နေပြည်တော် ဇန်နဝါရီ ၁၂
ပြည်ထောင်စုငြိမ်းချမ်းရေးညီလာခံဖွင့်ပွဲတွင် နိုင်ငံတော်သမ္မတ ဦးသိန်းစိန် ပြောကြားခဲ့သည့် မိန့်ခွန်းအပြည့်အစုံမှာ အောက်ပါအတိုင်း ဖြစ်ပါသည် -
ဒီကနေ့ဟာ ကျွန်တော်တို့ တိုင်းပြည်ရဲ့သမိုင်းမှာ အင်မတန်ထူးခြားတဲ့ နေ့တစ်နေ့အဖြစ် မှတ်တမ်းဝင်တော့မှာဖြစ်ပါတယ်။ ကျွန်တော်တို့အားလုံးဟာ နောင်တစ်ချိန်မှာ ဂုဏ်ယူဝင့်ကြွားစွာ ပြန်ပြောင်းပြောဆိုကြရမယ့် သမိုင်းသစ်ကို အတူတကွရေးသားဖို့ ဒီနေရာကို စုရုံးရောက်ရှိလာကြပါတယ်။ ဒါဟာ လွတ်လပ်ရေးရပြီးနောက်ပိုင်းမှာ ကျွန်တော်တို့ စုစည်းနိုင်ခဲ့တဲ့ အကြီးမားဆုံးသော တိုင်းပြုပြည်ပြုကိစ္စကြီးတစ်ရပ်ကို အစပြုလိုက်ခြင်းလည်းဖြစ်ပါတယ်။
ပထမဦးစွာ ကျွန်တော်တို့အားလုံးအနေနဲ့ ဒီညီလာခံကြီးပေါ်ပေါက်လာရတဲ့ အကြောင်းအရင်းကို လက်တွေ့ကျကျနဲ့ မှန်မှန်ကန်ကန် ပြန်ပြောင်း ကြည့်ရှုကြဖို့ လိုအပ်မှာဖြစ်ပါတယ်။
ကျွန်တော်တို့အစိုးရ စတင်တာဝန်ယူတဲ့အချိန်ကစပြီး နှစ်ပေါင်းများစွာ ဖြစ်ပွားခဲ့ရတဲ့ လက်နက်ကိုင်ပဋိပက္ခများအတွက် တွေ့ဆုံညှိနှိုင်းအဖြေရှာရေး လက်နက်ကိုင်အဖွဲ့အစည်းများထံ ငြိမ်းချမ်းရေး စတင်ဖိတ်ခေါ်ခဲ့ပါတယ်။
ဒီနေရာမှာနောက်ခံသမိုင်းတွေ၊ နိုင်ငံရေးရပ်တည်ချက်တွေ၊ လိုလားချက် တွေအရ မတူညီကြတဲ့ တိုင်းရင်းသားလက်နက်ကိုင်အဖွဲ့အစည်းများအားလုံး အနေနဲ့ တူညီစွာတောင်းဆိုခဲ့ကြတဲ့ အဓိကအချက်တွေ ရှိပါတယ်။ ဒါကတော့ တစ်နိုင်ငံလုံးအတိုင်းအတာနဲ့ ပစ်ခတ်တိုက်ခိုက်မှုတွေရပ်စဲဖို့နဲ့ လက်နက်ကိုင်ပဋိပက္ခတွေကို နိုင်ငံရေးအရ တွေ့ဆုံဆွေးနွေးအဖြေရှာဖို့အတွက်ပဲဖြစ်ပါတယ်။
ဒါကြောင့် ကျွန်တော်တို့အနေနဲ့ တစ်ဖွဲ့ချင်းဆွေးနွေးတဲ့ အခြေအနေကနေ အဖွဲ့အစည်းအားလုံးအတူတကွ ပါဝင်ဆွေးနွေးနိုင်မယ့် ဖြစ်စဉ်တစ်ရပ်ကို တည်ဆောက်ခဲ့ပါတယ်။ ဒီလိုဖြစ်စဉ်တစ်ရပ်ကို အခိုင်အမာ တည်ဆောက် နိုင်တာကြောင့် ကျွန်တော်တို့နိုင်ငံရဲ့ ငြိမ်းချမ်းရေးတည်ဆောက်မှု သမိုင်းတစ်လျှောက်မှာ အစိုးရ၊ လွှတ်တော်၊ တပ်မတော်နဲ့ လက်နက်ကိုင်အဖွဲ့အစည်း များအကြားမှာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် တစ်ခုကို ရရှိလာခဲ့ပါတယ်။
