နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ကိုရီးယားသမ္မတနိုင်ငံ သမ္မတ မစ္စတာ မွန်ဂျေအင်းတို့ နှစ်နိုင်ငံတွေ့ဆုံပွဲသို့ တက်ရောက်ဆွေးနွေး

နေပြည်တော် စက်တင်ဘာ ၃

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နှင့် ကိုရီးယားသမ္မတနိုင်ငံ သမ္မတ မစ္စတာ မွန်ဂျေအင်းတို့ သည် ယနေ့ညနေ ၄ နာရီတွင် နိုင်ငံတော်သမ္မတအိမ်တော် သံတမန်ဆောင်ဧည့်ခန်းမ၌ သီးသန့်တွေ့ဆုံကြသည်။

ထို့နောက် မြန်မာ-ကိုရီးယားနှစ်နိုင်ငံ တွေ့ဆုံ ဆွေးနွေးပွဲကို နိုင်ငံတော်သမ္မတအိမ်တော်ရှိ အစည်း အဝေးခန်းမ၌ ကျင်းပရာ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ကိုရီးယားသမ္မတနိုင်ငံ သမ္မတ မစ္စတာ မွန်ဂျေအင်းတို့ တက်ရောက်ဆွေးနွေးကြသည်။

တက်ကြွစွာအထောက်အကူပြု

နှစ်နိုင်ငံတွေ့ဆုံဆွေးနွေးပွဲတွင် နှစ်နိုင်ငံပြည်သူ အချင်းချင်း ထိတွေ့ဆက်ဆံမှု ပိုမိုတိုးမြှင့်ရေး၊ နှစ်နိုင်ငံ အကြား ယဉ်ကျေးမှုကဏ္ဍ၊ ပညာရေးကဏ္ဍ၊ ကုန်သွယ်မှု ကဏ္ဍ၊ ရင်းနှီးမြှုပ်နှံမှုကဏ္ဍ၊ အခြေခံအဆောက်အဦ၊ စွမ်းအင်၊ ငွေကြေးနှင့် ဘဏ္ဍာရေးကဏ္ဍများတွင် ပိုမို ပူးပေါင်းဆောင်ရွက်သွားရေး၊ မြန်မာနိုင်ငံ၏ ကျေးလက် ဒေသဖွံ့ဖြိုးရေးအတွက် လယ်ယာကဏ္ဍတွင် အတွေ့အကြုံ နှင့် နည်းပညာများဖလှယ်ခြင်းဖြင့် ဆက်လက်အကူအညီ ပေးအပ်ရေး၊ ကိုရီးယားနိုင်ငံမှ မြန်မာနိုင်ငံတွင် လာရောက် ရင်းနှီးမြှုပ်နှံမှု ပြုလုပ်ရာတွင် ပိုမိုလွယ်ကူချောမွေ့စေရန် အတွက် ရန်ကုန်မြို့တွင် သတင်းအချက်အလက်စင်တာ တစ်ခု တည်ထောင်သွားရေး၊ သဘာ၀ပတ်ဝန်းကျင်နှင့် ဇီ၀မျိုးစုံမျိုးကွဲ ထိန်းသိမ်းစောင့်ရှောက်ရေးဆိုင်ရာ ပူးပေါင်းဆောင်ရွက်ရေး၊ ခရီးသွားလုပ်ငန်း တိုးမြှင့်နိုင်ရေး အတွက် ၂၀၁၈ ခုနှစ် အောက်တိုဘာ ၁ ရက်က ဗီဇာ ကင်းလွတ်ခွင့်ပြုခဲ့ပြီးနောက်ပိုင်း ကိုရီးယားနိုင်ငံမှ ခရီးသွားဧည့်သည်များ သိသာစွာ တိုးမြင့်လာသည့်အတွက် ကိုရီးယားခရီးသွားများအတွက် ဗီဇာကင်းလွတ်ခွင့်ကို တစ်နှစ်ထပ်မံ သက်တမ်းတိုးမြှင့်ပေးခဲ့သည့် ကိစ္စရပ်များ၊ အာဆီယံ-ကိုရီးယား၊ အာဆီယံ- မဲခေါင် ပူးပေါင်းဆောင် ရွက်မှုတိုးမြှင့်ရေးတွင် မြန်မာနိုင်ငံက ပိုမိုတက်ကြွစွာ အထောက်အကူပြုရေး၊ ၂၀၁၉ ခုနှစ် နိုဝင်ဘာလတွင် ကိုရီးယားသမ္မတနိုင်ငံ ဘူဆန်မြို့၌ ကျင်းပပြုလုပ်မည့် အာဆီယံ-ကိုရီးယားဆွေးနွေးဖက်၊ မိတ်ဖက်ဆက်ဆံမှု နှစ် ၃၀ မြောက် ထိပ်သီးအစည်းအဝေးနှင့် ကိုရီးယား-မဲခေါင် ပူးပေါင်းဆောင်ရွက်မှု ပထမအကြိမ် ထိပ်သီး အစည်းအဝေးသို့ မြန်မာနိုင်ငံမှ နိုင်ငံတော်အဆင့် ပါဝင် တက်ရောက်ရေး၊ မြန်မာနိုင်ငံနှင့်ပတ်သက်၍ ကိုရီးယား ပြည်သူများ ပိုမိုသိရှိလာစေရေးအတွက် ဘူဆန်မြို့ရှိ အာဆီယံယဉ်ကျေးမှုစင်တာတွင် က္ဘာ့ယဉ်ကျေးမှု အမွေ အနှစ်စာရင်းဝင် ပုဂံဒေသ၏ ယဉ်ကျေးမှုနှင့် သဘာ၀ ရှုခင်းများအား ဒစ်ဂျစ်တယ်နည်းပညာဖြင့် ပုံဖော်ပြသ ရေး၊ ရန်ကုန်တက္ကသိုလ် နှစ် ၁၀၀ ပြည့်အခမ်းအနားများ ကျင်းပရာတွင် ကိုရီးယားနိုင်ငံမှ လိုအပ်သည့် အကူအညီ များ ပါဝင်ကူညီရေး၊ ရခိုင်ပြည်နယ် အရေးကိစ္စနှင့် ပတ်သက်၍ မြန်မာအစိုးရ၏ ကြိုးပမ်းဆောင်ရွက်မှုများကို ပါဝင်အထောက်အကူပြုနိုင်ရန်အတွက် ကိုရီးယားသမ္မတ နိုင်ငံမှ အပြုသဘောဆောင်သည့် အကူအညီများ ပေးအပ် ရေး၊ ကိုရီးယား-မြန်မာ စီးပွားရေး ပူးပေါင်းဆောင်ရွက်မှု စက်မှုဇုန်စီမံကိန်း(KMIC) ထူထောင်နိုင်ရေးအတွက် စတင်သည့် အထိမ်းအမှတ်အခမ်းအနားကို ရန်ကုန်မြို့တွင် ကျင်းပပြုလုပ်မည့်ကိစ္စ၊ နှစ်နိုင်ငံသဘောတူညီချက်နှင့် အညီ ကိုရီးယားနိုင်ငံတွင် အလုပ်လုပ်ကိုင်နိုင်ရေးအတွက် မြန်မာအလုပ်သမားများ တိုးမြှင့်ခေါ်ယူနိုင်ရေးကိစ္စရပ် များနှင့်စပ်လျဉ်း၍ ဆွေးနွေးကြသည်။

