စီးပွားရေးအသိုက်အဝန်းတစ်ခု ဖော်ဆောင်နိုင်ရေး အလုပ်သမားများဘဝမြှင့်တင်ပေး

ဆောင်းပါး

==========

ထက်ဝေအောင်(စစ်ကိုင်း)

နိုင်ငံ၏ ကုန်ထုတ်စွမ်းအားတိုးတက်သော ဈေးကွက်စီးပွား ရေးစနစ်တစ်ရပ် ဖော်ဆောင်ရာတွင် စက်ရုံ၊ အလုပ်ရုံများ၏ လည်ပတ်မှုအခန်းကဏ္ဍမှာ အရေးကြီးလှပါသည်။ ကုန်ထုတ်စွမ်းအားတိုးတက်ရေးသည် နိုင်ငံဖွံ့ဖြိုးတိုးတက် ရေးကို ကိုယ်စားပြုပြီး ရေရှည်ကောင်းမွန်သော စီးပွားရေး အသွင်သဏ္ဌာန်ကို ဖြစ်ပေါ်စေပါသည်။

စက်ရုံ၊ အလုပ်ရုံ များ ကောင်းမွန်စွာလည်ပတ်နိုင်ရေးအတွက် လူ၊ စက် ပစ္စည်း၊ ငွေကြေးအရင်းအနှီးများ လိုအပ်သည်ကို တွေ့ရ ပါသည်။ စက်ပစ္စည်းနှင့် ငွေကြေးအရင်းအနှီးသည် ငွေကြေး ဓန အင်အားပြည့်စုံသည်နှင့် အခက်အခဲတစ်ခု မဖြစ်နိုင်ဘဲ လွယ်ကူစွာဖြည့်တင်းရယူနိုင်သော ကိစ္စရပ်များ ဖြစ်ပါ သည်။ လူဟူသော လူ့စွမ်းအားအရင်း အမြစ်မှာ ရှားပါး အရေးပါ တန်ဖိုးကြီးမားလွန်းလှပါသည်။ အကြောင်းမှာ အလုပ်သမားများ၏ကျွမ်းကျင်မှု အတွေ့ အကြုံများသည် အချိန်တိုအတွင်း လွယ်လင့်တကူ မရရှိနိုင်သော ရင်းနှီး မြှုပ်နှံမှုဖြစ်သဖြင့် ရေရှည်အသုံးဝင်နေမည် ဖြစ်ပါသည်။

ဟန်ချက်ညီညီ ဖွံ့ဖြိုးတိုးတက်စေမည်

မြန်မာနိုင်ငံအပါအဝင် ကမ္ဘာ့နိုင်ငံအသီးသီးသည် မိမိတို့နိုင်ငံသားများ သင့်တင့်လျောက်ပတ်သော အလုပ် အကိုင်တိုးမြှင့်ရေးအတွက် အင်တိုက်အားတိုက် ဆောင်ရွက် ပေး လျက်ရှိကြသည်။ အမှန်တကယ် အလုပ်လိုအပ်နေသူ များကို အလုပ်ခန့်ထားပေးနိုင်မှုသည် ပြည်သူအများစု၏ လူမှုစီးပွားဘဝဖွံ့ဖြိုးရေး၊ ဆင်းရဲနွမ်းပါးမှုတိုက်ဖျက်ရေးကို အလေးထားခြင်းဖြစ်သည်။ အလားတူ ကုန်ထုတ်လုပ်မှု အခန်းကဏ္ဍတွင် အဓိကအင်အားဖြစ်သည့် အလုပ်သမား များ၏ ကျွမ်းကျင်မှုအတွေ့အကြုံ၊ လုပ်သားအင်အား ခါးဆက်မပြတ်ရေးမှာပဓာနကျပြီး စည်းကမ်းကောင်းမွန် သော ကျွမ်းကျင်လုပ်သားများ၏ လုပ်ငန်းကျွမ်းကျင်မှုများ သည် အခြေခံအကျဆုံး လုပ်ငန်းခွင်များကို ဟန်ချက်ညီညီ ဖွံ့ဖြိုးတိုးတက်စေမည်ဖြစ်ပါသည်။

ပဋိပက္ခများ လျော့နည်းလာ

နိုင်ငံတော်အနေဖြင့် နိုင်ငံသားများ၏ အလုပ်အကိုင် အခွင့်အလမ်း၊ နည်းပညာ၊ အရင်းအနှီးများ ပိုမိုရရှိရေး အတွက် အထူးစီးပွားရေးဇုန်များ၊ စက်မှုဇုန်များ၊ ပြည်တွင်း၊ ပြည်ပရင်းနှီးမြှုပ်နှံလိုသူများစွာကို ဖိတ်ခေါ် ဆောင်ရွက်လျက်ရှိပါသည်။ ကုန်ထုတ်လုပ်မှုကဏ္ဍများ ပိုမိုဖွံ့ဖြိုးတိုးတက်စေရေး အလေးထားဆောင်ရွက်လျက် ရှိပြီး လုပ်ငန်းခွင်တည်ငြိမ်မှုရှိသော ပြည်တွင်း ပြည်ပ အလုပ်အကိုင်အခွင့်အလမ်းများကို ဖြည့်ဆည်းဖော်ဆောင် ပေးလျက်ရှိသည်။ အလုပ်သမားများအတွက် သင့်လျော် သည့် အလုပ်အကိုင်တိုးမြှင့်ရရှိရေး ကြိုးပမ်းမှုအဖြစ် ပြည်တွင်း ပြည်ပအလုပ်အကိုင်ရှာဖွေပေးရေး၊ အလုပ် သမား မှတ်ပုံတင်ပြုလုပ်ပေးရေး၊ ပြည်တွင်းအလုပ်သမား များ၏ အနည်းဆုံးအခကြေးငွေဆိုင်ရာ လုပ်ခလစာ တိုးမြှင့်ရေးဆိုင်ရာပြုပြင်ပြောင်းလဲမှုများကို အချိန်နှင့် တစ်ပြေးညီ ဆောင်ရွက်ပေးနိုင်ခဲ့သည်။ လုပ်ငန်းခွင်များ အတွင်း လိုက်နာကျင့်သုံးရန် ဥပဒေ၊ နည်းဥပဒေများ ခိုင်မာစွာ ပြဋ္ဌာန်းပေးနိုင်ခြင်းကြောင့် အလုပ်ရှင်၊ အလုပ် သမားများကြားရှိ ပဋိပက္ခများမှာလည်း တဖြည်းဖြည်း လျော့နည်းလာသည်ကို တွေ့ရပါသည်။

အလုပ်အကိုင်အခြေအနေများ တိုးတက်ကောင်းမွန် လာစေရေး အလုပ်သမား၊ အစိုးရနှင့် အလုပ်ရှင် သုံးပွင့်ဆိုင် ပူးပေါင်းဆောင်ရွက်ရေးလုပ်ငန်းများ ဆောင်ရွက်ရာ၌ နိုင်ငံတော်အစိုးရနှင့်အတူ အိုင်အယ်လ်အိုအဖွဲ့ကြီးက ပါဝင်ကူညီပေးလေ့ရှိသည်။ အိုင်အယ်လ်အို၏ ဦးတည်ချက် နှင့်အညီ အဖွဲ့ဝင်နိုင်ငံများကို ကျွမ်းကျင်အကူအညီ၊ နည်းပညာအကူအညီနှင့် ပညာသင်ဆုများပေးလျက် အားဖြည့်ကူညီခြင်းများ ဆောင်ရွက်ပေးသည်။ အပြည်ပြည် ဆိုင်ရာ အလုပ်သမားရေးရာအဖွဲ့၏ ညီလာခံကို တစ်နှစ်တစ်ကြိမ် နှစ်စဉ်ကျင်းပလေ့ရှိပြီး အုပ်ချုပ်ရေး အဖွဲ့ကို ရွေးချယ်တင်မြှောက်ပေးခြင်း၊ ညီလာခံမှရရှိသော သဘောတူညီချက်များ၊ အကြံပြုချက်များဖြင့် အလုပ်သမား စံနှုန်းများနှင့် အလုပ်သမား ဥပဒေများကို အတည်ပြု သတ်မှတ်ပေးလေ့ရှိသည့် အိုင်အယ်လ်အို အဖွဲ့ကြီး၏ လူမှုတရားမျှတရေး လုပ်ဆောင်ချက်များ သည် အရေးပါအရာရောက်နေဆဲဖြစ်သည်။ အပြည်ပြည် ဆိုင်ရာ အလုပ်သမားရေးရာအဖွဲ့ (အိုင်အယ်လ်အို) (International Labour Organization-ILO)ကို ၁၉၁၉ ခုနှစ်တွင် စတင်ဖွဲ့စည်းတည်ထောင်ခဲ့သည်ကို လေ့လာ သိရှိရသည်။ ရည်ရွယ်ချက်ကောင်းများဖြင့် ဖွဲ့စည်းခဲ့သော အိုင်အယ်လ်အို အဖွဲ့ကြီးသည် နိုင်ငံများ၏ အလုပ်သမားရေးရာကိစ္စရပ် များတွင် လူမှုရေး၊ တရားမျှတမှုကို ရှေ့ဆောင်ရှေ့ရွက် ပြုရေး၊ ထာဝစဉ်တည်တံ့သော ကမ္ဘာ့ငြိမ်းချမ်းရေးကို အထောက်အကူပြုရေးကိစ္စများကို အလေးထားဆောင်ရွက် ပေးခဲ့သည်။ အလုပ်သမားများနှင့် ပတ်သက်သော လုပ်ငန်းခွင် အခြေအနေ တိုးတက်ကောင်းမွန်ရေးနှင့် လူနေမှုစနစ်များ တည်ငြိမ်ရေးတို့ကို အလေးထားသဖြင့် အပြည်ပြည်ဆိုင်ရာ အစိုးရများ၊ သမဂ္ဂများနှင့် အလုပ်သမား ကိုယ်စားလှယ်များပါဝင်သော ညီလာခံများကျင်းပပြီး အလုပ်သမားများ၏ အရေးကိစ္စများကို ညှိနှိုင်းဆွေးနွေးပေး ခဲ့သည်မှာ ယနေ့ထက်တိုင်ပင်ဖြစ်ပါသည်။

