မြန်မာနိုင်ငံအစိုးရ၏ ဒီမိုကရေစီစနစ်သို့ အသွင်ကူးပြောင်းရေး၊ စဉ်ဆက်မပြတ် ဖွံ့ဖြိုးတိုးတက်ရေးနှင့် တည်ငြိမ်အေးချမ်း၍ သဟဇာတရှိသော
လူမှုအဖွဲ့အစည်းတစ်ရပ် ထူထောင်ရေးအတွက် ဆောင်ရွက်ချက်များ၊ ရခိုင်ပြည်နယ်အရေးကိစ္စနှင့်ပတ်သက်၍ နေရပ်စွန့်ခွာသူများ
ပြန်လည်လက်ခံရေးအပါအဝင် ရေရှည်အဖြေကိုရှာနိုင်ရန် ကြိုးပမ်းဆောင်ရွက်နေမှုအခြေအနေများကို အလေးထားပြောကြားခဲ့
(၇၃)ကြိမ်မြောက် ကုလသမဂ္ဂအထွေထွေညီလာခံ အထွေထွေမူဝါဒရေးရာဆွေးနွေးပွဲ၏ စတုတ္ထနေ့အစည်းအဝေးကို စက်တင်ဘာလ ၂၈ ရက်တွင် အမေရိကန်၊ နယူးယောက်မြို့ ကုလသမဂ္ဂဌာနချုပ်ရှိ အထွေထွေညီလာခံခန်းမ၌ ကျင်းပရာ ဒေသစံတော်ချိန် ည ၈ နာရီတွင် မြန်မာကိုယ်စားလှယ်အဖွဲ့ခေါင်းဆောင် နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီး ဦးကျော်တင့်ဆွေ တက်ရောက်၍ အထွေထွေမူဝါဒရေးရာ မိန့်ခွန်းတစ်ရပ် ပြောကြားခဲ့ သည်။
ပြည်ထောင်စုဝန်ကြီးက ကုလသမဂ္ဂအနေဖြင့် နိုင်ငံ အားလုံးအတွက် ဆီလျော်မှုရှိသည့် ပိုမိုကောင်းမွန်သော အဖွဲ့အစည်းတစ်ရပ်ဖြစ်လာစေရေးအတွက် အပြုသဘော ဆောင်ပြီး၊ ငြိမ်းချမ်းသည့်နည်းလမ်းများဖြင့် ချဉ်းကပ်ဆောင် ရွက်သွားရန် လိုအပ်ကြောင်း ပြောကြားခဲ့ပြီး၊ မြန်မာနိုင်ငံ အစိုးရ၏ ဒီမိုကရေစီစနစ်သို့ အသွင်ကူးပြောင်းရေး၊ စဉ်ဆက်မပြတ် ဖွံ့ဖြိုးတိုးတက်ရေးနှင့် တည်ငြိမ်အေးချမ်း၍ သဟဇာတရှိသော လူမှုအဖွဲ့အစည်းတစ်ရပ် ထူထောင် ရေးအတွက် ဆောင်ရွက်ချက်များ၊ ရခိုင်ပြည်နယ်အရေး ကိစ္စနှင့်ပတ်သက်၍ နေရပ်စွန့်ခွာသူများ ပြန်လည်လက်ခံ ရေးအပါအဝင် ရေရှည်အဖြေကိုရှာနိုင်ရန် ကြိုးပမ်းဆောင် ရွက်နေမှုအခြေအနေများကို အလေးထားပြောကြားသည်။
သန္နိဋ္ဌာန်ချထားမှု
ထို့ပြင် လူ့အခွင့်အရေးကောင်စီ၏ မြန်မာနိုင်ငံ ဆိုင်ရာ လွတ်လပ်သော နိုင်ငံတကာအချက်အလက်ရှာဖွေ ရေးအဖွဲ့မှ မကြာမီက ထုတ်ပြန်ခဲ့သည့် အစီရင်ခံစာနှင့် အပြည်ပြည်ဆိုင်ရာ ပြစ်မှုဆိုင်ရာတရားရုံးမှ ချမှတ်ခဲ့သော ရခိုင်ပြည်နယ်အရေးကိစ္စနှင့်ပတ်သက်သည့် ဆုံးဖြတ်ချက် တို့အပေါ် မြန်မာနိုင်ငံ၏ရပ်တည်ချက်နှင့် တာဝန်ခံမှုဆိုင် ရာ ကိစ္စရပ်နှင့် ပတ်သက်၍ မြန်မာနိုင်ငံအစိုးရက ဖွဲ့စည်း ခဲ့သည့် လွတ်လပ်သောစုံစမ်းစစ်ဆေးရေး ကော်မရှင်ဖြင့် ဆောင်ရွက်သွားရန် သန္နိဋ္ဌာန်ချထားမှုတို့ကို ပြည်ထောင်စု ဝန်ကြီးက ရှင်းလင်းပြောကြားသည်။
မြန်မာကိုယ်စားလှယ်အဖွဲ့ခေါင်းဆောင် ပြောကြား ခဲ့သည့် မိန့်ခွန်းအပြည့်အစုံမှာ အောက်ပါအတိုင်းဖြစ် သည်-
သဘာပတိကြီးခင်ဗျား၊