တက်ရောက်

တွေ့ဆုံဆွေးနွေးပွဲသို့ နိုင်ငံတော်၏အတိုင်ပင်ခံပုဂ္ဂိုလ် နှင့်အတူ ပြည်ထောင်စုဝန်ကြီးများ ဖြစ်ကြသည့် ဦးကျော်တင့်ဆွေ၊ ဒေါက်တာဖေမြင့်၊ ဦးမင်းသူ၊ ဦးသန့်စင် မောင်၊ ဒေါက်တာသန်းမြင့်၊ ဒေါက်တာမျိုးသိမ်းကြီး၊ ဦးစိုးဝင်း၊ ဦးသောင်းထွန်းနှင့် ဦးကျော်တင်၊ ကိုရီးယားသမ္မတနိုင်ငံ ဆိုင်ရာ မြန်မာနိုင်ငံသံအမတ်ကြီး ဦးသန့်စင်နှင့် တာဝန်ရှိ သူများတက်ရောက်ကြပြီး ဧည့်သည်တော် ကိုရီးယား သမ္မတနိုင်ငံ သမ္မတ ဦးဆောင်သည့် ကိုယ်စားလှယ်အဖွဲ့နှင့် အတူ မြန်မာနိုင်ငံဆိုင်ရာ ကိုရီးယားသမ္မတနိုင်ငံ သံအမတ်ကြီး Mr. Lee Sang-Hwa လည်း တက်ရောက်သည်။

