ရိုင်းတယ်လို့ မှတ်မှာလား
ယခုရက်ပိုင်းအတွင်း လူမှုကွန်ရက်စာမျက်နှာများနှင့် သတင်းစာ မျက်နှာများပေါ်တွင် တောဆင်ရိုင်း ခြောက်ကောင်သတင်းမှာ အထူးပျံ့နှံ့ နေသည်။ ပဲခူးရိုးမတောတွင်းတစ်နေရာမှ လူတို့နေထိုင်ရာ လူ့ရွာဝန်းကျင် ဒေသများသို့ မျက်စိလည်လမ်းမှား ရောက်ရှိလာသည့်အခါ အထူးအဆန်း သဘော၊ အန္တရာယ်ရှိသည့်သဘော မြင်ကြသည်မှာ လူတို့၏ဓလေ့ဖြစ်သည်။
အမှန်တွင် ဆင်ရိုင်းများဟုဆိုကြသော်လည်း ရိုင်းသောဆင်များ မဟုတ်ပါ။ ဆင်ရိုင်းဆိုသည်မှာ မြင်မြင်ရာ၊ မဲမဲမြင်ရာ တိုက်ခိုက်ဖျက်ဆီး တတ်သည့်သဘောရှိပါသည်။ ကျွန်ုပ်တို့နိုင်ငံ၏ အချို့ဒေသများတွင် ဆင်ရိုင်းများနှင့် ကြုံတွေ့ဖူးသည့် အဖြစ်များရှိခဲ့ဖူးပါသည်။ တွေ့ရာလူကို နင်းချေသတ်ဖြတ်ခြင်း၊ နေအိမ်အဆောက်အအုံများအား ဖျက်ဆီးခြင်း၊ သီးနှံစိုက်ခင်းများအား ဝင်ရောက်ဖျက်ဆီးခြင်း ရှိခဲ့ဖူးပါသည်။
ယခုဆင်ရိုင်းဟုဆိုကြသော ဆင်ခြောက်ကောင်မှာ ထိုသို့မဟုတ်ပါ။ သက်ရှိသတ္တဝါတိုင်းသည် မိမိတို့ အသက်ရှင်သန်နေထိုင်နိုင်ရန်အတွက် ကြံဆကြိုးပမ်းကြရပါသည်။ လူသတ္တဝါများပင် တစ်နေရာမကောင်းလျှင် တစ်နေရာသို့ပြောင်းသည့် ရေကြည်ရာမြက်နုရာ ရွှေ့ပြောင်းနေထိုင်သော အလေ့အထများရှိပါသည်။ ယခုဆင်များသည်လည်း ၎င်းတို့ရှင်သန် ကျက်စားရာ နယ်မြေဒေသများ ကျဉ်းမြောင်းလာသဖြင့် နယ်မြေဒေသအသစ်များကို စွန့်စား ရှာဖွေကြခြင်းသာဖြစ်သည်။
ထိုသို့ရှာဖွေကြရာ၌ နေရာတစ်ခုသို့ရောက်ရှိသောအခါ ထိုနေရာမှ အခြေ ကျပြီးသား သတ္တဝါများက ဧည့်သတ္တဝါများကို လက်ခံလေ့မရှိဘဲ ရန်ပြုတိုက် ခိုက်တတ်သည့် အစဉ်အလာရှိပါသည်။ ဧည့်သတ္တဝါကလည်း ထိုရေကြည်၊ ထိုမျက်နုရာနေရာ၌ အခြေချနိုင်ရန်အတွက် လက်မခံသောအိမ်ရှင်ကို ပြန်လည် ရန်ပြုတိုက်ခိုက်လေ့ရှိသည်ကို Discovery ရုပ်သံလိုင်းများတွင် မြင်တွေ့ နိုင်ပါသည်။