ကျွန်တော်တို့ဟာ စိန်ခေါ်မှုများစွာ ဖြစ်ပေါ်နေတဲ့ အချိန်ကာလများမှာ အသက်ရှင်နေထိုင်ကြတာ ဖြစ်ပါ တယ်။ ဒါ့ကြောင့် ယခုနှစ်အထွေထွေညီလာခံရဲ့ ဆောင်ပုဒ် ဖြစ်တဲ့ ''ပြည်သူအားလုံးနဲ့ဆီလျော်တဲ့ ကုလသမဂ္ဂဖြစ်စေ ရေး-ငြိမ်းချမ်းမျှတပြီး ရေရှည်တည်တံ့တဲ့ လူမှုအဖွဲ့အစည်း များဖြစ်ပေါ်စေရေးအတွက် ကမ္ဘာကို ဦးဆောင်ပေးနိုင်မှုနဲ့ တာဝန်များ မျှဝေယူမှု''ဟာ အင်မတန်မှ ကောင်းမွန် ဆီလျော်လှပါတယ်။ ဒီဆောင်ပုဒ်ဟာ ယနေ့ကျွန်တော်တို့ ရင်ဆိုင်နေရတဲ့ ရှုပ်ထွေးတဲ့ စိန်ခေါ်မှုတွေကို ကျော်လွှား နိုင်ကြဖို့အတွက် အရေးပါတဲ့ ဒီအဖွဲ့အစည်းကြီးရဲ့ ကဏ္ဍကို မြှင့်တင်ပေးဖို့ လိုအပ်ချက်ကိုလည်း သတိပေးရာ ရောက်ပါတယ်။ ဒီလုပ်ငန်းစဉ်ကို ဆောင်ရွက်ရာမှာ အချုပ် အခြာအာဏာ တန်းတူညီတူရှိမှုဆိုတဲ့မူ အပါအဝင် ကုလ သမဂ္ဂ ပဋိညာဉ်စာတမ်းကြီးရဲ့ အခြေခံမူတွေကိုလည်း မေ့လျော့ထားလို့မဖြစ်ပါဘူး။ ဒါ့အပြင် စီးပွားရေး၊ လူမှု ရေး၊ ယဉ်ကျေးမှု၊ လူသားချင်းစာနာမှုဆိုင်ရာ အကျိုးစီးပွား နဲ့ လူ့အခွင့်အရေးတွေကို မြှင့်တင်ကာကွယ်ရာမှာ အပြည် ပြည်ဆိုင်ရာ ပူးပေါင်းဆောင်ရွက်မှု နည်းလမ်းများမှတစ်ဆင့် ဆောင်ရွက်မှ ရရှိနိုင်မယ်ဆိုတာကိုလည်း သတိရကြဖို့ လိုအပ်ပါတယ်။ ကုလသမဂ္ဂရဲ့ အပြည်ပြည်ဆိုင်ရာ ပါဝင် နေတဲ့ ဝိသေသလက္ခဏာကိုလည်း မမေ့လျော့သင့်ပါဘူး။
အပြုသဘောဆောင်ပြီး ငြိမ်းချမ်းတဲ့နည်းလမ်းတွေနဲ့ ဆောင်ရွက်မှသာ ကျွန်တော်တို့အနေနဲ့ နိုင်ငံအားလုံးနဲ့ ဆီလျော်တဲ့ ပိုမိုကောင်းမွန်သော ကုလသမဂ္ဂကြီးကို ဖန်တီး နိုင်ကြမှာ ဖြစ်ပါတယ်။ ဒါမှသာ ကျွန်တော်တို့ မျှော်လင့် တောင့်တတဲ့ တာဝန်မျှဝေယူမှုများနဲ့အညီ ကမ္ဘာကို ဦးဆောင်ပေးနိုင်မှုကို အမှန်တကယ်ရရှိနိုင်မှာ ဖြစ်ပါတယ်။
သဘောထားပြောင်းလဲသွားခြင်းမရှိ
ဒီနေရာမှာ ကျွန်တော့်အနေနဲ့ ကုလသမဂ္ဂအဖွဲ့ အစည်းကြီးရဲ့ အခန်းကဏ္ဍအပေါ် မြန်မာနိုင်ငံရဲ့ သဘော ထား ပြောင်းလဲသွားခြင်းမရှိဘူးဆိုတာကိုလည်း အလေး ထားပြောကြားလိုပါတယ်။ ကမ္ဘာ့ရေးရာ စိန်ခေါ်မှုတွေကို ကျော်လွှားနိုင်ရေးအတွက် ကမ္ဘာ့နိုင်ငံတွေ အတူတကွ ပူးပေါင်းပြီး အဖြေရှာဖွေကြဖို့ ကုလသမဂ္ဂအဖွဲ့ကြီးထက် ပိုပြီးသင့်လျော်သော နိုင်ငံအပေါင်း ဆုံစည်းနိုင်တဲ့နေရာ မျိုးမရှိပါဘူး။
သဘာပတိကြီးခင်ဗျား၊
မြန်မာနိုင်ငံကို အာဏာရှင်စနစ်ကနေ ဒီမိုကရေစီ စနစ်သို့ အသွင်ကူးပြောင်းရေး၊ စဉ်ဆက်မပြတ် ဖွံ့ဖြိုး တိုးတက်ရေးနဲ့ တည်ငြိမ်အေးချမ်း၍ သဟဇာတရှိသော လူမှုအဖွဲ့အစည်းတစ်ရပ် ထူထောင်ရေးအတွက် ကျွန်တော် တို့ရဲ့ ကြိုးပမ်းအားထုတ်မှုတွေနဲ့ ပတ်သက်ပြီး ဒီအထွေထွေ ညီလာခံကြီးမှာ အသိပေးတင်ပြလိုပါတယ်။
အေးချမ်းမှု၊ တည်ငြိမ်မှုမရှိတဲ့ နိုင်ငံတစ်နိုင်ငံဟာ စီးပွားရေးဖွံ့ဖြိုးတိုးတက်မှု မရရှိနိုင်ပါဘူး။ ဒါဟာကျွန်တော် တို့ရဲ့ ခံယူချက်ဖြစ်ပါတယ်။ ဒါ့ကြောင့် ဒီမိုကရေစီ နည်းလမ်းတကျ ရွေးကောက်တင်မြှောက်ခြင်း ခံထားရတဲ့ ကျွန်တော်တို့အစိုးရဟာ တာဝန်စတင်ထမ်းဆောင်ချိန် ကစပြီး အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးကို ဦးစားပေးဆောင်ရွက်လျက်ရှိပါတယ်။
သဘာပတိကြီးခင်ဗျား၊
မြန်မာနိုင်ငံမှာ ဖြစ်ပေါ်နေတဲ့ တိုင်းရင်းသားများ အကြား ဝိဝါဒကွဲပြားမှုတွေနဲ့ လက်နက်ကိုင်ပဋိပက္ခတွေကို နိုင်ငံရေးနည်းလမ်းနဲ့သာ အဆုံးသတ်နိုင်မယ်လို့ ခံယူ ထားပါတယ်။ ကျွန်တော်တို့ရဲ့ ပြည်သူများ မျှော်လင့်တောင့် တတဲ့ ဒီမိုကရေစီ ဖက်ဒရယ်ပြည်ထောင်စု တည်ထောင်နိုင် မှသာ ရေရှည်တည်တံ့တဲ့ ငြိမ်းချမ်းရေးဆိုတာ အမှန် တကယ် အကောင်အထည်ပေါ်လာမှာဖြစ်ပါတယ်။