ပါဝင်လက်မှတ်ထိုးတဲ့အဖွဲ့တွေနဲ့ လက်မှတ်မထိုးနိုင်သေးတဲ့ အဖွဲ့တွေ ရှိသော်လည်း ဒီသဘောတူစာချုပ်ဟာ အစိုးရ၊ လွှတ်တော်၊ တပ်မတော်နဲ့ ဆွေးနွေးဖက် လက်နက်ကိုင်အဖွဲ့အစည်းများအားလုံး သဘောတူရေးဆွဲ ခဲ့တဲ့စာချုပ်ဖြစ်ပါတယ်။
စာချုပ်အရ အပစ်အခတ်ရပ်စဲရေးဆိုင်ရာကိစ္စရပ်တွေကို ဆက်တိုက် အကောင်အထည်ဖော်နိုင်ခဲ့ပါတယ်။ လက်နက်ကိုင်ပဋိပက္ခများ၊ တိုက်ပွဲများကို ထိရောက်စွာကြိုတင်ကာကွယ်နိုင်ဖို့၊ ရပ်တန့်နိုင်ဖို့နဲ့ ဖြေရှင်းနိုင်ဖို့အတွက် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီများ၊ စစ်ဘက်ဆိုင်ရာကျင့်ဝတ်များနဲTOR များကို စတင်အကောင်အထည်ဖော် နိုင်ခဲ့ပြီဖြစ်ပါတယ်။
သို့သော်လည်း လွတ်လပ်ရေးရပြီးတည်းကပေါ်ပေါက်ခဲ့တဲ့ လက်နက် ကိုင်ပဋိပက္ခများရဲ့ ဇာစ်မြစ်ပြဿနာတွေကို နိုင်ငံရေးအရဆွေးနွေးညှိနှိုင်း အဖြေရှာတဲ့အခါမှာတော့ လက်နက်ကိုင်တပ်ဖွဲ့များသာမက သက်ဆိုင်ရာ နိုင်ငံရေးအင်အားစုတွေနဲ့ လူထုအဖွဲ့အစည်းတွေပါ က်ိုယ်စားပြုဆွေးနွေး ကြရမှာဖြစ်ပါတယ်။ ဒါကြောင့် ကျွန်တော်တို့အားလုံးအနေနဲ့ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးစာချုပ်မှာ အပစ်အခတ်ရပ်စဲရေးထက် ကျော်လွန်တဲ့ နိုင်ငံရေးသဘောတူညီချက်တွေကိုလည်း ထည့်သွင်းချုပ်ဆိုခဲ့ပါတယ်။
အဓိကအချက်အနေနဲ့ကတော့ လက်နက်ကိုင်ပဋိပက္ခများကို နိုင်ငံရေး နည်းလမ်းနဲ့ညှိနှိုင်းအဖြေရှာရေးနဲ့ ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုကြီးကို ထူထောင်ရေးအတွက် နိုင်ငံရေးဆွေးနွေးပွဲများ ပြုလုပ်ဖို့ပဲဖြစ်ပါတယ်။
ဒါကြောင့် ဒီကနေ့ ပြည်ထောင်စုငြိမ်းချမ်းရေးညီလာခံ စတင်ကျင်းပရ ခြင်းဟာ တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်ကို အခြေခံပြီး စာချုပ်ပါအချိန်ဇယားအတိုင်း နိုင်ငံရေးဆွေးနွေးမှုဖြစ်စဉ်ကို အစပြုအကောင်အထည်ဖော်ဆောင်ရွက်ခြင်းလည်းဖြစ်ပါတယ်။
