နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်
ရန်ကုန်တက္ကသိုလ် ရာပြည့်အထိမ်းအမှတ် စတင်ကြောင်းကြေညာခြင်းအခမ်းအနားသို့ တက်ရောက်မိန့်ခွန်းပြောကြား
ရန်ကုန်တက္ကသိုလ် ရာပြည့်အထိမ်းအမှတ် စတင်ကြောင်းကြေညာခြင်းအခမ်းအနားသို့ တက်ရောက်မိန့်ခွန်းပြောကြား
ရန်ကုန် ဒီဇင်ဘာ ၂
ရန်ကုန်တက္ကသိုလ် နှစ် (၁၀၀) ပြည့် ရာပြည့်သဘင် အခမ်း အနား ကျင်းပရေးဦးစီးကော်မတီက ဦးဆောင်ကျင်းပသည့် ရန်ကုန်တက္ကသိုလ်ရာပြည့်အထိမ်းအမှတ် စတင်ကြောင်း ကြေညာခြင်းအခမ်းအနားကို ယနေ့နံနက် ၁၀ နာရီတွင် ရန်ကုန်တက္ကသိုလ် ဘွဲ့နှင်းသဘင်ခန်းမ၌ ကျင်းပရာ ရန်ကုန်တက္ကသိုလ် နှစ် (၁၀၀) ပြည့် ရာပြည့်သဘင် အခမ်း အနား ကျင်းပရေးဦးစီးကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက် မိန့်ခွန်းပြောကြားသည်။
တက်ရောက်
အခမ်းအနားသို့ အမျိုးသားလွှတ်တော်ဥက္ကဋ္ဌ မန်းဝင်း ခိုင်သန်း၊ ပြည်ထောင်စုဝန်ကြီးများဖြစ်ကြသည့် ဒုတိယ ဗိုလ်ချုပ်ကြီး ကျော်ဆွေ၊ ဒေါက်တာဖေမြင့်၊ ဦးမင်းသူ၊ ဒေါက်တာအောင်သူ၊ ဦးသန့်စင်မောင်၊ ဦးဝင်းခိုင်၊ ဦးသိန်းဆွေ၊ ဒေါက်တာသန်းမြင့်၊ ဒေါက်တာမျိုးသိမ်းကြီး၊ ဒေါက်တာမြင့်ထွေး၊ ဒေါက်တာဝင်းမြတ်အေးနှင့် ဦးကျော်တင်၊ ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်း၊ ရန်ကုန်တိုင်းဒေသကြီး လွှတ်တော် ဥက္ကဋ္ဌ ဦးတင်မောင်ထွန်း၊ ဒုတိယဝန်ကြီးများဖြစ်ကြသည့် ဦးဝင်းမော်ထွန်းနှင့် ဦးကျော်လင်း၊ တိုင်းဒေသကြီးဝန်ကြီး များ၊ လွှတ်တော်ကိုယ်စားလှယ်များ၊ တက္ကသိုလ်များမှ ပါမောက္ခချုပ်များ၊ ပါမောက္ခများ၊ ရန်ကုန်တက္ကသိုလ် ကျောင်းသား ကျောင်းသူဟောင်းများ၊ မျိုးဆက်သစ် ကျောင်းသား ကျောင်းသူများနှင့် ဖိတ်ကြားထားသော ဧည့်သည်တော်များ တက်ရောက်ကြသည်။
သီဆိုဖျော်ဖြေ
ရှေးဦးစွာ ရန်ကုန်တက္ကသိုလ် ကျောင်းသား ကျောင်းသူများက "မြကျွန်းညိုညို တက္ကသိုလ်" တေးသီချင်း ဖြင့် သီဆိုဖျော်ဖြေကြသည်။