အခြေခံမူ(၅၁)ချက်
ဒါ့ကြောင့် ဒီမိုကရေစီဖက်ဒရယ်ပြည်ထောင်စု အတွက် အခြေခံမူတွေချမှတ်ရာမှာ သဘောတူညီမှုရရှိ နိုင်ဖို့အတွက် ပြည်ထောင်စုငြိမ်းချမ်းရေးညီလာခံ-(၂၁) ရာစုပင်လုံမှာ ဆွေးနွေးညှိနှိုင်းမှုတွေ ပြုလုပ်လျက်ရှိပါတယ်။ ကျင်းပပြီးစီးခဲ့တဲ့ ညီလာခံ(၃)ကြိမ်မှာ ပြည်ထောင်စု ငြိမ်းချမ်းရေးသဘောတူစာချုပ်ရဲ့ အစိတ်အပိုင်း ဖြစ်လာ မယ့် အခြေခံမူ(၅၁)ချက်ကို ချမှတ်နိုင်ခဲ့ပြီးဖြစ်ပါတယ်။ အားလုံးပါဝင်တဲ့ ငြိမ်းချမ်းရေးလုပ်ငန်းစဉ် ဖြစ်စေဖို့ အတွက် ကျွန်တော်တို့အနေနဲ့ တစ်နိုင်ငံလုံးပစ်ခတ် တိုက်ခိုက်မှုရပ်စဲရေး သဘောတူစာချုပ်မှာ လက်မှတ်ရေး ထိုးပြီးဖြစ်တဲ့ တိုင်းရင်းသားလက်နက်ကိုင်အဖွဲ့ (၈) ဖွဲ့နဲ့ သာမက လက်မှတ်မရေးထိုးရသေးတဲ့ အဖွဲ့တွေနဲ့ပါ ဆက်လက်ညှိနှိုင်းဆွေးနွေးလျက်ရှိပါတယ်။
ပါဝင်လက်မှတ်ရေးထိုးခဲ့
ပြီးခဲ့တဲ့နှစ်အတွင်းမှာတော့ နောက်ထပ် တိုင်းရင်း သားလက်နက်ကိုင်အဖွဲ့ နှစ်ဖွဲ့ဖြစ်တဲ့ မွန်ပြည်သစ်ပါတီနဲ့ လားဟူဒီမိုကရက်တစ်အစည်းအရုံးတို့က တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်မှာ ပါဝင် လက်မှတ်ရေးထိုးခဲ့ကြပါတယ်။ တိုင်းရင်းသား လက်နက် ကိုင်အဖွဲ့အစည်းအားလုံး တစ်နိုင်ငံလုံးပစ်ခတ်တိုက်ခိုက် မှုရပ်စဲရေး သဘောတူစာချုပ်အောက်သို့ ရောက်ရှိလာပြီး၊ ညီလာခံရဲ့ ဆွေးနွေးပွဲတွေမှာ ပါဝင်လာနိုင်ဖို့ကို ကျွန်တော် တို့အနေနဲ့ ဆက်လက်ကြိုးပမ်းသွားမှာ ဖြစ်ပါတယ်။
သဘာပတိကြီးခင်ဗျား၊
တိုင်းပြည်ငြိမ်းချမ်းသာယာဝပြောစေဖို့ ဆောင်ရွက် ရာမှာ စီးပွားရေး၊ လူမှုရေးနဲ့ ပတ်ဝန်းကျင်ထိန်းသိမ်းရေး ကဏ္ဍတွေမှာ မျှတတဲ့ ဖွံ့ဖြိုးတိုးတက်မှု မရှိမဖြစ် လိုအပ်ပါ တယ်။ ဒီ့အတွက် ကုလသမဂ္ဂ ၂ဝ၃ဝ စဉ်ဆက်မပြတ်ဖွံ့ဖြိုးမှု အစီအစဉ်နဲ့ကိုက်ညီတဲ့ မြန်မာနိုင်ငံရဲ့ စဉ်ဆက်မပြတ် ဖွံ့ဖြိုးတိုးတက်ရေးစီမံကိန်း (၂ဝ၁၈-၂ဝ၃ဝ)(MSDP)ကို မြန်မာအစိုးရအနေနဲ့ ချမှတ်ထားပြီးဖြစ်ပါတယ်။ ဒီစီမံ ကိန်းရဲ့ ငြိမ်းချမ်းရေးနှင့်တည်ငြိမ်ရေး၊ သာယာဝပြောရေး နှင့် ပူးပေါင်းဆောင်ရွက်ရေး၊ ပြည်သူများနှင့် ကမ္ဘာမြေ ဆိုတဲ့ မဏ္ဍိုင်(၃)ရပ် ပါဝင်ပါတယ်။ ဒီစီမံကိန်းရဲ့ ရည်မှန်း ချက်များထဲမှာ ငြိမ်းချမ်းရေး၊ အမျိုးသားပြန်လည်သင့်မြတ် ရေး၊ လုံခြုံရေးနဲ့ ကောင်းမွန်သော အုပ်ချုပ်ရေးတို့ ပါဝင် ပါတယ်။ ဒီစီမံကိန်းရဲ့နေရာအားလုံးမှာ စဉ်ဆက်မပြတ် တိုးတက်ရေးကို ထည့်သွင်းစဉ်းစားဆောင်ရွက်ရမှာဖြစ်ပြီး၊ စီမံကိန်းအကောင်အထည်ဖော်ရေး ရှုထောင့်အားလုံးမှာ အဓိကထားရမှာ ဖြစ်ပါတယ်။MSDP အောင်မြင်မှုအတွက် အမျိုးသားကြိုးပမ်းအားထုတ်မှုများသာမက ဖွံ့ဖြိုးမှုမိတ် ဖက်များနှင့် အပြည်ပြည်ဆိုင်ရာ အဖွဲ့အစည်းများရဲ့ ပါဝင် ဆောင်ရွက်မှုများလည်း လိုအပ်ပါတယ်။
သဘာပတိကြီးခင်ဗျား၊
