မြန်မာ့အလင်းအယ်ဒီတာအာဘော်
၂ဝ၁၇ ခုနှစ် တက္ကသိုလ်ဝင်စာမေးပွဲအောင်စာရင်းများကို ပြီးခဲ့သည့် ဇွန် ၁၇ ရက်က ထုတ်ပြန်ကြေညာခဲ့သည်။ မြန်မာနိုင်ငံတစ်ဝန်းလုံးနှင့် နိုင်ငံခြားစာစစ်ဌာနများ အပါအဝင် စာမေးပွဲဝင်ရောက်ဖြေဆိုသူ ၇၁၆၁၈၈ ဦးရှိသည့်အနက် ၂၄၂၇၃၆ ဦး အောင်မြင်ခဲ့သည်။ အောင်ချက် ရာခိုင်နှုန်း ၃၃ ဒသမ ၈၉ ရှိခဲ့သည်ဟု ထုတ်ပြန်ကြေညာချက်များအရ သိရှိခဲ့ရသည်။
သိပ္ပံဘာသာတွဲ၊ ဝိဇ္ဇာဘာသာတွဲ၊ ဝိပ္ပံဘာသာတွဲ စသည်ဖြင့် ဘာသာတွဲအလိုက်စစ်မေးသော မေးခွန်းများကို ဝင်ရောက်ဖြေဆိုကြသည့် ကျောင်းသား ကျောင်းသူများမှာ နေထိုင်ရာဒေသ၊ မိသားစုအခြေအနေ၊ ဘဝအခြေအနေ၊ ဉာဏ်ရည်အဆင့်အတန်း စသည်ဖြင့် မတူညီသော၊ ကွဲပြားခြားနားသော ဖြစ်တည်မှုများမှသည် ကံ၊ ဉာဏ်၊ လုံ့လ၊ ဝီရိယတို့ကို အခြေပြုကာ အောင်မြင်မှု သို့မဟုတ် ရှုံးနိမ့်မှုတို့ကို လက်ခံခဲ့ကြရခြင်း ဖြစ်သည်။ တစ်နည်းအားဖြင့် မိမိတို့စိုက်ပျိုးခဲ့သမျှ မိမိတို့ကိုယ်တိုင် ပြန်လည်ရိတ်သိမ်းရခြင်းပင်ဖြစ်သည်။
ဖခင်ကွယ်လွန်၊ မိခင်မှာတောင်သူ၊ မိသားစုစားဝတ်နေရေးက အဆင်မပြေ၊ ကိုယ်တိုင်မှာလည်း မွေးရာပါ ကိုယ်အင်္ဂါချို့ယွင်းမှုများ ကြောင့် အများနည်းတူ ဉာဏ်ရည်ပြည့်စုံသည့်တိုင်အောင် ပညာသင်ယူရန် ခက်ခက်ခဲခဲ အားထုတ်ခဲ့ရသူ၊ လူမှုကွန်ရက်ကျေးဇူးပြုမှုကြောင့် ကလျာဏမိတ္တနှင့်ကြုံဆုံရပြီး ပညာခရီးကိုဆက်ခဲ့ရသူ၊ တက္ကသိုလ် ဝင်တန်းကို ပထမအကြိမ် ဝင်ရောက်ဖြေဆိုရာတွင် မအောင်မြင်ခဲ့ သော်လည်း ရှုံးနိမ့်မှုကိုအလျှော့မပေးဘဲ ဇွဲ၊ လုံ့လ၊ ဝီရိယ၊ ကြိုးစား အားထုတ်မှု၊ အလှူရှင်ပုဂ္ဂိုလ်၏ ကူညီပေးမှု၊ မိခင်၏အားပေး စောင့်ရှောက်မှုတို့ဖြင့် ၂ဝ၁၆-၂ဝ၁၇ ပညာသင်နှစ် တက္ကသိုလ်ဝင်တန်း အောင်မြင်ခဲ့သူ မထူးထူးမွန်အား ၂ဝ၁၇ ခုနှစ် ဇွန်လအတွက် ချီးကျူးဂုဏ်ပြုထိုက်သူအဖြစ် နိုင်ငံတော်အတိုင်ပင်ခံရုံးမှ ထုတ်ပြန်သည့် ကျေးဇူးတင်လွှာတွင် ရွေးချယ်ဖော်ပြခဲ့သည်။ ''ခက်ခဲကြမ်းတမ်းသော ဘဝကို ရန်လိုစိတ်ပျက်ခြင်း အလျဉ်းမရှိဘဲ ကြိုးပမ်းအားထုတ်ခဲ့သော