အမျိုးသားပြန်လည်သင့်မြတ်ရေး၊ အကျင့်ပျက်ခြစားမှုတိုက်ဖျက်ရေး ဆောင်ရွက်နိုင်မည်ဟု မျှော်လင့်

အစိုးရသစ်၏ မျှော်မှန်းချက်၊ ရည်မှန်းချက်ဖြစ်သည့် 'ပြောင်းလဲချိန်တန်ပြီ'ဆိုသည့်ကြွေးကြော်သံနှင့်အညီ ဖေဖော်ဝါရီ ၁ ရက်က လွှတ်တော်အဟောင်းမှ လွှတ်တော်အသစ်သို့လည်းကောင်း၊ ယခု မတ် ၃ဝ ရက်တွင် အုပ်ချုပ်ရေးကဏ္ဍဆိုင်ရာအပြောင်းအလဲအဖြစ်သို့လည်းကောင်း ပြောင်းလဲလာခဲ့ပြီဖြစ်သည်။

အဆိုပါအပြောင်းအလဲနှစ်ရပ်တွင် လွှတ်တော်အပြောင်းအလဲဆိုသည်မှာ အချုပ်အခြာအာဏာထဲတွင်ပါရှိသည့် ဥပဒေပြုရေးနှင့်ပတ်သက်၍ ပြောင်းလဲခြင်းဖြစ်ပြီး အုပ်ချုပ်ရေးပိုင်းဆိုင်ရာပြောင်းလဲခြင်းသည် ပြည်သူလူထုနှင့် တိုက်ရိုက်ထိတွေ့ရသည့် အပြောင်းအလဲဖြစ်သောကြောင့် ပြည်သူအများ စိတ်ဝင်စားသည်။ အစိုးရသစ်အပြောင်းအလဲမှာ ပြည်သူများနှင့် တိုက်ရိုက်ထိတွေ့ရသည့် အောက်ခြေမှ ဗဟိုကနေတစ်ဆင့် အားသွန်ခွန်စိုက်လုပ်ဆောင်ရတော့မည်ဖြစ်သည်။

ပြည်သူများနှင့် တိုက်ရိုက်ထိတွေ့မှုဆိုရာ၌ နိုင်ငံတော်အဆင့်မှ ရပ်/ကျေး အဆင့်အထိ တစ်ဆက်တစ်စပ်တည်းသွားနေရမည်ဖြစ်ပြီး ဗဟိုလုပ်ဆောင်မှုကို အောက်ခြေအထိရောက်ရန် အလွန်ကြန့်ကြာတတ်သည်များ ရှိသည်။ ၎င်းကို အုပ်ချုပ်ရေးပိုင်းအနေဖြင့် သတိထားဖို့လိုမည်ဖြစ်သည်။ ပြည်သူများမျှော်လင့် ထားသည့်အတိုင်း ဖြစ်လာရန် ပြည်သူများနှင့် တိုက်ရိုက်ထိတွေ့မှုကို မြန်မြန်နှင့် ပြင်းပြင်းလှုပ်ရှားဆောင်ရွက်နိုင်မှသာလျှင် ပြည်သူများက အသိမြန်ကာ အမြန်အသိအမှတ်ပြုမည်ဖြစ်သည်။

အစိုးရသစ်တစ်ရပ်ကို လွှဲပြောင်းပေးခဲ့ပြီဖြစ်ရာ ရက်ပေါင်း ၁ဝဝ အတွင်း လုပ်ဆောင်မည့် လုပ်ငန်းဆောင်တာများကို အစိုးရသစ်အနေဖြင့် ထိထိမိမိ လုပ်ဆောင်လိမ့်မည်ဖြစ်သော်လည်း ပြည်သူလူထုအနေဖြင့် စိတ်ရှည်ရှည်ဖြင့် စောင့်ကြည့်နိုင်ဖို့လည်း လိုအပ်မည်ဖြစ်သည်။ ထို့ပြင် အစိုးရသစ်အနေဖြင့် အမျိုးသားပြန်လည်သင့်မြတ်ရေးအပြင် အကျင့်ပျက်ခြစားမှုနှင့် လာဘ်ပေးလာဘ်ယူမှုတို့ကို အတိုင်းအတာတစ်ခုအထိ လျှော့ချနိုင်လိမ့်မည်ဟုလည်း မျှော်လင့်ရသည်။

