာလာရာ မွန်းလွဲပိုင်းတွင် ရန်ကုန်မြို့သို့ ရောက်ရှိကြသည်။
(သတင်းစဉ်)
No comments:
Post a Comment