မိုးပန်းပွင့်ရဲ့ သင်္ကေတ' ရုပ်ရှင်ဇာတ်ကား စက်တင်ဘာ ၁၄ ရက်မှစတင်၍ မြန်မာတစ်နိုင်ငံလုံးရှိ အဆင့်မြင့်ရုပ်ရှင်ရုံကြီးများတွင် ပြသသွားမည်

ရန်ကုန် စက်တင်ဘာ ၅

FOREVER GROUPကစီစဉ်ထုတ်လုပ်ပြီး ဒါရိုက်တာ ကိုပေါက် ရိုက်ကူးသည့် 'မိုးပန်းပွင့်ရဲ့ သင်္ကေတ' ရုပ်ရှင်ဇာတ်ကား စာနယ်ဇင်းအကြိုမိတ်ဆက်ပွဲ အခမ်းအနားကို စက်တင်ဘာ ၄ ရက် ညနေ ၆ နာရီခွဲက ရန်ကုန်မြို့ Junction Cityရှိ JCGVရုပ်ရှင်ရုံ၌ပြသခဲ့ပြီး စက်တင်ဘာ ၁၄ ရက်မှစတင်၍ မြန်မာတစ်နိုင်ငံလုံးရှိ အဆင့်မြင့်ရုပ်ရှင်ရုံကြီးများတွင် ပြသသွားမည်ဖြစ်ကြောင်း သိရသည်။

'မိုးပန်းပွင့်ရဲ့ သင်္ကေတ' သည် တစ်ဦးနှင့်တစ်ဦး ရန်သူကဲ့သို့ အမုန်း တရားများ ပွားခဲ့ကြသော်လည်း တကယ်တမ်း အရေးကြုံသည့်အခါ ရိုင်းပင်းကူညီကြပုံ၊ သားသမီးနှင့် မိဘတို့အကြား အုပ်ထိန်းမှု၊ ခံယူမှု၊ ပေးဆပ်မှုနှင့် နားလည်မှုများ လွဲမှား သွားပါက သားသမီးတို့၏ အနာဂတ် ကို ရိုက်ခတ်လာနိုင်ပုံတို့ကို ရည်ရွယ် ၍ ရိုက်ကူးထားခြင်းဖြစ်သည်။

ဒါရိုက်တာ ကိုပေါက်က ''ဒီဇာတ်ကားဇာတ်ညွှန်းကို ကျွန်တော် လွန်ခဲ့တဲ့ ခုနစ်နှစ်လောက် ကတည်းက ရေးခဲ့တာပါ။ ဒီကားဟာ ကျွန်တော်ပထမဆုံးရိုက်တဲ့ ရုပ်ရှင် ဇာတ်ကားပါ။ ဒီဇာတ်လမ်းကိုရိုက်ပြီးမှ တခြားဇာတ်လမ်းတွေကို ရိုက်မယ်လို့ ဆုံးဖြတ်ထားတဲ့အတွက် ဒီဇာတ်ကား ဟာ ကျွန်တော့်ရဲ့ ပထမဆုံးစိန်ခေါ်မှု ပါ။ ဒီဇာတ်ကားကို စရိုက်တာကနေ ရုံတင်တာနဲ့ကြားမှာ သုံးနှစ်ကြာပါ တယ်။ စိတ်တိုင်းအကျဆုံး ရုပ်ရှင်လို့ ပြောလို့ရပါတယ်။ သုံးပွင့်ဆိုင် အချစ်ဇာတ်လမ်းလေးပါ။ ရသတွေ အများကြီး ပေးထားပါတယ်။ ကျွန်တော့်ရဲ့ ကနဦး အိပ်မက် ဇာတ်ကားလေးပါ''ဟု ပြောသည်။

အဆိုပါ ဇာတ်ကားတွင် ရန်အောင်၊ ရဲအောင်၊ စိုးမြတ်သူဇာ၊ မေသဉ္ဇာဦး၊ ဟန်လင်းသန့်၊ မေမြင့်မိုရ်၊ နေအဉ္ဇရာ (ခြူးလေး)တို့နှင့် အခြားသော အနုပညာရှင်များပါဝင်ပြီး ဖိနှိပ် တားဆီးမှုများကြားမှ အချစ်၊ အာဃာတ၊ သံယောဇဉ်များနှင့် မေတ္တာတရားတို့ကို ရသမြောက် အောင် ပုံဖော်ရိုက်ကူးထားသည့် ဇာတ်ကားဖြစ်သည်။

သရုပ်ဆောင် မေမြင့်မိုရ်က ''မိုးပန်းပွင့်ဆိုတဲ့ မိန်းကလေးနေရာ က ပါဝင်ထားတာပါ။ အချစ်ကို တန်ဖိုးထားပြီး ဘဝကို ရိုးရိုးနဲ့ ဖြတ်သန်းတဲ့သူအနေနဲ့ သရုပ်ဆောင် ထားတာပါ။ ကိုယ့်ချစ်သူကို ချုပ်ချယ် ပြီး ကိုယ့်အဖေလိုဖြစ်မှာ စိုးရိမ်လို့ ချစ်သူကို နိုင်ငံရေးမလုပ်အောင် တားတဲ့ သူမျိုးပါ။ ဒီဇာတ်ကားလေးမှာ အချစ်၊ အိမ်ထောင်ရေးအပြင် ၂ဝဝ၇ ခုနှစ်တုန်းက ဖြစ်ပွားခဲ့တဲ့ ရွှေဝါရောင် အရေးအခင်းလည်းပါတယ်။ ပရိသတ် တွေကြည့်ပြီးရင် နှလုံးသားထဲမှာ တစ်ခုခုကျန်ခဲ့မယ်လို့ ထင်ပါတယ်''ဟု ပြောသည်။

