ခရီးသွားခြင်းကို လူသားအားလုံး နှစ်သက်ကြသည်။ ခရီးသွားခြင်းဖြင့် ပျော်ရွှင်ခြင်း၊ စိတ်အပန်းပြေခြင်း၊ စိတ်နှလုံးချမ်းမြေ့လန်းဆန်းသဖြင့် ကျန်းမာရွှင်လန်းခြင်း စသည့်ကောင်းကျိုးများအပြင် အသိအမြင် ဗဟုသုတများခြင်း၊ ခံစားမှုအသစ်၊ အတွေ့အကြုံအသစ်၊ ပညာ အသစ်များရရှိခြင်း စသည့်အကျိုးများရှိပါသည်။ ခရီးသွားခြင်းသည် ငွေကုန်ကြေးကျများသည်ဆိုသော်လည်း လူတစ်ဦးချင်းအလိုက် နှစ်သက် ဖွယ်ဖြစ်သောကြောင့် ကမ္ဘာပေါ်ရှိပြည်သူများ စဉ်ဆက်မပြတ် ခရီးထွက် ကြပါသည်။
ကမ္ဘာပေါ်တွင် ဖွံ့ဖြိုးဆဲ၊ ဖွံ့ဖြိုးပြီး နိုင်ငံအားလုံးအနေဖြင့် ခရီးသွား လုပ်ငန်းကို အလေးထားဦးစားပေးဆောင်ရွက်ကြသည်မှာ ခရီးသွား လုပ်ငန်းမှ အကျိုးအမြတ်များ ပေါ့ပေါ့ပါးပါး ရနေသောကြောင့်ဖြစ်သည်။ ခရီးသွားလုပ်ငန်းမှ နိုင်ငံ့စီးပွားမြင့်မားအောင် ဆောင်ရွက်နိုင်သလို ပုဂ္ဂလိကကဏ္ဍ၊ ပြည်သူများကဏ္ဍမှလည်း အကျိုးစီးပွား ဖြစ်ထွန်းအောင် ဆောင်ရွက်နိုင်သည်။ ထို့ကြောင့် ကမ္ဘာတစ်ဝန်း၌ ခရီးသွားလုပ်ငန်းများ တစ်နှစ်ထက်တစ်နှစ် တိုးတက်မြင့်မားနေသည်ကို မြင်တွေ့ရမည် ဖြစ်သည်။
၂ဝ၁၇ ခုနှစ်တွင် ကမ္ဘာတစ်ဝန်းလုံးသို့ သွားလာကြသော ခရီးသွား အရေအတွက်မှာ ၁၃၂၃ သန်းခန့်ရှိပြီး ယခင်နှစ်များထက် တိုးတက် လာသည်ဟု သိရသည်။ ဥရောပနှင့် အာဖရိကတိုက်သို့ ကမ္ဘာလှည့်ခရီး သည် အများဆုံးသွားရောက်သည်။ ယမန်နှစ် ခရီးသွားလုပ်ငန်းမှဝင်ငွေမှာ အမေရိကန်ဒေါ်လာ ၁ ဒသမ ၆ ထရီလီယံ ရှိပြီး ကမ္ဘာ့ပို့ကုန်ကဏ္ဍ၏ ခုနစ်ရာခိုင်နှုန်းကို ဖြည့်ဆည်းပေးလျက်ရှိကြောင်း သိရသည်။ မြန်မာ နိုင်ငံ၏ ခရီးသွားလုပ်ငန်းတွင် ကမ္ဘာလှည့်ခရီးသည်ဝင်ရောက်မှုမှာ ၂ဝ၁၇ ခုနှစ်တွင် ၃ ဒသမ ၄ သန်းရှိပြီး မျှော်မှန်းထားသည့် ဦးရေ ငါးသန်းသို့ ရောက်ရှိရန် လိုအပ်ချက်များစွာရှိနေသည်ဟု သိရသည်။
