မိုဂါဒစ်ရှူး စက်တင်ဘာ ၁
ဆိုမာလီနိုင်ငံတောင်ပိုင်းရှိ အာဖရိကသမဂ္ဂ(အေယူ)တပ်ဖွဲ့ အခြေစိုက်စခန်းတစ်ခုကို အယ်လ်ရှာဘတ်စစ်သွေးကြွများက စက်တင်ဘာ ၁ ရက် နံနက်အစောပိုင်းတွင် တိုက်ခိုက်ခဲ့ရာ အာဖရိက သမဂ္ဂတပ်ဖွဲ့မှ တပ်ဖွဲ့ဝင်ဦးရေ ဒါဇင်နှင့်ချီကာ ကျဆုံးသွားကြောင်း အဆိုပါစစ်သွေးကြွအဖွဲ့က ပြောကြားသည်။
အယ်လ်ခိုင်ဒါအဖွဲ့နှင့် ဆက်နွှယ်မှုရှိသော အယ်လ်ရှာဘတ် စစ်သွေးကြွအဖွဲ့မှ တိုက်ခိုက်ရေးသမားများသည် အာဖရိကသမဂ္ဂတပ်ဖွဲ့၏ အခြေစိုက်စခန်းအတွင်းသို့ ဗုံးများထောင်ထားသည့် ကားတစ်စီးဖြင့် အတင်းမောင်းဝင်ခဲ့ပြီး ဖောက်ခွဲခဲ့ကြောင်း၊ အေယူတပ်ဖွဲ့အခြေစိုက် စခန်းအတွင်းသို့ သေနတ်သမားများဝင်ရောက်ပစ်ခတ်ခဲ့ကြောင်း ယင်း အဖွဲ့၏ ပြောရေးဆိုခွင့်ရှိသူ ရှိတ်အဘူမူဆတ်က ပြောကြားသည်။
ဆိုမာလီနိုင်ငံ မိုဂါဒစ်ရှူးမြို့တော်၏တောင်ဘက် ကီလိုမီတာ ၉ဝ (၅၅ မိုင်)ခန့်အကွာရှိ ဂျာနာလီအခြေစိုက်စစ်စခန်းတွင် ဖြစ်ပွားသော တိုက်ခိုက်မှုအတွင်း အာဖရိကသမဂ္ဂငြိမ်းချမ်းရေး ထိန်းသိမ်းမှုတပ်ဖွဲ့မှ တပ်ဖွဲ့ဝင် ၅ဝ ခန့် သေဆုံးကြောင်း အယ်လ်ရှာဘတ်စစ်သွေးကြွအဖွဲ့ ပြောရေးဆိုခွင့်ရှိသူက ပြောကြားသည်။
အာဖရိကသမဂ္ဂငြိမ်းချမ်းရေးထိန်းသိမ်းမှုတပ်ဖွဲ့၏ ဂျာနာလီ စစ်စခန်းကို မိမိတို့က ထိန်းချုပ်ထားကြောင်း ပြောရေးဆိုခွင့်ရှိသူက ပြောကြားသည်။
ဆင်ဟွာ။
No comments:
Post a Comment