ထို့နောက် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ရာပြည့်အထိမ်းအမှတ် စတင် ကြောင်း စက်ခလုတ်နှိပ်၍ ဖွင့်လှစ်ပေးသည်။
ယင်းနောက် ရန်ကုန်တက္ကသိုလ် နှစ်(၁၀၀) ပြည့် ရာပြည့်သဘင်အခမ်းအနား ကျင်းပ ရေးဦးစီးကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က မိန့်ခွန်းပြောကြားရာတွင် “ဒီနေ့ဟာ ကျွန်မတို့ တက္ကသိုလ်အတွက်သာမက ကျွန်မတို့ နိုင်ငံအတွက် အရေးပါတဲ့ နေ့တစ်နေ့ဖြစ်ပါတယ်။ မြန်မာ့ပညာရေး လောကအတွက် အရေးပါတဲ့ ရန်ကုန် တက္ကသိုလ်ရာပြည့်ကာလမှာ ရာပြည့်အထိမ်း အမှတ် ဖွင့်ပွဲအခမ်းအနားကို အခုလို တက်ရောက်ပြီးတော့ အမှာစကားပြောခွင့်ရတဲ့ အတွက် အင်မတန်မှ ဝမ်းမြောက်ဂုဏ်ယူပါ တယ်။
အခွင့်ထူးကြီးဖြစ်
မြန်မာ့ပညာရေးသမိုင်းမှာ အစဉ်အလာ ကြီးမားလှတဲ့ ရန်ကုန်တက္ကသိုလ်ဟာ ၁၉၂၀ ပြည့်နှစ် ဒီဇင်ဘာလ ၁ ရက်နေ့မှာ စတင် ပေါ်ပေါက်ခဲ့ပြီး လာမယ့် ၂၀၂၀ ပြည့်နှစ် ဒီဇင်ဘာလ ၁ ရက်နေ့မှာ နှစ်ပေါင်း ၁၀၀ ပြည့်မြောက်တဲ့ ရာပြည့်သဘင်ကို ဆင်ယင် ကျင်းပနိုင်တော့မှာ ဖြစ်ပါတယ်။ ရန်ကုန် တက္ကသိုလ် ရာပြည့်ပွဲသဘင်ကို ရာပြည့် ကာလဖြစ်တဲ့ ဒီနေ့ကစပြီး စည်ကားသိုက်မြိုက် ခမ်းနားထည်ဝါစွာနဲ့ တစ်ဆင့်ပြီးတစ်ဆင့် အရှိန်အဟုန်မြှင့်ပြီး ဆောင်ရွက်သွားကြမှာ ဖြစ်ပါတယ်။ ဒီလို ကြုံတောင့်ကြုံခဲဖြစ်တဲ့ ရန်ကုန်တက္ကသိုလ် ရာပြည့်ပွဲသဘင်အခမ်း အနားကြီးကို ဆင်ယင်ကျင်းပခွင့်ရတာဟာ ကျွန်မတို့ အားလုံးအတွက် ဝမ်းမြောက်ဂုဏ်ယူ စရာ အခွင့်ထူးကြီးပဲဖြစ်ပါတယ်။
သမိုင်းအစဉ်အလာကြီးမားခဲ့တဲ့ ရန်ကုန် တက္ကသိုလ်ဟာ နိုင်ငံ့ဂုဏ်ဆောင် တက္ကသိုလ် တစ်ခုဖြစ်ပါတယ်။ မြန်မာနိုင်ငံမှာရှိတဲ့ တက္ကသိုလ်အသီးသီးရဲ့ မိခင်ကြီးလို့လည်း ဆိုလို့ ရပါတယ်။ မြန်မာနိုင်ငံမှာ ပေါ်ပေါက် လာခဲ့တဲ့ တက္ကသိုလ်အသီးသီးဟာ ရန်ကုန် တက္ကသိုလ်ကတစ်ဆင့် ပေါက်ဖွားလာခဲ့တဲ့ တက္ကသိုလ်တွေ ဖြစ်ပါတယ်။
