ကြည်ကြည်လင်လင် ရေကိုမြင်လျက်

မြန်မာ့အလင်းအယ်ဒီတာအာဘော်

ဧရာဝတီမြစ်ရေကို သောက်သုံးရန် သင့်မသင့် ကွင်းဆင်းစစ်ဆေးသွားတော့ မည်ဟု သတင်းတစ်ခုက ဆိုသည်။ စစ်ဆေးမည့် နေရာမှာ မြစ်ညာဒေသ ကချင်ပြည်နယ်အတွင်းဖြစ်ပြီး ဧရာဝတီမြစ်ကို ပေါင်းဆုံမွေးဖွားပေးခဲ့သည့် မြစ် နှစ်သွယ်ဖြစ်သော မေခနှင့် မလိခမြစ်များတစ်လျှောက် တရားမဝင်ရွှေတူးဖော်မှုများပြုလုပ်နေကြခြင်းကြောင့် မြစ်ရေများနောက်ကျိနေသည့် အပြင် စွန့်ပစ်ရေများကြောင့် မြစ်ရေကို သုံးစွဲနေရသည့် ပြည်သူလူထု၏ကျန်းမာရေးဆိုင်ရာပြဿနာများ မဖြစ်ပွားရအောင် ရည်ရွယ်ခြင်းဖြစ် သည်ဟုလည်း သိရသည်။

ဧရာဝတီမြစ်ရေသည် အရှည်မိုင်ပေါင်း ၁၃ဝဝ ကျော် ၁၄ဝဝ နီးပါးခန့် ရှိပြီး မြစ်အစမှသည် အဆုံးထိအောင် မြန်မာနိုင်ငံ၏ပင်မအသက်သွေး ကြောကြီးသဖွယ် စီးဆင်းနေသောမြစ်တစ်စင်းဖြစ်သည်။ ချင်းတွင်းမြစ်၊ ဒုဋ္ဌဝတီမြစ် တို့အပါအဝင် ဧရာဝတီမြစ်အတွင်းစီးဝင်သော မြစ်များရှိသလို ဧရာဝတီမြစ်ရေကို စိုက်ရေးပျိုးရေးအတွက်ရော သောက်ရေသုံးရေအတွက်ပါ အမှီပြုသုံးစွဲကြရသည့် မြို့ရွာများစွာတို့မှာ မြစ်တစ်လျှောက်တည်ရှိကြသည်။ မြစ်ကြောင်း တစ်လျှောက် ရွှေရှာသည့်လုပ်ငန်းများမှာ ဧရာဝတီမြစ်ညာ ဒေသတွင်သာမက ချင်းတွင်းမြစ်နှင့် ၄င်း၏မြစ်လက်တက်၊ မြစ်ချောင်းများ တွင်ပါ ပျံ့နှံ့လုပ်ကိုင်လျက်ရှိနေကြခြင်းဖြစ်သည်။ လူသားတို့တန်ဖိုးထားကြ သည့် ရွှေဟူသော သတ္တုအောင်စအနည်းငယ်ခန့်ကိုရရှိရန် မြေလှန်ခံလိုက် ရသည့် သစ်ပင်သစ်တောများ၊ ဖြိုချဖဲ့ချခံလိုက်ရသည့် မြစ်ကမ်းပါးများနှင့် မူလသဘာဝဖျက်ဆီးခံလိုက်ရသည့် မြစ်ချောင်းအင်းအိုင် ရေနေရေထိုင် များ၊ မူလသဘာဝ ပတ်ဝန်းကျင်တွင် ပေါက်ရောက် ရှင်သန်ကျက်စားနေထိုင် ကြသည့် သားငှက်တိရစ္ဆာန်အပင်သတ္တဝါများစသည့် ဇီဝမျိုးစုံမျိုးကွဲများ၏ တန်ဖိုးမှာ ရွှေထက် အဆပေါင်းများစွာ တန်ဖိုးကြီးမားကြသည်ကို ဂရုပြုသူ နည်းပါးလှသည်။

