ဒုတိယသမ္မတ ဦးဟင်နရီဗန်ထီးယူ မြန်မာစာရင်းအင်းဖိုရမ်သို့ တက်ရောက်အမှာစကားပြောကြား

နေပြည်တော် နိုဝင်ဘာ ၂

မြန်မာစာရင်းအင်းဖိုရမ် (၂ဝ၁၈)ကို ယနေ့နံနက်ပိုင်းတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်း ဗဟိုဌာန(၂)၌ ကျင်းပရာ စာရင်းအင်း အချက်အလက်မှန်ကန်ရေးနှင့် အရည် အသွေးပြည့်ဝရေးဗဟိုကော်မတီဥက္ကဋ္ဌ ဒုတိယသမ္မတ ဦးဟင်နရီဗန်ထီးယူ တက်ရောက်၍ အဖွင့်အမှာစကား ပြောကြားသည်။

တက်ရောက်

ဖိုရမ်သို့ ပြည်ထောင်စုဝန်ကြီးများ၊ ဒုတိယဝန်ကြီးများ၊ လွှတ်တော် ကိုယ်စားလှယ်များ၊ နေပြည်တော် ကောင်စီဝင်များ၊ တိုင်းဒေသကြီး/ ပြည်နယ်အစိုးရအဖွဲ့များမှ စီမံကိန်း နှင့် ဘဏ္ဍာရေးဝန်ကြီးများ၊ အမြဲတမ်း အတွင်းဝန်များ၊ စာရင်းအင်းဆိုင်ရာ အစိုးရဌာနများမှ ကိုယ်စားလှယ်များ၊ ပညာရှင်များ၊ သုတေသီများ၊ ဖွံ့ဖြိုးမှု မိတ်ဖက်အဖွဲ့အစည်းများမှ တာဝန် ရှိသူများ တက်ရောက်ကြသည်။

ဖိုရမ်တွင် ဒုတိယသမ္မတက ကမ္ဘာ့ နိုင်ငံအသီးသီးတွင် အောက်တိုဘာ ၂ဝ ရက်ကို ကမ္ဘာ့စာရင်းအင်းနေ့အဖြစ်
သတ်မှတ်၍World Statistics Day ကို ငါးနှစ်တစ်ကြိမ် ကျင်းပလျက်ရှိရာ မြန်မာနိုင်ငံတွင် ၂ဝ၁၅ ခုနှစ်က ကျင်းပခဲ့ပါကြောင်း၊ ယနေ့ကျင်းပသည့် ဖိုရမ်ကို "Better Data, Better Statistics, Better Lives: Transforming Data Culture in Myanmar"ဆိုသည့် ဆောင်ပုဒ်ဖြင့် ကျင်းပခြင်းဖြစ်ပြီး မြန်မာနိုင်ငံတွင် စာရင်းအင်းပညာ (Statistics Literacy) တိုးမြှင့်စေရန်၊ စာရင်းအချက်အလက် ယဉ်ကျေးမှု (Data Culture)များ ပြန့်ပွားစေရန်၊ ၂ဝ၁၈ ခုနှစ် ဇန်နဝါရီလတွင် ပြဋ္ဌာန်းလိုက်သည့် စာရင်းအင်းဥပဒေအရ စာရင်းအင်းပညာရပ်အား မြှင့်တင်ရန်၊ စာရင်းအင်းထုတ်ဝေသူများနှင့် အသုံးပြု သူများအကြား ဆက်ဆံရေးမြှင့်တင်ရန်၊ စာရင်းအင်းအသုံးပြုသူများ၏ လိုအပ် ချက်များကို သိရှိစေရန်၊ စာရင်းအင်းဆိုင်ရာ စာတမ်းဖတ်ပွဲဆောင်ရွက်ရန်၊ ကျောင်းသားလူငယ်များအကြား စာရင်းအင်းကဏ္ဍ မြှင့်တင်ရေးအတွက် Statistics Quiz များ ဆောင်ရွက်ရန်အတွက် ရည်ရွယ်ကျင်းပခြင်းဖြစ်ပါ ကြောင်း။