''လွှတ်တော်ကိုလာရောက်လေ့လာတဲ့သူတွေကိုတွေ့ရတဲ့အခါ သူတို့ရဲ့ မျှော်လင့်ချက်တွေနဲ့ သူတို့ရဲ့ ဝမ်းသာပီတိဖြစ်မှုတွေက ကျွန်မတို့ဆီကိုအများ ကြီးကူးစက်ပါတယ်။ အရင်က ကိုယ်တွေချည်းပဲလွှတ်တော်တက်နေရတော့ ဒီလောက်မသိသာဘူး။ ကျွန်မတို့စိတ်ထဲမှာက ရှေ့မှာထမ်းဆောင်ရမယ့်တာဝန်တွေ၊ အခက်အခဲတွေနဲ့ စိန်ခေါ်မှုတွေကိုပဲ ပိုပြီးအာရုံစိုက်မိနေတယ်။ ပြည်သူလူထုရဲ့စိတ်အားထက်သန်မှု၊ မျှော်လင့်ချက်တွေကိုတွေ့ရတာ ပိုပြီးစိတ်လှုပ်ရှား စေပါတယ်''ဟု ရန်ကင်းမဲဆန္ဒနယ်မှ လွှတ်တော်ကိုယ်စားလှယ် ဒေါ်ဇင်မာအောင် က ပြောသည်။

မြန်မာနိုင်ငံသည် ဖွံ့ဖြိုးမှုနောက်အကျဆုံးနိုင်ငံများထဲတွင် အပါအဝင်ဖြစ်ပြီး စီးပွားရေး၊ လူမှုရေးအပြင် နိုင်ငံရေးအကျပ်အတည်းများလည်း များစွာရှိနေသည်။ စီးပွားရေးရင်းနှီးမြှုပ်နှံမှုကဏ္ဍအပြင် တစ်ချိန်ကဖြစ်ပေါ်ခဲ့သည့် ပြဿနာပေါင်းများစွာကလည်း လွှတ်တော်ကော်မတီများဆီသို့ တိုင်စာတွေတက်နေသည်မှာ အတော်ပင်များနေပြီဖြစ်ကြောင်းလည်း သိရသည်။ ထို့ပြင် လယ်ယာမြေကိစ္စနှင့် အလုပ်အကိုင်အခွင့်အလမ်းကိစ္စများကိုလည်း အစိုးရသစ်အနေဖြင့် ဖြေရှင်းရဦးမည်ဖြစ်သည်။

ထို့ကြောင့် အစိုးရသစ်ရင်ဆိုင်ရမည့် စိန်ခေါ်မှုများနှင့် စပ်လျဉ်း၍ ရန်ကင်းမဲဆန္ဒနယ်မှ လွှတ်တော်ကိုယ်စားလှယ် ဒေါ်ဇင်မာအောင်က ''အဲဒါတွေကို ဘယ်လောက်ဖြေရှင်းနိုင်မလဲဆိုတာက ကျွန်မတို့ အာရုံစိုက်နေရတယ်။ မဖြေရှင်းနိုင်သေးတဲ့အတွက်လည်း စိန်ခေါ်မှုတွေဖြစ်နေရတာပါ။ ဘယ်လောက်ပူးပေါင်းဆောင်ရွက်နိုင်မလဲဆိုတာလည်း စိန်ခေါ်မှုတစ်ခုပါ။ ဒီစိန်ခေါ်မှုတွေကို ကျော်ဖြတ်နိုင်ရင်တော့ ကျွန်မတို့နိုင်ငံဟာ ပြည်သူလူထုက မျှော်လင့်နေတဲ့ ဒီမိုကရေစီနိုင်ငံတစ်ခုကို ထူထောင်နိုင်မှာပါ''ဟု ဆိုသည်။

