နေပြည်တော် ဇွန် ၂၉
ပြည်သူ့လွှတ်တော်ဥက္ကဋ္ဌ သူရဦးရွှေမန်းသည် ဇွန် ၂၈ ရက် နံနက်ပိုင်း က မုံရွာမြို့ရှိ စစ်ကိုင်းတိုင်းဒေသကြီး လွှတ်တော်အဆောက်အအုံBanquest Hall၌ ဒေသခံပြည်သူများနှင့် တွေ့ဆုံသည်။
အဆိုပါတွေ့ဆုံပွဲသို့ ပြည်သူ့လွှတ်တော် ဒုတိယဥက္ကဋ္ဌ ဦးနန္ဒကျော်စွာ၊ စစ်ကိုင်းတိုင်းဒေသကြီး လွှတ်တော်ဥက္ကဋ္ဌ ဦးသင်းလှိုင်၊ တိုင်းဒေသကြီး၊ ပြည်နယ်လွှတ်တော်ဥက္ကဋ္ဌများနှင့် ဒုတိယဥက္ကဋ္ဌများ၊ ပြည်သူ့လွှတ်တော် အားကစား၊ ယဉ်ကျေးမှုနှင့် ပြည်သူ့ဆက်ဆံရေးဖွံ့ဖြိုးတိုးတက်မှုကော်မတီဥက္ကဋ္ဌ သူရဦးအေးမြင့်၊ ပြည်ထောင်စုလွှတ်တော်ကိုယ်စားလှယ်များ၊ ပြည်သူ့ လွှတ်တော်ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ် ရေးကော်မရှင်အဖွဲ့ဝင်များ၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီး လွှတ်တော်ကိုယ်စားလှယ်များ၊ တိုင်းဒေသကြီးအဆင့် ဌာနဆိုင်ရာများ၊ နိုင်ငံရေးပါတီများမှ ကိုယ်စားလှယ်များ၊ မြို့မိ မြို့ဖများနှင့် လူမှုရေးအဖွဲ့အစည်း များ တက်ရောက်ကြသည်။
ရှေးဦးစွာ ပြည်သူ့လွှတ်တော်ဥက္ကဋ္ဌက ဒေသဖွံ့ဖြိုးရေးဆောင်ရွက်နေကြ သည့် အဖွဲ့အစည်းများနှင့်တွေ့ရှိရသဖြင့် မြန်မာနိုင်ငံ၏ အနာဂတ်အတွက် ကောင်းန်ိုးဖွယ်ရာများကို ဆွေးနွေးနိုင်မည်ဟု ယုံကြည်ပါကြောင်း၊ ယခုအချိန်၌ ပြည်ထောင်စုလွှတ်တော်တွင် အရေးကြီးသည့် ဖွဲ့စည်းပုံအခြေခံဥပဒေပြင်ဆင် နိုင်ရေး အလေးအနက်ထားဆောင်ရွက်နေချိန်ဖြစ်ပါကြောင်း၊ ၂ဝဝ၈ ဖွဲ့စည်းပုံ အခြေခံဥပဒေသည် အနှစ်သာရအဖြစ် မြန်မာနိုင်ငံကို ပါတီစုံဒီမိုကရေစီနှင့် ဈေးကွက်စီးပွားရေးစနစ်ကိုအခြေခံရမည်ဟု ပြဋ္ဌာန်းထားပါကြောင်း။
