အင်းတော် နိုဝင်ဘာ ၂၉
စစ်ကိုင်းတိုင်းဒေသကြီး အင်းတော်မြို့နယ် သူရောင်းကျေးရွာ လယ်ယာမြေများအနီးတွင် ကျောက်စိမ်းရိုင်းများ တူးဖော်နေမှုကြောင့် သဘာဝပတ်ဝန်းကျင် ထိခိုက်ပျက်စီးမည်ကို ဒေသခံတောင်သူများ စိုးရိမ်မှုဖြစ်ပေါ်လျက်ရှိကြောင်း သိရသည်။
''ကျွန်မတို့ လယ်ယာလုပ်ကိုင်လာတာ မိဘများ လက်ထက်ကတည်းကဆိုတော့ နှစ်ပေါင်း ၁ဝဝ ခန့်ရှိပြီ။ လယ်အနီးမှာ ကျောက်စိမ်းတူးဖော်ရေးကုမ္ပဏီက တူးဖော်တဲ့မြေစာတွေကို စွန့်ပစ်နေတာကြောင့် လယ်မြေထဲမြေစာနဲ့ ကျောက်ခဲတွေရောက်လာလို့ လယ်ယာမြေတစ်ဧကနီးပါး စပါးမစိုက်နိုင်ပါဘူး။ ကျောက်တွင်းမှာ မိုင်းက နံနက် ၁၁ နာရီနဲ့ ညနေ ၅ နာရီမှာ တစ်ကြိမ်စီ မိုင်းခွဲတဲ့အတွက် ကြောင့် ကျွန်မတို့လယ်ယာလုပ်ငန်းခွင်ထဲအထိ ကျောက်ခဲတွေ လွင့်စင်လာတဲ့အတွက် လုပ်ငန်းခွင်ဝင်ရာမှာ အများကြီး အသက်အန္တရာယ်စိုးရိမ်ရပါတယ်''ဟု တောင်သူ ဒေါ်တင်မြက ပြောသည်။
''ကျွန်တော့်လယ်က ကျောက်ကျင်းနဲ့နီးတယ်။ ကျောက်ကျင်းက မိုင်းခွဲရင် ကျောက်စတွေ ကျွန်တော့်တဲပေါ်ကို ကျပါတယ်။ မိုင်းခွဲမှုတွေကြောင့် စပါးအထွက်နှုန်းတွေလည်း တစ်နှစ်ထက် တစ်နှစ် ကျဆင်းလာပါတယ်။ ကျွန်းတော၊ အင်တောတွေမှာ မြေစာပစ်တဲ့အတွက်ကြောင့် သဘာဝသစ်တောတွေ ပျက်စီးလာပြီး အဆိုပါမြေစာများ မိုးရာသီတွင် အရည်ပျော်ကျကာ လယ်ယာမြေထဲသို့ စီးဝင်လျက်ရှိပြီး လယ်ယာမြေများ ပျက်စီးစပြုနေပြီဖြစ်ပါတယ်''ဟု တောင်သူဦးကျန်ရစ်က ပြောပြသည်။ ''ကျွန်တော်တို့ရွာနဲ့ ကျောက်ကျင်းနဲ့ တစ်မိုင်ခွဲပဲ ဝေးတယ်။ ကျောက်ကျင်းက မိုင်းခွဲတာ ရွာကအတိုင်းကြီး ကြားရတယ်။ တောင်ဖီလာစဥ့်ခိုးရွာ တွေနဲ့လည်း တစ်မိုင်ခွဲလောက်စီပဲဝေးပါတယ်။ ကျွန်တော်တို့ရွာက အိမ်ခြေ ၃၁၅ အိမ်ရှိပါတယ်။ ဒေသခံတွေက လယ်ယာနဲ့တစ်ပိုင်တစ်နိုင် ကျောက်တူးဖော်ခြင်းလုပ်ငန်းတွေ လုပ်ကိုင်ကြပါ တယ်။ ဒီတစ်နှစ် နှစ်နှစ်အတွင်းမှာ ကုမ္ပဏီတွေဝင်လာတော့ တစ်ပိုင်တစ်နိုင် ကျောက်တူးသူ တွေနေရာပျောက်လာကြပြီး ကုမ္ပဏီလုပ်ကွက်အတွင်း ကျရောက်သွားတဲ့ တစ်ပိုင်တစ်နိုင် ကျောက်တူးဖော်နေသူတွေမှာလည်း နစ်နာကြေးတွေ မရရှိပါဘူး''ဟု သူရောင်းကျေးရွာနေ ကိုချစ်ဝင်းက ပြောသည်။
ကျောက်စိမ်းတူးဖော်ရေးကုမ္ပဏီတစ်ခုက သူရောင်းမှော်မှာ လုပ်ကွက်အမှတ် (၃၆၊ ၃၇)ဆိုပြီး နှစ်ဧကရရှိထားကြောင်း၊ လုပ်ကွက်သက်တမ်းက ၂ဝ၁၅မှ ၂ဝ၁၈ အထိ ကျောက်စိမ်းရိုင်းများ တူးဖော်သွားမှာဖြစ်ကြောင်း၊ လက်ရှိအနက်ပေ ၁ဝဝ အထိ တူးဖော်ထားပြီးဖြစ်ပြီးဘက်ဟိုး ငါးစီး၊ မြေသယ်ယာဉ် ခြောက်စီး၊ လုပ်သား ၈ဝ ခန့်တို့ဖြင့် လုပ်ငန်းဆောင်ရွက်လျက်ရှိကြောင်း၊ စွန့်ပစ်မြေစာများကိုလည်း ပလပ်မြေများတွင် စွန့်ပစ်ခြင်းဖြစ်ကြောင်း၊ ကျေးရွာအကျိုးပြုလုပ်ငန်းများအနေဖြင့် သူရောင်း-နန့်ရုံ-ခိုးခေါင် ကျေးရွာချင်းဆက်လမ်းများအား မြေသားလမ်းများအဖြစ် ပြုပြင်ဆောင်ရွက်ပေးထားကြောင်း ကုမ္ပဏီယာယီတာဝန်ခံ ဦးအောင်ဆန်းဦးက ပြောသည်။
အဆိုပါ ကျောက်စိမ်းတူးဖော်ရေးကုမ္ပဏီက စွန့်ပစ်မြေစာများမှာ လယ်ယာမြေများနှင့် နီးကပ်ပြီး မိုးတွင်းကာလတွင် မြေစာများ အရည်ပျော်ကျကာ လယ်မြေများအတွင်းစီးဝင် အနည်ထိုင်ခြင်း၊ သစ်တောများအတွင်း စွန့်ပစ်ခြင်းကြောင့် သစ်တောပြုန်းတီးကာ သဘာဝပတ်ဝန်းကျင်များ ထိခိုက်ပျက်စီးမည်ကို စိုးရိမ်လျက်ရှိကြောင်း သိရသည်။ (မောင်ချစ်လင်း)
No comments:
Post a Comment