မိုးကောင်းမြို့နယ် မဲဆန္ဒနယ်မှ ဦးဝင်းနိုင်ကမူ ''ဒီမိုကရေစီအသွင်ကူး ပြောင်းရေးကာလမှာ အာဏာလွှဲပြောင်းမှုဟာ မလွဲမသွေကြုံရမှာပါ။ မဲအများ စုအနိုင်ရတဲ့အဖွဲ့အစည်းကနေ အစိုးရသစ်ဖွဲ့စည်းတာဆိုတော့ နောက်နောင်ကိုလည်း အဆင်ပြေပြေလွှဲပြောင်းပေးနိုင်မယ်လို့လည်း မြင်ပါတယ်။ မြန်မာ့နိုင်ငံရေးရဲ့ ဒီမိုကရေစီနေ့သစ် စတင်မယ့်နေ့လို့လည်း မျှော်လင့်တယ်။ အစိုးရသစ်အနေနဲ့ မြန်မာနိုင်ငံသူ နိုင်ငံသားအားလုံးကို စေတနာ၊ မေတ္တာနဲ့ အုပ်ချုပ်မယ်၊ ဖြေရှင်းမယ်၊ ပူးပေါင်းဆောင်ရွက်မယ်ဆိုရင်တော့ ရင်ဆိုင်ရမယ့် အခက်အခဲတွေကို အောင်မြင်ကျော်လွှားနိုင်မှာပါ''ဟု ပြောသည်။

အစိုးရသစ်လက်ထက်တွင် တွေ့ကြုံလာမည့် အခက်အခဲအမျိုးမျိုးရှိနိုင်သော်လည်း တိုင်းပြည်ဖွံ့ဖြိုးတိုးတက်ရေးအတွက် လုပ်ဆောင်ရမည့် ပြည်တွင်း ငြိမ်းချမ်းရေးနှင့် အမျိုးသားရင်ကြားစေ့ရေးအပါအဝင် ကဏ္ဍပေါင်းစုံအား အမျိုးသားပြန်လည်သင့်မြတ်ရေးမူကိုအခြေခံကာ သဟဇာတရှုထောင့်မှတစ်ဆင့် ဆောင်ရွက်သွားရန်လည်း အရေးကြီးပေသည်။

ထို့ပြင် အစိုးရသစ်လက်ထက်တွင် လွှတ်တော်ကဏ္ဍအနေဖြင့် ဆောင်ရွက်မည့်လုပ်ငန်းစဉ်များနှင့်စပ်လျဉ်း၍ ''လွှတ်တော်အနေနဲ့ကတော့ အရင် ရှိရင်းစွဲကော်မတီတွေကနေပြီးတော့ အစိုးရသစ်လက်ထက်မှာ ဆက်ပြီးလုပ် ဆောင်ရမယ့် ဥပဒေကြမ်းကိစ္စတွေကိုလည်း လုပ်ရမှာရှိသလို ပြန်ပြီးပြင်ရမယ့် ဥပဒေအချို့ကိုပြင်ပြီး ပယ်ဖျက်သင့်တာတွေကို ပယ်ဖျက်ဖို့ လုပ်ကြမှာပါ။ လွှတ်တော်အနေနဲ့ကတော့ ဥပဒေပြုမယ်၊ စောင့်ကြည့်မယ်၊ ထိန်းညှိမယ်။ ဒ့ါအပြင် ပူးပေါင်းဆောင်ရွက်စရာရှိရင် ပူးပေါင်းဆောင်ရွက်ဖို့ပဲရှိပါတယ်''ဟု ဆက်လက်ပြောကြားသည်။

ယနေ့ကျင်းပသည့် ပြည်ထောင်စုလွှတ်တော်အစည်းအဝေးတွင် နိုင်ငံတော်သမ္မတ ဦးထင်ကျော်၏ မိန့်ခွန်းတွင် အမျိုးသားရင်ကြားစေ့ရေး၊ ပြည်တွင်း ငြိမ်းချမ်းရေးနှင့် ဒီမိုကရေစီဖက်ဒရယ်ပြည်ထောင်စုဖြစ်ပေါ်ရေးကို ရှေးရှုသည့် ဖွဲ့စည်းပုံအခြေခံဥပဒေတစ်ခုပေါ်ပေါက်ရေးတို့ကို ဦးစားပေးပြောကြားခဲ့သည်။