အနာဂတ်အိပ်မက်များ ပိုမိုတောက်ပလာမည်

အလုပ်သမားအရေးသည် နိုင်ငံ့အရေးကိစ္စ ဖြစ်ပါ သည်။ ပြည်တွင်း ပြည်ပအလုပ်အကိုင်အခွင့်အလမ်း ရရှိ ရေး၊ အလုပ်သမားခံစားခွင့် ပြည့်ပြည့်ဝဝရရှိရေး၊ အလုပ် သမားရေးရာ ပဋိပက္ခများချုပ်ငြိမ်းရေးဥပဒေ၊ နည်းဥပဒေ များနှင့်အညီ ဆောင်ရွက်ပေးကြရပါသည်။ မြန်မာနိုင်ငံ အနေဖြင့် ပြည်တွင်းအလုပ်အကိုင်အခွင့်အလမ်းများ ဖြစ်သည့် အစိုးရကဏ္ဍ၊ ပုဂ္ဂလိကကဏ္ဍများမှ အလုပ်အကိုင် ပိုမိုရရှိရေး နှစ်အလိုက်ဆောင်ရွက်ပေးနိုင်ခဲ့သည်ကိုလည်း တွေ့ရှိရသည်။ ပြည်ပအလုပ်အကိုင်ရှာဖွေပေးနိုင်မှုကို လေ့လာကြည့်လျှင် ပြည်ပအလုပ်အကိုင်ဆိုင်ရာဥပဒေများ အတိုင်း အလုပ်သမားများ အလုပ်အကိုင်အခွင့်အလမ်း ခံစားခွင့်ရရှိရေး အလုပ်အကိုင်အကျိုးဆောင်အေဂျင်စီများ မှတစ်ဆင့် ချိတ်ဆက်ဆောင်ရွက်ပေးနေသည်ကိုလည်း တွေ့ရှိရပါသည်။ အလုပ်လုပ်ကိုင်နိုင်သူများ တစ်ဦးချင်း ဝင်ငွေရရှိရေး အလုပ်အကိုင်အခွင့်အလမ်းများ ပေါ်ပေါက် ရန် လိုအပ်ပြီး သင့်လျော်ကောင်းမွန်သည့် အလုပ်အကိုင် ရရှိရေးဆိုင်ရာ အလုပ်အကိုင်အခွင့်အလမ်းပြပွဲများ ပိုမို ဆောင်ရွက်ပေးခြင်းဖြင့် အလုပ်လိုအပ်နေသူများ၏ အနာဂတ်အိပ်မက်များ ပိုမိုတောက်ပလာမည် ဖြစ်ပါသည်။

ဖွံ့ဖြိုးပြီးနိုင်ငံများ၏ လုပ်ငန်းလိုအပ်ချက်များတွင် လုပ်သားလိုအပ်ချက်မှာ ဟင်းတစ်ခွက်တွင် မပါမဖြစ် ဆား တစ်ပွင့်ပမာတူညီသည်။ ပြည်ပနိုင်ငံအသီးသီးမှ စက်ရုံ၊ အလုပ်ရုံများတွင် ကျွမ်းကျင်အလုပ်သမားများ တရားဝင် ခေါ်ယူရခြင်းစျေးကွက်များ ဖြစ်ထွန်းအောင်မြင်လာခဲ့သည်။ နိုင်ငံတကာ ရွှေ့ပြောင်းအလုပ်သမားအချို့သည် အိမ်တွင်းမှု အထောက်အကူပြု အလုပ်နေရာများဖြစ်သည့် အိမ်တွင်း ဧည့်ကြိုများ၊ သန့်ရှင်းရေးအလုပ်သမားများ၊ ယာဉ်မောင်း များ၊ ချက်ပြုတ်သူများ၊ ကလေးသူငယ်စောင့် ရှောက်ပေးရ သူများ၊ သက်ကြီးရွယ်အို စောင့်ရှောက်ပေးရသူများ၊ လုံခြုံရေး ဝန်ထမ်းများအစရှိသည့် အလုပ်အမျိုးအစားများတွင် ပါဝင် လုပ်ကိုင်လာကြသည်ကို တွေ့ရှိရ သည်။ ဖွံ့ဖြိုးဆဲနိုင်ငံများမှ ရွှေ့ပြောင်းသွားလာ အလုပ်လုပ် ကိုင်နေကြသည့် အလုပ် သမားများကို လေ့လာဆန်းစစ် ကြည့်လျှင် အလုပ်အကိုင် အခွင့်အလမ်းနည်းပါးခြင်း၊ လုပ်ခလစာ နည်းပါးခြင်းတို့ ကြောင့် လုပ်ခလစာပိုမိုရရှိသည့် နိုင်ငံများကို ရွေးချယ် သွားလာနေကြခြင်း ဖြစ်ပါသည်။ နိုင်ငံအလိုက် ရေခံမြေခံ သဘောတရား၊ နိုင်ငံရေး၊ စီးပွားရေး၊ လူမှုရေး အခြေအနေ များကြောင့် တစ်နိုင်ငံချင်းစီ၏ အလုပ်သမားရပိုင်ခွင့် အခွင့် အရေးများလည်း မတူကွဲပြား ရှိနိုင်ပါသည်။

အမိမြေတွင် ပြန်လည်အသုံးပြုနိုင်

ယနေ့ကမ္ဘာ့နိုင်ငံအသီးသီးတွင် အဓိကလိုအပ်လျက်ရှိ သည့် ကျွမ်းကျင်အလုပ်သမားများ၏ အခန်းကဏ္ဍသည် ထိပ်ဆုံးကအရေးပါလာခဲ့သည်။ လူမှုစီးပွားဘဝဖွံ့ဖြိုး တိုးတက်ရေးနှင့် ဆင်းရဲမှုလျှော့ချရေးအတွက် အလုပ်အကိုင် အခွင့်အလမ်းများ ပိုမိုပေါ်ပေါက်ရရှိရန်လိုအပ်ပြီး နိုင်ငံ ဖွံ့ဖြိုးတိုးတက်မှုနှင့်အတူ အလုပ်သမားလိုအပ်ချက်ပြည့်မီ ရေး ရွှေ့ပြောင်းအလုပ်သမားလိုအပ်မှု အရေအတွက်မှာ စဉ်ဆက်မပြတ် တိုးပွားလာဖွယ်သာရှိပါသည်။ နိုင်ငံ တစ်ခုမှတစ်ခုသို့ ရွှေ့ပြောင်း အလုပ်လုပ်ကြသဖြင့် အလုပ် သမား၊ အလုပ်ရှင်နှစ်ဖက်စလုံးတွင် စီးပွားရေးဖွံ့ဖြိုး တိုးတက်စေသော အကျိုးအမြတ်များ ရရှိစေနိုင်ပါသည်။ မြန်မာအလုပ်သမားများအနေဖြင့် အချိန်ပေးဆပ်ရရှိလာ မည့် နိုင်ငံခြားဝင်ငွေ၊ ပြည်ပအလုပ်အကိုင် အတွေ့အကြုံ များ၊ အသိပညာ၊ အတတ်ပညာများကို အမိမြေတွင် ပြန်လည် အသုံးပြုနိုင်သည့်အခွင့်အရေးများ ပိုင်ဆိုင်ရရှိနိုင်ပါသည်။

အလုပ်သမားများသည် နိုင်ငံတစ်နိုင်ငံ၏ လုပ်အား ရင်းမြစ်ဖြစ်ပြီး မိခင်နိုင်ငံနှင့် အလုပ်လက်ခံပေးသော နိုင်ငံ များ၏ ရေရှည်အကျိုးစီးပွားဖွံ့ဖြိုးရေးကို အဓိက မောင်းနှင် ပေးလျက်ရှိသည်။ ထို့ကြောင့် ပြည်တွင်းအလုပ်သမားများ နှင့် ရွှေ့ပြောင်းသွားလာနေကြသည့် ရွှေ့ပြောင်းအလုပ် သမားများ၏ ဘဝအာမခံချက်နှင့် လူမှုဘဝ လုံခြုံစိတ်ချရ သော အခြေအနေကောင်းများရရှိရေးမှာ လွန်စွာအရေးပါ လာခဲ့ပါသည်။ စက်ရုံ၊ အလုပ်ရုံ လုပ်ငန်းခွင်များတွင် အလုပ် သမားခန့်ထားရေးဆိုင်ရာ သဘောတူစာချုပ် ချုပ်ဆိုခြင်း၊ ပြဋ္ဌာန်းထားသည့် အလုပ်သမားဥပဒေနှင့်အညီ အလုပ်ရှင် နှင့် အလုပ်သမားအဖွဲ့အစည်းများ ဖွဲ့စည်းခြင်းနှင့် အလုပ် သမားရေးရာပြဿနာများ ဖြေရှင်းပေးခြင်းများ စဉ်ဆက် မပြတ် ဖြစ်ထွန်းအောင်မြင်မှုရှိရန် လိုအပ်သည်။

ရွှေ့ပြောင်းသွားလာလုပ်ကိုင်ခြင်းသည် ပွင့်လင်း မြင်သာရှိသည့် ခေတ်ကို အမီလိုက်လျက် တစ်ဟုန်ထိုး တိုးတက်နေသော အလုပ်သမားများ၏ စီးပွားရေးအရွေ့ ပင် ဖြစ်သည်။ ကမ္ဘာကြီးသည် ခေတ်မီတိုးတက်ခြင်းဖြင့် စက်မှုနည်းပညာနယ်ပယ်အသီးသီးကို ကျော်လွှားရောက် ရှိသည့်တိုင် အသိဉာဏ်ရှိသော လူ့စွမ်းအားအရင်းအမြစ် များကို အသုံးပြုနေရဆဲ ဖြစ်ပါသည်။ သတင်းအချက် အလက်နှင့် ဆက်သွယ်ရေးနည်းပညာများ တိုးတက်လာ ခြင်းကြောင့် ကမ္ဘာကြီးသည် ရွာတစ်ရွာပမာ တည်ရှိလာခဲ့ သည်။ နည်းပညာနယ်ပယ်အသီးသီးတွင်လည်း စက်ကို ထိန်းချုပ်နိုင်သည့် လူသားအကူအညီများ၊ ကျွမ်းကျင် အလုပ်သမားများ၏ စွမ်းပကားများမှာ ထိပ်ဆုံးရောက်ရှိ လာခဲ့သည်။

