မော်လိုက် မတ် ၃ဝ
စစ်ကိုင်းတိုင်းဒေသကြီး မော်လိုက်ခရိုင် မော်လိုက်မြို့နယ် သက္ကယ်ကျင်း-ဖောင်းပြင်-ဟုမ္မလင်း-ခန္တီးလမ်းပေါ်ရှိ မိုင်တိုင်အမှတ် (၄၄/၇-၄၅/ဝ) တွင် ကိုးတန်ချောင်းကူးတံတားအသစ် တည်ဆောက်ပြီးစီးပြီဖြစ်သဖြင့် ပြည်သူများ ရာသီမရွေး စိတ်အေးချမ်းမြေ့စွာ သွားလာနိုင်ပြီဖြစ်ကြောင်း သိရသည်။
ကိုးတန်ချောင်းကူးတံတားက သက္ကယ်ကျင်း-ခန္တီးလမ်းပေါ်မှာ အဓိကကျတဲ့တံတားတစ်စင်းပါ။ မိုးတွင်းမှာ ဒီချောင်းက ရေစီးသန်တော့ ချောင်းရေကြောင့် ယခင်က ဒီကိုးတန်ချောင်းကို ကူးထားတဲ့ တံတားဟောင်းလေးက ရေစီးနဲ့အတူ ပျက်စီးသွားခဲ့တယ်။
ဒီလမ်းကနေ သွားလာနေတဲ့ ပြည်သူတွေအတွက် မိုးတွင်းဆို ကိုးတန်ချောင်းက သဘာဝကပေးထားတဲ့ အတားအဆီးတစ်ခုလိုဖြစ်နေတော့ ရေစီးသန်တဲ့ဒီချောင်းမှာ လှေတို့ ဝါးဖောင်တို့နဲ့ အန္တရာယ် ကြီးစွာဖြင့် ခက်ခဲစွာဖြတ်ကူးရတယ်။
ဒါကြောင့် ဒီချောင်းမှာ ရာသီမရွေး ဖြတ်သန်းသွားလာနိုင်တဲ့ ကိုးတန် ချောင်းကူးတံတားအသစ်ကို ထပ်မံတည်ဆောက်ခဲ့တာ အခု မတ်လဒုတိယပတ်မှာ ဆောက်လုပ်ပြီးစီးခဲ့တဲ့အတွက် ပြည်သူများအနေနဲ့ ရာသီမရွေး အဆင်ပြေချောမွေ့စွာ သွားလာနိုင်ပါပြီ'' ဟု တံတားအထူးအဖွဲ့(၂)မှ တာဝန်ရှိသူတစ်ဦးက ပြောကြားခဲ့သည်။
အဆိုပါ ကိုးတန်ချောင်းတံတားသည် တံတားအရှည်ပေ ၃ဝဝ၊ တံတားအကျယ် ၂၄ ပေ ဖြစ်ကာ တံတားအမျိုးအစားမှာ ဘိုးပိုင်စနစ် သံကူကွန်ကရစ်အုတ်မြစ်ဖြစ်ပြီး ကိုယ်ထည်မှာ သံကူကွန်ကရစ်ကမ်းကပ်ခုံ၊ သံကူကွန်ကရစ် ရေလည်တိုင်နှင့် အပေါ်ထည်မှာ သံကူကွန်ကရစ်ရက်မ၊ ကြမ်းခင်းနှင့် တံတားခံနိုင်ဝန် တန် ၆ဝ ဖြစ်ကာ ပြည်ထောင်စုငွေလုံးငွေရင်း ရန်ပုံငွေကျပ် ၅၁၇ ဒသမ ၅ သန်းဖြင့် တည်ဆောက်ခဲ့ကြောင်း သိရသည်။
ဖိုးချမ်း(မုံရွာ)
No comments:
Post a Comment