ပြုစုပျိုးထောင်

စာရင်းအင်းအချက်အလက် မှန်ကန်ရေးကိစ္စသည် ဖွံ့ဖြိုးပြီးနိုင်ငံများနှင့် ဖွံ့ဖြိုးဆဲ နိုင်ငံများအတွက် အလွန်အရေးပါပါကြောင်း၊ နိုင်ငံတစ်နိုင်ငံ၏ အမျိုးသားစာရင်းအင်းစနစ် အရည်အသွေးပြည့်ဝမှသာ မူဝါဒချမှတ်သူများ၊ စီမံကိန်းရေးဆွဲသူများ၊ လူမှုစီးပွား သုတေသနဆောင်ရွက်သူများအနေဖြင့် စီမံကိန်းများရေးဆွဲခြင်း၊ ဖွံ့ဖြိုးမှု မူဝါဒများနှင့် စီးပွားရေးဝန်းကျင်ကောင်းများကို ဖန်တီးနိုင်မည့် မူဝါဒများချမှတ်ရာတွင် ထည့်သွင်းစဉ်းစားရန် အချက်အလက် များ ရရှိနိုင်မည်ဖြစ်ပြီး ရှားပါးသည့် သယံဇာတများကို အကျိုးရှိရှိ ထိရောက် သည့် ခွဲဝေမှုများ ဆောင်ရွက်နိုင်မည်ဖြစ်ပါကြောင်း၊ ထို့ပြင် စီမံကိန်းများကို စောင့်ကြည့်ကြီးကြပ်ခြင်းများကိုလည်း ဆောင်ရွက်နိုင်မည်ဖြစ်ပြီး မူဝါဒများ ပြင်ဆင်ရန် လိုအပ်လာလျှင်လည်း ပိုမိုကောင်းမွန်သည့် ပြန်လည်ပြင်ဆင်မှုများ ဆောင်ရွက်နိုင်မည်ဖြစ်ပါကြောင်း၊ စီးပွားရေးလုပ်ငန်းရှင်များအနေဖြင့်လည်း စာရင်းအင်းအချက်အလက်များအပေါ်အခြေခံပြီး ရင်းနှီးမြှုပ်နှံမှုများကို ဆောင်ရွက်မှသာ အရှုံးဖြစ်ပေါ်နိုင်မှုနှင့် စွန့်စားရမှု (Risk Management) တို့ကို စီမံခန့်ခွဲနိုင်မည်ဖြစ်ပါကြောင်း။

စိတ်ချယုံကြည် ကိုးစားရသည့် စာရင်းအင်းများမရှိခြင်းသည် ရှားပါးသည့် သယံဇာတခွဲဝေရာတွင် လွဲမှားစေနိုင်သည့်အပြင် မူဝါဒဆုံးဖြတ်ချက်များလည်း မှားယွင်းစေနိုင်သည့်အတွက် ပြည်သူများ၏ လူမှုရေးနှင့်စီးပွားရေး ဖွံ့ဖြိုး တိုးတက်မှုအပေါ် သက်ရောက်မှုများ ဖြစ်ပေါ်စေနိုင်ပါကြောင်း၊ ထို့ကြောင့် စာရင်းအင်းအချက်အလက်များ မှန်ကန်စေရေးအတွက် လိုအပ်သည့် လူသား ရင်းမြစ် ပြုစုပျိုးထောင်ခြင်း၊ ကွန်ရက်များ တည်ဆောက်ခြင်း၊ ပူးပေါင်းဆောင် ရွက်ရေးယန္တရားများနှင့် Statistics Literacy ကို မူဝါဒအားဖြင့် အထူးအာရုံ စိုက်ခြင်း၊ စာရင်းအင်းဥပဒေပြဋ္ဌာန်းသက်ရောက်မှုရှိစေခြင်း စသည့် အရင်း အနှီးများ စိုက်ထုတ်ဆောင်ရွက်ရန် လိုအပ်ပါကြောင်း။