ရန်ကုန် တက္ကသိုလ်ကို စတင်တည်ထောင်စဉ်ကတည်း က အင်္ဂလန်နိုင်ငံမှာရှိတဲ့ တက္ကသိုလ်ကြီးတွေ ရဲ့ စနစ်အတိုင်း စနစ်တကျ ဖွဲ့စည်းတည်ထောင် ခဲ့တာဖြစ်ပြီး ပညာရပ်နယ်ပယ်မှာ တစ်ချိန်က အရှေ့တောင်အာရှမှာ အကောင်းဆုံး တက္ကသိုလ်တွေထဲမှာ တစ်ခုဖြစ်ခဲ့ပါတယ်။ တက္ကသိုလ်ရဲ့ဥပဓိရုပ်ဟာ အင်းလျားကန် နောက်ခံ၊ ဘွဲ့နှင်းသဘင်အဆောက်အအုံ၊ သစ်ပုပ်ပင်၊ အဓိပတိလမ်း၊ ကျယ်ဝန်းတဲ့ တက္ကသိုလ်နယ်မြေတွေကြောင့် အရှေ့တောင် အာရှမှာ အလှပဆုံးတက္ကသိုလ်တစ်ခုလည်း ဖြစ်ခဲ့ပါတယ်။
ရန်ကုန်တက္ကသိုလ် ရာပြည့်ကာလမှာ ကျွန်မတို့ ဦးစားပေးဆောင်ရွက်နေတဲ့ လုပ်ငန်းစဉ်တွေကတော့ ရန်ကုန်တက္ကသိုလ် အဆင့်မြှင့်တင်ရေးပဲဖြစ်ပါတယ်။ ရန်ကုန် တက္ကသိုလ် ပြန်လည်မွမ်းမံတာတွေ၊ အဆင့် မြှင့်တင်တာတွေကို စနစ်တကျဆောင်ရွက် နိုင်ဖို့အတွက် လုပ်ငန်းကော်မတီတွေ၊ လုပ်ငန်း အဖွဲ့တွေ ဖွဲ့စည်းပြီး မဟာစီမံကိန်း (Master Plan) တစ်ခု ရေးဆွဲအကောင်အထည်ဖော်နေပြီ ဖြစ်ပါတယ်။ ဒီလုပ်ငန်းစဉ်ကို ပညာရေးဝန်ကြီး ဌာန ပြည်ထောင်စုဝန်ကြီး ဥက္ကဋ္ဌအဖြစ် ပါဝင် တဲ့ ဦးစီးကော်မတီ (Steering Committee)ဖွဲ့စည်းပြီး အကောင်အထည်ဖော်လျက် ရှိပါတယ်။ လုပ်ငန်းအလိုက် ပညာအရည် အသွေးမြှင့်တင်ရေးကော်မတီ (Software Committee)၊ ရုပ်ပိုင်းဆိုင်ရာ ဖြည့်ဆည်းရေး ကော်မတီ (Hardware Committee)တွေကိုလည်း ထပ်မံဖွဲ့စည်းဆောင်ရွက်လျက် ရှိပါတယ်။
ကိုယ်ပိုင်စီမံခန့်ခွဲခွင့်ရ တက္ကသိုလ်
မဟာစီမံကိန်းအရ ရန်ကုန်တက္ကသိုလ်ရဲ့ ဖွဲ့စည်းပုံ၊ စီမံခန့်ခွဲမှုကိစ္စတွေ၊ မူဝါဒတွေ၊ လုပ်ငန်းစဉ်တွေကို တိုးတက်ပြောင်းလဲနေတဲ့ ခေတ်ကာလအခြေအနေနဲ့ ဆီလျော်ညီညွတ်မှု ရှိအောင် ပြုပြင်ပြောင်းလဲဆောင်ရွက်လျက် ရှိကြောင်း သိရပါတယ်။ ၂၀၁၅ ခုနှစ် အမျိုးသား ပညာရေးဥပဒေပါ ပြဋ္ဌာန်းချက်အရ ရန်ကုန် တက္ကသိုလ်ကို ကိုယ်ပိုင်စီမံခန့်ခွဲခွင့်ရ တက္ကသိုလ် (Autonomous University)ဖြစ်စေဖို့ လိုအပ်တဲ့အချက်တွေကို ဖြည့်ဆည်း ပေးလျက်ရှိပြီး မကြာခင်ကာလမှာ ရန်ကုန် တက္ကသိုလ်ဟာ ကိုယ်ပိုင်စီမံခန့်ခွဲခွင့်ရှိတဲ့ တက္ကသိုလ်ဖြစ်လာတော့မှာ ဖြစ်ပါတယ်။
