ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေးကော်မတီ၏အကြံပေးအဖွဲ့ဝင် တောင်အာဖရိကနိုင်ငံ ကာကွယ် ရေးဝန်ကြီးဟောင်း Mr. Roelof Meyer နှင့်အဖွဲ့သည် ယနေ့နံနက်ပိုင်းတွင် မောင်တောမြို့နယ်ရှိ ခရိုင်အထွေထွေအုပ်ချုပ်ရေးဦးစီးဌာန အစည်းအဝေး ခန်းမ၌ ခရိုင်အဆင့် ဌာနဆိုင်ရာများ၊ ဒေသခံပြည်သူများနှင့် တွေ့ဆုံသည်။
ရှေးဦးစွာ Mr. Roelof Meyerနှင့်အဖွဲ့သည် မောင်တောခရိုင် ဒုတိယ အုပ်ချုပ်ရေးမှူး ဦးရဲထူး၊ မြို့နယ်အုပ်ချုပ်ရေးမှူးနှင့် ဌာနဆိုင်ရာ တာဝန်ရှိသူ များနှင့် တွေ့ဆုံရာ ခရိုင်ဒုတိယအုပ်ချုပ်ရေးမှူး ဦးရဲထူးက မောင်တောဒေသ တွင် ဖြစ်ပွားခဲ့သည့် အကြမ်းဖက်မှုဖြစ်စဉ်များ၊ အကြမ်းဖက်ဖြစ်စဉ်များကြောင့် နေရပ်စွန့်ခွာသူများ ပြန်လည်လက်ခံရေးဆောင်ရွက်ပေးနေမှုများ၊ မောင်တော ဒေသ ဖွံ့ဖြိုးတိုးတက်ရေးလုပ်ငန်းများ၊ ပြန်လည်ထူထောင်ရေးလုပ်ငန်းများ နှင့် ဆက်လက်ဆောင်ရွက်သွားမည့် လုပ်ငန်းစဉ်များကို ရှင်းလင်းပြောကြားသည်။
ယင်းနောက် Mr. Roelof Meyerက နှစ်ဖက်အသိုက်အဝန်းများအကြား ပြန်လည်သင့်မြတ်ရေးလုပ်ငန်းများအတွက် တွေ့ဆုံဆွေးနွေးရေး စကားဝိုင်း များ ပြုလုပ်နိုင်ရေးကိစ္စရပ်များကို ဆွေးနွေးပြောကြားသည်။
မွန်းလွဲပိုင်းတွင် Mr. Roelof Meyerနှင့် အဖွဲ့သည် မောင်တောမြို့နယ် ရှိ မြို့မိမြို့ဖများနှင့် ရပ်မိရပ်ဖများ၊ အစ္စလာမ်ဘာသာဝင်များနှင့် ဒေသခံ ရခိုင်တိုင်းရင်းသားများကို သီးခြားစီ တွေ့ဆုံပြီး နှစ်ဖက်အသိုက်အဝန်းများအကြား စကားဝိုင်းများ ပြုလုပ်နိုင်ရေးကိစ္စရပ်များနှင့်ပတ်သက်၍ ထင်မြင်ယူဆချက် များ၊ သုံးသပ်ချက်များနှင့် အကြံပြုချက်များကို ရယူကြသည်။
သတင်း၊ ဓာတ်ပုံ-ရာမည၊ မျိုးသူဟိန်း
No comments:
Post a Comment