မှန်မှန်ကန်ကန်လှုပ်ရှားဆောင်ရွက်
မျက်မှောက်ကာလတွင် တစ်တိုင်းပြည်လုံးရှိ ပြည်သူများအနေဖြင့် မြန်မာ့နိုင်ငံရေးဖြစ်စဉ်၌ အရေးကြီးသည့်လုပ်ငန်းစဉ်ဖြစ်သည့် အထွေထွေ ရွေးကောက်ပွဲကြီးတွင် မိမိနှစ်သက်ရာကိုယ်စားလှယ်လောင်းကို မဲပေးရွေးချယ်နိုင်ရန်အတွက် အသင့်ဖြစ်နေလောက်ပြီဟု မျှော်လင့်ပါသည်။
ဆန္ဒမဲပေးခြင်းသည် မိမိတို့၏ကိုယ်ပိုင်ဆုံးဖြတ်ချက်ဖြင့် မိမိတိုင်းပြည် နှင့်လူမျိုးအကျိုးအတွက် အမှန်တကယ်အကောင်အထည်ဖော်နိုင်မည့်သူကိုသာ ရွေးချယ်ခြင်းဖြစ်လိမ့်မည်ဟု ယုံကြည်ပါသည်။ အရွေးချယ်ခံမည့် ကိုယ်စားလှယ်လောင်းများကလည်း မိမိတို့အနိုင်ရရှိရေးအတွက် ပြည်သူတို့အား အစွမ်းကုန်စည်းရုံးကြမည်ဖြစ်သည်။
မဲပေးခြင်းနှင့်စည်းရုံးခြင်း လုပ်ငန်းစဉ်နှစ်မျိုးကိုဆောင်ရွက်ရာတွင် သတ်မှတ်ထားသော စည်းမျဉ်း၊ စည်းကမ်း၊ ဥပဒေများကို လေးစားလိုက်နာပြီး ဆောင်ရွက်ကြရန်လိုအပ်ပါသည်။ ဥပဒေ၊ စည်းကမ်းနှင့်မလျော်ညီသော တစ်ဖက်သားနစ်နာအောင်ပြုလုပ်မှု၊ အသရေဖျက်မှု၊ ခိုက်ရန်ဖြစ်ပွားမှု၊ ဆူပူမှု၊ အကြမ်းဖက်မှုများကို မပြုလုပ်မိရန် အရေးကြီးပါသည်။
ထိုနေရာတွင် ပါတီများကလည်း သတ်မှတ်ထားသော ပါတီစည်းရုံးရေး စည်းကမ်းများကို လိုက်နာရန် လိုအပ်ပြီး ကိုယ်စားလှယ်လောင်းများကလည်း ပြည်သူများအား မှန်မှန်ကန်ကန်စည်းရုံးကြဖို့လိုအပ်ပါသည်။ ပြည်သူများကလည်း စည်းကမ်းတကျပါဝင်လှုပ်ရှားကြရန်လိုအပ်ပြီး နိုင်ငံ့ဝန်ထမ်းများကလည်း ပါတီနိုင်ငံရေး ကင်းရှင်းစွာဖြင့် အသိတရားနှင့် ဆောင်ရွက်ကြရန် လိုအပ်မည်ဖြစ်သည်။
ရွေးကောက်ပွဲကျင်းပရန် ရက်သတ္တတစ်ပတ်သာလိုတော့သည့် ယနေ့ အချိန်ကာလအထိ မြန်မာနိုင်ငံတစ်ဝန်းတွင် ရွေးကောက်ပွဲအကြိုဆောင်ရွက် မှုများနှင့် ပတ်သက်၍ အချို့နေရာအနည်းငယ်၌သာ စည်းကမ်းနှင့်မလျော်ညီသည့် ပြုမူဆောင်ရွက်မှု၊ အကြောင်းမဲ့နှောင့်ယှက်ဖျက်ဆီးမှုနှင့် ခိုက်ရန်ဖြစ်ပွားမှုတို့သာ ဖြစ်ပွားခဲ့သည်ကို တွေ့မြင်ရသဖြင့် မြန်မာနိုင်ငံ၏နိုင်ငံရေးဖြစ်စဉ် ကောင်းမွန်နေသေးသည်ဟု ဆိုရမည်ဖြစ်သည်။
