တောင်ကြီးမီးပုံးပျံလွှတ်တင်ပွဲ စည်ကားသိုက်မြိုက်စွာ ကျင်းပတော့မည်

ေေ

တောင်ကြီး အောက်တိုဘာ ၂၉

 ရှမ်းပြည်နယ်(တောင်ပိုင်း)တောင်ကြီးမြို့၌ နှစ်စဉ်အစဉ်အလာမပျက် ကျင်းပလျက်ရှိသည့် တန်ဆောင်တိုင်မီးပုံးပျံပွဲတော်ကို ယနေ့(အောက်တိုဘာ ၃ဝ)ရက်မှ နိုဝင်ဘာ ၇ ရက်အထိ အဝေယာကုန်းသာယာမီးပုံးပျံကွင်း၌ စည်ကား သိုက်မြိုက်စွာ ကျင်းပတော့မည်ဖြစ်သည်။ ပြိုင်ပွဲကို နေ့လွှတ်နှင့် ညလွှတ်ဟူ၍ အစီအစဉ်နှစ်ရပ်ဖြင့် ကျင်းပခြင်းဖြစ်သည်။ နေ့လွှတ်မှာခြေနှစ်ချောင်း၊ ခြေလေး ချောင်းသတ္တဝါများအား အရုပ်ကြီးများပြုလုပ်ကာ ယှဉ်ပြိုင်ခြင်းဖြစ်ပြီး ညလွှတ် မှာ အဆင်တန်ဆာအလှအပစုံစုံညီညီခြယ်သယှဉ်ပြိုင်သည့် စိန်နားပန်နှင့် ယမ်းမီးပေါက်ကွဲမှုဖြင့် မျက်စိပသာဒဖြစ်အောင် ယှဉ်ပြိုင်သည့် မီးကြီး တို့ပင်ဖြစ်သည်။ ပြိုင်ပွဲယှဉ်ပြိုင်မှုများနှင့်ပတ်သက်၍ ကျင်းပရေးကော်မတီမှ တွဲဖက်အတွင်းရေးမှူး ဦးတင်ဝင်းနှင့်တွေ့ဆုံမေးမြန်းဖြစ်ခဲ့သည်။ 

 မေး။ ။ဒိုင်အဖွဲ့မှာ တာဝန်ယူခဲ့တာ ဘယ်လောက်ကြာပါပြီလဲ။ ပြိုင်ပွဲ စတင်ခဲ့ပုံကို အနည်းငယ်ရှင်းပြပေးစေလိုပါတယ်။ 

 ဖြေ။ ။ဒိုင်အဖွဲ့မှာ ကျွန်တော်တာဝန်ယူခဲ့တာ နှစ်ပေါင်း ၅ဝ ရှိပါပြီ။ 

 ဒီမီးပုံးပျံပွဲက အရင်တုန်းက တောင်ကြီးမြို့က ဝါသနာရှင်တွေ ဖွဲ့စည်းပြီး လုပ်ခဲ့တာပါ။ မီးပုံးပျံတွေကလည်း အခုလောက် မကြီးသေးဘူး။ ၁၆ ပေ၊ ၁၇ ပေက အကြီးဆုံးပဲ။ နောက်ပိုင်းမှ ပေ ၂ဝ၊ ၂၄ ပေတို့ဖြစ်လာတာ။ အရင် တုန်းက ပြိုင်ပွဲတွေက ပထမတန်း၊ ဒုတိယတန်းဆိုပြီး ခွဲထားတာ။ အဲဒီတော့ ဘာဖြစ်လာလဲဆိုရင် မသမာတဲ့နည်းလမ်းတွေ သုံးလာကြတယ်။ ဘယ်လို မသမာတဲ့နည်းလဲဆိုရင် သတ်မှတ်ထားတဲ့ပေထက် ခိုးကြီးပြီး ဆုရရှိရေး လုပ်ဆောင်လာတာပဲ။ ဒါကြောင့် အဲဒီစနစ်ကို မသုံးတော့ဘူး။ 

 မေး။ ။မီးပုံးပျံပြုလုပ်လာတဲ့ ရေစီးကြောင်းလေးလည်း ရှင်းပြပေးပါဦး။

 ဖြေ။ ။မီးပုံးပျံပြုလုပ်တဲ့ အပိုင်းကလည်း အခုခေတ်ရေစီးကြောင်းနဲ့ တော်တော်လေးကို တိုးတက်လာတာတွေ့ရတယ်။ အခုမီးပုံးပျံကို ၂၅ ပေ သတ်မှတ်ထားတယ်။ ၂၅ ပေ သတ်မှတ်ရတာကလည်း အောက်ကချိတ်မယ့် ယမ်း ပိဿာ ၄ဝ လောက်ကို နိုင်နိုင်နင်းနင်း ချိတ်ဆွဲလွှတ်တင်နိုင်အောင်ပါ။ ၂၄ ပေဆိုရင် အဲဒီလောက်ယမ်းပိဿာကို နိုင်နိုင်နင်းနင်း မလွှတ်တင်နိုင် လောက်တော့ဘူး။ ဒါကတော့ မီးပုံးပျံပြုလုပ်လာတဲ့ ရေစီးကြောင်းပေါ့။