မြန်မာနိုင်ငံကို ဒီမိုကရက်တစ် လူ့အဖွဲ့အစည်း တစ်ရပ်အဖြစ် အောင်အောင်မြင်မြင် အသွင်ကူးပြောင်း ရေးမှာ လူ့အခွင့်အရေးနဲ့ အားလုံးပါဝင်ရေးဟာ အခြေခံ ကျပါတယ်။ ပြည်သူတွေအကြားမှာ ဒီမိုကရေစီစံနှုန်းနဲ့ အလေ့အထတွေ လေ့ကျင့်မွေးမြူနိုင်ကြဖို့အတွက် အစိုးရ အနေနဲ့ အားထုတ်ကြိုးပမ်းလျက်ရှိပါတယ်။ ဒီလိုကြိုးပမ်းရာ မှာ တရားဥပဒေစိုးမိုးရေးနှင့် ကောင်းမွန်သော အုပ်ချုပ်မှု တိုးတက်ရေး၊ လူ့အခွင့်အရေး ကာကွယ်စောင့်ရှောက်ရေး နဲ့ အားမာန်ရှိတဲ့ လူမှုအဖွဲ့အစည်းတစ်ရပ် ပေါ်ထွန်းလာ စေရေးတို့ ပါဝင်ပါတယ်။ ဒီအချက်တွေ အားလုံးဟာ ပြည်သူအားလုံးကို လုံခြုံမှုနဲ့ သာယာဝပြောမှု ပေးစွမ်းနိုင် မယ့် ဒီမိုကရေစီဖက်ဒရယ်ပြည်ထောင်စုကြီး ပေါ်ပေါက် ရေးအတွက် မဖြစ်မနေလိုအပ်ချက်တွေပဲ ဖြစ်ပါတယ်။ ဒီမိုကရေစီစနစ်ကို ပြောင်းလဲကျင့်သုံးစ နိုင်ငံတစ်နိုင်ငံ အတွက် ဒါဟာစိန်ခေါ်မှု အလွန်ကြီးမားတဲ့ လုပ်ငန်းစဉ် တစ်ရပ်ဖြစ်ပါတယ်။ သို့သော်လည်း ကျွန်တော်တို့ ပြည်သူ များ လိုလားတောင့်တကြတဲ့ ဒီမိုကရေစီ လူ့ဘောင်အဖွဲ့ အစည်းကို တည်ဆောက်ရေးအတွက် ကျွန်တော်တို့အနေနဲ့ ခိုင်မာသော သန္နိဋ္ဌာန်ချထားပြီး ဖြစ်ပါတယ်။
သဘာပတိကြီးခင်ဗျား၊
ရခိုင်ပြည်နယ်အရေးကိစ္စကို ကိုင်တွယ်ဖြေရှင်းရေး ဟာ ကျွန်တော်တို့ ဒီမိုကရေစီလုပ်ငန်းစဉ်ရဲ့ အရေးကြီးတဲ့ အစိတ်အပိုင်းတစ်ခုပဲ ဖြစ်ပါတယ်။ ရခိုင်ပြည်နယ်ငြိမ်းချမ်း ပြီး ဖွံ့ဖြိုးစေဖို့အတွက် ကျွန်တော်တို့အစိုးရအနေနဲ့ အစဉ် တစိုက်ကြိုးပမ်းဆောင်ရွက်လျက်ရှိပါတယ်။ နိုင်ငံတော် တာဝန်ကို စတင်တာဝန်ယူပြီး ရက်သတ္တပတ် အနည်းငယ် အတွင်း ၂ဝ၁၆ ခုနှစ်၊ မေလမှာ နိုင်ငံတော်၏အတိုင်ပင်ခံ ပုဂ္ဂိုလ် ဦးဆောင်တဲ့ ရခိုင်ပြည်နယ်တည်ငြိမ်အေးချမ်းရေး နှင့် ဖွံ့ဖြိုးတိုးတက်မှု အကောင်အထည်ဖော်ရေး ဗဟို ကော်မတီကို အစိုးရက ဖွဲ့စည်းခဲ့ပါတယ်။ အဲ့ဒီနောက် ရခိုင်ပြည်နယ် ငြိမ်းချမ်းတည်ငြိမ်ရေးနဲ့ ဖွံ့ဖြိုးရေးအတွက် အကြံပြုချက်များ တင်ပြနိုင်ဖို့ ကုလသမဂ္ဂအတွင်းရေးမှူး ချုပ်ဟောင်း ဒေါက်တာကိုဖီအာနန် ဦးဆောင်တဲ့ ရခိုင် ပြည်နယ်ဆိုင်ရာ အကြံပေးကော်မရှင်ကို ၂ဝ၁၆ ခုနှစ်၊ စက်တင်ဘာလမှာ ဆက်လက်ဖွဲ့စည်းခဲ့ပါတယ်။
ရခိုင်ပြည်နယ်တွင် ကျွန်တော်တို့ရဲ့ ငြိမ်းချမ်းရေး၊ သာယာဝပြောရေးနဲ့ လုံခြုံရေးဆိုင်ရာ ရည်မှန်းချက်များ အောင်မြင်နိုင်စေဖို့ ဆန္ဒနဲ့ ဥာဏ်ပညာအမြော်အမြင် ကြီးမားစွာဖြင့် အကြံပြုချက်များ ပေးအပ်ခဲ့တဲ့ ဒေါက်တာ ကိုဖီအာနန်ကို ဒီနေရာကနေ ချီးကျူးဂုဏ်ပြုပါကြောင်း ပြောကြားလိုပါတယ်။
ကြိုတင်အကွက်ချစီစဉ်ခဲ့
ကော်မရှင်ဖွဲ့စည်းပြီး တစ်လခန့်အကြာမှာ နောင် အာဆာအဖွဲ့ဖြစ်လာမယ့် ''အာကွာမူ မူဂျာဟီဒင်'' ဘာသာ ရေးအစွန်းရောက် အကြမ်းဖက်အုပ်စုက ရခိုင်ပြည်နယ် မြောက်ပိုင်းရှိ နယ်စပ်လုံခြုံရေး ရဲကင်း(၃)ခုကို တိုက်ခိုက်ခဲ့ ပါတယ်။ ဒီတိုက်ခိုက်မှုတွေဟာ အဲဒီဒေသမှာ နေထိုင်သူ များအကြား စိုးရိမ်ကြောက်ရွံ့မှုတွေဖြစ်လာစေဖို့၊ အကြမ်း ဖက်မှုတွေကို လှုံ့ဆော်ပေးဖို့နဲ့ နိုင်ငံတကာရဲ့ အာရုံစိုက်မှု ရဖို့အတွက် ကြိုတင်အကွက်ချစီစဉ်ခဲ့တာ ဖြစ်ပါတယ်။
