နေပြည်တော် နိုဝင်ဘာ ၁
နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးမြင့်သူ ခေါင်းဆောင်သည့် ကိုယ်စားလှယ်အဖွဲ့သည် ဘင်္ဂလား ဒေ့ရ်ှနိုင်ငံသို့ ရောက်ရှိနေသော နေရပ်စွန့်ခွာသူများ ပြန်လည်ခေါ်ယူရေးဆိုင်ရာ မြန်မာ-ဘင်္ဂလားဒေ့ရှ် တတိယ အကြိမ်မြောက် ပူးတွဲလုပ်ငန်းအဖွဲ့အစည်းအဝေးသို့ တက်ရောက်ရန် အောက်တိုဘာ ၂၉ ရက်မှ ၃၁ ရက်အထိ ဘင်္ဂလားဒေ့ရ်ှနိုင်ငံ ဒါကာမြို့သို့ သွားရောက်ခဲ့ပြီး အဆိုပါ ကိုယ်စားလှယ်အဖွဲ့တွင် သက်ဆိုင်ရာ ဝန်ကြီးဌာနများနှင့် ရခိုင်ပြည်နယ်အစိုးရအဖွဲ့မှ ကိုယ်စားလှယ်များ လိုက်ပါ သွားကြသည်။
တတိယအကြိမ် ပူးတွဲလုပ်ငန်းအဖွဲ့အစည်းအဝေးကို အောက်တိုဘာ ၃ဝ ရက်တွင် ဘင်္ဂလားဒေ့ရ်ှနိုင်ငံ အစိုးရ ဧည့်ဂေဟာ၌ ကျင်းပရာ အမြဲတမ်းအတွင်းဝန် ဦးမြင့်သူ နှင့် ဘင်္ဂလားဒေ့ရ်ှနိုင်ငံ နိုင်ငံခြားရေးဝန်ကြီးဌာန နိုင်ငံခြားရေးအတွင်းဝန် မစ္စတာ ရှာဟီဒူလ် ဟတ်ခ်တို့က ပူးတွဲသဘာပတိများအဖြစ် ဆောင်ရွက်ကြသည်။
အဆိုပါအစည်းအဝေးတွင် ပြန်လည်ဝင်ရောက်လာ သူများအတွက် အဆင်ပြေစေမည့် ပတ်ဝန်းကျင် ဖန်တီး ထားရှိမှုအခြေအနေ၊ လုံခြုံရေးအစီအမံများ၊ ယုံကြည်မှု တည်ဆောက်ရေး အပါအဝင် ပြန်လည်လက်ခံရေး လုပ်ငန်းစဉ်ဆောင်ရွက်ထားမှုအခြေအနေ၊ ပြန်လည်နေရာ ချထားရေးအစီအမံများ၊ ပြန်လည်ဝင်ရောက်မည့်သူများ စိစစ်ရေးလုပ်ငန်းစဉ်၊NV ကတ်ဆိုင်ရာအချက်များကို ပြန်လည်ဝင်ရောက်လာသူများအကြား သတင်းဖြန့်ချိ ပေးရေး၊ ပြန်လည်လက်ခံရေး၊ နေရာချထားရေးနှင့် ပေါင်းစည်းရေးလုပ်ငန်းစဉ်များတွင် ကုလသမဂ္ဂလက်အောက်ခံ အဖွဲ့အစည်းများ၊ နိုင်ငံတကာအဖွဲ့အစည်းများနှင့် မိတ်ဖက်နိုင်ငံများ ပါဝင်နိုင်မည့် အခြေအနေများကို နှစ်ဖက်အမြင်ချင်းဖလှယ် အသိပေးခဲ့သည်။