 မေး။ ။မီးပုံပျံပွဲလာကြည့်မယ့် ပရိသတ်တွေနဲ့ ယှဉ်ပြိုင်ကြမယ့် အဖွဲ့တွေရဲ့ လုံခြုံရေးအတွက်ကော ဘယ်လိုစီစဉ်ထားပါသလဲ။ 

 ဖြေ။ ။ပရိသတ်တွေကော၊ ယှဉ်ပြိုင်ကြမယ့် အဖွဲ့တွေကော အားလုံး အန္တရာယ်ကင်းရှင်းအောင် သက်ဆိုင်ရာအဖွဲ့အစည်းတွေနဲ့ ညှိနှိုင်းပြီး အကောင်းဆုံး၊ စိတ်အချရဆုံးဖြစ်အောင် စီစဉ်ထားပါတယ်။

 မေး။ ။ဒိုင်တွေက ဘယ်လိုအချက်အလက်တွေကိုကြည့်ပြီး အမှတ်ပေး တာပါလဲ။

 ဖြေ။ ။လူအယောက် ၅ဝ နဲ့ ဖွဲ့စည်းထားတဲ့ အမှတ်ပေးဒိုင်ခုနစ်ဖွဲ့ရှိတယ်။ ကွင်းထဲမှာ နှစ်ဖွဲ့၊ အပေါ်ကကြည့်တာ ငါးဖွဲ့။ ကွင်းထဲက မှိုင်းခံတဲ့ ပုံသဏ္ဌာန် အမှတ်ပေးအဖွဲ့က
မှိုင်းခံကြာချိန်ကိုကြည့်မယ်။ ပေးထားတဲ့ အမှတ် ၂ဝ ကနေ ၅ မိနစ်ကြာရင် ၁၅ မှတ်ရမယ်။ တစ်မိနစ်ပိုကြာတိုင်း တစ်မှတ်စီလျော့သွားမှာဖြစ်တယ်။ မှိုင်းပြည့်လို့ တက်တဲ့အချိန်မှာ သူ့ကြာချိန်အတိုင်း အမှတ် ၂ဝ လျှော့ပြီး ကျန်တာ သူ့ရမှတ်ပဲ။ ပုံသဏ္ဌာန် အမှတ်ပေးမယ့်ဒိုင်ကတော့ မီးပုံးပျံလှပမှု၊ အပြစ်အနာအဆာကင်းစင်မှုကို ဦးစားပေးကြည့်တာပါ။ ဘယ် လောက်ပဲ ပန်းချီလှလှ၊ အဆင်တန်ဆာအလှလှ၊ အပြစ်အနာအဆာကင်းစင်ပြီးမှ ပန်းချီတို့ အဆင်တန်ဆာ လှပမှုတွေကို ကြည့်တာဖြစ်တယ်။ အမှတ် ၂ဝ ကနေ အပြစ်ရှာပြီး ကျန်တာသူ့ရမှတ်ပဲ။ နောက် အပေါ်ဒိုင်တွေက အတက်ကောင်းမကောင်းကြည့်မယ်။ အတက်ကောင်းမကောင်းကို ကြည့်တဲ့ဒိုင်အဖွဲ့က လေဆာ ဆလိုက်ထိုးထားပြီး ဒီဂရီဘယ်လောက်စောင်းပြီး တက်သွားတယ်ကိုကြည့်မှာ။ များများဒီဂရီစောင်းလေ အမှတ်လျော့ လေပဲ။ တန်ဆာပလာအမှတ်ပေးဒိုင်က မီးပုံးပျံမှာ ပါဝင်တဲ့ပစ္စည်း၊ နောက်အမျိုးအမည်ဘယ်လောက်ပါတယ်ဆိုတာ ကို အသေးစိတ်မှတ်တဲ့အဖွဲ့ပါ။ ဆန်းသစ်တီထွင်မှုပါသလောက် အမှတ်ရတာပါ။ 