''ကြည်ကြည်လင်လင်၊ ရေကိုမြင်လျက်၊ ရေတွင်ဆိပ်ခိုး၊ ပါလေနိုးဖြင့်၊ စိုးရွံ့မသောက်သာပြီတကား''။ အရှေ့နှင့် အနောက် က္ဘာ့နိုင်ငံကြီးနှစ်ခုနှင့် အုပ်စုကြီးနှစ်စုတို့ အင်အားပြိုင်ဆိုင်ခဲ့ကြသည့် စစ်အေးခေတ်အရှိန်မြင့် စဉ်ကာလက ရေးဖွဲ့ခဲ့သော ကဗျာလေးတစ်ပိုဒ်က ထိုခေတ် အဏုမြူ လက်နက်များစမ်းသပ်ဖောက်ခွဲမှုနှင့် အဏုမြူလက်နက်ပြိုင်ပွဲများ၏ အန္တရာယ်၊ ကမ္ဘာ့လူသားတို့၏ စိုးရိမ်ကြောင့်ကြမှုတို့ကို ကွက်ကွက်ကွင်းကွင်းဖော်ပြနိုင်သကဲ့သို့ ယနေ့တိုင်လည်း ဆက်လက်၍ မှန်ကန်ခေတ်မီ နေဆဲဟုပင် ဆိုရမည်ဖြစ်သည်။

ရွှေရှာဖွေသည့်လုပ်ငန်းများတွင် အသုံးပြုကြသည့် ဆိုင်ယာနိုက်၊ မာကျူရီစသည့် အဆိပ်ပြင်းဓာတုပစ္စည်းများ၊ စိုက်ပျိုးရေးလုပ်ငန်းသုံး ပိုးသတ်ဆေးများ၊ လောဘကြီးသလောက်ပညာနည်းသူတို့က ငါးဖမ်းရာတွင် အသုံးပြုသည့် အဆိပ်များ၊ စက်မှုဇုန်စက်ရုံအလုပ်ရုံများမှ မဆင်မခြင်စွန့် ထုတ်ထားသည့် ဓာတုဒြပ်ပေါင်းများစွာ ပျော်ဝင်နေသော ရေဆိုးများ၊ စည်းကမ်းမဲ့သူတို့က စွန့်ပစ်လိုက်သည့် အိမ်တွင်းအညစ်အကြေးများနှင့် အမှိုက်သရိုက်များက ဧရာဝတီမြစ်ကြီးနှင့်တကွ မြစ်အတွင်းသို့စီးဝင်သည့် မြစ်များ၊ ချောင်းများ၏ရေများတွင်ပါ ပါဝင်လျက်ရှိနေခြင်းကြောင့် မြစ်ရေ ၏ အရည်အသွေး၊ သောက်သုံးရန် သင့်မသင့်စသည်တို့အတွက် စစ်ဆေးမှု များကို မြစ်တစ်လျှောက်လိုအပ်သည့်နေရာများတွင် ပုံမှန်စစ်ဆေးမှု ပြုလုပ်ခြင်း၊ တရားမဝင်ရွှေရှာတူးဖော်သည့်လုပ်ငန်းများကို ထိထိရောက် ရောက် အရေးယူပိတ်သိမ်းခြင်း၊ သဘာဝပတ်ဝန်းကျင်မပျက်စီးအောင် ထိန်းသိမ်းခြင်း၊ ရေထုမြေထုညစ်ညမ်းမှုမရှိအောင် ဆောင်ရွက်ခြင်းတို့ အတွက် အလေးအနက်ထားကြဖို့ အချိန်ကျရောက်နေပြီဖြစ်သည်။

သဘာဝအလျောက်မဟုတ်သည့် ဓာတုပစ္စည်းများကို လူတို့ဖန်တီးကာ ပမာဏများစွာထုတ်လုပ်မှုများမှာ ဒုတိယကမ္ဘာစစ်ကာလများအတွင်း စတင်ခဲ့ခြင်းဖြစ်သည်။ လူလုပ်ဓာတုပစ္စည်းများ၏ ရေထုမြေထုများအတွင်း ပျော်ဝင်ပေါင်းစပ်သွားမှုများနှင့် အန္တရာယ်တို့၏အတိုင်းအဆပမာဏများမှာ သုတေသီပညာရှင်တို့ပင် ကြိုတင်မသိမြင် မခန့်မှန်းနိုင်လောက်အောင် ကြောက်ခမန်းလိလိဖြစ်ကြောင်း စာပေများတွင်ဖတ်ရှုရသည်။ စည်းကမ်း မဲ့စွန့်ပစ်ရန်လွယ်ကူသလောက် ဖယ်ရှားသန့်စင်ရန် မလွယ်ကူသည့် ဓာတု အဆိပ်သင့်ပစ္စည်းများ မြစ်ချောင်းများထဲသို့ အလွယ်တကူမစွန့်ပစ်စေရေး ထိထိရောက်ရောက်ဆောင်ရွက်နိုင်မှသာ ကြည်ကြည်လင်လင်ရေကို မြင်လျက် စိုးရွံ့စိတ်ဖြင့် မသောက်သုံးနိုင်သည့် အခြေအနေများမှ လွန်မြောက်နိုင်မည်ဖြစ်ပါကြောင်း။ ။