မထူးထူးမွန်သည် ယနေ့ခေတ်လူငယ်များအတွက် အတုယူဖွယ်ရာ ကြိုးစားအားထုတ်မှု သင်္ကေတတစ်ရပ် ဖြစ်လာခဲ့ပါပြီ'' ဟူ၍လည်း ကျေးဇူးတင်လွှာတွင် ထုတ်ဖော်ချီးကျူး ဂုဏ်ပြုထားသည်ကို တွေ့ရသည်။ ဤသည်မှာ တက္ကသိုလ်ဝင်စာမေးပွဲကျရှုံးမှုကြောင့် ကိုယ့်အသက်ကိုပင် ပြန်ရန်ရှာခဲ့သည့်ဖြစ်စဉ်များ၊ စာမေးပွဲရှုံးနိမ့်မှုကို တစ်ဘဝစာ ဘဝပျက်စီးသွားသည့်နှယ် ခံယူမှုလွဲမှားခဲ့သူများကို လမ်းòန်ပြသထားသည့် အလင်းတံခါးဟုလည်း ဆိုရမည်ဖြစ်သည်။
ဘဝအောင်မြင်ရာ အောင်မြင်ကြောင်းအတွက် အဆုံးအမသြဝါဒများ၊ လမ်းညွှန်ချက်များ၊ အကြံပြုချက်၊ သွန်သင်ချက်များကို ဘာသာတရား အသီးသီး၌လည်းကောင်း၊ ဆရာအဆူဆူတို့၏ တက်ကျမ်းများတွင် လည်းကောင်း တွေ့နိုင်သည်။ ဗုဒ္ဓဝါဒအလိုအားဖြင့်မူ ဘဝအောင်မြင်ရေး တွင် အဓိပတိထိုက်သော စေတသိက်လေးပါးဖြစ်သည့် ဆန္ဒာဓိပတိ၊ ဝီရိယာဓိပတိ၊ စိတ္တာဓိပတိနှင့် ဝီမံသာဓိပတိ(ပညာ)တို့သည် တန်ခိုးဣဒ္ဓိပါဒ်နှင့် ပြည့်စုံစေသော အထောက်အပံ့များပင်ဖြစ်သည်။ အလွန်တရာ ပြင်းပြသည့်ဆန္ဒ၊ အလွန်တရာထက်သန်သည့် ဝီရိယ၊ အလွန်တရာခိုင်ခံ့သည့် စိတ်ဓာတ်၊ အလွန်တရာကြီးမားမြော်မြင်သည့် ပညာတို့က ဘဝတွင် မည်သို့သော အတားအဆီး၊ အခက်အခဲ၊ အန္တရာယ်ရန်စွယ်ဟူသမျှကိုမဆို ရင်ဆိုင်ကျော်လွှားအောင်မြင်စေနိုင် သည်ချည်းဖြစ်သည်။
ငြိမ်းချမ်းရေးနိုဘယ်ဆုရှင် သူတော်စင်သီလရှင်ကြီး မာသာထရီဇာ (၁၉၁ဝ-၁၉၉၇) က လူ့ဘဝဖြစ်တည်မှုနှင့်ပတ်သက်၍ အကျိုးရှိရှိအသုံးချ ရန်၊ ပကတိအတိုင်းခံယူရန်၊ အကောင်းဘက်ကရှုမြင်ရန်၊ လူတစ်ယောက် အဖြစ် တာဝန်ယူရန်၊ အကောင်းအဆိုးတို့ကို ရင်ဆိုင်ရန်တိုက်တွန်းခဲ့သည်။ အထူးသဖြင့် လူအဖြစ် ဖြစ်တည်လာသော ဘဝသည် တန်ဖိုးကြီးလှသဖြင့် ဖျက်ဆီးမပစ်ရန်နှင့် ကာကွယ်စောင့်ရှောက်သွားရန် အလင်းပြခဲ့သည်။
ဘဝကို ရဲရင့်စွာစိန်ခေါ်ကာ လောကလူ့ရွာတွင် တန်ဖိုးမြင့်မားသော လူသားတစ်ဦး၊ ကမ္ဘာလောကကို ကောင်းကျိုးပြုနိုင်သူတစ်ဦးအဖြစ် အရွယ်သုံးပါး လူသားတိုင်း အားထုတ်နိုင်ကြပါစေကြောင်း။ ။
No comments:
Post a Comment