ဖွဲ့စည်းပုံအခြေခံဥပဒေပြင်ဆင်ရေးနှင့်ပတ်သက်၍ ပြည်ထောင်စု လွှတ်တော်က ဦးတည်ချက် သုံးရပ် ချမှတ်ဆောင်ရွက်ခဲ့ပါကြောင်း၊ ¤င်းတို့မှာ ပြည်ထောင်စုသမ္မတမြန်မာနိုင်ငံတော်၏ တည်တံ့ခိုင်မြဲမှု၊ တည်ငြိမ်အေးချမ်းမှု နှင့် ဖွံ့ဖြိုးတိုးတက်မှုတို့ကို ခေတ်စနစ်နှင့်လျော်ညီစွာ ပိုမိုတည်ဆောက်နိုင် သော ဖွဲ့စည်းပုံအခြေခံဥပဒေဖြစ်လာစေရေး၊ တိုင်းရင်းသားမျိုးနွယ်စုများ အကြား ယုံကြည်မှုခိုင်မာသော အမျိုးသားစည်းလုံးညီညွတ်မှုကို တည်ဆောက် နိုင်ခြင်းဖြင့် ထာဝရငြိမ်းချမ်းရေးကို ဖော်ဆောင်ရေး၊ နိုင်ငံတော်နှင့် နိုင်ငံသား တို့၏ ဒီမိုကရေစီစနစ်သို့ ပြုပြင်ပြောင်းလဲရေးလုပ်ငန်းစဉ်ကို အရှိန်အဟုန် မပျက် ဆက်လက်ဆောင်ရွက်နိုင်ရေးပင် ဖြစ်ပါကြောင်း၊ မပြင်သင့်သေးသည်ကို ပြင်မိလျှင် ဦးတည်ချက်သုံးရပ်ကို ထိခိုက်နိုင်သကဲ့သို့ ပြင်သင့်တာ မပြင်မိလျှင် လည်း ဦးတည်ချက်သုံးရပ်ကို ထိခိုက်နိုင်ကြောင်း။
ပြီးခဲ့သည့် ရက်ပိုင်းအတွင်းက ပြည်ထောင်စုလွှတ်တော်တွင် ဖွဲ့စည်းပုံ အခြေခံဥပဒေပါ ပုဒ်မ ၄၃၆ (က)ကို မဲခွဲဆုံးဖြတ်ဆောင်ရွက်ရာတွင် ပုဒ်မခွဲ ၁ ခုသာ ၇၅ ရာခိုင်နှုန်းကျော်ပြီး ကျန် ပုဒ်မ၊ ပုဒ်မခွဲ ၅ ခုမှာ ၇၅ ရာခိုင်နှုန်း မကျော်လွန်သဖြင့် ပြင်ဆင်၍မရပါကြောင်း။
ပုဒ်မ ၄၃၆ (ခ)ပြင်ဆင်ရန် ပြည်ထောင်စုလွှတ်တော်တွင် ဆက်လက် ဆောင်ရွက်ရန် ရှိပါကြောင်း၊ တိုင်းရင်းသားအများစုတောင်းဆိုနေကြသည့် ကိုယ်ပိုင်ပြဋ္ဌာန်းခွင့်၊ ကိုယ်ပိုင်အုပ်ချုပ်ခွင့်၊ တန်းတူညီမျှအခွင့်အရေးနှင့် ဗဟို ဦးစီးချုပ်ကိုင်မှု လျှော့ချရေးအတွက် လုပ်ပိုင်ခွင့်များကို တိုင်းဒေသကြီးနှင့် ပြည်နယ်များသို့ ခွဲဝေပေးရေး၊ တိုင်းဒေသကြီး၊ ပြည်နယ်လွှတ်တော်များက ရွေးချယ်တင်မြှောက်သည့် ပြည်သူ့ကိုယ်စားလှယ်သာလျှင် တိုင်းဒေသကြီး၊ ပြည်နယ်ဝန်ကြီးချုပ် ခန့်ထားရေး၊ တရားရေးအဖွဲ့အစည်းများအား လွတ်လပ် စွာ၊ တရားမျှတစွာ တရားစီရင်နိုင်သောအခြေအနေများသို့ ရောက်ရှိအောင် ဆောင်ရွက်ပေးရေး၊ အမျိုးသားပြန်လည်သင့်မြတ်ရေးကို ထိခိုက်စေသော ကိုယ်စားလှယ်များ ပြန်လည်ရုပ်သိမ်းခြင်းကိစ္စရပ်များနှင့် ရှေ့နောက်ဆက်စပ် လျော်ညီမှုမရှိသည့်ကိစ္စရပ်များ ပြင်ဆင်နိုင်ရေး ဆောင်ရွက်သွားမည် ဖြစ်ပါ ကြောင်း။