ခံစားခွင့်များရရှိရေးမှာ လွန်စွာအရေးကြီး

သို့ဖြစ်ရာ ရွှေ့ပြောင်းအလုပ်သမားများ တရားဝင် လမ်းကြောင်းမှ သွားရောက်အလုပ်လုပ်ကိုင်ရေး သတင်း အချက်အလက်၊ အသိပညာများ ကျယ်ပြန့်စွာ သိရှိ နားလည်ရန် လိုအပ်လှသည်။ အလုပ်သမားများသည် မသိနားမလည်သဖြင့် တရားမဝင်အလုပ်သမားစေလွှတ် ရေးအေဂျင်စီများနှင့် အလုပ်ပွဲစားများကို ဆက်သွယ်ကြ လေ့ရှိသဖြင့် အလိမ်ခံရနိုင်ဖွယ်ရှိကြောင်း သတိပြုကြရ ပါမည်။ အလုပ်သမားစေလွှတ်ရေး အေဂျင်စီများကလည်း လူစုဆောင်းမှုအစီအစဉ်တွင် ပွင့်လင်းမြင်သာမှုရှိရပါမည်။ သို့မှသာ ရွှေ့ပြောင်းအလုပ်သမားများအတွက် ခေါင်းပုံ ဖြတ်မှုကင်းဝေးခြင်း၊ ကုန်ကျစရိတ်အနည်းဆုံးဖြစ်ခြင်း အစရှိသော တရားမျှတမှုများ ရရှိစေမည်ဖြစ်ပါသည်။ ရွှေ့ပြောင်း အလုပ်သမားများအတွက် ရွှေ့ပြောင်းသွားလာ မှု လုံခြုံရေး၊ အလုပ်သမား ဥပဒေပါအတိုင်း ခံစားခွင့်များ ရရှိရေးမှာ လွန်စွာအရေးကြီးလှပါသည်။

မြန်မာနိုင်ငံအနေဖြင့် အဆိုပါလိုအပ်ချက်များကို ဖြည့်ဆည်းကူညီပေးလျက်ရှိပြီး ထိုင်း၊ မလေးရှား၊ ကိုရီးယား ကဲ့သို့နိုင်ငံကြီးများတွင် အလုပ်သမားအရေး ဖြေရှင်းပေး နိုင်မည့် အလုပ်သမားသံအရာရှိများ စေလွှတ်ထားရှိပေး ခြင်း၊ နိုင်ငံတကာအလုပ်သမားရေးရာစံသတ်မှတ်ချက် များကို အလေးထားရှိခြင်း၊ သက်ဆိုင်ရာနိုင်ငံများ၏ အလုပ်သမားဥပဒေနှင့် အမိန့်ညွှန်ကြားချက်များနှင့် အညီ အလုပ်သမားများအရေး ကူညီဖြေရှင်းပေးခြင်း၊ ရွှေ့ပြောင်းအလုပ်သမားများ၏ ဘာသာစကား အခက် အခဲ၊ လုပ်ငန်းခွင်အခက်အခဲများ ကူညီဖြေရှင်းပေးနိုင်ရန် စကားပြန်များထားရှိပေးခြင်းနှင့် သက်ဆိုင်ရာသံရုံးနှင့် ပူးပေါင်းဆောင်ရွက်ပေးခြင်းများ ကူညီဆောင်ရွက်ပေး လျက်ရှိသည်ကို ဝမ်းမြောက်ဖွယ် လေ့လာသိရှိရသည်။

စည်းမျဉ်းစည်းကမ်းများ လိုက်နာရန်လိုအပ်

လုပ်ငန်းခွင်အတွင်း အလုပ်သမားများ အချိန် မတိုင်မီ သေဆုံးခြင်း၊ မသန်စွမ်းဖြစ်ခြင်း၊ ရောဂါ တစ်မျိုးမျိုး ခံစားခြင်းများ မဖြစ်စေရန် လုပ်ငန်းခွင်ဘေးကင်းရေး၊ အလုပ်သမားများ၏ ကျန်းမာရေး၊ သက်သာချောင်ချိရေး ဆိုင်ရာ ရပိုင်ခွင့်များကို အလုပ်ရှင်ဘက်မှစီစဉ်ဆောင်ရွက် ပေးရပြီး လုပ်သားများဘက်ကလည်း လုပ်ငန်းခွင် ဘေးကင်းရေး၊ အလုပ်သမားများ၏ ကျန်းမာရေးဆိုင်ရာ ညွှန်ကြားချက်များကို လိုက်နာရန်လိုအပ်ပါသည်။ လုပ်ငန်းခွင် မတော်တဆမှုနှင့် ရောဂါဖြစ်ပွားမှု လျှော့ချရေးဆောင် ရွက်ရာတွင် အလုပ်ရှင်၊ အလုပ်သမားများမှ မှန်ကန်သော အသိအမြင်၊ အတွေးအခေါ်ဖြင့် ဥပဒေ၊ နည်းဥပဒေ၊ စည်းမျဉ်းစည်းကမ်းများကို လေးစားလိုက်နာရန်လိုအပ်ပါ သည်။

ထို့အတူပင် အလုပ်ရှင်၊ မန်နေဂျာ၊ အလုပ်သမား များ၏ လုပ်ငန်းခွင်ဘေးအန္တရာယ်ကင်းရှင်းရေးနှင့် ကျန်းမာရေး အသိအမြင်များ မြှင့်တင်ရေးဆိုင်ရာ ဆွေးနွေးပွဲများကို အခါအားလျော်စွာ ကျင်းပပြုလုပ်ပေး ခြင်းဖြင့် ဘေးကင်းလုံခြုံသော ဘဝများကို ပိုင်ဆိုင်နိုင်မည် ဖြစ်ပါသည်။ အလုပ်ရှင်၊ အလုပ်သမား လုပ်ငန်းခွင် ဆက်ဆံရေးကောင်းမွန်ခြင်းဖြင့် စံချိန်မီထုတ်ကုန်များ ပိုမိုထုတ်လုပ်နိုင်မည့်အပြင် နှစ်ဦးနှစ်ဖက် အကျိုးတူ ပူးပေါင်းလျက် ဂုဏ်သိက္ခာရှိသော တာဝန်ယူမှု၊ တာဝန် ခံမှုရှိသော လုပ်ငန်းခွင်အဖြစ် ရေရှည်တည်တံ့နိုင်မည် ဖြစ်ပါကြောင်း ယုံကြည်လျက် မေလ ၁ ရက်နေ့တွင် ကျရောက်မည့် ကမ္ဘာ့အလုပ်သမားနေ့ကို ကြိုဆိုဂုဏ်ပြု ရေးသားလိုက်ရပါသည်။ ။

ဘေးဘယာဝေးကွာဖို့ မပြတ်သောသတိပြုကြစို့

အယ်ဒီတာ့ အာဘော်

===============

ကိုဗစ်-၁၉ ရောဂါကို တစ်ကမ္ဘာလုံးနှင့်အတူတကွ ရင်ဆိုင်ကြုံတွေ့ကျော်လွှား နေကြသည်။ မျှော်လင့်မထားသော ဆန်းပြားသည့်ရောဂါဘေးကို ကြံ့ကြံ့ခံတွန်းလှန်နိုင်ကြလျှင် ကြုံတွေ့နေကျ အခြားဘေးဘယာများကို မကျော်လွှားနိုင်စရာ အကြောင်းရှိမည်မဟုတ်ပေ။ လူရယ်လို့ဖြစ်လာပါက ဒုက္ခအမျိုးမျိုးနှင့် လွတ်ကင်းနိုင်မည် မဟုတ်ပါလော။ ထိုဘေးဒုက္ခများအနက် ကမ္ဘာကြီးတွင် ဖြစ်ရိုးဖြစ်စဉ်ဖြစ်လာသည့် သဘာဝဘေးဒုက္ခကို လူတို့ ကြံ့ကြံ့ခံရင်ဆိုင်နိုင်စွမ်း ရှိနေကြပါသည်။

ယခုအခါ ကိုဗစ်-၁၉ ရောဂါဘေးကို ရင်ဆိုင်ကျော်လွှားနေချိန်တွင် အချိန်ကာလအလျောက်ဖြစ်ပေါ်လာသော ပူပြင်းသည့်ဒဏ်၊ ရေရှားပါး သည့်အခက်အခဲ၊ မိုးသက်လေပြင်းဒုက္ခနှင့် ကိုဗစ်-၁၉ ရောဂါဘေးကြောင့် ဖြစ်ပေါ်လာသည့် လူမှုဘဝဒုက္ခ အခက်အခဲများကို နိုင်ငံတော်အစိုးရနှင့်အတူ ပြည်သူအားလုံး ရင်ဆိုင်ဖြေရှင်းနေကြသည်။ ထိုသို့ဖြေရှင်းနေရသော အချိန်ကာလတွင် ရာသီကာလကြုံတွေ့ရလေ့ရှိသည့် မုန်တိုင်းအန္တရာယ် ကိုလည်း အထူးသတိပြုကြဖို့လိုမည်ဖြစ်သည်။

ယခုအချိန်ကာလသည် ပူပြင်းသောနွေရာသီကာလဖြစ်သကဲ့သို့ မိုးကြိုကာလလည်းဖြစ်သည်။ လာမည့် မေလလယ်တွင် မုတ်သုံရာသီဝင်တော့ မည်ဖြစ်၍ ယခုအချိန်မှစ၍ မိုးသက်လေပြင်းများ၊ မုန်တိုင်းများကို သတိ ထားကြရတော့မည်ဖြစ်သည်။ မိုးကြိုကာလတွင် လေဖိအားနည်းရပ်ဝန်း များနှင့် မုန်တိုင်းများလည်း နှစ်စဉ်ဖြစ်လေ့ရှိသည်။ မြန်မာနိုင်ငံအပါအဝင် ကမ္ဘာ့မိုးလေဝသဌာနများ၏ ထုတ်ပြန်ချက်အရ မြန်မာနိုင်ငံတွင် မိုးရွာသွန်း နေပြီး ဘင်္ဂလားပင်လယ်အော်အရှေ့တောင်ပိုင်းနှင့် ယင်းနှင့်ဆက်စပ်လျက် ရှိသော ကပ္ပလီပင်လယ်ပြင်တွင် ဧပြီ ၂၈ ရက်မှ ၃၀ ရက်အတွင်း လေဖိအားနည်း ရပ်ဝန်းဖြစ်ပေါ်မည်ဟု ခန့်မှန်းထားသည်။