 စက္ခုပသာဒဘယ်လောက်ဖြစ်တယ် ဆိုတာ ကြည့်တဲ့ဒိုင်အဖွဲ့က မီးပုံးပျံတက်သွားပြီး ပေ ၃ဝဝ အမြင့်ရောက်တဲ့အခါ ယမ်းကို လေးမိနစ်အထိ ဘယ် လောက်အကောင်းဆုံး အလှဆုံးပြနိုင်လဲကြည့်တာပါ။ လေးမိနစ်အောက်ပဲပြနိုင်တယ်ဆိုရင်တော့ အမှတ်စလျော့ပြီ ပေါ့။ ဒီယမ်းချတဲ့အပိုင်းမှာလည်း ဘေးဖြာ၊ အောက်ချ၊ ကာလာအရောင်တွေကြည့်ပြီး အမှတ်ခွဲတာ။ အတက်စံချိန် ဒိုင်ကလည်း ဝေဟင်မှာ မိနစ်လေးဆယ်လောက် အကောင်းဆုံးပြသနိုင်ရန် အမှတ် ၂ဝ အပြည့်ရပြီပဲ။ တစ်ချို့မီး ပုံးပျံတွေက အပေါ်ကိုတော့တက်သွားပါရဲ့။ လေလမ်းကြောင်းကြောင့် တောင်ကွယ်သွားရင် အမှတ်မရတော့ဘူး။ ဒါကတော့ ကံစီမံရာကို ခံရတာပဲ။ နောက်တစ်ခု ယမ်းကူးရင်လည်း အမှတ်မရဘူး။ စည်းကမ်းဒိုင်ကတော့ သတ်မှတ် တဲ့အချိန်အတွင်းမှာ သတ်မှတ်အလေးချိန်အတိုင်း လိုက်နာသူကို အမှတ်အပြည့်ပေးမှာပါပဲ။

 မေး။ ဆုကြေးတွေကို ဘယ်လိုသတ်မှတ်ထားပါလဲ။
ဖြေ။ အရုပ်ဆုကြေးက အုပ်စုဆိုရင် ငါးသိန်း၊ ခြေလေးချောင်းကို သုံးသိန်း၊ ခြေနှစ်ချောင်းကို နှစ်သိန်း ပါ။ စိန်နားပန်ဆိုရင် အရင်က ၁၅ သိန်း၊ အခု ၂၅ သိန်း။ မီးကြီးဆို အရင်က ၄၅ သိန်း၊ အခု သိန်း ၆ဝ အဲ့လိုတွေ တိုးမြှင့်ထားတယ်။ ဒီဆုကြေးတွေက ရှမ်းပြည်နယ်ဝန်ကြီးချုပ်ကိုယ်တိုင် နောက်ဆုံးအစည်းအဝေးမှာ အတည်ပြုတိုး မြှင့်ပေးခဲ့တာပဲဖြစ်တယ်။

 မေး။ ဒိုင်အဖွဲ့ကိုယ်စားပြောချင်တာလေးရှိရင် ပြောပေးပါဦး။
ဖြေ။ အဓိကပြောချင်တာက ကျွန်တော်တို့ဒိုင်အဖွဲ့တွေက အဂတိကင်းရှင်းစွာနဲ့ တာဝန်ယူဆောင်ရွက် သွားမှာပါ။ နောက်တစ်ခုက ဒီနှစ်မှာအရုပ်လွှတ်တာ နည်းသွားပါတယ်။ အရုပ်လွှတ်တာကလည်း များသောအားဖြင့် လူငယ်တွေများတယ်။ အခုလူငယ်တွေကလည်း ပိုက်ဆံတွေစုပြီး မီးကြီးကိုဝင်ပြိုင်နေကြတော့ အရုပ်လွှတ်တဲ့အဖွဲ့ တွေနည်းသွားရခြင်းတစ်ခုပဲ။ ကျွန်တော်တို့ မီးပုံးပျံပြိုင်ပွဲကို အောင်အောင်မြင်မြင်ပြီးပါစေလို့ ဆုတောင်းပါတယ်။ နိုင်ငံတော်ကလည်း အများကြီးအားပေးကူညီထားသလို မိမိတို့ရိုးရာမတိမ်ကော မပပျောက်အောင်လည်း ထိန်းသိမ်း သွားဖို့ အရေးကြီးပါတယ်။ နောက်ဆုံးအနေနဲ့ ကလေးတွေ မီးပုံးပျံကို အောင်အောင်မြင်မြင်နဲ့ လွှတ်တင်နိုင်ပါစေလုိ့ ပဲ ဆုတောင်းပေးပါတယ်။

သတင်းနှင့်ဓာတ်ပုံ-ဇေယျာ(မိုင်ရာ)