မြန်မာနိုင်ငံ ငြိမ်းချမ်းရေးတည်ဆောက်မှုသမိုင်းတစ်လျှောက် ဘယ်တုန်းကမှ မရရှိဖူးခဲ့တဲ့ နိုင်ငံရေးတည်ငြိမ်မှုနဲ့ပွင့်လင်းလွတ်လပ်မှုတွေကိုအခြေခံပြီး ဒီကနေ့ ပြည်ထောင်စုငြိမ်းချမ်းရေးညီလာခံကြီးကိုကျင်းပနိုင်မှာ ဖြစ်ပါတယ်။
အခုလို ပြည်ထောင်စုငြိမ်းချမ်းရေးညီလာခံ စတင်ကျင်းပနိုင်ခြင်းဟာ နိုင်ငံရေးအသွင်ကူးပြောင်းမှုတစ်ခုကို စနစ်တကျစတင်နိုင်ပြီး တည်ငြိမ်တဲ့ အရွေ့တစ်ခုပေါ်ပေါက်ရေးကို စီမံခန့်ခွဲနိုင်ခြင်းရဲ့ အကျိုးရလဒ်တစ်ခုအဖြစ်လည်း ရှုမြင်ကြရမှာဖြစ်ပါတယ်။
ပြည်ထောင်စုညီလာခံကို စတင်ခေါ်ယူကျင်းပရခြင်းဟာ ကျွန်တော်တို့ အနေနဲ့ ၂ဝ၁၅ ရွေးကောက်ပွဲရလဒ်အရပေါ်ပေါက်လာမယ့် အစိုးရသစ်ထံ အစိုးရတာဝန်များကို လွှဲပြောင်းပေးတဲ့ကိစ္စတွေထဲမှာ အရေးအကြီးဆုံး လုပ်ငန်းစဉ်တစ်ခုကိုဆောင်ရွက်ခြင်းဖြစ်ပါတယ်။ သိမ်မွေ့နက်နဲပြီး ကျယ်ပြန့်တဲ့ ငြိမ်းချမ်းရေးလုပ်ငန်းစဉ်ကို အစိုးရသစ်ထံ စနစ်တကျလွှဲပြောင်းနိုင်ရေးအတွက် အထူးအရေးပါလှတဲ့ ဆောင်ရွက်ချက်တစ်ခုလည်းဖြစ်ပါတယ်။
ဒီညီလာခံဟာ ကာလအပိုင်းအခြားတစ်ခုအနေနဲ့ဆောင်ရွက်တဲ့ အခမ်း အနားတစ်ခုမဟုတ်ဘဲ ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စု ကြီးတည်ဆောက်ရေးအတွက် ဖြစ်စဉ်တစ်ခုအစပျိုးခြင်းသာ ဖြစ်ပါတယ်။ ဆွေးနွေးရမယ့်ကိစ္စရပ်တွေ၊ ပါဝင်ဆွေးနွေးမယ့်သူတွေနဲ့ ကိုယ်စားပြုမှုတွေဟာလည်း ညီလာခံကြီးရဲ့ဖြစ်စဉ်တစ်လျှောက်မှာ ဆက်လက်ဆွေးနွေးညှိနှိုင်း သွားရမယ့်ကိစ္စရပ်များ ဖြစ်ပါတယ်။
ဒီညီလာခံကအစပြုပြီး နိုင်ငံရေးဆွေးနွေးမှုများကနေ နိုင်ငံရေးအင်အား စုများအကြားမှာ ရရှိလာမယ့် အပြန်အလှန်ယုံကြည်မှုတွေကလည်း နိုင်ငံရေး ဖြစ်စဉ်ကို များစွာအထောက်အကူပြုမှာဖြစ်ပါတယ်။ ဒီညီလာခံကြီးကနေစပြီး နိုင်ငံရေးဆွေးနွေးပွဲတွေမှာ နိုင်ငံရေး၊ လူမှုရေး၊ စီးပွားရေး၊ လုံခြုံရေး၊ မြေယာနဲ့ သဘာဝပတ်ဝန်းကျင်ဆိုင်ရာမူဝါဒများဆိုတဲ့ အကြောင်းအရာတွေကို နိုင်ငံရေး ဆွေးနွေးမှုဆိုင်ရာမူဘောင်များအတိုင်း ဆွေးနွေးကြမှာဖြစ်ပါတယ်။