အစည်းအဝေးတွင် ပြန်လည်လက်ခံရေးလုပ်ငန်းစဉ် များကို နိုဝင်ဘာလလယ်တွင် ပထမအသုတ် စတင် ဆောင်ရွက်ရန် နှစ်ဖက်သဘောတူခဲ့ကြသည်။ ထို့ပြင် အစည်းအဝေးတွင် နယ်နိမိတ် မှတ်တိုင် ၃၄ နှင့် ၃၅ အကြား မြန်မာနယ်နိမိတ်အတွင်း ယာယီနေထိုင်သူများ နှင့် ပတ်သက်၍လည်း ဆွေးနွေးခဲ့သည်။
မြန်မာကိုယ်စားလှယ်အဖွဲ့သည် UEHRD မှ ဆောင်ရွက်လျက်ရှိသည့် လုပ်ငန်းများအပါအဝင် ပြန်လည် လက်ခံရေးနှင့် ပြန်လည်နေရာချထားရေးလုပ်ငန်းစဉ် များ၊ ကျေးရွာများနေရာချထားမှုနှင့် နေအိမ်များ တည်ဆောက်နေမှုအခြေအနေ၊ အသက်မွေးဝမ်းကျောင်း အတွက် အခွင့်အလမ်းများ၊ ပြန်လည်ဝင်ရောက်လာမည့် သူများအတွက် ပညာရေးနှင့် ကျန်းမာရေးစောင့်ရှောက်မှု အစီအမံများ၊ မြန်မာနိုင်ငံတွင် နေထိုင်ခဲ့ကြောင်း စိစစ်ရေး လုပ်ငန်းစဉ်များ၊ NV ကတ် ထုတ်ပေးမှုအခြေအနေ များကို အသိပေးပြောကြားခဲ့သည်။
ထို့ပြင် မြန်မာအစိုးရ၏ ဒေသနေပြည်သူများ၏ လူနေမှုဘဝတိုးတက်စေရန်၊ ယုံကြည်မှုတည်ဆောက်ရန်၊ အသိုက်အဝန်းများအကြား သဟဇာတရှိစေရန်၊ ကြိုးပမ်းနေမှုများကို ကူညီပေးရန် UNDP နှင့်UNHCR တို့မှ ရခိုင်ပြည်နယ်မြောက်ပိုင်းရှိ ကျေးရွာအုပ်စုများသို့ စက်တင်ဘာလနှင့် အောက်တိုဘာလအတွင်း ကွင်းဆင်း လေ့လာခဲ့မှု အခြေအနေများကိုလည်း အသိပေးပြောကြား ခဲ့သည်။
မြန်မာနိုင်ငံအနေဖြင့် နေရပ်စွန့်ခွာသူများ ပြန်လည် လက်ခံရေးအတွက် နှစ်နိုင်ငံအကြား သဘောတူညီချက် များနှင့်အညီ ဘင်္ဂလားဒေ့ရ်ှနိုင်ငံသို့ ရောက်ရှိနေသော စိစစ်ပြီးနေရပ်စွန့်ခွာသွားသူများ ပြန်လည်လက်ခံရန် အဆင်သင့်ဖြစ်နေမှုကို ထပ်လောင်းပြောကြားခဲ့သည်။
ယင်းသို့ ဆောင်ရွက်ရာတွင် နှစ်ဖက်အပြန်အလှန် နားလည်မှု၊ ဓမ္မဓိဋ္ဌာန်ကျကျ အပြုသဘောဆောင်သည့် ပူးပေါင်းဆောင်ရွက်မှု၊ အပြန်အလှန်လေးစားမှုနှင့် နှစ်နိုင်ငံသဘောတူညီချက်များကို လေးစားလိုက်နာမှု များဖြင့် ပြန်လည်ခေါ်ယူရေးလုပ်ငန်းစဉ်တွင် ကောင်းမွန် သောရလဒ်များ ရရှိစေမည်ဖြစ်ကြောင်း အလေးထား ပြောကြားခဲ့သည်။