ထိုသို့ နိုင်ငံတော်သမ္မတ ဦးထင်ကျော် မိန့်ခွန်းပြောကြားအပြီးတွင် ''ဒီနေ့ဟာဆိုရင် အရပ်သားသမ္မတတစ်ယောက် တက်လာတာဖြစ်တဲ့အတွက်ကြောင့် အင်မတန်မှ ဝမ်းသာကြိုဆိုပါတယ်။ သမ္မတကြီးပြောသွားတဲ့ မိန့်ခွန်းကိုလည်း တော်တော်လေးအားရနှစ်ထောင်းဖြစ်မိပါတယ်။ ပြောသွားတဲ့အထဲမှာ တိုင်းရင်းသားတွေအပေါ်မှာ လိုလားတဲ့ငြိမ်းချမ်းရေးကို ပြည်သူပြည်သား တိုင်းရင်းသားများအားလုံးရဲ့ အကျိုးတွေအတွက် ဆောင်ရွက်သွားပါမယ်။ စစ်မှန်တဲ့ ဖက်ဒရယ်ပြည်ထောင်စုစနစ်ကို ဖော်ဆောင်သွားမယ်ဆိုတာလည်း ကြားသိရပါတယ်။ အဲဒီအတွက် ကြိုလည်းကြိုဆိုပါတယ်''ဟု ပြည်ထောင်စုကြံ့ခိုင် ရေးနှင့်ဖွံ့ဖြိုးရေးပါတီမှ ဦးစိုင်းထွန်းအောင်က ပြောကြားသည်။

နိုင်ငံတော်သမ္မတ ဦးထင်ကျော်ပြောကြားသည့် မိန့်ခွန်းတွင် ဒီမိုကရေစီ စံချိန်စံညွှန်းများနှင့်ကိုက်ညီသည့် ဖွဲ့စည်းပုံအခြေခံဥပဒေတစ်ရပ် ဖြစ်ပေါ်လာရေးအတွက်လည်း ဆောင်ရွက်ရမည့်တာဝန်ရှိသည်ဟု ဆိုခဲ့သည်။

ထို့ကြောင့် ရှမ်းတိုင်းရင်းသားများဒီမိုကရေစီအဖွဲ့ချုပ်မှ ဦးစိုင်းသီဟကျော်က''ပြည်သူတွေရွေးချယ်တင်မြှောက်လို့ တက်လာတဲ့အစိုးရဆိုတော့ ကျွန်တော်တို့အနေနဲ့လည်း အထူးပဲဝမ်းမြောက်မိပါတယ်။ နှစ်ပေါင်းမြောက် မြားစွာခံစားခဲ့ရတဲ့ ပြည်သူတွေရဲ့ လူမှုဘဝဒုက္ခတွေအားလုံး၊ တိုင်းရင်းသားများ အားလုံးတောင်းဆိုထားတဲ့ စစ်မှန်တဲ့ဖက်ဒရယ်ပြည်ထောင်စုတည်ဆောက် နိုင်ရေးအတွက် ဖွဲ့စည်းပုံအခြေခံဥပဒေ ပြင်ဆင်သွားမယ်ဆိုတဲ့အပိုင်းကိုလည်း နိုင်ငံတော်သမ္မတက ပြောကြားသွားတဲ့အတွက်ကြောင့် အလွန်ပဲမျှော်လင့် မိပါတယ်။ ပြောခဲ့သလိုလည်း ဆောင်ရွက်နိုင်ပါစေလို့လည်း ဆုတောင်းပေးလို ပါတယ်''ဟု ဆိုသည်။

''နှစ်(၅ဝ)လောက်အုပ်ချုပ်ခဲ့တဲ့ စစ်အစိုးရလက်ထက်ကနေပြီးတော့ အရပ်သားအစိုးရစစ်စစ်ကို ပြောင်းလဲတဲ့အတွက် အများကြီးဂုဏ်ယူပါတယ်။ ကြုံတွေ့ရမယ့်အခက်အခဲတွေက အများကြီးပါ။ ပထမအချက်ကတော့ တိုင်းရင်းသားရင်ကြားစေ့ရေးကို အစိုးရသစ်အနေနဲ့ ပထမဦးဆုံး ရင်ဆိုင်ဖြေရှင်း ရနိုင်တယ်လို့ ကျွန်တော်ထင်ပါတယ်။ အစိုးရအဖွဲ့သစ်အနေနဲ့ တတ်သိပညာရှင် တွေပူးပေါင်းပြီး ပြည်သူတွေက အစိုးရသစ်အပေါ် ယုံကြည်အားကိုးတဲ့ မျှော်လင့်ချက်ကို အများကြီးဖော်ဆောင်ပေးနိုင်မယ်လို့ မျှော်လင့်ပါတယ်''ဟု ရှမ်းပြည်နယ်(မြောက်ပိုင်း) မိုးမိတ်မဲဆန္ဒနယ်မှ ဦးတိုးသောင်က ပြောသည်။