ဒီလို တိုက်ခိုက်မှုတွေ ဖြစ်ပွားခဲ့ပေမယ့် ရခိုင်ပြည်နယ် အတွက် ရေရှည်အဖြေကို ရှာနိုင်ဖို့အတွက် အစိုးရအနေနဲ့ ဆက်လက်ကြိုးပမ်းခဲ့ပါတယ်။ ရခိုင်ပြည်နယ်ဆိုင်ရာ အကြံ ပေးကော်မရှင်က အပြီးသတ်အစီရင်ခံစာကို မြန်မာအစိုးရ ထံ ၂ဝ၁၇ ခုနှစ်၊ သြဂုတ်လမှာ တင်သွင်းခဲ့ပါတယ်။ အစီ ရင်ခံစာမှာ ရခိုင်ပြည်နယ် ရေရှည်ငြိမ်းချမ်းတည်ငြိမ်ဖို့ အတွက် အကြံပြုချက်(၈၈)ချက် ပါဝင်ပါတယ်။ ကျွန်တော် တို့အနေနဲ့ အကောင်အထည်ဖော်ရေးကော်မတီကို ဖွဲ့စည်း ခဲ့ပြီးနောက်၊ ယခုအချိန်မှာ အကြံပြုချက် (၈၈) အနက် (၈၁) ချက်ကို အကောင်အထည်ဖော်နေပြီဖြစ်တယ်ဆိုတာ ကို ဝမ်းမြောက်စွာ တင်ပြလိုပါတယ်။
ဒေါက်တာ ကိုဖီအာနန်က ကော်မရှင်ရဲ့ အပြီးသတ် အစီရင်ခံစာကိုပေးအပ်ပြီး နာရီအနည်းငယ်အတွင်း အာဆာအကြမ်းဖက်အဖွဲ့ဟာ ရခိုင်ပြည်နယ်မြောက်ပိုင်းရှိ ရဲကင်းစခန်း(၃ဝ)နဲ့ နယ်မြေခံတပ်ရင်းဌာနချုပ်တို့ကို တစ်ပြိုင်တည်း တိုက်ခိုက်ခဲ့ပါတယ်။ ၂ဝ၁၇ ခုနှစ် အာဆာရဲ့ အကြမ်းဖက်မှုတွေဟာ လုံခြုံရေးတပ်ဖွဲ့တွေ သာမက ရခိုင်ပြည်နယ်မှာနေထိုင်ကြတဲ့ မတူညီတဲ့ လူမှုအသိုက်အဝန်းများကိုပါ ဦးတည်ခဲ့တယ်ဆိုတာ ဒီနေရာမှာ အလေးထားပြောကြားလိုပါတယ်။ ယင်းသို့ တိုက်ခိုက်မှုများကြောင့် စိုးရိမ်ကြောက်ရွံ့မှု၊ မတည်ငြိမ်မှုတို့ ဖြစ်ပေါ်ခဲ့ရပြီး ဘင်္ဂလားဒေ့ရ်ှနိုင်ငံဘက်ကို ဒုက္ခသည် အမြောက်အမြား ထွက်ပြေးခဲ့ကြပါတယ်။
လျစ်လျူရှုခဲ့ကြ
ဒီလိုထွက်ပြေးမှုကိုသာ နိုင်ငံတကာက အာရုံစိုက်ပြီး၊ ထွက်ပြေးရတဲ့ လတ်တလောနဲ့ ယခင်ကတည်းကရှိနေ ခဲ့တဲ့ ပိုမိုကျယ်ပြန့်တဲ့ အကြောင်းရင်းတွေကိုတော့ လျစ်လျူ ရှုခဲ့ကြပါတယ်။ မည်သို့ပင်ဖြစ်စေကာမူ အစိုးရအနေနဲ့ ရခိုင်ပြည်နယ်မှာရှိတဲ့ အသိုက်အဝန်းအားလုံးအတွက် လိုအပ်တဲ့ တည်ငြိမ်မှု၊ ပြန်လည်သင့်မြတ်မှုနဲ့ ဖွံ့ဖြိုးတိုးတက် မှုတို့အတွက် စေတနာမှန်ကန်စွာဖြင့် တစ်ပေါင်းတစ်စည်း တည်း ဆက်လက်ဖြေရှင်းဆောင်ရွက်သွားမှာ ဖြစ်ပါတယ်။
သဘာပတိကြီးခင်ဗျား-
ကျွန်တော်တို့အနေနဲ့ နေရပ်စွန့်ခွာသူတွေ၊ အထူးသဖြင့် အမျိုးသမီးတွေနဲ့ ကလေးသူငယ်တွေရဲ့ ဒုက္ခတွေအပေါ် လွန်စွာစာနာထောက်ထားမိပါတယ်။ ရခိုင်ပြည်နယ်မှာ နေထိုင်ကြောင်း စိစစ်ပြီးတဲ့ နေရပ် စွန့်ခွာသူအားလုံးကို ဆောလျင်စွာ ပြန်လည်လက်ခံနိုင်ဖို့ အတွက် အစီအမံတွေ ဆောင်ရွက်ထားပြီး ဖြစ်ပါတယ်။
ဒီ့အတွက် ရခိုင်ပြည်နယ်မှ နေရပ်စွန့်ခွာသူများ ပြန်လည်လက်ခံရေးအစီအစဉ်၊ ပြန်လည်စိစစ်လက်ခံရေး ပူးတွဲလုပ်ငန်းအဖွဲ့၏ လုပ်ငန်းတာဝန်သတ်မှတ်ချက်များ နှင့် ပြန်လည်လက်ခံရေးဆိုင်ရာ လက်တွေ့အစီအစဉ်စတဲ့ နှစ်နိုင်ငံသဘောတူညီချက် (၃)ခုကို ဘင်္ဂလားဒေ့ရ်ှနိုင်ငံနဲ့ လက်မှတ်ရေးထိုးခဲ့ပြီး ဖြစ်ပါတယ်။
တိုက်တွန်း