ဆွေးနွေးပွဲအပြီးတွင် နိုင်ငံတော်၏အတိုင်ပင်ခံ ပုဂ္ဂိုလ်နှင့် ကိုရီးယားသမ္မတနိုင်ငံ သမ္မတတို့သည် မြန်မာ-ကိုရီးယား နှစ်နိုင်ငံနားလည်မှုစာချွန်လွှာ လက်မှတ်ရေးထိုး ပွဲနှင့် စာချုပ်လဲလှယ်ပွဲသို့ တက်ရောက်ကြသည်။

အဆိုပါ လက်မှတ်ရေးထိုးပွဲနှင့် စာချုပ်လဲလှယ်ပွဲတွင် နိုင်ငံတော်၏အတိုင်ပင်ခံပုဂ္ဂိုလ်နှင့် ကိုရီးယားသမ္မတနိုင်ငံ သမ္မတတို့ရှေ့မှောက်၌ ၂၀၁၈ ခုနှစ်မှ ၂၀၂၂ ခုနှစ်အထိ စီးပွားရေးဖွံ့ဖြိုးတိုးတက်ရေးဆိုင်ရာ ပူးပေါင်းဆောင်ရွက်မှု အတွက် ချေးငွေဆိုင်ရာမူဘောင်သဘောတူညီချက်ကို ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသောင်းထွန်းနှင့် ကိုရီးယား သမ္မတနိုင်ငံ နိုင်ငံခြားရေးဝန်ကြီး Ms. Kang Kyung-wha တို့ကလည်းကောင်း၊ ကုန်သွယ်ရေးနှင့် စက်မှုဆိုင်ရာ ပူးပေါင်းဆောင်ရွက်ရေး နားလည်မှုစာချွန်လွှာနှင့် ကိုရီးယားနိုင်ငံမှ မြန်မာနိုင်ငံ၌ လာရောက်ရင်းနှီးမြှုပ်နှံမှု ပြုလုပ်ရာတွင် ပိုမိုလွယ်ကူချောမွေ့စေရန်အတွက် ရန်ကုန် မြို့တွင် သတင်းအချက်အလက်စင်တာတစ်ခု တည်ထောင် ရေးဆိုင်ရာ နားလည်မှုစာချွန်လွှာတို့ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်နှင့် ကိုရီးယားသမ္မတနိုင်ငံ ကုန်သွယ် ရေးဝန်ကြီး Ms.Yoo Myung-hee တို့ကလည်းကောင်း လက်မှတ်ရေးထိုးကြပြီး အပြန်အလှန်လဲလှယ်ကြသည်။

ထို့နောက် သင်္ဘောလိုင်း၊ သင်္ဘောကျင်း အဆင့်မြှင့် တင်ရေး၊ ထောက်ပံ့ပို့ဆောင်ရေး၊ ဆိပ်ကမ်းတည်ဆောက် ရေးနှင့် စီမံခန့်ခွဲရေးကိစ္စရပ်များတွင် ပူးပေါင်းဆောင်ရွက်မှု နားလည်မှုစာချွန်လွှာကို ပို့ဆောင်ရေးနှင့် ဆက်သွယ်ရေး ဝန်ကြီးဌာန ပြည်ထောင်စုဝန်ကြီး ဦးသန့်စင်မောင်နှင့် မြန်မာနိုင်ငံဆိုင်ရာ ကိုရီးယားသမ္မတနိုင်ငံ သံအမတ်ကြီး Mr. Lee Sang-Hwa တို့ကလည်းကောင်း၊ သိပ္ပံနှင့် နည်းပညာဆိုင်ရာ ပူးပေါင်းဆောင်ရွက်ရေးနားလည်မှု စာချွန်လွှာကို
ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာ မျိုးသိမ်းကြီးနှင့် မြန်မာနိုင်ငံဆိုင်ရာ ကိုရီးယားသမ္မတနိုင်ငံ သံအမတ်ကြီး Mr. Lee Sang-Hwa တို့က လည်းကောင်း၊ ထွန်းသစ်စလုပ်ငန်းများနှင့် တီထွင် ဆန်းသစ်ခြင်းနယ်ပယ်တွင် ပူးပေါင်းဆောင်ရွက်ရေး နားလည်မှုစာချွန်လွှာကို စက်မှုဝန်ကြီးဌာန အမြဲတမ်း အတွင်းဝန် ဦးကိုကိုလွင်နှင့် မြန်မာနိုင်ငံဆိုင်ရာ ကိုရီးယား သမ္မတနိုင်ငံသံအမတ်ကြီး Mr. Lee Sang-Hwa တို့က လည်းကောင်း အပြန်အလှန်လဲလှယ်ကြသည်။
ယင်းနောက် ကိုရီးယားသမ္မတနိုင်ငံမှ ပညာရေး ဝန်ကြီးဌာနအတွက် ပေးအပ်လှူဒါန်းသည့် ကျောင်းကား အစီး ၆၀ ကို ကိုရီးယားသမ္မတနိုင်ငံ နိုင်ငံခြားရေးဝန်ကြီးက ပညာရေးဝန်ကြီးဌာန ပြည်ထောင်စုဝန်ကြီးထံ လွှဲပြောင်း ပေးအပ်သည်။

