မင်းလှ ဒီဇင်ဘာ ၃ဝ
မကွေးတိုင်းဒေသကြီး သရက်ခရိုင် မင်းလှမြို့ရှိ ရှေးဟောင်းမင်းလှ ခံတပ်ကြီးအား ပြည်တွင်းခရီးသွားများနှင့် နိုင်ငံခြားခရီးသွားများ ဝင်ရောက် လေ့လာမှုများပြားလျက်ရှိကြောင်း သိရသည်။
မင်းလှမြို့ ဧရာဝတီကမ်းပါးထိပ်တွင် တည်ဆောက်ထားသော မင်းလှ ခံတပ်သည် အင်္ဂလိပ်-မြန်မာ တတိယစစ်ပွဲဖြင့် အထူးထင်ရှားသော ရှေးဟောင်း နယ်မြေဖြစ်သည်။ မင်းလှခံတပ်ကို (၁၈၆ဝ-၆၁)ခုနှစ်တွင် ကနောင်မင်းသားကြီးဦးစီး၍ ပြင်သစ်နှင့်အီတလီ အင်ဂျင်နီယာများ၊ နိုင်ငံခြား ပညာတော်သင်ပြန် မြန်မာလူငယ် အင်ဂျင်နီယာများပူးပေါင်း၍ ဧရာဝတီမြစ်မှ ဆန်တက်လာမည့် အင်္ဂလိပ်သင်္ဘောများကို တိုက်ခိုက်နိုင်ရန် ကြီးမားခိုင်ခံ့စွာ တည်ဆောက်ခဲ့သည်။
ခံတပ်ကြီးသည် အရှေ့အနောက်အလျား ၁၈၄ ပေနှင့် တောင်မြောက် အလျား ၁၇၁ ပေ၊ အမြင့်၂၆ ပေရှိ ပြီး နံရံများတွင် စစ်သည်တော်များနေထိုင်ရန်နှင့် ပစ္စည်း ရိက္ခာသိုလှောင်ရန် အခန်းပေါင်း ၂၁ ခန်း ပါဝင်ဖွဲ့စည်းထားသည်။ ခံတပ်အတွင်းပိုင်းမှ အပေါ်တက်ရန် တောင်ဘက်နှင့် မြောက်ဘက်တွင် လှေကား နှစ်စင်းစီ စုစုပေါင်း လှေကား လေးစင်းတပ်ဆင်ထားကာ အနောက် ဘက်အဝင်ပေါက် ဝဲ၊ ယာမှ
ခံတပ်ပေါ်သို့ အမြောက်များတင်ရန် ဆင်ခြေလျှောလမ်းများလည်း ပြုလုပ် ထားသည်။အမြောက်ဒဏ်နှင့် ကျည်ဆန် မဖောက်ဝင်စေရန် နံရံထူကြီးနှစ်ခု ကြား၌ မြေသားများဖို့၍ တည်ဆောက်ထားသည်။ ၁၈၈၅ ခုနှစ်တွင် အင်္ဂလိပ်များ ဝင်ရောက်တိုက်ခိုက်စဉ် မင်းလှခံတပ်မှ မင်းထင်မင်းလှ ရဲခေါင်သူရိန်နှင့် တပ်သား ၅ဝဝ ကျော်တို့က အမြောက်ကြီး ၃၅ လက်၊ ဓား၊ သေနတ်၊ မီးပေါက် စသည် တို့ဖြင့် ကြံ့ကြံ့ခံ ခုခံတိုက်ခိုက်ခဲ့ကြ သည်။
''မင်းလှခံတပ်ကြီးကို မြန်မာ့ ရှေးဟောင်းသမိုင်းဝင် ယဉ်ကျေးမှု အဆောက်အအုံကြီးအဖြစ် သတ်မှတ်ပြီး ရှေးဟောင်းသုတေသနနဲ့ စာကြည့်တိုက်ဦးစီးဌာနက ၁၉၅၇ ခုနှစ်ကနေ အခုအချိန်အထိ ပြုပြင် ထိန်းသိမ်းထားပါတယ်။ ခံတပ်ကြီး အတွင်းမှာ ပလတ်စတစ်နဲ့ အမှိုက် ကင်းမဲ့ဇုန်အဖြစ် အမှိုက်ခြင်းတွေ ထားရှိပြီး ဝန်ထမ်းလေးဦးနဲ့ နေ့စဉ် သန့်ရှင်းရေး၊ ပတ်ဝန်းကျင်ထိန်းသိမ်း ရေးလုပ်ငန်းတွေ ဆောင်ရွက်ပါတယ်။ ကျွဲ၊ နွားတိရစ္ဆာန်တွေ ဝင်ရောက်မှု၊ ခံတပ်အတွင်း အရက်သေစာ သောက်စားမှုနဲ့ မဖွယ်မရာမှုတွေ မပြုလုပ်ဖို့လည်း အထူးတားမြစ် ထားပါတယ်။ ပြည်တွင်းခရီးသွား တွေအပြင် နိုင်ငံခြားခရီးသွားများ ဝင်ရောက်မှုကလည်း တစ်လကို ပျမ်းမျှ ၁ဝဝ ကျော်ကနေ ၃ဝဝ အထိရှိတယ်''ဟု ရှေးဟောင်း သုတေသနနှင့် အမျိုးသားပြတိုက် မင်းလှဌာနစိတ်မှ ဒုတိယဦးစီးမှူး ဒေါ်လှဝင်းရီက ပြောသည်။
ကျော်စွာ(မကွေး)
No comments:
Post a Comment