ကျွန်တော်တို့အနေနဲ့ အဲဒီနှစ်နိုင်ငံသဘောတူညီချက် တွေနဲ့အညီ လိုအပ်တဲ့ကြိုတင်ပြင်ဆင်မှုတွေ ပြုလုပ်ထား ပြီးဖြစ်ပါတယ်။ ဘင်္ဂလားဒေ့ရ်ှနိုင်ငံကနေ ပြန်လည် ဝင်ရောက်လာကြမယ့် စိစစ်ပြီးသူများကို ပြန်လည်လက်ခံဖို့ ယခုနှစ် ဇန်နဝါရီလ ၂၃ ရက်ကတည်းက မိမိတို့ဘက် မှာ အဆင်သင့်ဖြစ်နေခဲ့ပြီ ဖြစ်ပါတယ်။ နှစ်နိုင်ငံသဘော တူညီချက်များအတိုင်း ကတိကဝတ်များလိုက်နာဖို့နဲ့ စိစစ်ပြီးသူများကို ဆန္ဒအလျောက် လုံခြုံသိက္ခာရှိစွာ ပြန်လာနိုင်ရေးအတွက် အချိန်မဆွဲဘဲ ခွင့်ပြုပေးဖို့ ဘင်္ဂလားဒေ့ရ်ှနိုင်ငံကို တိုက်တွန်းလိုပါတယ်။
နေရပ်စွန့်ခွာသူအချို့ဟာ မိမိတို့ သဘောဆန္ဒ အလျောက် ¤င်းတို့အစီအစဉ်နဲ့ ပြန်လည်ရောက်ခဲ့ကြပြီး ဖြစ်ပါတယ်။ ယင်းသို့ ပြန်လည်ဝင်ရောက်လာသူများကို စနစ်တကျ စိစစ်မှတ်ပုံတင်မှုများ ပြုလုပ်ပေးခဲ့ပြီး၊ ယခု အခါမှာ ၄င်းတို့ရဲ့ နေအိမ်အသီးသီးမှာ မိသားစုများ၊ ဆွေမျိုးများနဲ့အတူ ပြန်လည်နေထိုင်နေကြပြီဖြစ်ပါတယ်။ သို့သော် နှစ်နိုင်ငံသဘောတူညီချက်ကို အကောင်အထည် ဖော်မှု အစီအစဉ်အနေနဲ့ ဘင်္ဂလားဒေ့ရ်ှနိုင်ငံက နေရပ် စွန့်ခွာသူ တစ်ဦးတစ်ယောက်မျှ ပြန်လည်ပေးပို့လာခြင်း မရှိသေးပါဘူး။
သဘာပတိကြီးခင်ဗျား-
နှစ်နိုင်ငံသဘောတူညီချက်တွေကို အကောင်အထည် ဖော်ခြင်း၊ အိမ်နီးချင်းကောင်းစိတ်ဓာတ်နဲ့ ပူးပေါင်း ဆောင်ရွက်ခြင်းနဲ့ မြန်မာနိုင်ငံ သို့မဟုတ် ဘင်္ဂလားဒေ့ရှ့် နိုင်ငံရဲ့ အမျိုးသားအကျိုးစီးပွားကို ထိခိုက်စေမယ့်လုပ်ရပ် တွေကို ရှောင်ရှားခြင်းဖြင့်သာ ပြဿနာကို လျင်လျင်မြန်မြန် အေးအေးချမ်းချမ်း ဖြေရှင်းနိုင်မှာဖြစ်ပါတယ်။
လက်မှတ်ရေးထိုးခဲ့
ရခိုင်ပြည်နယ်အရေးကိစ္စနဲ့ အထူးသဖြင့် လက်ရှိ လူသားချင်းစာနာမှု အကျပ်အတည်းကို ဖြေရှင်းရာမှာ ကုလသမဂ္ဂရဲ့ အရေးပါတဲ့ကဏ္ဍကို ကျွန်တော်တို့အနေနဲ့ အသိအမှတ်ပြုကြောင်း ပြောကြားလိုပါတယ်။ ပြန်လည် ဝင်ရောက်မယ့်သူများကို ပြန်လည်နေရာချထားရေးနှင့် ပြန်လည်ထူထောင်ရေးလုပ်ငန်းများကို ထိရောက်မြန်ဆန် စွာ ဆောင်ရွက်နိုင်ရေးအတွက် အကူအညီရယူဖို့ မြန်မာ အစိုးရအနေနဲ့ ကုလသမဂ္ဂဖွံ့ဖြိုးမှုအစီအစဉ်နဲ့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးတို့နဲ့ နားလည်မှု စာချွန်လွှာတစ်ရပ်ကို လက်မှတ်ရေးထိုးခဲ့ပါတယ်။ နားလည်မှုစာချွန်လွှာအရ ကုလသမဂ္ဂဖွံ့ဖြိုးမှုအစီအစဉ်နဲ့ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံးတို့ အနေနဲ့ လုပ်ငန်းစတင်နိုင်မယ့်နေရာတွေမှာ ကွင်းဆင်း ဆန်းစစ်လေ့လာရေးအစီအစဉ်ကို ဆောင်ရွက်ခြင်းဖြင့် အကောင်အထည်ဖော်ရေးလုပ်ငန်းစဉ်ကို စတင်ရမှာ ဖြစ်ပါတယ်။ ကုလသမဂ္ဂအဖွဲ့အနေနဲ့ ဒီလုပ်ငန်းစဉ်ကို စတင်နေပြီဖြစ်လို့ ကျွန်တော်တို့အနေနဲ့ ¤င်းတို့ထံမှ ဆန်းစစ်တွေ့ရှိချက်များ ပြန်ကြားလာတာကို စောင့်ဆိုင်း နေပါတယ်။
သဘာပတိကြီးခင်ဗျား-
လူ့အခွင့်အရေးကောင်စီရဲ့ မြန်မာနိုင်ငံဆိုင်ရာ လွတ်လပ်သော နိုင်ငံတကာအချက်အလက်ရှာဖွေရေး အဖွဲ့က ၂ဝ၁၈ ခုနှစ်၊ သြဂုတ်လ ၂၇ ရက်မှာ ထုတ်ပြန်ခဲ့တဲ့ အစီရင်ခံစာအပေါ် မြန်မာအစိုးရအနေနဲ့ အလွန်စိုးရိမ် ပူပန်ကြောင်း ထုတ်ဖော်ပြောကြားခဲ့ပြီးဖြစ်ပါတယ်။