သတင်းစာရှင်းလင်းပွဲသို့တက်ရောက်

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်နှင့် ကိုရီးယားသမ္မတနိုင်ငံ သမ္မတတို့သည် နိုင်ငံတော်သမ္မတ အိမ်တော်၌ကျင်းပသည့် နှစ်နိုင်ငံ ပူးတွဲသတင်းစာ ရှင်းလင်းပွဲသို့ တက်ရောက်ကြသည်။

သတင်းစာရှင်းလင်းပွဲတွင် နိုင်ငံတော်၏အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ကိုရီးယားသမ္မတနိုင်ငံ သမ္မတ မွန်ဂျေအင်းအား မြန်မာနိုင်ငံသို့ ဖိတ်ခေါ်ခွင့် ရရှိခဲ့သည့်အတွက် အထူးပင် ဝမ်းမြောက်ဂုဏ်ယူမိပါ ကြောင်း၊ ယခုခရီးစဉ်သည် မိမိတို့နှစ်နိုင်ငံအကြား ချစ်ကြည်ရေးနှင့် ပူးပေါင်းဆောင်ရွက်မှု တိုးမြှင့်ရေးအတွက် စာမျက်နှာသစ် တစ်ရပ်ပင်ဖြစ်ပါကြောင်း၊ မိမိတို့နှစ်နိုင်ငံ အကြား ဒီမိုကရေစီနိုင်ငံတော်ထူထောင်ရေးအတွက် တူညီသည့်အတွေ့အကြုံများရှိကြသဖြင့် တစ်နိုင်ငံနှင့် တစ်နိုင်ငံ ရင်းနှီးမှုပိုရှိကြပါကြောင်း၊ မိမိအနေဖြင့် နှစ်နိုင်ငံ ပြည်သူများအကြား ထိတွေ့ရင်းနှီးမှုများ ပိုမိုများပြားလာ ခဲ့သည်ဟု ယုံကြည်ပါကြောင်း၊ တစ်ဆက်တည်းအနေဖြင့် သမ္မတ မွန်ဂျေအင်းက ကိုရီးယားကျွန်းဆွယ် တည်ငြိမ် အေးချမ်းရေးအတွက် အားထုတ်ကြိုးပမ်းမှုများအား ချီးကျူးအားပေးမှုပြုပါကြောင်း၊ ကိုရီးယားကျွန်းဆွယ် ငြိမ်းချမ်းရေးသည် ကိုရီးယားတစ်နိုင်ငံတည်းအတွက် အရေးပါသော ကိစ္စမဟုတ်ပါကြောင်း၊ ဒေသတွင်းနိုင်ငံများ အတွက်သာမက ကမ္ဘာ့နိုင်ငံများအတွက် အရေးပါ ပါကြောင်း၊ နှစ်ဖက်အကြား နားလည်မှုတည်ဆောက်ခြင်း နှင့် ညှိနှိုင်းဆောင်ရွက်ခြင်းအားဖြင့် အားထုတ်လုပ်ကိုင် သွားရမည့် ဥပမာကောင်းတစ်ရပ်ပင် ဖြစ်ပါကြောင်း။

သမ္မတ မွန်ဂျေအင်းနှင့် သမ္မတ ဦးဝင်းမြင့်တို့အနေဖြင့် ယနေ့ အောင်မြင်သောဆွေးနွေးပွဲတစ်ခု ပြုလုပ်ခဲ့ပါ ကြောင်း၊ ထို့ပြင် နှစ်နိုင်ငံဆွေးနွေးပွဲ၌ ကိစ္စရပ်များစွာကို ကျယ်ကျယ်ပြန့်ပြန့် ဆွေးနွေးနိုင်ခဲ့ပါကြောင်း၊ နားလည်မှု စာချွန်လွှာ (၆)ခုအား လက်မှတ်ရေးထိုးနိုင်ခဲ့ပြီး ယင်းစာချွန်လွှာများသည် နှစ်နိုင်ငံအကြား ပူးပေါင်း ဆောင်ရွက်မှုများ ပိုမိုမြှင့်တင်သွားနိုင်ရန်အတွက် အခြေခံ အုတ်မြစ်ပင် ဖြစ်ပါကြောင်း၊ မိမိတို့နှစ်နိုင်ငံအကြား ပြည်သူအချင်းချင်း ထိတွေ့ဆက်နွှယ်မှုသည်လည်း အရေးကြီးပါကြောင်း၊ ယခုခရီးစဉ်နှင့်ဆက်စပ်၍ နှစ်နိုင်ငံ ပြည်သူများအကြား ကူးလူးဆက်ဆံမှု တိုးမြှင့်ရေး ဆောင်ရွက်သွားလိုပါကြောင်း။