အားပေးဆောင်ရွက်

စာရင်းအင်းကဏ္ဍ ဖွံ့ဖြိုးတိုးတက်မှုအနေဖြင့် စာရင်းအင်းဥပဒေကို ၂ဝ၁၈ ခုနှစ် ဇန်နဝါရီ ၂၂ ရက်တွင် ပြည်ထောင်စုလွှတ်တော်ဥပဒေအမှတ် ၁/၂ဝ၁၈ ဖြင့် ပြဋ္ဌာန်းခဲ့ပြီးဖြစ်ပါကြောင်း၊ ဗဟိုစာရင်းအင်းအဖွဲ့က မကြာမီ နည်းဥပဒေထွက်ရှိနိုင်အောင် ဆောင်ရွက်လျက်ရှိပါကြောင်း။

စာရင်းအင်းဥပဒေအရ စာရင်းအင်းမူဝါဒအနှစ်ချုပ် (Statistical Policy Brief)နှင့် စာရင်းအင်းဆိုင်ရာ ဖွံ့ဖြိုးမှုအမျိုးသားအဆင့် မဟာဗျူဟာ (National Strategy for Development of Statistics-NSDS)ကို ရေးဆွဲအကောင်အထည် ဖော်ဆောင်ရန် အဓိကမဟာဗျူဟာမူဘောင် (NSDS Core Strategies)ကို ၂ဝ၁၆ ခုနှစ်တွင် စီးပွားရေးရာကော်မတီသို့ အတည်ပြု တင်ပြခဲ့ပြီးဖြစ်ပါကြောင်း၊ နိုင်ငံတော်၏အတိုင်ပင်ခံပုဂ္ဂိုလ်က စာရင်းအင်း အချက်အလက်မှန်ကန်ရေးနှင့် အရည်အသွေးပြည့်ဝရေးသည် မိမိတို့နိုင်ငံ အတွက် အရေးကြီးကြောင်းနှင့် စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ အကောင်အထည်ဖော်ရေးကို အားပေးဆောင်ရွက်ရမည်ဟု စီးပွားရေးရာ ကော်မတီအစည်းအဝေးတွင် လမ်းညွှန်ဆွေးနွေးခဲ့ပါကြောင်း။

စာရင်းအင်းကဏ္ဍတိုးတက်ရေးကို ဆောင်ရွက်ရာတွင် ဝန်ကြီးဌာနများ အကြား အလျားလိုက်ပူးပေါင်းဆောင်ရွက်မှု (Horizontal Cooperation)နှင့် ဒေါင်လိုက်ပူးပေါင်းဆောင်ရွက်မှု (Vertical Cooperation)များကို ဆောင်ရွက်ရန်လိုအပ်ပါကြောင်း၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာကို ပူးပေါင်းအကောင်အထည်ဖော်ဆောင်နိုင်ရန် အလျားလိုက် ပူးပေါင်းဆောင်ရွက်မှုအနေဖြင့် စာရင်းအင်းကဏ္ဍများအလိုက် လုပ်ငန်းအဖွဲ့ ၁ဝ ဖွဲ့ ဖွဲ့စည်းဆောင်ရွက်လျက်ရှိပါကြောင်း၊ ယခုဆိုလျှင် သက်ဆိုင်ရာ လုပ်ငန်းအဖွဲ့များနှင့် NSDS Action Plan ကိုLiving Document အနေဖြင့် ထားရှိပြီး အသီးသီးအကောင်အထည်ဖော်ဆောင်လျက် ရှိကြပါကြောင်း၊ သက်ဆိုင်ရာStakeholders များအနေဖြင့်လည်း စာရင်းအင်းကဏ္ဍ ပိုမိုဖွံ့ဖြိုး တိုးတက်လာစေရေးအတွက် ပူးပေါင်းပါဝင်ဆောင်ရွက်ကြရန် ဖိတ်ခေါ်အပ်ပါ ကြောင်း၊ စာရင်းအင်းကဏ္ဍ ဖွံ့ဖြိုးတိုးတက်ရေးအတွက် ကူညီဆောင်ရွက်လျက် ရှိသည့် ဖွံ့ဖြိုးမှုမိတ်ဖက်အဖွဲ့အစည်းများကို ကျေးဇူးတင်ပါကြောင်း။