အဟန့်အတားဖြစ်စေ
အချက်အလက်ရှာဖွေရေးအဖွဲ့၏ လိုအပ်မှု၊ ဖွဲ့စည်း မှုနဲ့ လုပ်ပိုင်ခွင့်တို့အပေါ် မြန်မာအစိုးရက စစ်မှန်တဲ့ စိုးရိမ်မှုတွေရှိခဲ့တဲ့အတွက် အဖွဲ့ကို စတင်ဖွဲ့စည်းခဲ့တဲ့ ၂ဝ၁၇ ခုနှစ်၊ မတ်လမှာကတည်းက ကန့်ကွက်ခဲ့တာ ဖြစ်ပါတယ်။ မြေပြင်အခြေအနေမှာ လူမှုအသိုက်အဝန်းများ အကြား သဟဇာတရှိစေဖို့ ကျွန်တော်တို့ အစွမ်းကုန် ကြိုးပမ်းနေကြတဲ့ အချိန်မှာပဲ ခိုင်ခိုင်မာမာ သက်သေ မပြနိုင်တဲ့ ဖြစ်ရပ်ဇာတ်ကြောင်းတွေကို အခြေခံထားတဲ့ အစီရင်ခံစာကို ထုတ်ပြန်လိုက်ခြင်းဟာ တင်းမာမှုတွေကို ဆက်လက်ဖြစ်ပေါ်စေပြီး ရခိုင်ပြည်နယ်မှာရှိတဲ့ လူမှု အသိုက်အဝန်းများအကြား အလွန်လိုအပ်လျက်ရှိနေတဲ့ လူမှုပေါင်းစည်းနေထိုင်မှု တည်ဆောက်ရေးအတွက် ကျွန်တော်တို့ရဲ့ ကြိုးပမ်းမှုတွေကို အဟန့်အတားဖြစ်စေ မှာကို စိုးရိမ်မိပါတယ်။
ဒီနေရာမှာ တာဝန်ခံမှုဆိုတာ ကျွန်တော်တို့အားလုံး အတွက် ဘယ်လိုဖြစ်သင့်တယ်ဆိုတာ အလေးအနက် ပြောကြားလိုပါတယ်။ တာဝန်ခံမှုဆိုတာ မိမိရဲ့ လုပ်ရပ်တွေ အပေါ် တာဝန်ယူခြင်းပဲဖြစ်ပါတယ်။ တာဝန်ခံမှုဟာ အားလုံးအပေါ် မျှမျှတတ သက်ရောက်မှုရှိရမှာ ဖြစ်ပါ တယ်။ ပုဂ္ဂိုလ်တစ်ဦးချင်း၊ အဖွဲ့အစည်းများ၊ အစိုးရများနဲ့ အပြည်ပြည်ဆိုင်ရာ အဖွဲ့အစည်းများဟာ ¤င်းတို့ရဲ့ စကားလုံးများနဲ့ လုပ်ရပ်တွေရဲ့ အကျိုးဆက်အတွက် တာဝန်ခံမှုရှိရမှာ ဖြစ်ပါတယ်။
သဘာပတိကြီးခင်ဗျား-
အပြည်ပြည်ဆိုင်ရာ ပြစ်မှုဆိုင်ရာတရားရုံးရဲ့ ၂ဝ၁၈ ခုနှစ်၊ စက်တင်ဘာလ ၆ ရက်မှာ ချမှတ်ခဲ့တဲ့ ရခိုင်ပြည်နယ် အရေးကိစ္စနှင့်ပတ်သက်တဲ့ ဆုံးဖြတ်ချက်ကို မြန်မာအစိုးရ က ပြတ်သားစွာ ပယ်ချခဲ့ပြီးဖြစ်တာကို အဆွေတော်တို့ သိရှိပြီးဖြစ်ပါလိမ့်မယ်။ ဒီနေရာမှာ ကျွန်တော်တို့ရဲ့ ရပ်တည်ချက်က ရှင်းပါတယ်။ မြန်မာနိုင်ငံဟာ ရောမ သဘောတူစာချုပ်(ျွသာနှအအေကအန)မှာ ပါဝင်လက်မှတ် ရေးထိုးထားတဲ့ နိုင်ငံမဟုတ်တဲ့အတွက် ယင်းတရားရုံး အနေနဲ့ မြန်မာနိုင်ငံအပေါ် ဘယ်လိုမှ တရားစီရင်ပိုင်ခွင့် မရှိပါဘူး။ ယင်းတရားရုံးရဲ့ ဆုံးဖြတ်ချက်ဟာ သံသယ ဖြစ်ဖွယ် ဥပဒေအကြောင်းပြချက်တွေအပေါ်မှာ ချမှတ် ထားခဲ့တာ ဖြစ်ပါတယ်။ သက်ဆိုင်ရာ နိုင်ငံအစိုးရအနေနဲ့ ပြည်တွင်း၌ မိမိအစီအစဉ်နဲ့ ဖြေရှင်းဆောင်ရွက်နေမှုတွေ မပြီးဆုံးသေးတဲ့အခြေအနေမှာ ယခုလိုဆုံးဖြတ်ခဲ့တာ ဖြစ်ပါတယ်။
စိုးရိမ်ပူပန်သင့်
မကြာသေးမီကချမှတ်ခဲ့တဲ့ အပြည်ပြည်ဆိုင်ရာ ပြစ်မှုဆိုင်ရာတရားရုံးရဲ့ ဆုံးဖြတ်ချက်နဲ့ ဒီဆုံးဖြတ်ချက် ချမှတ်ခဲ့ပုံ နည်းလမ်းတို့ဟာ တရားရုံးအနေနဲ့ အန္တရာယ် ရှိတဲ့ အစဉ်အလာကျင့်ထုံးတစ်ရပ် ဖြစ်သွားနိုင်တဲ့အပေါ်မှာ နိုင်ငံတကာအသိုက်အဝန်းရဲ့ အဖွဲ့ဝင်တွေအနေနဲ့ လေးလေးနက်နက် စိုးရိမ်ပူပန်သင့်တယ်ဆိုတာကို ယနေ့ တက်ရောက်လာကြတဲ့ ကိုယ်စားလှယ်အားလုံးကို ပြောကြားလိုပါတယ်။ ယခုဆုံးဖြတ်ချက်ဟာ တရားရုံးရဲ့ လူမှုကျင့်ဝတ်နဲ့ ဥပဒေဆိုင်ရာ အခွင့်အာဏာကို ယိုယွင်း ပျက်စီးစေရာရောက်ပါတယ်။ ဒီအပြည်ပြည်ဆိုင်ရာ တရားရုံးအပေါ် ယုံကြည်စိတ်ချမှုကင်းမဲ့တာ မိမိတို့ တစ်နိုင်ငံတည်းမဟုတ်ကြောင်းသိရလို့ အားတက်မိ ပါတယ်။