ဒီမိုကရေစီစနစ်ကိုကျင့်သုံးရာ၌ အများဆန္ဒဖြင့် ရွေးကောက်တင်မြှောက်ခြင်းသည် အရေးပါသည့် လုပ်ငန်းစဉ်ဖြစ်၍ အများဆန္ဒနှင့်အညီ စနစ်ကျစည်း ကမ်းရှိစွာဖြင့် လှုပ်ရှားဆောင်ရွက်ကြရမည်ဖြစ်သည်။ မိမိတို့ ဆောင်ရွက်မှုများသည် နိုင်ငံ၏ဂုဏ်သိက္ခာ၊ နိုင်ငံ၏အကျိုးစီးပွား မထိခိုက်ဖို့အထူးလိုအပ်ပါသည်။ မည်သည့် ရွေးကောက်မှုတွင်မဆို အနိုင်နှင့်အရှုံး နှစ်မျိုးသာရှိမည်ဖြစ်၍ နိုင်လျှင်လည်း ပြုံးပြုံး၊ ရှုံးလျှင်လည်း ပြုံးပြုံးနေတတ်ဖို့ လိုအပ်ပါသည်။
အားကစားစကားနှင့်ပြောမည်ဆိုလျှင် အရှုံး၊ အနိုင်သည် ပဓာနမဟုတ်၊ ယှဉ်ပြိုင်ခြင်းသည်သာ အဓိကဖြစ်သည်ဟူသော ဆိုစကားနှင့်လည်း ပြောချင်ပါသည်။ ဘောလုံးပွဲတစ်ပွဲ ယှဉ်ပြိုင်ကြသည့် နှစ်ဖက်အသင်းတို့ ခြေရည်တူ၊ ခြေရည်ကွာဟမှုရှိကြမည်ဖြစ်သော်လည်း နိုင်သည်ဖြစ်စေ၊ ရှုံးသည်ဖြစ်စေ အကွက်ကျကျ အကောင်းဆုံးနှင့် အသန့်ရှင်းဆုံးကစားနိုင်သော အသင်းကိုသာ ပရိသတ်များက အားပေးကြမည်ဖြစ်သည်။
ပရိသတ်များအနေဖြင့်လည်း မိမိတို့အသင်းအောင်နိုင်ရေးအတွက် အင်တိုက်အားတိုက် အားပေးကြမည်ဖြစ်ပြီး အကွက်ကျကျအကောင်းဆုံးကစားခဲ့သော်လည်း အကြောင်းအမျိုးမျိုးကြောင့် ရှုံးနိမ့်ခဲ့ရပါက ကျေနပ် နှစ်သိမ့်ကြသကဲ့သို့ အားပေးကြရမည်ဖြစ်သည်။ ပြီးခဲ့သည့်ကာလက နိုင်ငံတကာပြိုင်ပွဲများတွင် ယှဉ်ပြိုင်ခဲ့သော မြန်မာလက်ရွေးစင်ဘောလုံးအသင်း ရှုံးသည့်ပွဲဖြစ်စေ၊ နိုင်သည့်ပွဲဖြစ်စေ မြန်မာပရိသတ်က အမျိုးသားရေး စိတ်ဓာတ်အပြည့်ဖြင့် တစ်ခဲနက်အားပေးခဲ့ကြပုံမှာ အတုယူစရာဖြစ်သည်။
ယခုကျင်းပမည့် အထွေထွေရွေးကောက်ပွဲတွင်လည်း ထိုကဲ့သို့ပင် မြန်မာတို့၏ အမျိုးသားရေးစိတ်ဓာတ်ဖြင့် ပါဝင်ယှဉ်ပြိုင်မှုကို အားပေးကြစေချင်ပါသည်။ မြန်မာနိုင်ငံသားအားလုံးတို့သည် မိမိနိုင်ငံ၊ မိမိလူမျိုးတိုးတက် စေလို သောဆန္ဒဖြင့် လှုပ်ရှားဆောင်ရွက်နေကြသည်မှာ အမှန်ဖြစ်သည်။ သို့ဖြစ်ရာ မိမိနိုင်ငံ၊ မိမိလူမျိုးတိုးတက်ကောင်းစားရေးကို ရှေးရှု၍ စည်ကမ်း စနစ်ကျနစွာဖြင့် မှန်မှန်ကန်ကန်လှုပ်ရှားဆောင်ရွက် ရွေးချယ်တတ်စေရန် တိုက်တွန်းအပ်ပါသည်။ ။
No comments:
Post a Comment