စာရင်းအင်းကဏ္ဍ ဖွံ့ဖြိုးတိုးတက်စေရေးအတွက် သက်ဆိုင်ရာဌာနများ အကြားData Culture မွေးမြူရန်နှင့်တိုးတက်ပွားများအောင် ဆောင်ရွက် သွားရန် လိုအပ်ပါကြောင်း၊ ထို့ပြင် သက်ဆိုင်ရာ စာရင်းအင်းဌာနများအကြား သက်ဆိုင်ရာ တိုင်းဒေသကြီးနှင့် ပြည်နယ်အဆင့်များတွင်လည်း ကော်မတီများ ဖွဲ့စည်း၍ တိုင်းဒေသကြီးနှင့် ပြည်နယ်အစိုးရများ၏ ဝန်ကြီးချုပ်များက နာယကအဖြစ်၊ စီမံကိန်းနှင့် ဘဏ္ဍာရေးဝန်ကြီးများက ဥက္ကဋ္ဌအဖြစ် ဦးဆောင် ပြီး စာရင်းအင်းမှန်ကန်စေရေး၊ အုပ်ချုပ်မှုမှတ်တမ်းများ ကောင်းမွန်စေရေး၊ စာရင်းအင်းပုံစံ၊ အထားအသို ညီညွတ်မှန်ကန်စေရေးတို့အတွက် ဗဟိုနှင့် ပေါင်းစပ်ညှိနှိုင်းသည့် ဒေါင်လိုက်ပူးပေါင်းမှုကို စတင်ဆောင်ရွက်နေပြီဟု သိရှိရပါကြောင်း၊ ဗဟိုစာရင်းအင်းအဖွဲ့အနေဖြင့်လည်း One Stop Data Hub ဖြစ်ပေါ်စေရေး ဆောင်ရွက်လျက်ရှိပါကြောင်း။

ထိရောက်မှန်ကန်

စာရင်းအင်းအချက်အလက်များ ပိုမိုကောင်းမွန်လာသည်နှင့်အမျှ လူနေမှု ဘဝများ ပိုမိုကောင်းမွန်လာသည့်အတွက် စာရင်းအင်းရလဒ်များကို ထိရောက် မှန်ကန်စွာ ထုတ်ပြန်နိုင်စေရန် သက်ဆိုင်ရာဝန်ကြီးဌာနများ၊ စာရင်းအင်းဆိုင်ရာ အချက်အလက် ထုတ်ပြန်သူများနှင့် အချက်အလက်သုံးစွဲသူများအကြား လိုအပ်သလို ပူးပေါင်းဆောင်ရွက်ရမည်ဖြစ်ပါကြောင်း၊Statistics User-Provider Relations တိုးတက်ကောင်းမွန်စေရေး ချိတ်ဆက်ဆောင်ရွက်ရန် လိုအပ်ပါကြောင်း။

နိုင်ငံဖွံ့ဖြိုးတိုးတက်ရန် အခြေခံဖြစ်သည့် စာရင်းအင်းများ ရှေ့နောက် ညီညွတ်မှုရှိစေရန်၊ အချိန်မီရရှိစေရန်၊ ယုံကြည်ကိုးစားနိုင်ပြီး ခိုင်မာသည့် စာရင်းအင်းများဖြစ်စေရန် လိုအပ်ပါကြောင်း၊ သို့မှသာ နိုင်ငံတော်၏ လက်ရှိ ဖြစ်ပေါ်နေသည့် စီးပွားရေး၊ လူမှုရေးအခြေအနေများကို ထင်ဟပ်နိုင်သည့် စာရင်းအင်းအချက်အလက်ကောင်းများ ပေါ်ထွက်လာနိုင်မည်ဖြစ်ပါကြောင်း၊ ပြည်သူများ၏ လိုအပ်ချက်များကို ဖြည့်ဆည်းပေးရန် လက်တွေ့ကျသည့် မူဝါဒများကို ခိုင်မာအောင် ဆောင်ရွက်သည့်နေရာတွင်လည်း အရည်အသွေးရှိ သည့် စာရင်းအင်းများသည် မရှိမဖြစ်အရေးပါပြီး ဖွံ့ဖြိုးတိုးတက်ရန် လိုအပ်နေ သည့်ကဏ္ဍများ၊ နေရာဒေသများ၊ ဦးစားပေးများအဖြစ် ရှာဖွေဖော်ထုတ်ရန် အတွက်လည်း စာရင်းအင်းများသည် အလွန်အရေးပါပါကြောင်း၊ "Better Data, Better Statistics, Better Lives"ဆိုသည့်အတိုင်း စာရင်းအင်း အချက်အလက်များ ပိုမိုအရည်အသွေးမြင့်ပါမှ ပြည်သူတို့၏ လူမှုဘဝများ ပိုမိုအဆင့်အတန်း မြင့်လာမည်ဖြစ်ပါကြောင်း။