မိုးလေဝသနှင့် ဇလဗေဒညွှန်ကြားမှုဦးစီးဌာနအနေဖြင့် မေလဆန်း တွင် ဘင်္ဂလားပင်လယ်အော်၌ ဖြစ်ပေါ်လာဖွယ်ရာရှိသည့် မုန်တိုင်းနှင့် ပတ်သက်၍ လေဖိအားနည်းရပ်ဝန်းဖြစ်ပေါ်သည့်အချိန်ရောက်မှ ဖြစ်ပေါ် လာနိုင်သည့် မုန်တိုင်းလားရာကို အချိန်နှင့်တစ်ပြေးညီ အသိပေးသွားနိုင်မည် ဖြစ်သည်။ ယခုလက်ရှိအချိန်တွင် ဘင်္ဂလားပင်လယ်အော်၌ မုန်တိုင်းဖြစ် ပေါ်နိုင်သည်မှာ သေချာသလောက်ရှိသော်လည်း မုန်တိုင်းဖြတ်ကျော်မည့် နေရာ၊ ဖြတ်ကျော်မည့်ရက်၊ ဖြတ်ကျော်မည့်အချိန်တို့ကို အတိအကျပြောဆို၍ ရနိုင်မည်မဟုတ်သေးပေ။

သို့သော် မုန်တိုင်းငယ်အဆင့်သို့ ရောက်ရှိပါက မေ ၂ ရက်၊ ၃ ရက်တို့ တွင် ဧရာဝတီတိုင်းဒေသကြီးနှင့် ရခိုင်ပြည်နယ်တောင်ပိုင်းတို့တွင် မိုးရွာ သွန်းမှုများနှင့် လေပြင်းတိုက်ခတ်မှုများ ဖြစ်ပေါ်နိုင်သည်။ လေဖိအား နည်းရပ်ဝန်းနှင့် မုန်တိုင်းတို့၏လားရာတို့ကို အတိအကျပြောဆိုရန်ခက်ခဲပြီး ဖြစ်ပေါ်နေသည့် အနီးဆုံးကာလရောက်မှသာ ရေရေရာရာဆုံးဖြတ်နိုင်မည် ဖြစ်သည်။ လက်ရှိတွင် မိုးလေဝသဌာနများ၏ ခန့်မှန်းချက်များအရ မေ ၅ ရက်နှင့် ၇ ရက်တို့တွင် ဆိုင်ကလုန်းမုန်တိုင်း တိုက်ခတ်နိုင်မည်ဟု ခန့်မှန်းကြပြီး ရခိုင်ကမ်းရိုးတန်း သို့မဟုတ် မြစ်ဝကျွန်းပေါ် သို့မဟုတ် ရခိုင်နှင့်မြစ်ဝကျွန်းပေါ်တို့ကို ဖြတ်သန်းနိုင်မည်ဟု ခန့်မှန်းကြသည်။

လက်ရှိတွင် လူမှုကွန်ရက်များ၌ မမှန်သတင်းများ၊ ကောလာဟလ သတင်းများ ထုတ်လွှင့်နေပြီး ယင်းသတင်းများကြောင့် ပြည်သူများ အနေဖြင့် စိုးရိမ်မှုလွန်ကဲခြင်းမဖြစ်ရန်လိုပေသည်။ သက်ဆိုင်ရာတရားဝင် ဌာနမှ လေဖိအားနည်းရပ်ဝန်းဖြစ်နိုင်ခြေ၊ မုန်တိုင်းငယ်အဆင့် ပြောင်းလဲ နိုင်ခြေ၊ မြန်မာနိုင်ငံအပေါ် အကျိုးသက်ရောက်မှုအခြေအနေတို့ကို ထုတ်ပြန်အသိပေးမှုအပေါ် မူတည်စောင့်ကြည့်ပြီး သတိပြုလိုက်နာ ဆောင်ရွက်ကြရန်လိုပေသည်။ အကယ်၍ မုန်တိုင်းနှင့် ကြုံတွေ့ရပါက ကြိုတင်ပြင်ဆင် ဆောင်ရွက်ထားခြင်းသည် ပျက်စီးဆုံးရှုံးထိခိုက်မှုများကို လျှော့ချနိုင်မည်ဖြစ်သည်။ အချိန်နှင့်အမျှ ပြောင်းလဲနေသော မိုးလေဝသ ဖြစ်စဉ်များကို ကြိုတင်သတိ၊ အသိတို့ဖြင့် ရင်ဆိုင်တုံ့ပြန်ကြရမည်ဖြစ်သည်။

သို့ဖြစ်ရာ ကိုဗစ်-၁၉ ရောဂါဘေးနှင့် ပြည်သူများ ရင်ဆိုင်ကြုံတွေ့ နေရချိန်တွင် ဘေးဘယာများကို ရှောင်ရမည့် အသိ၊ သတိများရှိထားကြပြီး ဖြစ်ရာ ရောဂါဘေးကို ရင်ဆိုင်ကျော်လွှားခုခံတိုက်ဖျက်ရင်း ရာသီကာလ အလိုက် ရောက်ရှိလာနိုင်သော မိုးသက်မုန်တိုင်းဘေးအန္တရာယ်များကို ရရှိထားပြီးဖြစ်သောအတွေ့အကြုံများနှင့် ညီညီညွတ်ညွတ် လက်တွဲ တွန်းလှန်ကြံ့ကြံ့ခံရင်ဆိုင်ကျော်လွှားကြရမည်ဖြစ်ပါကြောင်း။ ။

ကယားတို့ဌာနေ ငွေတောင်ပြည်မှ “ဂေဘား” တိုင်းရင်းသားညီနောင်များ

သတင်းဆောင်းပါး-မောင်မောင်ကျော့(ပလက်ဝ)

သွေးချင်းတို့ရဲ့ပွဲတော်ဆီ(၂၀၂၀)ပွဲတော်ကြီး တွင် ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်းလူမျိုးအုပ်စုကြီးရှစ်မျိုးနှင့် ကိုယ်ပိုင် အုပ်ချုပ်ခွင့်ရဒေသ၊ တိုင်း တို့ဖြစ်ကြသည့် နာဂ၊ ဓနု၊ ပအိုဝ်း၊ ဝ၊ ကိုးကန့်၊ တအာင်း (ပလောင်) တိုင်းရင်းသားသွေးချင်းတို့၏ ရိုးရာယဉ်ကျေးမှုပြခန်းများ၊ တိုင်းရင်းသား လူမျိုးရေးရာဝန်ကြီးဌာနပြခန်းနှင့် မြန်မာ နိုင်ငံ တိုင်းရင်းသားလုပ်ငန်းရှင်များပြခန်း တို့ကို လေ့လာခွင့်ရရှိခဲ့သည်။

ပွဲတော်ကြီး၏ စတုတ္ထမြောက်နေ့တွင် စာရေးသူ ကယားတိုင်းရင်းသားရိုးရာယဉ် ကျေးမှုပြခန်းကို လေ့လာဖြစ်ခဲ့ပါသည်။

ကယားတိုင်းရင်းသားရိုးရာယဉ်ကျေးမှုပြခန်း

ယခုနှစ်တွင် ကယားတိုင်းရင်းသား လုပ်ငန်းရှင်များအသင်းက ဦးဆောင်ကျင်းပ သည့်ပွဲဖြစ်သည့်အတွက် ကယားလူမျိုးတို့၏ တံခွန်တိုင်ကို ခမ်းနားစွာထားရှိမှုနှင့်အတူကယားလူမျိုးတို့၏ တံခွန်တိုင်အကကို ကြည်နူးဖွယ် မြင်တွေ့ခံစားခဲ့ရပါသည်။

ကယားတိုင်းရင်းသား ရိုးရာယဉ်ကျေး မှုပြခန်းကို ဝင်လိုက်သည်နှင့် အဝင်ဝ ထောင့် ဘက်တွင် ကယားတိုင်းရင်းသားတို့နေထိုင်ရာ ရိုးရာအိမ်ပုံစံငယ်ကို ဒေသထွက်သစ်ခွပန်း များဖြင့် အလှဆင်ပြထားသည်ကိုတွေ့ရသည် မှာ မျက်စိပသာဒ ရှိလှသည်။ ထို့ပြင် ကယားတိုင်းရင်းသားတို့၏ ရိုးရာအသုံး အဆောင်ပစ္စည်းများ၊ ဝတ်စားဆင်ယင်မှုများ၊ အထင်ကရနေရာများ၏ မှတ်တမ်းဓာတ်ပုံ များ၊ လက်မှုပစ္စည်းများ၊ စာပေယဉ်ကျေးမှုသင်ရိုးညွှန်းတမ်းများကို စိတ်ဝင်စားဖွယ်လေ့ လာခွင့် ရရှိခဲ့သည်။

ပြခန်းအတွင်းပတ်လည်တွင် ကယား ပြည်နယ်၏ အထင်ကရနေရာများဖြစ်သည့် လွိုင်ကော်မြို့ရှိ ဟော်နန်း၊ ကယားတိုင်းရင်း သားတို့၏ တံခွန်တိုင်များ၊ ဘီလူးချောင်း အမှတ်(၃) ရေအားလျှပ်စစ်စက်ရုံပုံစံငယ် နှင့်အတူ အထင်ကရ တောင်ကွဲစေတီ၊ ရေနီ ပေါက်ဂူ၊ ဆင်တောင်၊ သဘာဝလိုဏ်ဂူ အစရှိ သည်တို့ တည်ရှိရာနေရာများကို ဗီနိုင်း များဖြင့် ပြသထားသည်။

“အခုလို ပြခန်းတစ်ခုဖြစ်လာဖို့အတွက် လွန်ခဲ့တဲ့နှစ်လလောက်ကတည်းက ကြိုတင် ပြင်ဆင်မှုတွေ လုပ်ခဲ့တာပါ။ ဒီလိုအောင်အောင် မြင်မြင်ပြသနိုင်ဖို့ ကယားနဲ့ကယားမျိုးနွယ် စုတွေအားလုံး ကူညီပေးခဲ့ကြတာဖြစ်ပါတယ်” ဟု ဌာနေတိုင်းရင်းသားစာပေနှင့် ယဉ်ကျေးမှု ကော်မတီ ဥက္ကဋ္ဌ ဦးမိုးဇက်အောင်လေးက ပြောသည်။