ရင်းနှီးမြှုပ်နှံမှုတိုးတက်ရေးကြိုးပမ်း

ပြည်သူများအကြား ထိတွေ့မှု မြင့်တက်လာရေး အတွက် ခရီးသွားလာမှုကဏ္ဍ၊ ပညာရေးကဏ္ဍ၊ ယဉ်ကျေးမှု ကဏ္ဍများမှတစ်ဆင့် တိုးမြှင့်လုပ်ဆောင်သွားနိုင်ပါ ကြောင်း၊ ခရီးသွားကဏ္ဍနှင့်ပတ်သက်၍ ကိုရီးယားနိုင်ငံသား ခရီးသွားများအား ပြည်ဝင်ဗီဇာကင်းလွတ်ခွင့် ပေးအပ် ထားပါကြောင်း၊ ပညာရေးကဏ္ဍတွင် ပူးပေါင်းဆောင်ရွက် ခြင်းသည် မိမိတို့နိုင်ငံမှ အကောင်အထည်ဖော်လျက်ရှိ သည့် နိုင်ငံဖွံ့ဖြိုးတိုးတက်မှုနှင့် လူငယ်လူရွယ်များ စွမ်းရည် မြှင့်တင်ရေးအတွက် များစွာအကျိုးပြုပါကြောင်း၊ ယဉ်ကျေးမှုကဏ္ဍတွင် မြန်မာလူမျိုးများသည် ကိုရီးယား နိုင်ငံ၏ ယဉ်ကျေးမှု၊ ကိုရီးယားသမ္မတနိုင်ငံ၏ ဇာတ်လမ်း တွဲများနှင့် ရင်းနှီးနေပြီဟု ဆိုနိုင်ပါကြောင်း၊ ကိုရီးယား လူမျိုးများကို မြန်မာနိုင်ငံ၏ယဉ်ကျေးမှုနှင့် ရင်းနှီးအောင် ဆောင်ရွက်ရမည် ဖြစ်ပါကြောင်း၊ မိမိတို့နှစ်နိုင်ငံအကြား ကုန်သွယ်မှုမှာ မြင့်တက်လျက်ရှိပြီး မိမိတို့အနေဖြင့် ကိုရီးယားနိုင်ငံမှ ရင်းနှီးမြှုပ်နှံမှုတိုးတက်ရေးအတွက် အစဉ်ကြိုးပမ်းလျက်ရှိပါကြောင်း ပြောကြားသည်။

ဆက်လက်၍ ကိုရီးယားသမ္မတနိုင်ငံ သမ္မတ မစ္စတာ မွန်ဂျေအင်းက ပြီးခဲ့သည့်လအတွင်း မွန်ပြည်နယ်အတွင်း ရေလွှမ်းမိုးမှုကြောင့် အသက်အိုးအိမ်စည်းစိမ်များ ပျက်စီး ဆုံးရှုံးခဲ့ရခြင်းအတွက် မိမိအနေဖြင့် စိတ်မကောင်းဖြစ်ရ ကြောင်းကို ပြောကြားလိုပါကြောင်း၊ သမ္မတကြီး ဦးဝင်းမြင့် နှင့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တို့အနေဖြင့် ထိုသို့ခက်ခဲသောအချိန်၌ မိမိနှင့် မိမိ ဦးဆောင်သည့်ကိုယ်စားလှယ်အဖွဲ့အား နွေးထွေးစွာကြိုဆို ပေးသည့်အတွက် ကျေးဇူးတင်ရှိပါကြောင်း၊ ကိုရီးယား သမ္မတနိုင်ငံအနေဖြင့် မြန်မာနိုင်ငံမှ အကူအညီများ ရရှိခဲ့ဖူးပါကြောင်း၊ ကိုရီးယားစစ်ပွဲအတွင်း မြန်မာနိုင်ငံမှ အမေရိကန်ဒေါ်လာ ၅၀၀၀၀ တန်ဖိုးရှိ ဆန်များအား လှူဒါန်းခဲ့သည့်အတွက် ကိုရီးယားစစ်ပွဲဒဏ် ခံစားနေရ သည့် ပြည်သူများအနေဖြင့် မြန်မာနိုင်ငံ၏ အကူအညီ ကြောင့် နွေးထွေးမှုကိုခံစားခဲ့ရပါကြောင်း၊ မြန်မာနိုင်ငံနှင့် နိုင်ငံတကာအသိုက်အဝန်း၏ အကူအညီများကြောင့် ကိုရီးယားနိုင်ငံသည် အဆိုပါခက်ခဲသည့် အချိန်ကာလကို ကျော်ဖြတ်နိုင်ခဲ့ပါကြောင်း။