သရုပ်ဆောင် နေအဉ္ဇရာ(ခြူးလေး) က ''ဒီကားမှာ ချိုမြိန်ဆိုတဲ့ ကောင်မလေးပါ။ သာမန်အဆင့်ရှိပြီး တော့ မိဘမေတ္တာကိုရပြီး ကျေးဇူး သိတတ်တဲ့သူအနေနဲ့ သရုပ်ဆောင် ထားတာပါ။ ဇာတ်လမ်းတွဲတွေသာMRTV-4 နဲ့ရိုက်ခဲ့ပေမယ့် ရုံကြီးကား အနေနဲ့ ပထမဆုံးဖြစ်ပါတယ်။ ဇာတ်လမ်းမှာဆိုရင် တာဝန်ကြီးတဲ့ နေရာမျိုးကနေ သရုပ်ဆောင်ထားရတဲ့ အတွက် ပိုပြီးစိတ်လှုပ်ရှားခဲ့ရပါတယ်။ ဒါရိုက်တာခိုင်းတဲ့အတိုင်း ကြိုးစား လုပ်ဆောင်ရင်းနဲ့ အားလုံးအဆင်ပြေ သွားခဲ့ပါတယ်''ဟု ဆိုသည်။

သရုပ်ဆောင် ဝါဝါအောင်က ''ဒီဇာတ်ကားမှာ သားသမီးသုံးယောက် ရဲ့ အမေနေရာကနေ သရုပ်ဆောင် ရတာပါ။ နိုင်ငံရေးကားမျိုး မဟုတ် ပါဘူး။ မိသားစုတွေ အတွင်းမှာ ဖြစ်တတ်တဲ့ အတွေးအခေါ် မတူတာ မျိုးလေးတွေရှိပေမယ့် မိဘတွေအနေနဲ့ သားသမီးတွေကို အစစအရာရာ တာဝန်ယူရမယ်။ သားသမီးတွေ အနေနဲ့ မိဘရဲ့ သွန်သင်ဆုံးမမှု အောက်မှာ ကြီးပြင်းရမယ်ဆိုတဲ့ ဇာတ်မျိုးပါ။ သူငယ်ချင်းသုံးဦးရဲ့ လူငယ်သဘာဝ ချစ်ခြင်းကိုဖော်ကျူး ထားပြီး လူငယ်တွေကို ဦးစားပေး ရိုက်ကူးထားတဲ့ ဇာတ်လမ်းပါ''ဟု ပြောသည်။

ဟန်လင်းသန့်၊ မေမြင့်မိုရ်နှင့် နေအဉ္ဇရာ(ခြူးလေး) တို့သည်FOREVER GROUPမှ ရိုက်ကူး ထုတ်လွှင့်သည့် ရုပ်သံဇာတ်လမ်းတွဲ များမှ သရုပ်ဆောင်များဖြစ်ကြပြီး ရုပ်ရှင်ဇာတ်ကားကြီးအနေဖြင့် 'မိုးပန်း ပွင့်ရဲ့ သင်္ကေတ' ရုပ်ရှင်ဇာတ်ကား တွင် အဓိက လူငယ်ဇာတ်ဆောင်များ အဖြစ် ပထမဆုံးအကြိမ် ပါဝင် သရုပ်ဆောင်ထားခြင်း ဖြစ်ကြောင်း သိရသည်။

FOREVER GROUPမှ ဦးသိန်း ထွန်းအောင်က ''ဒီဇာတ်ကားဟာ ပြည်သူလူထုအတွက် ဖျော်ဖြေရေး တစ်ရပ်၊ ပညာပေးမှုတစ်ရပ် ဖြစ်မယ် လို့ ယူဆတဲ့အတွက် ရုံတင်ပြသတဲ့ အဆင့်အထိရောက်အောင် ဆောင်ရွက် ခဲ့တာပါ။ ကျွန်တော်တို့ဆီမှာ ရုပ်ရှင်ဇာတ်လမ်းတွဲတွေမှာ ပါဝင် သရုပ်ဆောင်ဖို့အတွက် သရုပ်ဆောင် တွေကို လေ့ကျင့်ပျိုးထောင်ပေးနေတာ ရှိပါတယ်။ ဒီသရုပ်ဆောင်တွေကို အများကြီး လေ့ကျင့်ပေးထားပြီး ရုပ်ရှင်ကဏ္ဍနယ်ပယ်အထိ ပါဝင် လာနိုင်အောင် ကျွန်တော်တို့ဆီက ထုတ်သမျှ ဇာတ်ကားတွေထဲမှာ ထည့်သွင်းပြီးသုံးသွားမှာ ဖြစ်ပါတယ်။ ဒါဟာ မြန်မာ့ရုပ်ရှင်ကဏ္ဍနယ်ပယ် မှာ မျိုးဆက်သစ် အနုပညာရှင်တွေ ပေါ်ပေါက်လာရေးအတွက် တစ်တပ် တစ်အားပါဝင်ပြီး ဆောင်ရွက်ပေးခြင်း ဖြစ်ပါတယ်''ဟု ပြောသည်။

သတင်း- ဇော်ကြီး
ဓာတ်ပုံ- ဖေဇော်