ကယားအစုကို ၁၉၉၈ ခုနှစ် မေလထုတ် ယနေ့ မြန်မာအတွဲ(၁)၊အမှတ်(၂)စာအုပ်တွင် ကယား၊ ကယန်း(ပဒေါင်း)၊ ဂေခို၊ ဂေဘား၊ ပရဲ (ကယော)၊ မနုမနော၊ ယင်းတလဲ၊ ယင်းဘော်၊ ဇယိမ်းဟူ၍ ကယားမျိုးနွယ်စုကိုးမျိုး မှတ်သား ခဲ့ဖူးပါသည်။ ပြခန်းတွင် ကယား၊ ကယန်း၊ ကယော၊ ဂေဘား၊ မနုမနော၊ ယင်းတလဲ ခြောက်စု ၏ဝတ်စားဆင်ယင်မှုများကို ရုပ်တုများဖြင့် လှပစွာပြင်ဆင်ပြသထားသည်ကို စိတ်ကြည်နူး ဖွယ်မြင်တွေ့ခဲ့ရသည်။ ကျန်ကယားသုံးစု မတွေ့ရသဖြင့် ပြခန်းတာဝန်ခံ ဒေါ်ချစ်နိုဝင်ဘာ (ဂေဘားတိုင်းရင်းသူ)အား စေ့ငုမေးမြန်းဖြစ်ခဲ့ ပါသည်။

ဒေါ်ချစ်နိုဝင်ဘာက ကယားအစုတွင် ကယား၊ ဂေဘား၊ ယင်းတလဲတို့မှာ ယခင် အမည် ဖြင့် သုံးစွဲကြကြောင်း၊ “ပရဲ” က ”ကယော” “မနုမနော” က “ကော်ယော်” ဟူ၍ သုံးစွဲလာ ကြောင်း၊ ကယန်းတွင်မူ ကယန်းကခေါင်း၊ ကယန်းကဒေါ့၊ ကယန်းကငန်၊ ကယန်းလဲထ ဟူ၍ လေးမျိုးရှိကြောင်း၊ ကယန်းကခေါင်း ကို မြန်မာတို့ ရှေးအခါက ပဒေါင်းဟု ခေါ်ကြောင်း၊ ယခုအခါ ကယန်း(ပဒေါင်) (သို့) ကယန်းဟုခေါ်ကြောင်း၊ ကယန်းကဒေါ့မှာ ဂေခို၊ ကယန်းကငန်မှာ ယင်းဘော်၊ ကယန်းလဲ ထမှာ ဇယိမ်းဟူ၍ ခေါ်ဆိုလာကြခြင်း ဖြစ်ကြောင်း၊ ယခုပြခန်းတွင် ကယန်းလေးမျိုး ကို ပေါင်းစုပြသထားခြင်းကြောင့် ကယား ခြောက်စုဟု ထင်ရခြင်းဖြစ်ကြောင်းနှင့် ပြခန်း တာဝန်ခံများမှလုပ်ဆောင်နေသည့် လုပ်ငန်းစဉ် များ၊ ဂေဘားလူမျိုးတို့၏ စာပေယဉ်ကျေးမှု ဆိုင်ရာများကို ဂေဘားစာပေနှင့်ယဉ်ကျေးမှု အဖွဲ့ ဖွဲ့စည်းပြီး ဆောင်ရွက်နေသည့် လုပ်ငန်း စဉ်များအား ဆွေးနွေးရှင်းလင်းပြောကြားပေးပါသည်။

ဤသို့ ဆွေးနွေးပြောကြားပေးခဲ့သည့်အကြောင်းအရာများကိုအခြေခံ၍ ဂေဘား တိုင်းရင်းသားတို့၏ သမိုင်းကြောင်း၊ ရိုးရာ ယဉ်ကျေးမှုဓလေ့၊ လူမှုစီးပွားဘဝ စသည် တို့ကို ဆက်လက်လေ့လာဖြစ်ခဲ့သည်။ ထိုသို့ လေ့လာမှတ်သားမိသည်များမှ ဂေဘား တိုင်းရင်းသားတို့အကြောင်း မည်သို့မည်ပုံ ရှိသည်ကို လေ့လာလိုသူများ သတင်းစာ စာမျက်နှာပေါ်မှသိရှိစေရန် ယခုဆောင်းပါး ရေးသားရခြင်း ဖြစ်ပါသည်။

ဂေဘားလူမျိုး

ကယားတိုင်းရင်းသားတို့ကို ကေဘား၊ ကယ်ဘား ဟူ၍ အမျိုးမျိုးခေါ်ကြသည်။ သူတို့နှစ်သက်သည့် အမည်မှာ ဂေဘား ဖြစ်သည်။ ဂေဘားစကားကိုပင် ပြောဆို ကြသည်။ ဂေဘားစကားနှင့်နီးစပ်သော စကားပြောသည့်လူမျိုးများမှာ ပရဲ(ကယော)၊ မနုမနော(ကော်ယော်)တို့ဖြစ်သည်။ ၁၉၆၅ ခုနှစ် ကရင်ပြည်နယ် ဘားအံမြို့၌ကျင်းပသော (၁၈)ကြိမ်မြောက် ပြည်ထောင်စုနေ့တွင် တိုင်းကြီးကြပ်ရေးကော်မတီ တိုင်းခွဲ(၉)မှ တင်ပြသည့် စာရင်းအရ ကယားပြည်နယ်တွင် ဂေဘားတိုင်းရင်းသား ၄၀၀ ခန့်ရှိသည်ဟု ဖော်ပြထားသည်။ ယခုအခါ ကယားပြည်နယ် တွင် ၁၀၀၀၀ ခန့်ရှိနိုင်ကြောင်းနှင့် ရှမ်းပြည် နယ်၊ ကရင်ပြည်နယ် သံတောင်မြို့နယ်၊ မြန်မာ နိုင်ငံအလယ်ပိုင်း တောင်ငူမြို့နယ်၊ ‌နေပြည် တော်၊ လယ်ဝေး၊ ပျဉ်းမနားနှင့် မွန်ပြည်နယ် သထုံမြို့သို့တိုင် ဖြန့်ခွဲနေထိုင်ကြသူများပါ ထည့်တွက်ပါက ၄၀၀၀၀ ကျော်ခန့်ရှိနိုင်သည် ဟု ဒေါ်ချစ်နိုဝင်ဘာက ပြောသည်။ ဂေဘား တိုင်းရင်းသားများကို ကယားပြည်နယ်အတွင်း ဖရူဆိုမြို့နယ် ကေကော၊ ရော်ဒေါ်ခေါနှင့် လွိုင် ကော်မြို့နယ် မထောနူးကျေးရွာနှင့် မြို့ပေါ် ရပ်ကွက်များတွင် စုစုခဲခဲတွေ့ရသည်။

ဆင်းသက်ပေါက်ဖွား ဂေဘားတိုင်းရင်းသား

ဂေဘားတို့ ဆင်းသက်လာပုံနှင့် ပတ်သက်၍ ကယားတိုင်းရင်းသားရိုးရာယဉ်ကျေးမှုပြခန်းတွင် ဂေဘားတိုင်းရင်းသားတို့မှ ပေးဝေငှသည့် လက်ကမ်းစာစောင်တွင် ဂေဘားတို့သည် မွန်ဂိုလွိုက်(အသားဝါ) မျိုးနွယ်စုမှဆင်းသက်လာသည့် တိဘက်မြန်မာ ဘာသာစကားပြော အုပ်စုဝင် လူမျိုးတစ်မျိုး ဖြစ်ကြောင်း၊ မွန်ဂိုလွိုက်အနွယ်ထဲမှ ကရက် တိဘက်မြန်မာမျိုးနွယ်စု တစ်စုဖြစ်ကြောင်း၊ တရုတ်ပြည် ယူနန် ရှမ်းတို့အခေါ် ယန်မျိုးနွယ် စုမှ ဆင်းသက်လာသည်ဟုလည်း သမိုင်းပညာ ရှင်များ အဆိုရှိသည်။

ဟန်မျိုးနွယ်စုသုံးစုတို့သည် မွန်ဂိုလီး ယားဒေသမှ ဘီစီ၂၀၁၇ တွင် တောင်ဘက်သို့ တရွေ့ရွေ့ပြောင်းရွှေ့ခဲ့ရာ ဦးစွာတိဘက်ဒေသ သို့ အခြေချခဲ့သည်။ ဘီစီ ၁၃၈၈ တွင် တိဘက်ဒေသမှ ယူနန်ဒေသသို့ ရောက်ရှိ ခဲ့ကြကာ သံလွင်မြစ်နှင့် မဲခေါင်မြစ်ကြား တောင်တန်း တောင်ကုန်းများအတိုင်း ဆင်းသက်ခဲ့ရာ ဘီစီ ၇၄၁ တွင် ယူနန်ဒေသမှ ယခု ကယားနယ် ရွာသစ်ရွာနယ်စပ်တစ်နေရာ မှအနောက်ဘက်ရှိ ထီးရော်ခိုတောင်တန်းကို ဖြတ်ကာ မြန်မာနိုင်ငံ စစ်တောင်းမြစ်ဖျား ရမည်းသင်းနယ်နှင့် တောင်ငူနယ်အရှေ့ဘက် တောင်တန်းဒေသတို့တွင် အများဆုံးအခြေချ နေထိုင်ခဲ့ကြသည်။

ထိုသို့ ဂေဘားမိသားစုခြောက်စု စုစည်း ၍ ဆင်းသက်ခဲ့ရာ တစ်စုမှာ ကန္တာရဝတီနယ်၊ ကြယ်ဖိုးကြီးနယ်တို့ပါဝင်သည့် ယခု ကယားနယ် သို့ စုစည်းနေထိုင်ခဲ့ကြသော ကယားအုပ်စုဝင် ဂေဘားတို့ပင် ဖြစ်ပေသည်။ ဖဲကွမ်းအုံအစုမှာမူ စမုံမြစ်၊ စစ်တောင်းမြစ်နှင့် ဆွာချောင်းတစ်ဝိုက် ရမည်းသင်းနယ်နှင့် ပေါင်းလောင်းမြစ်အနောက် ဘက်နှင့် အရှေ့ဘက် တောင်ပေါ်ဒေသများတွင် ကွမ်းအုံသား၊ ကွမ်းအပ်သား အမည်ဖြင့် ရွာများ တည်ထောင်ကာ နေထိုင်ခဲ့ကြသူများဖြစ်ကြ သည်ဟု ရေးသားထားပါသည်။