ထို့ကြောင့် ခရီးသွားကဏ္ဍမြင့်မားတိုးတက်ရေးအတွက် လတ်တလောတွင် ဟိုတယ်နှင့် ခရီးသွားကဏ္ဍနှင့်ပတ်သက်၍ ခရီးသွား ကဏ္ဍမှ တတ်သိပညာရှင်များ၊ ကျွမ်းကျင်သူများက နိုင်ငံစီးပွား ခရီးသွား ဖြင့် ကြိုးပမ်းတိုးမြှင့်ကမ္ဘာအဆင့် ခေါင်းစဉ်ဖြင့် စီးပွားရေးစကားဝိုင်း ကျင်းပကာ အဖြေရှာလျက်ရှိသည်။ ထိုအချိန်တွင် ၂ဝ၁၈ ခုနှစ်အတွက် ကမ္ဘာ့ခရီးသွားလုပ်ငန်းနေ့ အခမ်းအနားကျင်းပခဲ့ရာ ခရီးသွားလုပ်ငန်း မြှင့်တင်ရန် ဒစ်ဂျစ်တယ်နည်းပညာဖြင့် ပြောင်းလဲစို့ ဆောင်ပုဒ်နှင့်အညီ ခရီးသွားလုပ်ငန်းတိုးတက်ရေးအတွက် ဆွေးနွေးညှိနှိုင်း အဖြေရှာခဲ့ကြ သည်။
မျက်မှောက်ကာလ ခရီးသွားလုပ်ငန်း တိုးမြှင့်ရေးတွင် ဒစ်ဂျစ်တယ် နည်းပညာသည် အထူးအရေးပါ အရာရောက်သော ပညာရပ်ဖြစ်သည်။ ဒစ်ဂျစ်တယ်နည်းပညာဖြင့် ခရီးသွားလုပ်ငန်းဖွံ့ဖြိုးအောင် တိုးတက်ဖော် ဆောင်နိုင်ခဲ့ပြီး ကမ္ဘာတစ်ဝန်းတွင် ခရီးသွားလုပ်ငန်းများ တိုးတက်မြင့်မား လာသည်။ ခရီးသွားလုပ်ငန်း မြင့်မားအောင် ဒီဂျစ်တယ်နည်းပညာဖြင့် ဆောင်ရွက်သဖြင့် ခရီးသွားလုပ်ငန်းအပေါ် စိတ်ဝင်စားမှုမြင့်မား လာအောင် ဆွဲဆောင်နိုင်သည့်အပြင် ခရီးသွားဝန်ဆောင်မှုများကို ဒစ်ဂျစ်တယ်နည်းပညာဖြင့် အဆင့်မြှင့်တင် ဖန်တီးဖော်ဆောင်ကြသည်။ ခရီးသွားလုပ်ငန်းတွင် ဝန်ဆောင်မှုနည်းပညာမှာ အထူးအရေးပါပြီး မြန်မာနိုင်ငံအတွက် ထိုနည်းပညာတိုးတက်လာအောင် ကြိုးပမ်း အားထုတ်ရမည်ဖြစ်သည်။ ဒစ်ဂျစ်တယ်နည်းပညာဆိုသည်နှင့် ခရီးသွား များ စိတ်ဝင်စားမှုမြင့်တက်လာစေရန် ဝန်ဆောင်မှုအပိုင်းတွင်သာမက သတင်းအချက်အလက်အပိုင်းမှ ထုတ်ပြန်အသိပေးမှုများသည် အထူး အရေးပါပြီး အကျိုးသက်ရောက်မှုရှိပေသည်။ မြန်မာနိုင်ငံအနေဖြင့် လက်ရှိတွင် တည်ငြိမ်အေးချမ်းမှုရှိပြီး ဘေးအန္တရာယ်ကင်းရှင်းစွာဖြင့် လာရောက်လည်ပတ်နိုင်ကြောင်း သတင်းကောင်းများကိုဖော်ထုတ်ရေး တွင် မကောင်းသတင်းများမှာ လိုသည်ထက်ပို၍ ပျံ့နှံ့နေခြင်းကြောင့် ခရီးသွားပုံရိပ်ကို ထိခိုက်ကျဆင်းစေနိုင်သည်။
သို့ဖြစ်ရာ ခရီးသွားလုပ်ငန်း မြင့်မားတိုးတက်လာရေးအတွက် ဒစ်ဂျစ်တယ်နည်းပညာဖြင့် ပြောင်းလဲနိုင်ရန် ကြိုးပမ်းဖော်ဆောင်ရာ၌ နည်းပညာဖြင့် ဝန်ဆောင်မှုလုပ်ငန်းများကို မြှင့်တင်ပေးရန်လိုအပ်သကဲ့သို့ ကောင်းသတင်းများကိုဆောင်ကြဉ်း၍ မြန်မာနိုင်ငံ၏အခင်းအကျင်းကို မြှင့်တင်ပေးရန် လိုအပ်မည်ဖြစ်ပါကြောင်း။ ။
No comments:
Post a Comment