လာမည့်နိုဝင်ဘာလဆန်းတွင် ပါတီစုံဒီမိုကရေစီ အထွေထွေရွေးကောက် ပွဲကျင်းပမည်ဖြစ်ရာ ရွေးကောက်ပွဲအကြိုကာလနှင့် ရွေးကောက်ပွဲကာလများ တွင် တည်ငြိမ်အေးချမ်းမှုရှိရေးအတွက် မြို့နယ်အလိုက် ဖွဲ့စည်းထားသည့် ကော်မတီများ၊ လူထုလူတန်းစားအသီးသီးနှင့် နိုင်ငံရေးပါတီအသီးသီးမှ ပုဂ္ဂိုလ် များအနေဖြင့် ဝိုင်းဝန်းပူးပေါင်းဆောင်ရွက်ပေးကြရန်လိုကြောင်း၊ မိမိတို့ဒေသ အတွက်သာမက နိုင်ငံကောင်းကျိုးလုပ်ဆောင်နိုင်မည့်သူများကို မှန်ကန်စွာ ရွေးချယ်နိုင်ရန်လိုကြောင်း၊ နိုင်ငံရေးပါတီအသီးသီးမှ ကိုယ်စားလှယ်လောင်း များအနေဖြင့်လည်း လွတ်လပ်၍ တရားမျှတပြီး ပွင့်လင်းမြင်သာမှုရှိသည့် ရွေးကောက်ပွဲဖြစ်ရေးအတွက် ရွေးကောက်ပွဲကော်မရှင်က ထုတ်ပြန်ထား သည့် ကျင့်ဝတ်များကို လိုက်နာရမည်ဖြစ်ကြောင်း၊ မိမိတို့ရောက်ရှိခိုက် လိုအပ် ချက်များကိုတင်ပြပေးရန် ဖိတ်ခေါ်ပါကြောင်းဖြင့် ပြောကြားသည်။
ထို့နောက် မြို့နယ်ဖွံ့ဖြိုးတိုးတက်ရေးအထောက်အကူပြုကော်မတီ၊ မြို့နယ် စည်ပင်သာယာရေးကော်မတီတို့မှ တာဝန်ရှိသူများက မြို့နယ်ဖွံ့ဖြိုးတိုးတက် ရေးဆိုင်ရာ ဆောင်ရွက်ချက်များကို ရှင်းလင်းတင်ပြကြပြီး တက်ရောက်လာ ကြသူများက အထွေထွေဆွေးနွေးတင်ပြကြသည်။
ယင်းနောက်တိုင်းဒေသကြီးလွှတ်တော်ဥက္ကဋ္ဌ ဦးသင်းလှိုင်က ပြောကြားပြီး အမျိုးသားလွှတ်တော်ကိုယ်စားလှယ် ဒေါက်တာဝင်းမြင့်အောင်နှင့် ပြည်သူ့ လွှတ်တော်ကိုယ်စားလှယ် ဦးခင်မောင်ဦးတို့က မြို့နယ်ဆွမ်းလောင်းအသင်းနှင့် လူမှုကူညီရေးအသင်းတို့အတွက် ထောက်ပံ့ငွေကျပ် ငါးသိန်းစီပေးအပ်လှူဒါန်း ကြသည်။
ထို့နောက် ပြည်သူ့လွှတ်တော်ဥက္ကဋ္ဌက တင်ပြချက်များအပေါ် ပြန်လည် သုံးသပ်ဆွေးနွေးပြီး နိဂုံးချုပ်အမှာစကားပြောကြားကာ တက်ရောက်လာကြ သူများအား ရင်းရင်းနှီးနှီးနှုတ်ဆက်သည်။
(သတင်းစဉ်)
No comments:
Post a Comment