ပျံ့နှံ့နေထိုင်မှုနှင့်အုပ်ချုပ်ရေး

ကရင်ပြည်နယ် မြောက်ပိုင်း(ယခင် တောင်ငူခရိုင်) လိပ်သိုနယ်၊ သံတောင် မြောက်ပိုင်း ပျဉ်းမနားနယ်နှင့် လယ်ဝေးနယ် အရှေ့ဘက်တောင်တန်း၊ ကယားပြည်နယ် လွိုင်ကော်၊ ဖရူဆို၊ ဒီးမော့ဆို၊ ရှားတော မြို့နယ်တို့တွင် ဖြန့်ခွဲနေထိုင်လျက်ရှိကြသည်။

ရှေးအခါက စော်ကဲစနစ်ဖြင့် အုပ်ချုပ်ခဲ့ သည်။ ၁၉၆၂ ခုနှစ်နောက်ပိုင်း မရှိတော့ပါ။ အများကြည်ညိုလေးစားသူ ရပ်ရွာလူကြီးတစ် ဦးဦးက ဦးဆောင်၍ စီမံခန့်ခွဲအုပ်ချုပ်ကြသည်။

ရုပ်ရည်သွင်ပြင်နှင့် ဝတ်စားဆင်ယင် ထုံးဖွဲ့မှု ယန်(ကရင်)သုံးစုတွင် တစ်စုအပါ အဝင်ဖြစ်သဖြင့် ပုံပန်းသွင်ပြင်တူညီကြသည်။ မေးရိုးကား၍ ကိုယ်လုံးကိုယ်ထည်ခပ်ပြားပြားဖြစ်သည်။ အမျိုးသားများသည် ရှေးအခါက ကိုယ်တိုင်ရက်လုပ်သော ဂျပ်ခုတ်ရက်ကန်း ထည်ဘောင်းဘီအပွထည် ဝတ်ကြသည်။ ထို့နောက် ပိတ်ထူအနက်ရောင်ဝတ်ဆင်ကာ အနံတစ်ထွာ၊ အရှည်သုံးတောင်ရှိခေါင်းပေါင်း အဖြူပေါင်းကြသည်။ လက်ရက်ထည်ကို အင်္ကျီလက်များနှင့် ကိုယ်ထည်တွင် အနီစင်း များဖော်၍ ရက်လုပ်ပြီး ဝတ်ဆင်ကြသည်။ ဆံပင်အရှည်ထား၍ သျှောင်တင်းတင်းထုံး လေ့ရှိကြသည်။ လက်စွပ်ဝတ်ကြပြီး ငွေနား တောင်းလည်းပန်ဆင်ကြသည်။

ယခုအခါ အပေါ်ပိုင်းအဖြူ၊ အောက်ပိုင်း ကြက်သွေးရောင်ဖျော့ သင်တိုင်းကို ဝတ်ကြ ပြီး ကြက်သွေးရောင်၊ အနက်ရောင်ခွဘောင်းဘီ ဝတ်ကြသည်။ အချို့မှာ အဖြူခံ နီဝါပြာ ဒေါင်လိုက်အစင်း၊ အောက်ပိုင်း ကြက်သွေး ရောင်ပန်းထိုးသင်တိုင်းနှင့် ကြက်သွေးအနက် ရောင် ခွဘောင်းဘီဝတ်ကြသည်။ နားဖောက် ၍ ချိုစောင်းတွင် သျှောင်ထုံးကိုဝါးဘီးဖြင့် ထုံးကြသည်။ ခေါင်းပေါင်းပြီး လွယ်အိတ် လွယ်လေ့ရှိသည်။

အမျိုးသမီးတို့မှာ ကိုယ်တိုင်ရက်လုပ် ဂျပ်ခုတ်ထည်ဖြင့် သင်တိုင်းကဲ့သို့ အင်္ကျီ အရှည်အနက်ရောင်လက်ပြတ်ကို ကိုယ်တိုင် ရက်လုပ်ပြီး ဝတ်ဆင်ကြသည်။ လက်ဖျားနှင့် ကိုယ်ထည်အနားတစ်လျှောက်တွင် ပန်းရောင် စုံအလှထိုး၍ ဝတ်ဆင်ကြသည်။ ရှေးအခါက တစ်ထည်တည်းဝတ်၍ နောက်ပိုင်းတွင် အင်္ကျီအဖြူကို ဝတ်ဆင်လာကြသည်။ အပေါ် အင်္ကျီမှာ ရောင်စုံဝတ်သော်လည်း အညစ်ခံ စေရန် အနက်ရောင်ကိုသာ အများဆုံးဝတ် လေ့ရှိသည်။

ယခုအခါ နေလကြယ်ပန်းထိုးအပေါ် ဖြူနှင့် အောက်ပိုင်းစပါးနှံပန်းထိုး ကြက်သွေးဖျော့သင်တိုင်းကိုဝတ်ကြပြီး ကြက်သွေးရောင် အောက်ခံဖားစည်ရေလှိုင်း အဆင်ရောင်စုံ ထဘီကို ဝတ်ဆင်ကြသည်။ အချို့မှာ အနက် ခံပေါ်တွင် ဖားစည်ပါ ပန်းခက်အကွက်နှင့် အောက်ပိုင်းကြက်သွေးရောင် ပန်းထိုးသင် တိုင်းတိုဝတ်ကြပြီး ကြက်သွေးရောင်အောက် ခံဖားစည် ရေလှိုင်းရောင်စုံထဘီကို ဝတ်ဆင် ကြသည်။ ပန်းရောင်ပဝါကို ဦးခေါင်းတွင် ပတ်လေ့ရှိသည်။ ပယင်းပုတီး၊ ငွေမတ်စေ့၊ ငွေပြားနှင့်ကြိတ်သီးများကို သီပြီးဆွဲလေ့ရှိ သည်။

လူမှုစီးပွားဘဝ

ဂေဘားတို့ နေထိုင်မှုသဘာဝသည် တောတောင်ခိုမှီသဖြင့် စူးထိုးစနစ်ဖြင့် တောင်ယာလုပ်ကိုင်ကြသည်။ ဖရူဆို မြို့နယ်တွင် ရောနှောနေထိုင်ကြသော ပရဲ(ကယော)နှင့် ဂေခို(ကယန်းကဒေါ့)တို့ကဲ့သို့ တောင်ယာမခုတ်မီ ခုတ်မည့်ရက်ကို သိနိုင်ရန် ကြက်ရိုးဗေဒင်မေးလေ့ရှိသည်။ ဗေဒင်အလိုအရ တောင်ယာခုတ်ခြင်း၊ တောင်ယာမီးရှို့ခြင်းတို့ကို ပြုလုပ်ကြသည်။ လယ်ယာများကို မိသားစုအနေဖြင့် ဝိုင်းဝန်း စိုက်ပျိုးကြသည်။ ကျယ်ပြန့်သောလယ် ကွက်များကိုလည်း ရပ်ရွာသူ၊ ရပ်ရွာသား အားလုံး ဝိုင်းဝန်းကူညီလုပ်ကိုင်ပေးကြ သည်။ လယ်ယာမြေကို ရွေးချယ်ရာတွင် မြေတူးကြည့်၍ အချဉ်ဓာတ်ပါသောမြေ၊ တောရင့်ရာမြေကိုရွေး၍ လယ်ယာဖော်ထုတ် ကြသည်။ မြေနီကိုရှောင်ကြသည်။ လယ်ယာ တွင်လည်း စပါးစူးထိုးစိုက်ကြရာ စပါးစူးထိုး သည့်အခါ ၁၂ ယောက်မျှ တန်းစီထိုးကြသည်။ စူးမထိုးခင် စပါးလိပ်ပြာခေါ်ရသည်။ ထို့နောက် စူးထိုးသူတို့ကို ခေါင်းဆောင် လုပ်သူက"ထိုးတော့" ဟုပြောမှ စူးထိုးရ သည်။

ဂေဘားတို့သည် တစ်ဦးတည်း ငါးရှာ ထွက်ကြသည်။ အမျိုးသမီးတို့လည်း ငါးရှာ လေ့ရှိသည်။ ငါးရှာရာတွင် ဂေခို(ကယန်း ကဒေါ့) တို့ကဲ့သို့ ဟုန်း(အဆိပ်ရည်)ကို သုံးကြသည်။ ကုလားကင်ပွန်းသီးကို ထုပြီး အရည်ဖျန်း၍လည်း ငါးရှာကြသည်။ တောင်ယာအားလပ်ချိန်တွင် အမဲလိုက်ကြ သည်။ ကြက်ကို ကျော့ကွင်းနှင့် ဖမ်းသည့် ကြက်တယ်ခြင်း၊ ကျားကို သံညှပ်ထောင်ဖမ်း ခြင်း၊ ရှဉ့်ကို တုံးထောင်ဖမ်းကြသည်။

မွေးမြူရေးကို စီးပွားဖြစ်မဟုတ်ဘဲ လိုသည့်အခါ စားသုံးရန်သာ မွေးကြ သည်။ ကျွဲ၊ နွားတို့ကို ထိန်းကျောင်းခြင်း မရှိဘဲ တောထဲတွင် လွှတ်မွေးကြသည်။ အမဲလိုက်ခွေးကိုလည်းမွေးကြသည်။ ဝက် ကို ရွာအတွင်း လွှတ်မွေးကြပြီး ဖွဲနုကျွေး မွေးမြူသည်။ နွားထီးကို ဝန်တင်တိရစ္ဆာန် အဖြစ်သုံးကြသည်။