ဆက်လက်ပြီး''လောလောဆယ် ဖွဲ့စည်းပုံအခြေခံဥပဒေကို ပြင်ဆင်နိုင် ခြင်းမရှိသေးတဲ့အချိန်မှာတော့ သမ္မတနဲ့အဖွဲ့ဝင်အားလုံးက ဖွဲ့စည်းပုံအခြေခံ ဥပဒေအတိုင်းလိုက်နာဆောင်ရွက်ပါမယ်၊ ကာကွယ်စောင့်ရှောက်ပါမယ် ဆိုတာကို ကတိသစ္စာပြုထားကြရတာဖြစ်တဲ့အတွက် လောလောဆယ်မှာတော့ ဖွဲ့စည်းပုံအခြေခံဥပဒေအတိုင်း ဆောင်ရွက်သွားရမှာဖြစ်ပါတယ်။ နောက်ပိုင်းမှာ ပြင်ဆင်ဖို့ကြိုးစားမယ်ဆိုတာကတော့ နောက်ပိုင်းတစ်ကဏ္ဍပါ။ ပြင်ဆင်ပြီးပြီဆိုရင်လည်းပဲ ပြင်ဆင်တဲ့အတိုင်း အားလုံးကလိုက်နာဆောင်ရွက် ဖို့လိုအပ်ပါတယ်။ ဆက်သွားမယ့်လမ်းကြောင်းမှာ ဖွဲ့စည်းပုံအခြေခံဥပဒေ ပြင်ဆင်မယ့်အကြောင်းပါလာတဲ့အတွက်ကြောင့်မို့ အခက်အခဲကတော့ တပ်မတော်ရဲ့သဘောတူညီချက်ရယူဆောင်ရွက်ဖို့ဆိုရင် အခက်အခဲရှိနိုင်လိမ့် မယ်လို့ ဆိုနိုင်ပါတယ်။ တကယ်လို့ တပ်မတော်ဘက်က သဘောတူညီချက်ရပြီ ဆိုရင်တော့ အရာအားလုံးအဆင်ပြေချောမွေ့သွားလိမ့်မယ်လို့ ယုံကြည်ပါတယ်''ဟု ဦးစိုင်းသီဟကျော်က ဆိုသည်။

''ဒီနေ့ လွှတ်တော်ကို ပထမဦးဆုံး လာရောက်လေ့လာတာပါ။ အရပ်သား သမ္မတ ပထမဦးဆုံး စတင်ဦးဆောင်မှာဖြစ်တဲ့အတွက် ကောင်းမယ်လို့ မျှော်လင့်ပါတယ်။ တိုင်းပြည်က ဒဏ်ရာဒဏ်ချက်တွေများတော့ တိုင်းပြည်ဖွံ့ဖြိုး တိုးတက်ဖို့ ရင်ဆိုင်ကျော်လွှားမယ့် အခက်အခဲတွေတော့ အများကြီးရှိပါတယ်။ ဒါပေမယ့် အမေစုဦးဆောင်တဲ့အစိုးရသစ်မှာ ထိုအခက်အခဲတွေကို အောင်မြင်စွာကျော်လွှားနိုင်မယ်လို့ ယုံကြည်ပါတယ်''ဟု မန္တလေးမြို့ ချမ်းအေးသာစံ မြို့နယ်မှ လွှတ်တော်သို့ လာရောက်လေ့လာသူ ဦးအေးကျော်က ပြောသည်။