ယခုဤဆင်များမှာ ထိုသို့မဟုတ်ပါ။ တောဆင်ရိုင်းများဟုဆိုသော်လည်း ၎င်းတို့အတွက် အကောင်းဆုံးလမ်းကြောင်းကို ငြိမ်းငြိမ်းချမ်းချမ်းရှာဖွေသွားလာနေကြခြင်းသာဖြစ်သည်။ ဤရေ၊ ဤမြေများမှာ မူလက သတ္တဝါများ ရှင်သန်ကျက်စားရာ တောတောင်များသာဖြစ်ပါသည်။ လူတို့နယ်မြေချဲ့ထွင် လာသောအခါ တောတောင် စားကျက်များကွယ်ပျောက်၍ သတ္တဝါများ ပျက်စီးခြင်း၊ ရွှေ့ပြောင်းထွက်သွားရခြင်း၊ ကျန်ရှိသောသတ္တဝါများမှာလည်း ရန်သူသဖွယ်တိုက်ခိုက်ခံရခြင်းများရှိခဲ့ကြပါသည်။
ရေမြေတို့၏သဘာဝအရ သတ္တဝါတို့က ကျူးကျော်ခဲ့ခြင်းမဟုတ်ဘဲ လူတို့ကသာ ကျူးကျော်ဝင်ရောက် ခဲ့ခြင်းသာဖြစ်ပါသည်။ ရေမြေတောတောင်များတွင် မူလကတည်းက ကျင်လည်ကျက်စားခဲ့သော သတ္တဝါများအား အသိဥာဏ်ရှိသော လူသားများက စာနာထောက်ထားကြရမည်ဖြစ်ပါသည်။ တို့အားသွားလမ်းသာ၍ လာလမ်းဖြောင့်အောင် ကူညီစောင့်ရှောက်ပေးကြရမည်ဖြစ်သည်။
ယခုဖြစ်စဉ်တွင် ထိုသို့မဟုတ်ခဲ့ပါ။ တောဆင်များ ရောက်ရှိရာအရပ် ဒေသများရှိ လူတို့က ဝိုင်းအုံကြည့်ရှုခြင်း၊ ခြောက်လှန့်မောင်းထုတ်ခြင်း၊ ဝိုင်းဝန်းတိုက်ခိုက်ခြင်းများ ရှိခဲ့သည်ဟု သိရပါသည်။ ၎င်းဆင်သတ္တဝါများသည် မိသားစုအသွင်ဖြင့် ရွှေ့ပြောင်းသွားလာနေခြင်းဖြစ်ပြီး လူတို့၏ ရန်မူခြင်းကို မဖြစ်မနေထိပ်တိုက်ကြုံတွေ့ရပါမှ ပြန်လည်တုံ့ပြန်ခြင်းများရှိခဲ့ပါသည်။ ကျန်အချိန်များတွင် ၎င်းတို့လမ်းကို ၎င်းတို့အေးချမ်းစွာကူးပြောင်း သွားလာနေခြင်းဖြစ်ပါသည်။
၎င်းတို့ရွှေ့ပြောင်းသွားလာနေရသည့်အချိန်ကာလမှာ ကြာမြင့်လာပြီ ဖြစ်သည်။ သြဂုတ်လ ၁၈ ရက်နေ့မှ ယနေ့အထိ နှစ်ပတ်ခန့်အချိန်ဖြစ် လာခဲ့သည်။ ဆင်ငယ်တစ်ကောင်မှာ ခရီးပန်းသည့်ဒဏ်နှင့်ကျန်းမာရေးချို့တဲ့ သောကြောင့် မိသားစုနှင့်ကွဲကွာကျန်ရစ်ခဲ့သည်။ တာဝန်ရှိသူအဖွဲ့အစည်းများကလည်း ဆင်များ ဘေးမသီရန်မခဘဲ မူလနေရာသို့ ငြိမ်းငြိမ်းချမ်းချမ်း ရောက်ရှိရေးအတွက် ထိန်းကျောင်းမောင်းနှင်ပို့ဆောင်မှုများ နေ့စဉ်ပြုလုပ် ပေးနေသည်ကို တွေ့ရသည်။
သို့ဖြစ်ရာ အဆိုပါဆင်များမှာ ဆင်ရိုင်းများနှင့်မတူ တစ်မူထူးသည့် ရေကြည်ရာ မြက်နုရာဒေသကို ငြိမ်းချမ်းစွာ ရှာဖွေသွားလာနေသော ဆင်များဖြစ်ရာ ဆင်ရိုင်းများဟုမမှတ်ယူဘဲ သက်ရှိသတ္တဝါအချင်းချင်း စာနာထောက်ထားသောအားဖြင့် ဝိုင်းဝန်းကူညီစောင့်ရှောက်ပေးကြရန် တိုက်တွန်း လိုက်ပါသည်။ ။
No comments:
Post a Comment