''စာရင်းဇယားကိန်းဂဏန်းများ တိကျမှန်ကန်ရေး''အတွက် လူမှု-စီးပွားရေးဆိုင်ရာ အချက်အလက်များကိုပြည့်စုံအောင် ဆောင်ရွက်ရမည်ဖြစ်ပြီး ပြည့်စုံရန်အတွက်လည်း အချက်အလက်များကို စုစည်းခြင်း၊ ပြုစုခြင်း၊ ခွဲခြား ဆန်းစစ်ခြင်း၊ အစီရင်ခံခြင်း စသည့်လုပ်ငန်းစဉ်များကို ထိရောက်ပြီး စွမ်းဆောင် ရည်ပြည့်ဝစွာ ဆောင်ရွက်သွားရန် လိုအပ်ပါကြောင်း။

စာရင်းအင်းအချက်အလက် မှန်ကန်ရေးနှင့် အရည်အသွေး ပြည့်ဝရေး သည် အစိုးရနှင့် ပြည်သူများအကြား၊ နိုင်ငံတကာ အသိုင်းအဝိုင်းများအကြား ယုံကြည်မှု တိုးမြှင့်စေနိုင်ပါကြောင်း၊ စာရင်းအင်းနယ်ပယ် ဖွံ့ဖြိုးတိုးတက်စေ ရေးအတွက် စစ်တမ်း (Survey)များ ကောက်ခံရန်လိုအပ်ပြီး ဌာနဆိုင်ရာများ၏ အုပ်ချုပ်မှု မှတ်တမ်းများ ပြည့်စုံမှန်ကန်စေရေး၊ အသေးစိတ်အချက်အလက်များပါ မှတ်တမ်းများတွင် ပါဝင်စေနိုင်ရေးသည် အရေးပါပါကြောင်း။

စာရင်းအင်းနှင့် ဆန်းစစ်လေ့လာမှုများ ဆောင်ရွက်တတ်စေရန် စာရင်းအင်းဆိုင်ရာအသိပညာ (Statistical Literacy)ကို ဌာနဆိုင်ရာများတွင် သာမက အများပြည်သူနှင့် ပုဂ္ဂလိကစီးပွားရေးအဖွဲ့အစည်းများ အကြားတွင်ပါ ပျံ့နှံ့အောင် ဆောင်ရွက်ကြရမည်ဖြစ်ပါကြောင်း၊ မိမိတို့နိုင်ငံသည် ဖွံ့ဖြိုးဆဲ နိုင်ငံဖြစ်သည့်အတွက် စာရင်းအင်းဆိုင်ရာ ရင်းနှီးမြှုပ်နှံမှုကို အချိန်၊ ငွေကြေး၊ လူအင်အား စသည့်ရင်းမြစ်များ ကန့်သတ်ချက်ရှိသည့် ကြားက တတ်နိုင်သမျှ ရင်းနှီးမြှုပ်နှံပြီး အထိရောက်ဆုံး အသုံးချနိုင်ရန် အရေးကြီးပါကြောင်း၊ “င်္From Data to Policy ” ဆိုသည့်အတိုင်း အချက်အလက်များကို မူဝါဒအဖြစ် ပြောင်းလဲ နိုင်ခြင်းကြောင့် ဖော်ထုတ်သုံးတတ်လျှင် စာရင်းအင်းဆိုင်ရာ ရင်းနှီးမြှုပ်နှံမှု၏ ရလဒ်ပြန်လည် ရရှိချက်သည် အလွန်ကြီးမားသည့်အတွက် Better Data, Better Statistics, Better Lives: Transforming Data Culture in Myanmar"ဆိုသည့် ဆောင်ပုဒ်နှင့်အတူ စာရင်းအင်းမှန်ကန်ရေးနှင့် အရည်အသွေးပြည့်ဝရေး ဗဟိုကော်မတီအဖွဲ့ဝင်များ၊ ဖွံ့ဖြိုးမှု မိတ်ဖက်အဖွဲ့အစည်းများ၊ လုပ်ငန်းအဖွဲ့များ၊Stakeholder များအနေဖြင့် တက်ကြွစွာ ပါဝင်ဆောင်ရွက်ကြရန် တိုက်တွန်းပါကြောင်း ပြောကြားသည်။