ဥယျာဉ်ခြံတွင် ကွမ်းသီး၊ တညင်း၊ လိမ္မော်၊ ဒူးရင်း၊ ကော်ဖီ၊ ချဉ်ပေါင်၊ ငှက်ပျော၊ ကြက်မောက်တို့ စိုက်ပျိုးကြသည်။ စိုက်ပျိုး သီးနှံကို ဖရူဆိုမြို့ပေါ်သို့ သွားရောက် ရောင်းချကြသည်။ ဆန်ဖြင့်လည်း လဲလှယ် ကြသည်။ ဂေဘားတို့နေထိုင်ရာ အနီးဝန်း ကျင်တွင် မြေစေးမရှိ၍ အိုးခွက်လုပ်ငန်း မလုပ်ကိုင်နိုင်ချေ။ အခြားတိုင်းရင်းသားတို့ ထံမှ ဝယ်ယူ၍လည်းကောင်း၊ အသီးနှံတို့ ဖြင့် လဲလှယ်၍လည်းကောင်း၊ သုံးစွဲကြ သည်။ ဖျာများတွင် အနီ၊ အဝါ၊ အဖြူ၊ အကွက်များဖော်၍ ရက်လုပ်ကြသည်။ မိုးရာသီနှင့် ပေါင်းထိုးစဉ်ဆောင်းရန် နှီး ခမောက်များရက်လုပ်ကြသည်။ ချည်ခင်ကို အရောင်ဆိုးပြီး ဂျပ်ခုတ်ထည်များ ရက် သည်။

ယုံကြည်ကိုးကွယ်မှု

ဂေဘားတို့သည် ရှေးအခါက ရိုးရာ နတ်ကိုးကွယ်ခဲ့ကြသည်။ ယဇ်ပူဇော်သော နေရာပုံသေသတ်မှတ်ခြင်းမရှိ။ နတ်ထိန်း ညွှန်ကြားသည့်နေရာသို့ တိရစ္ဆာန်များ ယူဆောင်သွားပြီး ပူဇော်ပသကြသည်။ တောစောင့်နတ်၊ တောင်စောင့်နတ်များကို လည်း ပူဇော်ကြသည်။ အေဒီ ၁၈၅၃ ခုနှစ် နောက်ပိုင်း ခရစ်ယာန်ဘာသာသို့ သက်ဝင် ယုံကြည်လာကြသည်။ ကောင်းကင်တွင် ဘုရားတစ်ဆူရှိသည်ဟူ၍ကား သိရှိကြသည်။ ခရစ်ယာန်ရဟန္တာ၊ မယ်တော်မာရီရုပ်တုများကို ရွာတိုင်းရှိ ဘုရားကျောင်းနှင့် အိမ်တိုင်းတွင် ထားရှိကိုးကွယ်ကြသည်ကို တွေ့ရသည်။ ယင်းမတိုင်မီ ဗုဒ္ဓဘာသာကိုးကွယ်သူများ လည်းရှိခဲ့သည်။

စာပေ၊ ဘာသာစကား

ရောမအက္ခရာကိုအခြေခံ၍ အသံဖလှယ် ထားသည့် စာပေရှိသည်။ သရ၊ ဗျည်းပေါ်တွင် နိမ့်သံ၊ မြင့်သံ သင်္ကေတအသုံးပြုထားသည်။ ၁၉၆၈ ခုနှစ်တွင် ခရစ်ယာန်သာသနာပြုများက စတင်တီထွင်ပေးခဲ့ခြင်းဖြစ်သည်။ ယခုအခါ တိုင်းရင်းသားလူမျိုးများရေးရာဝန်ကြီးဌာန တိုင်းရင်းသားစာပေနှင့် ယဉ်ကျေးမှုဦးစီးဌာန၏ လုပ်ငန်းစဉ်တစ်ရပ်ဖြစ်သော တိုင်းရင်းသား စာပေများကို ကျောင်းသင်ဘာသာရပ်အဖြစ် သင်ကြားနိုင်ရန် စီစဉ်ဆောင်ရွက်ပေးမှုကို ဂေဘားစာပေနှင့် ယဉ်ကျေးမှုအဖွဲ့မှ စာပေ သင်ကြားပေးမှုအပိုင်းတွင် ပူးပေါင်းပါဝင် ဆောင်ရွက်လျက်ရှိသည်။ ဂေဘားဘာသာ စကားတစ်မျိုးကို ပြောဆိုကြသည်။

လူမှုရေးရိုးရာဓလေ့များ

ဂေဘားတို့၏ သားသမီးများ လိမ္မာ ရေးခြားရှိလာစေရန် ဆောင်ရွက်ပုံမှာ ကလေး များလူလားမြောက်သည့်အခါ လူ့အဖွဲ့အစည်း တွင် အံဝင်ခွင်ကျဖြစ်အောင် ရိုးရာဓလေ့ထုံးစံ များကို စနစ်တကျသင်ကြားပေးလေ့ရှိသည်။ ရှေးအခါက ရပ်ရွာတွင် စာသင်ကျောင်းများ မရှိခဲ့၍ နီးစပ်ရာ ကျေးရွာများတွင် ရေးတတ်၊ ဖတ်တတ်ရုံသာ ပညာသင်ကြားပေးပြီး ရိုးရာ တောင်ယာလုပ်ငန်းကို လုပ်ကိုင်စေခဲ့သည်။ ယခုအခါ အနီးဝန်းကျင်တွင် အခြေခံပညာ အထက်တန်းကျောင်းများ ဖွင့်လှစ်ပေးနိုင် ခဲ့ပြီးဖြစ်၍ အခြေခံပညာအဆင့်ထိ သင်ယူနိုင် ကြသည့်အပြင် တက္ကသိုလ်၊ ကောလိပ်သို့တိုင် တက်ရောက်သင်ကြားကြပြီး အစိုးရအမှုထမ်း၊ အကြီးအကဲတို့ပင် ဖြစ်လာခဲ့ပေပြီ။

ဂေဘားတို့၏ ရိုးရာဓလေ့ထုံးစံတွင် ယောက်ျားလေးများ အရွယ်ရောက်သောအခါ မိန်းကလေးများကို အပြိုင်ပိုးပန်းနိုင်သည်။ မိန်းကလေးအိမ်သို့ သွားရောက်လည်ပတ်နိုင် သည်။ လူငယ်နှစ်ဦး စကားပြောစဉ် မိဘများက မနီးမဝေးနေ၍ စောင့်ကြည့်ပေးသည်။ ရှေးအခါက အိမ်ထောင်ဖက်ရွေးချယ်ရာတွင် လူငယ်များက မိဘစကားနားထောင်ကြသည်။ မိဘရွေးချယ်ပေးသည့် အိမ်ထောင်ဖက်ကို ထိမ်းမြားကြသည်။ ယခုအခါ လူငယ်အချင်းချင်း နှစ်သက်၍လည်း ထိမ်းမြားနိုင်သည်။ ဂေဘားတို့၏ ထိမ်းမြားမင်္ဂလာဓလေ့ကို နောင်တွင် သီးခြားဆောင်းပါးတစ်ပုဒ်ရေးသားပါမည်။

အမွေဆက်ခံရေးမှာ လယ်၊ တောင်ယာ များကို သားများအား ပေး၍ အိမ်သုံးပစ္စည်းနှင့် သီးနှံစိုက်ပျိုးရာ ဥယျာဉ်ကို သမီးများအား ပေးလေ့ရှိသည်။ အတွင်းပစ္စည်းများကိုကား သားသမီးအားလုံးကို ခွဲဝေပေးလေ့ရှိသည်။ မိဘများမသေဆုံးမီကတည်းက သားသမီးများ ထဲမှ အကြီးဆုံး(သို့) ရပ်ရွာလူကြီးတို့အား မိဘ သေဆုံးပါက အမွေခွဲဝေပေးရန် မှာကြားခဲ့ရ သည်။ တရားဥပဒေနှင့်ပတ်သက်၍ တစ်ဦး တောင်ယာသည် အခြားတစ်ဦးကြောင့် ပျက်စီး ပါက ပျက်စီးမှုပေါ်မူတည်၍ လျော်ကြေးပေးရ သည်။ ခိုးမှုဖြစ်ပါက သူကြီးထံတိုင်ရသည်။ လူသတ်မှုဖြစ်ပါက သေစားသေစေ အပြစ်ပေး ခံရသည်။ တရားစီရင်ရာတွင် ကျမ်းကျိန်ရ သည်။

ရှေးအခါက လူဝင်စား၊ ဥစ္စာစောင့် ရှိသည်ဟု ယုံကြည်ခဲ့ကြသော်လည်း ယခုအခါ ပပျောက်ခဲ့ပြီ။ ဖုတ်ဝင်လျှင် ပရိတ်ရည်ပက်ဖျန်း လေ့ရှိသည်။ အတိတ်နိမိတ်အနေဖြင့် ငှက်ဆိုး ထိုးလျှင် လူသေတတ်သည်။ ရွာတွင် ချေဝင် လျှင် ရွာပျက်မည့်လက္ခဏာရှိသည်ဟု ယုံကြည်ကြသည်။ ဒီးဒုတ်၊ စွန်ငှက်များကို စုန်းဟု မှတ်ယူကြ၍ ခေါင်မိုးပေါ်လာရောက် နားခြင်းကို မနှစ်သက်ချေ။ ငှက်အော်လျှင် တစ်စုံတစ်ခုဖြစ်တတ်ကြောင်းနှင့် ခွေးများ ညအချိန်မတော်အူလျှင် မကောင်းသည့်နိမိတ် ဟု အယူရှိသည်။ ပျား(သို့)ခြတောင်ပို့များ စွဲလျှင် အတိတ်နိမိတ်ကောင်းကြောင်း၊ သြဇာ၊ ဂမုန်း၊ နတ်နိုင်ဂမုန်းတို့ကို အိမ်ရှေ့ဝရန်တာတွင် ထားရှိခြင်းသည် ဂမုန်းပင်ကို တန်ခိုးရှိသည်ဟု ယုံကြည်မှုကြောင့်ဖြစ်သည်။ အိပ်မက်နှင့် ပတ်သက်၍ ငါးဖမ်းရသည်ကိုမြင်မက်လျှင် လာဘ်ရသည်။ သေဆုံးပြီးသော အိမ်သား တစ်ဦးဦးကို မြင်မက်လျှင် အမဲလိုက်မထွက် ကြချေ။ အမဲလိုက်ထွက်ခါနီး ကလေးငယ်က လိုက်ချင်သည်ဟုဆိုခဲ့လျှင် နိမိတ်မကောင်း၊ အမဲလိုက်ထွက်ခဲ့ပါက ဘေးဒုက္ခကြုံရသည်ဟု အယူရှိသည်။ မြေငလျင်လှုပ်ခတ်မှုနှင့် ပတ်သက်၍ မြေအောက်တွင် ကမ္ဘာမြေကြီးကို ထမ်းထားသူရှိကြောင်း၊ မြေပေါ်နေသူများ ထမင်းရည်ငှဲ့သည့်အခါ ထမင်းရည်က ကမ္ဘာ မြေကြီးထမ်းထားသူပခုံးပေါ်ကျ၍ အပူလောင် ကာ လှုပ်ရမ်းရာမှ မြေငလျင်လှုပ်သည်ဟု အယူ ရှိသည်။ ကမ္ဘာမြေကြီးကို ထမ်းထားသူတို့အားအုပ်ချုပ်သူနတ်မင်းက "မင်းတို့ရှိကြသေးရဲ့ လား" ဟု မေးမြန်းသောအခါ မြေထမ်းသူက"ရှိပါသေးကြောင်း"မြေကြီးကိုလှုပ်၍ အချက်ပြ ခြင်းကြောင့် မြေငလျင်လှုပ်သည်ဟု အယူ အဆတစ်ရပ်လည်းရှိသည်။ မြေငလျင်လှုပ် သည့်အခါ ကိုယ်ဝန်ဆောင်မိန်းမများ မီးဖိုပေါ် တက်၍ နေထိုင်ကြရသည်။ သို့မဟုတ်ပါက ကလေးပျက်ကျတတ်သည်ဟု အယူရှိသည်။

ရိုးရာအနုပညာ အက၊ တူရိယာနှင့်ပွဲတော်များ

ဂေဘားတို့၏ တေးဂီတနှင့်ပတ်သက်၍ တူရိယာများမှာ အိုးစည်၊ မောင်း၊ ကျွဲချို၊ လင်းကွင်း၊ ဖားစည်၊ ပတ္တလား၊ ဝါးပလွေတို့ ဖြစ်သည်။ ဖားစည်ကို ကြေးနီ၊ သွပ်၊ ခဲမဖြူ၊ ဘော်၊ ငွေနှင့် ရွှေတို့ကို ရောစပ်၍ပြုလုပ်ကြ သည်။ ဖားစည်ကို မြန်မာများ၏ နန်းတွင်း တွင်ထားသော မင်္ဂလာစည်တော်ကဲ့သို့ အမြတ် တနိုးတန်ဖိုးထားကြသည်။ ဖားစည်ပေါ်တွင် ဖားရုပ်၊ ခရုရုပ်၊ ငါးရုပ်နှင့် သစ်လုံးပုံများကို သွန်းလုပ်ထားသည်။ ရှေးအခါက စစ်နိုင်လျှင် ဖားစည်တီးခဲ့သည်။ ယခုအခါ အိမ်သစ်တက်ပွဲ၊ လက်ထပ်ပွဲအပါအဝင် မင်္ဂလာရှိသောပွဲသဘင် တို့၌သာ တီးကြသည်။ မင်္ဂလာမရှိသောနေရာ တွင် မတီးရ။

ကျွဲချို၊ ပတ္တလားနှင့် ဝါးပလွေများကို ပွဲတော်များတွင် တီးမှုတ်ကြသည်။ ပတ္တလား ကိုဝါးလုံး ၁၂ လုံးခန့်ဖြင့် ကြီးစဉ်ငယ်လိုက်စီ၍ အောက်တွင် ကောက်ရိုးခံပြီး သံဖြင့်ရိုက်ထား သည်။ ပတ္တလားတီးရန်ဝါး (သို့) သစ်သား တုတ်တံကို အသုံးပြုသည်။ ဤတူရိယာများကို အိမ်သစ်တက်ပွဲတွင် အသုံးများကြပြီး စပါးရိတ် သိမ်းပွဲတွင် ရွာသူရွာသားများသည် တပျော် တပါး စားသောက်ကြကာ ဖားစည်တီးကြ သည်။ စပါးသယ်ပွဲ၌ စပါးသယ်ယူလာစဉ် အသွားအပြန် အိုးစည်နှင့် မောင်းများ တီးကြ သည်။ အကများမှာ ဒိုင်းအက၊ ဒူးလေးအက၊ ဝါးညှပ်အက၊ တုတ်ခေါက်အက၊ စပါးလှေ့ စပါးနယ်အကတို့ဖြစ်သည်။ ပွဲတော်များမှာ စပါးရိတ်သိမ်းပြီး စပါးကျီထည့်ပွဲ၊ ကောက်သစ် စားပွဲ၊ အိမ်သစ်တက်ပွဲ၊ တံခွန်တိုင်ထူပွဲ၊ ရွာသန့်စင်ပွဲများ ပြုလုပ်လေ့ရှိသည်။ ဝိုင်းဝန်း လုပ်ကိုင်သူများနှင့် ရွာသားများကို ဖိတ်ပြီး ကောက်ညှင်းပေါင်း၊ ကောက်ညှင်းထုပ် ကျွေးမွေးဧည့်ခံပြုစုကြသည်။

ကောက်ဦးစားပွဲ(သို့)ကောက်သစ်စားပွဲ

ဂေဘားတို့၏ စိုက်ပျိုးရေးနှင့် ပတ်သက်သည့်ပွဲတော်တစ်ခုမှာ စပါးစူးထိုး ပွဲဖြစ်သည်။ ကဆုန်လတွင်ကျင်းပသည်။ ရည်ရွယ်ချက်မှာ စပါးကွင်းထဲရောက်၍ အသီးအနှံ ဖွံ့ဖြိုးစေရန်ဖြစ်သည်။ စပါးစူးထိုး ပွဲ (သို့) စူးချပွဲတွင် အိုးစည်နှင့် ဖားစည်ကို ညနေအိမ်ပြန်ရောက်မှ တီးရသည်။ ယာကွက်ထဲတွင် မတီးကြ။ ထိုပွဲတွင် အကျွေးအမွေးလည်းပါသည်။ စပါးမှည့်ချိန် တွင် စပါးပုတ်ပွဲလည်း လုပ်လေ့ရှိသည်။

တန်ဆောင်မုန်း၊ နတ်တော်လတွင် ပြုလုပ် ကြသည်။ စပါးဝိုင်းဝန်းကူညီ ရိုက်ပုတ်ခြင်း ဖြင့် စပါးတောင်လိုပုံပြီး စားမကုန်နိုင်အောင် ရှိစေရန် ရည်ရွယ်ကျင်းပခြင်းဖြစ်သည်။ စပါးပုတ်ပွဲပြီးလျှင် စပါးသယ်ပွဲပြုလုပ်ကြ သည်။ တစ်ရွာလုံး ယောက်ျား၊ မိန်းမ မကျန် တပျော်တပါး စပါးသယ်၍ ကျီထဲ ထည့်ကြခြင်းဖြစ်သည်။ စပါးသယ်ရာတွင် အသွားအပြန် အိုးစည်ဗုံမောင်းတီးရသည်။ ဝက်သတ်၍ထမင်းကျွေးကြသည်။ စပါးကျီ ထဲသို့ သိုလှောင်ပြီးလျှင် စပါးဦးစားပွဲ(သို့)ကောက်သစ်စားပွဲ ကျင်းပကြသည်။ ကောက်သစ်စားပွဲကို နှစ်စဉ် ပြာသိုလတွင် ကျင်းပ၍ စပါးဆန်သစ်နှင့် အရန်ဟင်းလျာ များ ချက်ပြုတ်ကာ ဦးစွာလူကြီးသူမများအား ကျွေးမွေးကန်တော့ကြသည်။

ယခုအခါ ဂေဘားတို့ နတ်ကိုးကွယ် လေ့မရှိကြတော့ပေ။ လူကြီးမိဘတို့ကိုသာ နေရာပေး ကန်တော့လာကြတော့သည်။ လူကြီးများစားသောက်ပြီးမှ လူငယ်များဝိုင်း ၍ တပျော်တပါးစားကြသည်။ တစ်အိမ်ထောင်တည်းစား၍ မကုန်ခန်း နိုင်သည့်အပြင် တစ်ရွာလုံးစား၍လည်း မကုန်ပါစေနှင့်ဟူသော အဓိပ္ပာယ်ခံယူကာ ဤသို့ စပါးပွဲတော်များ ကျင်းပကြခြင်းဖြစ် သည်။

စာရေးသူက ဤသွေးချင်းတို့ရဲ့ပွဲတော် ဆီအကြောင်း စဉ်းစားခန်းဝင်တိုင်း အတွေး အမျှင်တို့က တစ်စပြီးတစ်စ မဆုံးနိုင်အောင် ပင်။ ရေးစရာလည်းတစ်ပုံတစ်ပင်။ ဤသို့ သွေးချင်းတို့ရဲ့ပွဲတော်ဆီသည် ညီနောင် တူဖွား တိုင်းရင်းသားတို့၏ စည်းလုံးညီညွတ် မှုကို တည်ဆောက်ပေးနေသည်နှင့်အမျှ ချစ်ခင်ရင်းနှီးမှု အရှိန်အဟုန်ကောင်းများ လည်း ရရှိလာခဲ့ပါပြီ။ သို့ဖြစ်ပါ၍ ကယားတို့ ဌာနေ ငွေတောင်ပြည်ဆီမှ ဂေဘားတိုင်းရင်း သားတို့၏ "တို့ဆွေတို့မျိုးအကျိုးရှိဖို့၊ သွေးစည်းဖို့" သွေးချင်းတို့ရဲ့ပွဲတော်ဆီ ၂၀၂၁ ကယားတိုင်းရင်းသား ရိုးရာယဉ်ကျေးမှု ပြခန်းတွင် ပြန်လည်ဆုံတွေ့ကြပါစို့။

မှီငြမ်းကိုးကား

- တိုင်းရင်းသားယဉ်ကျေးမှုနှင့် ရိုးရာ ဓလေ့ထုံးစံများ(ကယား)။

- ကယားပြည်နယ် ခုနစ်စင်ကြယ် (ပြည်နယ်ယဉ်ကျေးမှု)။

- သွေးချင်းတို့ရဲ့ပွဲတော်ဆီ(၂၀၂၀)၊ ကယားတိုင်းရင်းသား ရိုးရာ

ယဉ်ကျေးမှုပြခန်း လက်ကမ်း စာစောင်များနှင့် စာရေးသူလေ့လာ ခဲ့မှုမှတ်တမ်းများ။