ရှမ်းပြည်နယ်ဒေသအလိုက် အမျိုးသားအဆင့်နိုင်ငံရေးဆွေးနွေးပွဲမှ ရရှိလာသည့်အဆိုပြုချက်နှင့် အကြံပြုချက်များ ပြည်ထောင်စုငြိမ်းချမ်းရေးညီလာခံ - (၂၁)ရာစုပင်လုံတွင် ဆွေးနွေးဆုံးဖြတ်မှုများ ပြုလုပ်နိုင်ရန် တင်ပြသွားမည်

တောင်ကြီး ဧပြီ ၂၅

ရှမ်းပြည်နယ်ဒေသအလိုက် အမျိုးသားအဆင့်နိုင်ငံရေး ဆွေးနွေးပွဲမှ ရရှိလာသည့် အဆိုပြုချက်နှင့် အကြံပြုချက်များကို ပြည်ထောင်စုငြိမ်းချမ်းရေးညီလာခံ-(၂၁)ရာစုပင်လုံတွင် ဆွေးနွေးဆုံးဖြတ်မှုများ ပြုလုပ်နိုင်ရန် သက်ဆိုင်ရာ လုပ်ငန်းကော်မတီများက တင်ပြသွားကြမည်ဖြစ်ကြောင်း ရှမ်းပြည်နယ် ပြည်နယ်ဝန်ကြီးချုပ် ဒေါက်တာလင်းထွဋ်က ယနေ့ကျင်းပသည့်ဆွေးနွေးပွဲ တတိယနေ့တွင် ပြောကြားသည်။

ဆွေးနွေးပွဲမှ ရရှိလာသည့် အဆိုပြုချက်နှင့် အကြံပြုချက်များအား ပြည်ထောင်စုငြိမ်းချမ်းရေးညီလာခံ- (၂၁)ရာစုပင်လုံ၏ နိုင်ငံရေးကိစ္စရပ်များ ဆွေးနွေးမှု လုပ်ငန်းကော်မတီ၊ စီးပွားရေးကိစ္စရပ်များ ဆွေးနွေးမှု လုပ်ငန်းကော်မတီနှင့် မြေယာနှင့်သဘာဝပတ်ဝန်းကျင်ဆိုင်ရာ မူဝါဒကိစ္စရပ်များ ဆွေးနွေးမှုလုပ်ငန်းကော်မတီများသို့ တင်သွင်းကာ လုပ်ငန်းကော်မတီများက ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC)မှ တစ်ဆင့် (၂၁)ရာစုပင်လုံညီလာခံတွင် ဆွေးနွေးမှုများ ပြုလုပ်နိုင်ရန် တင်ပြသွားကြမည် ဖြစ်ကြောင်း ပြည်နယ်ဝန်ကြီးချုပ်ကပြောကြားသည်။

''အမျိုးသားအဆင့် နိုင်ငံရေးဆွေးနွေးပွဲတွေဟာ အခုတစ်ကြိမ်တည်းနဲ့ ပြီးသွားမှာမဟုတ်ဘဲ ဆက်လက်ပြုလုပ်ဆောင်ရွက်သွားမယ့် လုပ်ငန်းစဉ်တွေဖြစ်တာကြောင့် နောင်ကျင်းပမယ့် နိုင်ငံရေးဆွေးနွေးပွဲတွေမှာလည်း ပြည့်ပြည့်စုံစုံတင်ပြဆွေးနွေးနိုင်ဖို့ ကြိုတင်ပြင်ဆင် ဆောင်ရွက်ထားကြဖို့ အကြံပြုလိုပါတယ်''ဟု ၎င်းက ဆိုသည်။

ဒေသအလိုက် အမျိုးသားအဆင့်နိုင်ငံရေးဆွေးနွေး ပွဲကျင်းပခဲ့သည့် သုံးရက်တာကာလအတွင်း နိုင်ငံရေးပါတီနှင့် နိုင်ငံရေးအဖွဲ့အစည်းများမှ ကိုယ်စားလှယ်များ၊ ကိုယ်ပိုင်အုပ်ချုပ်ခွင့်ရတိုင်း/ဒေသမှ ကိုယ်စားလှယ်များ၊ ခရိုင်အသီးသီးမှ ကိုယ်စားလှယ်များနှင့် စီးပွားရေးလုပ်ငန်းရှင်များက စာတမ်းပေါင်း ၅၇ စောင်ကို ဖတ်ကြားဆွေးနွေးခဲ့ကြသည်။

တင်သွင်းဆွေးနွေးခဲ့သည့် စာတမ်းများကို သတ်မှတ် မူဘောင်များ၊ စည်းကမ်းသတ်မှတ်ချက်များနှင့်အညီ စိစစ်စုစည်းပေါင်းစပ်ပြီး စာတမ်းပြုစုရေးကော်မတီများမှ ပြည်နယ်အဆင့်နိုင်ငံရေးဆိုင်ရာ စာတမ်းတစ်စောင်၊ စီးပွားရေးဆိုင်ရာစာတမ်း တစ်စောင်၊ မြေယာနှင့် သဘာဝပတ်ဝန်းကျင်ဆိုင်ရာ စာတမ်းတစ်စောင် စုစုပေါင်း အနှစ်ချုပ်စာတမ်းသုံးစောင်ကို ဖတ်ကြားခဲ့ကြောင်း ပြည်နယ်ဝန်ကြီးချုပ်က ဆက်လက်ပြောကြားသည်။

ယနေ့ဆွေးနွေးပွဲတွင် သက်ဆိုင်ရာကဏ္ဍအလိုက် စာတမ်းများဖတ်ကြားကြပြီး ငြ်ိမ်းချမ်းရေးကော်မရှင် အဖွဲ့ဝင် စီးပွားရေးပညာရှင် ဒေါက်တာအောင်ထွန်းသက် က Business for Peace နှင့်ပတ်သက်၍ ရှင်းလင်းပြောကြားကာ ပြည်နယ်ဝန်ကြီးချုပ်က အမျိုးသားအဆင့် နိုင်ငံရေးဆွေးနွေးပွဲ ကြီးကြပ်မှုကော်မတီဥက္ကဋ္ဌအား စာတမ်းများ ပေးအပ်သည်။

အဆိုပါ အမျိုးသားအဆင့် နိုင်ငံရေးဆွေးနွေးပွဲကို ဒီမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့် အခွင့်အရေးများ၊ အာမခံချက်များ အပြည့်အဝရရှိသော ဒီမိုကရေစီနှင့် ဖက်ဒရယ်စနစ်တို့ကိုအခြေခံသည့် ပြည်ထောင်စုကို နိုင်ငံရေးဆွေးနွေးပွဲရလဒ်များနှင့်အညီ တည်ဆောက်သွားနိုင်ရန်အတွက် တိုင်းရင်းသားများ၏ လိုလားချက်များနှင့် သဘောထားဆန္ဒများကို အခြေခံပြီး ပါဝင်သင့်သူအားလုံးပါဝင်သည့် လူမျိုးအလိုက်၊ ဒေသအလိုက်၊ အကြောင်းအရာအလိုက် ကျင်းပသော အမျိုးသားအဆင့် နိုင်ငံရေးဆွေးနွေးပွဲများမှ အမြင်သဘောထားများကိုစုစည်းကာ (၂၁)ရာစုပင်လုံညီလာခံသို့ တင်ပြသွားရန် ရည်ရွယ်ကျင်းပခြင်းဖြစ်ကြောင်း သိရသည်။

မင်းထက်အောင် (မန်းကိုယ်ပွား)