ဒီငြိမ်းချမ်းရေးညီလာခံကြီးဟာ အစိုးရသစ်ထံတာဝန်လွှဲပြောင်းမှု ချောမွေ့ စေရေးအတွက်ရော တစ်နိုင်ငံလုံးပစ်ခတ်တိုက်ခိုက်မှုရပ်စဲရေး စာချုပ်ပါအချိန်ဇယားအတိုင်း အကောင်အထည်ဖော်ရေးအတွက်ပါ စတင်ရတာဖြစ် ပါတယ်။
အချိန်မီစတင်ရတာဖြစ်တဲ့အပြင် ဒီကနေ့ဆွေးနွေးကြမယ့် ကဏ္ဍကြီး (၅)ရပ်ဟာလည်း အလွန်ကျယ်ပြန့်တာဖြစ်တဲ့အတွက် ဒီငါးရက်တာကာလ အတွင်းမှာ ဆုံးဖြတ်ချက်တွေချမှတ်ခြင်းမပြုဘဲ ဆွေးနွေးမှုတွေကိုစုစည်းမှာ ဖြစ်ပါတယ်။ ဒီလိုစုစည်းပြီး နောက်ညီလာခံကို သယ်ဆောင်သွားကြဖို့ ဖြစ်ပါတယ်။
ဒါကြောင့် နောက်အစိုးရသစ်လက်ထက်မှာကျင်းပမယ့် ပြည်ထောင်စု ငြိမ်းချမ်းရေးညီလာခံအတွက် အခြေခံအုတ်မြစ်ကောင်းချမှတ်ခြင်း ဖြစ်တယ်လို့လည်း ဆိုရမှာဖြစ်ပါတယ်။
အစိုးရသစ်လက်ထက်ပေါ်ပေါက်လာမယ့်ညီလာခံမှာ ရလဒ်ကောင်း များထွက်ပေါ်လာရေးအတွက် ဒီကနေ့ဆွေးနွေးမှုများကို အကောင်းဆုံး စုစည်းနိုင်ခြင်းအပေါ်မှာ မူတည်မယ်ဆိုတာကိုလည်း သတိပြုကြစေလိုပါတယ်။
ဒီညီလာခံကြီးမှာ ဆွေးနွေးညှိနှိုင်းအဖြေရှာတဲ့အခါမှာ ကိုယ်စားလှယ် တော်ကြီးများအနေနဲ့ ဆွေးနွေးဖက်အဖွဲ့အစည်းအသီးသီးရဲ့ မတူညီတဲ့ သမိုင်းကြောင်းတွေ၊ နိုင်ငံရေးရပ်တည်ချက်တွေနဲ့ လိုလားချက်တွေကို အပြန်အလှန်နားလည်သိရှိဖို့ ကြိုးပမ်းကြရမှာဖြစ်ပါတယ်။
ကျွန်တော်တို့ လူ့အဖွဲ့အစည်းမှာ ကြုံတွေ့ရင်ဆိုင်နေရတဲ့ ပြဿနာတွေကိုဆွေးနွေးအဖြေရှာတဲ့အခါမှာ အဖွဲ့အစည်းတစ်ခုရဲ့ ရပ်တည်ချက်၊ ရှုထောင့်တစ်ခုတည်းကမကြည့်ဘဲ ရှုထောင့်ပေါင်းစုံကနေရှုမြင်ပြီး အတူတကွ လက်တွဲဖြေရှင်းမယ်ဆိုတဲ့ ချဉ်းကပ်မှုမျိုးနဲ့ ဆွေးနွေးညှိနှိုင်းကြဖို့ တိုက်တွန်း အပ်ပါတယ်။
လက်တွေ့ကျပြီး အပြုသဘောဆောင်တဲ့ ဆွေးနွေးမှုများပြုလုပ်ပြီး တိုင်းပြည်အတွက် ရေရှည်အကျိုးဖြစ်ထွန်းစေမယ့် ဆွေးနွေးမှုတွေ၊ နိုင်ငံရေး ရွေးချယ်မှုတွေနဲ့ သဘောတူညီမှုတွေရရှိအောင်ကြိုးပမ်းကြဖို့ အလေးအနက် တိုက်တွန်းပြောကြားရင်း နိဂုံးချုပ်အပ်ပါတယ်။
(သတင်းစဉ်)
No comments:
Post a Comment