နှစ်နိုင်ငံဆက်ဆံရေးကို ပိုမိုတိုးမြှင့်သွားရေးဆွေးနွေး

ယခုအချိန်တွင် ကိုရီးယားလူမျိုးများသည် မိတ်ဆွေ ဟူသည့် စိတ်ဓာတ်ကိုအခြေခံပြီး မြန်မာနိုင်ငံအား အကူ အညီများ ပြန်လည်ပေးအပ်လိုပါကြောင်း၊ ယနေ့ မိမိနှင့် နိုင်ငံတော်၏အတိုင်ပင်ခံပုဂ္ဂိုလ်တို့သည် စီးပွားရေး၊ ယဉ်ကျေးမှုနှင့် ဖွံ့ဖြိုးတိုးတက်မှု စသည့်နယ်ပယ်များစွာတွင် ပူးပေါင်းဆောင်ရွက်မှုများ ပြုလုပ်ရန်နှင့် နှစ်နိုင်ငံပြည်သူ များအကြားဆက်ဆံရေးကို ပိုမိုတိုးမြှင့်သွားရေးတို့ကို ဆွေးနွေးခဲ့ကြပါကြောင်း၊ မိမိတို့နှစ်ဦးသည် သာယာ၀ပြော သည့် အနာဂတ်ဆက်ဆံရေး တည်ဆောက်နိုင်ရန်အတွက် ဆွေးနွေးခဲ့ကြပါကြောင်း။

မြန်မာနိုင်ငံ၏ စဉ်ဆက်မပြတ်ဖွံ့ဖြိုးတိုးတက်ရေး အစီအစဉ်နှင့် ကိုရီးယားသမ္မတနိုင်ငံ၏ တောင်ပိုင်းဆိုင်ရာ မူဝါသစ်တို့တွင်ပါဝင်သည့် ပြည်သူ၊ ငြိမ်းချမ်းရေးနှင့် သာယာ၀ပြောရေးကို အခြေခံပြီး မတူညီသည့်နယ်ပယ် များတွင် တူညီချက်များရှာဖွေနိုင်ရေးကို ဆွေးနွေးခဲ့ပါ ကြောင်း၊ အဆိုပါဆွေးနွေးချက်တွင် မိမိတို့အနေဖြင့် အချက်(၃)ကို သဘောတူညီခဲ့ကြပါကြောင်း၊ ပထမ အနေဖြင့် နှစ်နိုင်ငံအကြား စီးပွားရေးပူးပေါင်းဆောင်ရွက်မှု မြှင့်တင်နိုင်ရန်အတွက် အခြေခံအဆောက်အအုံနှင့် အဖွဲ့အစည်းများ ဖွံ့ဖြိုးတိုးတက်ရေးဖြစ်ပါကြောင်း၊ ကိုရီးယား-မြန်မာစက်မှုဇုန် (Korea-Myanmar Industrial Complex) စီမံကိန်းမှာ မိမိတို့ နှစ်နိုင်ငံ အကြား အထင်ကရဖြစ်သည့်စီမံကိန်းဖြစ်ပါကြောင်း၊ ကိုရီးယားသမ္မတနိုင်ငံမှ စီးပွားရေးသမားများအား အဆိုပါ စက်မှုဇုန်တွင် ရင်းနှီးမြှုပ်နှံရန် တိုက်တွန်းလုပ်ဆောင်ပြီး၊ ကိုရီးယား-မြန်မာစက်မှုဇုန်တွင် မိမိတို့ပါဝင်မှုကို မြှင့်တင် သွားမည်ဖြစ်ပါကြောင်း၊ မြန်မာနိုင်ငံအစိုးရ၏ ကျေးဇူးဖြင့် ကိုရီးယား-မြန်မာစက်မှုဇုန်တွင် One-stop Service Center ကို တည်ထောင်သွားမည် ဖြစ်ပါကြောင်း၊ အဆိုပါ One-stop Service Center မှာ ကိုရီးယားနိုင်ငံသားများ မြန်မာနိုင်ငံ၏ဈေးကွက်ကိုနားလည်ပြီး ရင်းနှီးမြှုပ်နှံမှု ပိုမိုတိုးတက်စေရေးအတွက် အထောက်အကူပြုသွားမည် ဖြစ်ပါကြောင်း။

