ပြည်ထောင်စုသမ္မတမြန်မာနိုင်ငံတော်အတွင်း မှီတင်းနေထိုင်ကြသော ပြည်ထောင်စုဖွားတိုင်းရင်းသား ညီအစ်ကိုမောင်နှမများအားလုံး ၂ဝ၁၈ ခုနှစ် နှစ်သစ် အခါသမယမှာ ကျန်းမာချမ်းသာပြီး မင်္ဂလာအပေါင်း နှင့် ပြည့်စုံပါစေကြောင်း ဆုမွန်ကောင်းတောင်းလျက် နှုတ်ခွန်းဆက်သအပ်ပါတယ်။
၂ဝ၁၇ ခုနှစ် နှစ်ဟောင်းကုန်ဆုံးပြီး ၂ဝ၁၈ ခုနှစ် နှစ်သစ်ကိုစတင်ရောက်ရှိပြီ ဖြစ်ပါတယ်။ နှစ်သစ်မှာ တိုင်းရင်းသားပြည်သူတစ်ရပ်လုံး မျှော်လင့်တောင့်တ နေတဲ့ ငြိမ်းချမ်းရေးနဲ့ ဖွံ့ဖြိုးတိုးတက်ရေးတို့ အမြန်ဆုံး ရရှိအောင် ညီညီညွတ်ညွတ် ကြိုးပမ်းဆောင်ရွက်နိုင် ကြပါစေလို့ ဆန္ဒပြုလိုက်ပါတယ်။
ငြိမ်းချမ်းရေးအတွက် ဆောင်ရွက်ရာမှာ နှစ်ဟောင်း က အတွေ့အကြုံတွေကို သင်ခန်းစာယူပြီး နှစ်သစ်မှာ ငြိမ်းချမ်းရေးလုပ်ငန်းစဉ် အဆင့်ဆင့်တွေ ပိုမိုချောမွေ့ လျင်မြန်စွာ ပြီးမြောက်စေဖို့အတွက် ညီညွတ်ရေးကို အရင်းခံတဲ့ စိတ်သစ် လူသစ်များနဲ့ ဆက်လက်ကြိုးပမ်းသွားကြရမှာ ဖြစ်ပါတယ်။
စည်းလုံးညီညွတ်ပြီး အသိပညာစွမ်းအား၊ စိတ်ဓာတ်စွမ်းအားများနဲ့ အားထုတ်ကြိုးပမ်းကြမှသာ တိုင်းပြည် ဖွံ့ဖြိုးတိုးတက်မှာ ဖြစ်ပါတယ်။
အခက်အခဲတွေ မည်သို့ရှိသည်ဖြစ်စေ ပြည်သူ့စွမ်းအားဖြင့် အင်တိုက်အားတိုက် ကြိုးပမ်းဆောင်ရွက် ကြမယ်ဆိုရင်တော့ ဒီမိုကရေစီဖက်ဒရယ်ပြည်ထောင်စုကြီး အောင်မြင်စွာ တည်ဆောက်နိုင်ပြီး ထွက်ပေါ်လာမယ့် အသီးအပွင့်တွေကို ပြည်ထောင်စုသားအားလုံး တန်းတူညီမျှ ခံစားနိုင်ကြမှာဖြစ်ပါတယ်။
တိုင်းရင်းသားပြည်သူအားလုံး နှစ်သစ်မှာ ကိုယ်စိတ်နှစ်ဖြာ ကျန်းမာချမ်းသာကြပါစေ။
No comments:
Post a Comment