ရန်ကုန်တက္ကသိုလ်ရဲ့ ပညာရေးဆိုင်ရာ ပြုပြင်ပြောင်းလဲမှုများအဖြစ်နဲ့ မဟာဌာနစနစ် (Faculty System)ကိုထူထောင်ဖို့၊ သင်ရိုး ညွှန်းတမ်းတွေကို ပြန်လည်ဆန်းစစ်ပြီး မွမ်းမံ ပြင်ဆင်ဖို့ ၊ လိုအပ်ချက်နဲ့အညီ ပြန်လည်ရေးဆွဲ ဖို့ စတဲ့လုပ်ငန်းတွေကို စီမံဆောင်ရွက်သွား မယ်လို့ သိရပါတယ်။ ဒါ့အပြင် အရည်အသွေး ပိုမိုမြင့်မားတိုးတက်လာစေဖို့၊ နိုင်ငံရဲ့လူမှု စီးပွားဖွံ့ဖြိုးတိုးတက်လာစေဖို့၊ နိုင်ငံတကာ တက္ကသိုလ်များနဲ့ အကျိုးတူ ပူးပေါင်း ဆောင်ရွက်ရာမှာ ထိထိရောက်ရောက်ဖြစ်စေ ဖို့၊ ကျောင်းသားများရွှေ့ပြောင်း ပညာသင်ယူ ရေး(Student Mobility)ကိစ္စတွေမှာ လွယ်ကူ ချောမွေ့အဆင်ပြေအောင် သင်ရိုးညွှန်းတမ်း တွေ၊ မူဝါဒတွေကို ပြုပြင်ပြောင်းလဲသွားမယ် လို့လည်း သိရပါတယ်။
အီလက်ထရွန်နစ် စာကြည့်တိုက်
အတွင်းပညာအရည်အသွေး အာမခံမှု စနစ်(Internal Quality Assurance System) ကို ထူထောင်ရေးစီမံကိန်းတွေ၊ နိုင်ငံ့အကျိုးပြု အသုံးချ သုတေသနလုပ်ငန်းတွေ (Applied Research Activities)၊ အခြားနိုင်ငံတကာ တက္ကသိုလ်များနဲ့ ပူးပေါင်းဆောင်ရွက်မယ့် အစီအစဉ်တွေ (Internationalization)၊ ရန်ကုန်တက္ကသိုလ်စာကြည့်တိုက်ကို ခေတ်ရဲ့ လိုအပ်ချက်နဲ့အညီ အီလက်ထရွန်နစ် စာကြည့်တိုက် (e-Library) အဖြစ် ပြုစု ပျိုးထောင်မယ့် အစီအစဉ်တွေကိုလည်း တွေ့ရ ပါလိမ့်မယ်။
ရုပ်ပိုင်းဆိုင်ရာ အဆင့်မြှင့်တင်ရေး လုပ်ငန်းတွေအဖြစ် ကျန်းမာရေးနဲ့ ပြည့်စုံပြီး သန့်ရှင်းသာယာလုံခြုံနွေးထွေးတဲ့ တက္ကသိုလ် ရုပ်ဝန်းကျင်ကောင်းဖြစ်စေဖို့၊ တက္ကသိုလ် ဝန်းကျင်မှာ