အတွေ့အကြုံကောင်းများ မျှဝေသွားမည်

ပြီးခဲ့သည့်ဇူလိုင်လအတွင်း မြန်မာနိုင်ငံမှ ပုဂံမြို့နှင့် ကိုရီးယားသမ္မတနိုင်ငံ၏ နီယို-ကွန်ဖြူးရှန်း သင်တန်း ကျောင်းတို့အား UNESCO မှ ကမ္ဘာ့ယဉ်ကျေးမှု အမွေ အနှစ်စာရင်းတွင် ထည့်သွင်းခဲ့ပါကြောင်း၊ မိမိ၏ ယခု မြန်မာနိုင်ငံခရီးစဉ်အတွင်း မြန်မာနိုင်ငံတွင် လာရောက် လုပ်ကိုင်လျက်ရှိသည့် ကိုရီးယားနိုင်ငံသား ရင်းနှီးမြှုပ်နှံသူ များ ရင်ဆိုင်ကြုံတွေ့နေရသည့် အခက်အခဲများ လျော့နည်း နိုင်စေရန် ရည်ရွယ်၍ မြန်မာနိုင်ငံတွင် Korea Desk တည်ထောင်ဖွင့်လှစ်ရေးအတွက် နားလည်မှုစာချွန်လွှာ ကိုလည်း ရေးထိုးနိုင်ခဲ့ပါကြောင်း၊ နှစ်နိုင်ငံအကြား နှစ်ဖက် အကျိုးစီးပွားဖြစ်ထွန်းစေမည့် ဖွံ့ဖြိုးတိုးတက်ရေးဆိုင်ရာ ကဏ္ဍတွင် ပူးပေါင်းဆောင်ရွက်မှုများကို တက်ကြွစွာ ဆက်လက်ဆောင်ရွက်သွားရန် သဘောတူညီခဲ့ပါကြောင်း၊ ကိုရီးယားသမ္မတနိုင်ငံအနေဖြင့် မြန်မာနိုင်ငံအတွက် စီးပွားရေးဖွံ့ဖြိုးတိုးတက်ရေးဆိုင်ရာ ပူးပေါင်းဆောင်ရွက်မှု ရန်ပုံငွေမှ အမေရိကန်ဒေါ်လာ သန်း ၁၀၀၀ ချေးငွေ ပေးအပ်သွားမည်ဖြစ်ကြောင်း၊ Myanmar Develop-ment Institute (MDI)နှင့် Myanmar Trade Promotion Organization တို့သို့လည်း စီးပွားရေးဖွံ့ဖြိုးတိုးတက်မှုဆိုင်ရာ ကိစ္စရပ်များနှင့်ပတ်သက်၍လည်း ကိုရီးယားနိုင်ငံ၏ အတွေ့အကြုံကောင်းများကို ဆက်လက် မျှဝေသွားမည်ဖြစ်ပါကြောင်း။