သို့သော်လည်း ကျွန်တော်ထပ်ပြီး ရှင်းရှင်းလင်းလင်း ပြောကြားလိုတာကတော့ အပြည်ပြည်ဆိုင်ရာ ပြစ်မှုဆိုင်ရာ တရားရုံးရဲ့ ယခုလို ဥပဒေကြောင်းအရ သံသယဖြစ်ဖွယ် ဝင်ရောက်စွက်ဖက်မှုကို မြန်မာအစိုးရက လက်ခံနိုင်မှာ မဟုတ်သော်လည်း၊ ရခိုင်ပြည်နယ်မှာ ကျူးလွန်ခဲ့တဲ့ လူ့အခွင့်အရေးချိုးဖောက်မှုတွေအတွက် လုံလောက်တဲ့ အထောက်အထားရှိမယ်ဆိုရင် တာဝန်ခံမှုရှိစေဖို့အတွက် ကျွန်တော်တို့ အပြည့်အဝ ကတိကဝတ်ပြုပါတယ်။ မြန်မာ နိုင်ငံအနေနဲ့ လွတ်လပ်သော စုံစမ်းစစ်ဆေးရေး ကော်မရှင် တစ်ရပ်ကို မကြာမီက ဖွဲ့စည်းခဲ့ပြီးဖြစ်ပါတယ်။
လွတ်လပ်သော စုံစမ်းစစ်ဆေးရေးကော်မရှင်
မြန်မာနိုင်ငံမှာ တာဝန်ခံမှုရှိစေရေး၊ ပြန်လည် သင့်မြတ်ရေး၊ ငြိမ်းချမ်းရေး၊ တည်ငြိမ်ရေးနဲ့ ဖွံ့ဖြိုးတိုးတက် ရေးဆောင်ရွက်နေမှုရဲ့ အစိတ်အပိုင်းတစ်ရပ်အဖြစ် ရခိုင် ပြည်နယ်မှာ ကျူးလွန်တဲ့ လူ့အခွင့်အရေး ချိုးဖောက်မှုတွေ၊ ရက်စက်ကြမ်းကြုတ်မှုတွေကို ဒီကော်မရှင်က စုံစမ်းစစ်ဆေး မှာဖြစ်ပါတယ်။ လွတ်လပ်သော စုံစမ်းစစ်ဆေးရေး ကော်မရှင်မှာ ဖိလစ်ပိုင်နိုင်ငံ၊ ဒုတိယ နိုင်ငံခြားရေးဝန်ကြီး ဟောင်း မစ္စ ရိုဆာရီယို မာနာလိုက ဥက္ကဋ္ဌအဖြစ် ဆောင်ရွက်ပြီး၊ ကုလသမဂ္ဂဆိုင်ရာ ဂျပန်အမြဲတမ်းကိုယ်စား လှယ်ဟောင်းနဲ့ ကုလသမဂ္ဂ လက်ထောက်အတွင်းရေးမှူး ချုပ်ဟောင်း သံအမတ်ကြီး ကင်ဇို အိုရှီးမား၊ မြန်မာနိုင်ငံ သားနှစ်ဦးဖြစ်တဲ့ နိုင်ငံတော်ဖွဲ့စည်းပုံ အခြေခံဥပဒေဆိုင်ရာ ခုံရုံးဥက္ကဋ္ဌဟောင်းနဲ့ ယူနီဆက်အဆင့်မြင့်အရာရှိကြီး ဟောင်းတို့ ပါဝင်ကြပါတယ်။
ရခိုင်ပြည်နယ်ဆိုင်ရာ အကြံပေးကော်မရှင်ရဲ့ အကြံပြုချက်များနဲ့အတူ လွတ်လပ်သော စုံစမ်းစစ်ဆေး ရေးကော်မရှင်ရဲ့ လုပ်ငန်းဆောင်ရွက်ချက်ဟာလည်း ရခိုင်ပြည်နယ်ရဲ့ ကာလရှည်ကြာစွာ တည်ရှိခဲ့တဲ့ ပြဿနာ များကို ဖြေရှင်းဆောင်ရွက်ရာမှာ အရေးပါတဲ့ လမ်းပြ အလင်းရောင်တစ်ခု ဖြစ်လာမယ်လို့ မျှော်လင့်ထားပါတယ်။
သဘာပတိကြီးခင်ဗျား-
မြန်မာနိုင်ငံ ရင်ဆိုင်ကြုံတွေ့နေရတဲ့ စိန်ခေါ်မှုတွေ ဟာ ရှုပ်ထွေးနက်နဲပြီး၊ ဘက်ပေါင်းစုံ ဖြစ်ပါတယ်။ သို့သော် လည်း မြန်မာပြည်သူတွေဟာ ကြံ့ကြံ့ခံနိုင်ကြပါတယ်။ ပဋိပက္ခ၊ ဖွံ့ဖြိုးမှုနောက်ကျမှုနဲ့ သဟဇာတမရှိမှုတွေကို ဆယ်စုနှစ်များစွာခံစားခဲ့ရတဲ့ မြန်မာနိုင်ငံကို ငြိမ်းချမ်းရေး၊ ဖွံ့ဖြိုးတိုးတက်မှုနဲ့ တစ်မျိုးသားလုံး သဟဇာတဖြစ်မှုတွေ ဆောင်ကြဉ်းပေးနိုင်ဖို့ ကြိုးပမ်းကြရာမှာ အခက်အခဲ အားလုံး၊ စိန်ခေါ်မှုများအားလုံးကို ရင်ဆိုင်ဖြေရှင်းကြဖို့ ကျွန်တော်တို့ဟာ စည်းလုံးညီညွတ်စွာ ရပ်တည်လျက်ရှိပါ ကြောင်း ပြောကြားလိုပါတယ်။
ကျေးဇူးတင်ပါတယ်။
No comments:
Post a Comment