ပြည်သူတွေထဲက ပြည်သူတစ်ဦးဖြစ်သည့် လွှတ်တော်သို့ လာရောက်လေ့လာသူ မရမ်းကုန်းမြို့နယ်မှ ဒေါ်စန်းနွဲ့ကလည်း ''အနှစ်နှစ်အလလ မျှော်လင့် စောင့်စားခဲ့ရတဲ့၊ ကြိုးစားခဲ့တဲ့ အနှစ်သာရကို ဒီနေ့ပြည့်ပြည့်ဝဝ ခံစားခဲ့ရတယ်။ ခံစားမှုနဲ့အလျောက် တာဝန်ယူမှုတွေလည်း ရှိပါတယ်။ သမ္မတကြီးပြောတဲ့ မိန့်ခွန်းက တိုတိုနဲ့လိုရင်းပဲပြောသွားတယ်။ အချက်အလက်ကလည်း ပြန်တွေးကြည့်လိုက်ရင်အများကြီးပဲ။ ကိုယ့်ကိုယ်ကိုယ်ပြန်မွမ်းမံပြီးတော့ တိုင်းပြည်အတွက် ငါလည်းတာဝန်ရှိနေပြီဆိုတာ သမ္မတတစ်ယောက်တည်းပဲ ပြောလို့မရဘူး။ သမ္မတတာဝန်ယူသွားသလို ပြည်သူလူထုအားလုံးကလည်း ကိုယ့်တာဝန် ကိုယ်ကျေပြီးတော့ ဆောင်ရွက်ကြဖို့လိုတယ်''ဟု ပြောသည်။

''ဘာပဲပြောပြော လက်ရှိအနေအထားအရ အကောင်းဆုံးအဆင့်ကို ရောက်ရှိနေပြီလို့ ပြောလို့ရပါတယ်။ အခုအခြေအနေက တိုက်ဆိုင်တာမဟုတ်ပါဘူး။ ပြည်သူတွေပေါင်းစုပြီးတော့ ဖြစ်ပေါ်လာတဲ့အနေအထားပါ။ ရှေ့ဆက်ပြီး ပြည်သူအားလုံး ပူးပေါင်းပါဝင်ပြီးတော့ တိုင်းပြည်ဖွံ့ဖြိုးတိုးတက်ဖို့ ကြိုးစား ရဦးမှာပါ'' ဟု ပန်းတနော်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမန်းညွန့်သိမ်းက ပြောသည်။

ဒေါ်အောင်ဆန်းစုကြည်သည် ပါတီဥက္ကဋ္ဌအဖြစ်မှ အစိုးရအဖွဲ့ဝန်ကြီးအဖြစ် တာဝန်ယူတော့မည်ဖြစ်ရာ ဒေါ်အောင်ဆန်းစုကြည်ပါတီတွင် မရှိပါက ပါတီ၏ ရှေ့ဆက်လုပ်ဆောင်မည့်အရေးနှင့်ပတ်သက်၍ အမျိုးသားဒီမိုကရေစီ အဖွဲ့ချုပ်မှ ဗဟိုအလုပ်အမှုဆောင်အဖွဲ့ဝင် ဦးဥာဏ်ဝင်းအား မေးမြန်းခဲ့ရာ ''ဒေါ်အောင်ဆန်းစုကြည်ရဲ့ သြဇာအာဏာဟာ ကျွန်တော်တို့အလွန်လိုချင်တဲ့ အရာပါ။ အခုလို ဖြစ်သွားတယ်ဆိုတာကလည်း ကျွန်တော်တို့က လိုချင်လို့ ဖြစ်တာမဟုတ်ဘူး။ ဥပဒေအရလုပ်လို့မရလို့ လုပ်လို့ရတာကို လုပ်သွားတဲ့ သဘောပါ။ ပါတီကိုတော့ အတွင်းရေးမှူးအဖွဲ့က ဆက်လုပ်မယ်။ ပြန်လည် ဖွဲ့စည်းရေးလုပ်မှာပါ။ ဒါပေမယ့် လက်ရှိကတော့ အတွင်းရေးမှူး ငါးဦးက ဦးဆောင်မှာပါ''ဟု ဆိုသည်။

ယနေ့ကျင်းပသော ပြည်ထောင်စုလွှတ်တော်တွင် နိုင်ငံတော်သမ္မတ၊ ဒုတိယသမ္မတများအပါအဝင် နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံးဥက္ကဋ္ဌ နှင့် အဖွဲ့ဝင်များ၊ ပြည်ထောင်စုရွေးကောက်ပွဲကော်မရှင်ဥက္ကဋ္ဌနှင့် အဖွဲ့ဝင်များ၊ ပြည်ထောင်စုဝန်ကြီးများက ပြည်ထောင်စုလွှတ်တော်နာယက၏ ရှေ့မှောက်တွင် ကတိသစ္စာပြုခဲ့ကြသည်။

သတင်းဆောင်းပါးနှင့်ဓာတ်ပုံ

အေဝမ်းစိုး၊ နိုင်လင်းကြည်၊ ကိုမင်း