အမြင်ချင်းဖလှယ်

နှစ်နိုင်ငံအကြား ပူးပေါင်းဆောင်ရွက်မှုများဖြစ် သည့် ပတ်ဝန်းကျင်ထိန်းသိမ်းရေးကဏ္ဍ၊ စိုက်ပျိုးရေးကဏ္ဍ၊ နည်းပညာကဏ္ဍ၊ ပညာရေးကဏ္ဍ စသည်တို့တွင် ဆက်လက်တိုးမြှင့်ဆောင်ရွက်သွားရန် သဘောတူညီခဲ့ ကြပါကြောင်း၊ ဒေသတွင်းတည်ငြိမ်အေးချမ်းရေးနှင့် သာယာ၀ပြောစေရေးတို့အတွက် မိမိတို့ နှစ်နိုင်ငံအကြား နီးကပ်စွာပူးပေါင်းဆောင်ရွက်သွားရန် သဘောတူညီခဲ့ပါ ကြောင်း၊ အခါအခွင့်ကြုံခိုက် မြန်မာနိုင်ငံအစိုးရအနေဖြင့် ကိုရီးယားကျွန်းဆွယ်တွင် တည်ငြိမ်အေးချမ်းရေးဆိုင်ရာ ကိစ္စနှင့်ပတ်သက်၍ Inter-Korea Summit ၊ US-DPRK summit တို့ကဲ့သို့သော တိုးတက်မှုများ ဖြစ်ပေါ် သည့်အခါတိုင်း တက်ကြွစွာထောက်ခံမှုများ အစဉ်ပြသခဲ့ သည့် အပေါ်လည်း ကျေးဇူးတင်ရှိကြောင်းကို ပြောကြားလို ပါကြောင်း၊ ကိုရီးယားကျွန်းဆွယ်တွင် နျူကလီးယား လက်နက်ကင်းစင်ရေးနှင့် ထာ၀ရငြိမ်းချမ်းမှု ရရှိစေရေး အတွက် နိုင်ငံတကာအသိုက်အဝန်းမှလည်း အတူတကွ ပူးပေါင်းပါဝင်ဆောင်ရွက်သွားရမည်ဖြစ်သည်ဟု မိမိနှင့် နိုင်ငံတော်၏အတိုင်ပင်ခံပုဂ္ဂိုလ်တို့ အမြင်ချင်းဖလှယ် ဆွေးနွေးခဲ့ပါကြောင်း။

မြန်မာနိုင်ငံအနေဖြင့်လည်း ငြိမ်းချမ်းရေးကို အလေးပေးဆောင်ရွက်လျက်ရှိရာ တိုင်းရင်းသား လက်နက်ကိုင်အဖွဲ့အစည်းများနှင့် အမျိုးသား ပြန်လည် စည်းလုံးညီညွတ်ရေးအတွက် အလေးပေးဆောင်ရွက် လျက်ရှိသည်ကို တွေ့ရပါကြောင်း၊ ရခိုင်ပြည်နယ် အရေးကိစ္စဖြေရှင်းရေးနှင့်ပတ်သက်၍ နိုင်ငံများအနေဖြင့် အပြန်အလှန် ကူညီဆောင်ရွက်သွားနိုင်မည်ဟု မျှော်လင့် ပါကြောင်း၊ ကိုရီးယားသမ္မတနိုင်ငံ ဘူဆန်မြို့တွင် ယခုနှစ် နိုဝင်ဘာလအတွင်း ကျင်းပမည့် ကိုရီးယား-အာဆီယံ ဆွေးနွေးဖက်ဆက်ဆံရေး နှစ်(၃၀)ပြည့် ထိပ်သီးအစည်း အဝေးနှင့် ကိုရီးယား-မဲခေါင် ထိပ်သီးအစည်းအဝေးတို့ အောင်မြင်စွာကျင်းပနိုင်ရေးအတွက် မြန်မာနိုင်ငံမှလည်း စိတ်အားထက်သန်သည့် ထောက်ခံအားပေးမှု ပြသခဲ့ပါ ကြောင်း။

အောင်မြင်မှုများ အတူတကွရယူ

မိမိတို့နှစ်နိုင်ငံအကြား ဆက်ဆံရေးမှာ ပိုမိုကောင်းမွန် လာသည်နှင့်အမျှ ယခုထက်ပိုမိုသည့် အောင်မြင်မှုများ အတူတကွရယူသွားရန်ရှိပါကြောင်း၊ ယခုဆွေးနွေးပွဲမှာ နှစ်နိုင်ငံဆက်ဆံရေး ပိုမိုတိုးမြှင့်နိုင်ရန် သမိုင်းမှတ်တိုင်သစ် တစ်ခုဖြစ်သကဲ့သို့ လာမည့် ၂၀၂၀ ပြည့်နှစ်တွင် နှစ်နိုင်ငံ သံတမန်ဆက်ဆံရေး (၄၅)နှစ်မြောက် အထိမ်းအမှတ် များကိုလည်း ပူးတွဲကျင်းပသွားမည်ဖြစ်ပါကြောင်း ပြောကြားသည်။

နှစ်နိုင်ငံ ပူးတွဲသတင်းစာရှင်းလင်းပွဲအပြီးတွင် နိုင်ငံတော်၏အတိုင်ပင်ခံပုဂ္ဂိုလ်နှင့် ကိုရီးယားသမ္မတနိုင်ငံ သမ္မတတို့သည် ကိုရီးယားသမ္မတနိုင်ငံမှ ပညာရေးဝန်ကြီး ဌာနသို့ လှူဒါန်းသည့် ကျောင်းကားများကို ကြည့်ရှုကြ သည်။

သတင်းစဉ်