ယင်းနောက် စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီ ဒုတိယဥက္ကဋ္ဌ ပြည်ထောင်စုဝန်ကြီး ဦးစိုးဝင်းနှင့် ကုလသမဂ္ဂလူဦးရေ ရန်ပုံငွေ အဖွဲ့မှMs. Janet Jackson တို့က ကြိုဆိုနှုတ်ခွန်းဆက်စကားပြောကြားကြပြီး ကုလသမဂ္ဂ အာရှပစိဖိတ်စီးပွားရေးနှင့် လူမှုရေးကော်မရှင်မှ Ms. Gemma က စာရင်းအင်းနှင့်ပတ်သက်၍ အဓိကဆောင်ရွက်ရမည့်အချက်များကို ရှင်းလင်းပြောကြားသည်။

ထို့နောက် ဒုတိယသမ္မတက ကမ္ဘာ့စာရင်းအင်းနေ့အထိမ်းအမှတ် စာရင်းအင်းဆိုင်ရာ သုတဥာဏ်စမ်းပြိုင်ပွဲတွင် ပထမဆုရရှိခဲ့သည့် ရန်ကုန်စီးပွားရေးတက္ကသိုလ်မှ ကျောင်းသား ကျောင်းသူအဖွဲ့အား ဂုဏ်ပြုဆုပေးအပ်ချီးမြှင့်သည်။

ဆက်လက်၍ ပြည်ထောင်စုဝန်ကြီး ဦးကျော်တင်နှင့်Ms. Janet Jackson တို့က ဒုတိယဆုနှင့် တတိယဆုရရှိကြသည့် ကျောင်းသား ကျောင်းသူအဖွဲ့အား ဂုဏ်ပြုဆုများ ပေးအပ်ချီးမြှင့်သည်။

ယင်းနောက် မြန်မာနိုင်ငံ၏ စာရင်းဆိုင်ရာကဏ္ဍ ဖွံ့ဖြိုးတိုးတက်မှုမှတ်တမ်းကို Video Clip ဖြင့် ပြသသည်။

ထို့နောက် ဒုတိယသမ္မတသည် အခမ်းအနားသို့ တက်ရောက်လာသူများနှင့် စုပေါင်း မှတ်တမ်းတင်ဓာတ်ပုံရိုက်သည်။

အခမ်းအနားအပြီးတွင် ဒုတိယသမ္မတသည် စာရင်းအင်းဆိုင်ရာ ဆောင်ရွက်ချက် ဓာတ်ပုံမှတ်တမ်းများ၊ စာအုပ်စာတမ်းများ ခင်းကျင်းပြသထားသည့် ပြခန်းကို လှည့်လည် ကြည့်ရှုသည်။

ထို့နောက် မြန်မာစာရင်းအင်းဖိုရမ်ကို ဆက်လက်ကျင်းပရာ စာရင်းအင်းပညာ အသိပညာပေးမြှင့်တင်ခြင်း၊ Round Table Discussion ပြုလုပ်ခြင်း၊ စာရင်းအင်းဆိုင်ရာ စာတမ်း ၁၅ စောင် ဖတ်ကြားခြင်း၊ မြန်မာနိုင်ငံစာရင်းအင်းဝန်ဆောင်မှုစနစ်(MMSIS) ပြသခြင်းတို့ကို ဆောင်ရွက်ကြသည်။

သတင်းစဉ်