ထို့ပြင် ဘင်္ဂလားဒေ့ရ်ှဘက်မှ ပေးအပ်ခဲ့သော ၈ဝ၃၂ ဦး စာရင်းတွင် ပါဝင်နေသည့် အကြမ်းဖက်သမားများ အပါအဝင် ARSAအကြမ်းဖက်သမားများအား အရေးယူ ဆောင်ရွက်ရန် ဘင်္ဂလားဒေ့ရ်ှနိုင်ငံအား တောင်းဆိုခဲ့ သည်။
အောက်တိုဘာ ၃၁ ရက်တွင် မြန်မာပူးတွဲလုပ်ငန်း အဖွဲ့ဝင်များသည် ဘင်္ဂလားဒေ့ရ်ှနိုင်ငံ နိုင်ငံခြားရေး ဝန်ကြီးဌာန နိုင်ငံခြားရေးအတွင်းဝန် မစ္စတာ ရှာဟီဒူလ် ဟတ်ခ်နှင့် ဘင်္ဂလားဒေ့ရှ် ပူးတွဲလုပ်ငန်းအဖွဲ့ဝင်များ လိုက်ပါလျက် ကော့စ်ဘဇားရှိ ကူတူပါလောင်းစခန်းသို့ သွားရောက်ခဲ့သည်။ စခန်းတွင် ကျေးရွာများမှ ကိုယ်စား လှယ်များ၊ နေရပ်စွန့်ခွာသူများအား တွေ့ဆုံ၍ ပြန်လည်ဝင်ရောက်သူများ၏ ဘေးကင်းလုံခြုံရေး ဆောင်ရွက်ထားမှုများ၊ ပြန်လည်နေရာချထားရေးအတွက်UEHRD ၏ ဆောင်ရွက်ထားမှုများ၊ ကျေးရွာများ တည်ဆောက်နေမှု၊ အသက်မွေးဝမ်းကျောင်း အခွင့်အလမ်း များ၊ ကျန်းမာရေးနှင့် ပညာရေးအစီအမံများ စီစဉ် ထားရှိမှု၊ ပြန်လည်လက်ခံရေးအတွက် စိစစ်ရေးလုပ်ငန်း စဉ်များ၊ NV ကတ်ပြား ကိုင်ဆောင်ခြင်းဖြင့် ရရှိမည့် အကျိုးကျေးဇူးများနှင့် နိုင်ငံသားစိစစ်ရေးကတ် ထုတ်ပေး နေမှုအခြေအနေများကို အသေးစိတ်ရှင်းလင်းပြောကြား ခဲ့သည်။ မြန်မာပူးတွဲလုပ်ငန်းအဖွဲ့ဝင်များသည် အုခိရရှိ ဘာလူခါလီစခန်းသို့လည်း သွားရောက်ကြည့်ရှုခဲ့သည်။
ထို့ပြင် မြန်မာပူးတွဲလုပ်ငန်းအဖွဲ့ဝင်များသည် ဟိန္ဒူ ဘာသာဝင် ကိုယ်စားလှယ်များကိုလည်း စခန်းတွင် သွားရောက်တွေ့ဆုံခဲ့ရာ ဟိန္ဒူဘာသာဝင်များက မြန်မာ နိုင်ငံသို့ ပြန်လည်သွားရောက်ရန် ဆန္ဒရှိကြောင်း ထုတ်ဖော် ပြောကြားကြသည်။
စတုတ္ထအကြိမ် ပူးတွဲလုပ်ငန်းအဖွဲ့အစည်းအဝေး အား မြန်မာနိုင်ငံ၌ ကျင်းပသွားမည်ဖြစ်ပြီး ကျင်းပမည့် နေ့ရက်နှင့် အချိန်တို့အား သံတမန်လမ်းကြောင်းမှတစ်ဆင့် ဆက်သွယ်ဆောင်ရွက်သွားမည်ဖြစ်ကြောင်း နိုင်ငံခြားရေး ဝန်ကြီးဌာနမှ သတင်းရရှိသည်။
သတင်းစဉ်
No comments:
Post a Comment