လမ်းပန်းဆက်သွယ်ရေး ကောင်းမွန်စေဖို့၊ အဓိပတိလမ်းတစ်လျှောက် သာယာလှပဖို့နဲ့ စိမ်းလန်းစိုပြည်ဖို့တို့ကို ဆောင်ရွက်သွားမှာဖြစ်ကြောင်းလည်း သိရပါ တယ်။ ဒီလိုဆောင်ရွက်ရာမှာ မျိုးဆက်သစ် ကျောင်းသား ကျောင်းသူတွေ၊ ကျောင်းသား ဟောင်းကြီးတွေ၊ မိဘပြည်သူတွေရဲ့ ဆန္ဒနဲ့ အညီ ရန်ကုန်တက္ကသိုလ်ရဲ့ သဘာဝ ပတ်ဝန်းကျင်ကို မထိခိုက်အောင်၊ သမိုင်းဝင် အဆောက်အအုံတွေကို မထိခိုက်အောင် ဆောင်ရွက်ကြရမှာဖြစ်ပါတယ်။ ရုပ်ပိုင်းဆိုင်ရာ အဆင့်မြှင့်တင် ပြုပြင်ပြောင်းလဲရေးမှာ ရန်ကုန်တက္ကသိုလ်အစဉ်အလာနဲ့ ယဉ်ကျေးမှု အမွေအနှစ်တွေကို မထိခိုက်စေဖို့ အထူး သတိပြုရမှာ ဖြစ်ပါတယ်။ ရုပ်ပိုင်းဆိုင်ရာအဆင့် မြှင့်တင်ရေးလုပ်ငန်းတွေမှာ သန့်ရှင်းတဲ့ ရေပေးဝေရေးစနစ်ဖြစ်စေဖို့၊ ရေစီးရေလာ ကောင်းစေဖို့၊ ရေဆိုးမိလ္လာစွန့်ပစ်စနစ် ကောင်းမွန်စေဖို့၊ လျှပ်စစ်ပိုင်းဆိုင်ရာစနစ်တကျ လုံခြုံမှုရှိစေဖို့ဆောင်ရွက်မယ့် အစီအစဉ်တွေ လည်း ပါရှိပါတယ်။
အထောက်အကူဖြစ်နိုင်
သင်ယူမှု သင်ကြားမှု ကဏ္ဍအနေနဲ့ နိုင်ငံတော်ရဲ့ လူမှုစီးပွားလိုအပ်ချက်၊ ပညာ ရေးလိုအပ်ချက်တွေကို ဖြည့်ဆည်းပေးနိုင်တဲ့ သင်ရိုးညွှန်းတမ်းတွေဖြစ်အောင် လက်ရှိ အသုံးပြုနေတဲ့ သင်ရိုးညွှန်းတမ်းတွေကို ပြန်လည်ဆန်းစစ်တာတွေ၊ အသစ်ပြန်လည် ရေးဆွဲတာတွေ၊ ပြုပြင်မွမ်းမံတာတွေကို ဆောင်ရွက်ရမှာ ဖြစ်ပါတယ်။ သင်ရိုးညွှန်းတမ်း တွေဟာ နိုင်ငံတကာပူးပေါင်းဆောင်ရွက်မှု တွေ၊ ကျောင်းပြောင်းသင်ယူမှုတွေကိုလည်း အထောက်အကူဖြစ်နိုင်ပြီး ဘက်စုံဖွံ့ဖြိုး တိုးတက်တဲ့ လူသားကောင်းများ မွေးထုတ် ပေးနိုင်ဖို့ ရည်ရွယ်မှာ ဖြစ်ပါတယ်။ ကျောင်း ရွှေ့ပြောင်းသင်ယူနိုင်ပြီး တက္ကသိုလ် အချင်းချင်းပူးပေါင်းဆောင်ရွက်ရာမှာ လွယ်ကူ အဆင်ပြေစေဖို့အတွက် ခရက်ဒစ် အမှတ် လွှဲပြောင်းတဲ့စနစ် (Credit Transfer System)ကိုလည်း အမြန်ဆုံးတည်ဆောက်ရမှာ ဖြစ်ပါ တယ်။ ရန်ကုန်တက္ကသိုလ် အဆင့်မြှင့်ရေးမှာ အဓိကအကျဆုံးလုပ်ငန်းကတော့ ပညာ အရည်အချင်းမြှင့်တင်ရေးပဲ ဖြစ်ပါတယ်။ တက္ကသိုလ်ဆိုတာဟာ ပညာပေးတဲ့အဆင့်မြင့် ဌာနတစ်ခုဖြစ်ပါတယ်။ ပညာပေးရာမှာ ပြီးပြည့်စုံတဲ့ လူသားကောင်းတစ်ယောက်ဖြစ် ဖို့ ရည်ရွယ်ရပါတယ်။ ဒီနေရာမှာ ပညာနဲ့ ပတ်သက်ပြီး အဓိပ္ပာယ်အမျိုးမျိုးဖွင့်ဆိုနိုင် မှာ ဖြစ်ပေမယ့် ကျွန်မအနေနဲ့ ပညာဆိုတာ လူသားတွေကို ခေတ်အဆက်ဆက် တိုးတက် ပြောင်းလဲစေခဲ့တဲ့ အမြော်အမြင်ဖြစ်တယ်လို့ ဆိုချင်ပါတယ်။ ပညာသင်ယူတယ်ဆိုတာ ဘဝ မှာ ကိုယ်ကြုံတွေ့ရမယ့် အခြေအနေတွေကို မျှော်မှန်းပြီး ဘယ်လိုအခြေအနေတွေ ဖြစ်ပေါ် လာရင် ဘယ်လိုရင်ဆိုင်ကျော်လွှားမလဲဆိုတာကို မှန်မှန်ကန်ကန် ဆုံးဖြတ်နိုင်ဖို့ပဲ ဖြစ်ပါ တယ်။ ဒီလို ဆုံးဖြတ်နိုင်ဖို့အတွက် ပညာ အမြော်အမြင်ရှိဖို့လိုပါတယ်။ စာတွေတတ်ပေ မယ့် အမြော်အမြင်မရှိရင် ဘဝကို မှန်ကန်စွာ ရင်ဆိုင်နိုင်မှာ မဟုတ်ပါဘူး၊ စာတော်ပြီး အမြော်အမြင်ရှိမှသာလျှင် နိုင်ငံကိုအကျိုးပြုနိုင် မှာ ဖြစ်ပါတယ်။ အကျိုးပြုမယ့်လူသားတွေ ကို အကျိုးပြုနိုင်မယ့်သူတွေဖြစ်လာအောင် ပြုစုပျိုးထောင်ပေးရမှာ ဖြစ်ပါတယ်။ ရန်ကုန် တက္ကသိုလ်ရဲ့ ပညာအရည်အချင်းမြှင့်တင်ရေး မှာ ဒီလို ပညာအမြော်အမြင်ရှိတဲ့ နိုင်ငံသား ကောင်းတွေ၊ လူသားကောင်းတွေ ဖြစ်လာ အောင် ပြုစုပျိုးထောင်ပေးနိုင်ဖို့ ရည်မှန်းချက် ထားရှိရမှာ ဖြစ်ပါတယ်။
တန်ဖိုးရှိ
ပညာရပ်နယ်ပယ်မှာ ဘယ်ဘာသာရပ်က ဘယ်ဘာသာရပ်ထက် ပိုပြီးတန်ဖိုးရှိတယ်ဆို တာကို ယတိပြတ်ပြောလို့မရပါဘူး။ ဘာသာရပ် တိုင်းဟာ သူ့နေရာနဲ့သူ တန်ဖိုးရှိတာပဲ ဖြစ်ပါ တယ်။ ပညာအရည်အချင်းမြှင့်တင်ရေးမှာ ဘာသာရပ်တိုင်းကို ဖွံ့ဖြိုးတိုးတက်ဖို့ အားပေး မှသာ ပညာရပ်နယ်ပယ်တစ်ခုလုံး ဖွံ့ဖြိုး တိုးတက်လာမှာ ဖြစ်ပါတယ်။ ဘာသာရပ်တွေ ရဲ့ တန်ဖိုးရှိမှု၊ မရှိမှုဟာ သုံးစွဲပုံပေါ်မှာ အင်မတန် မှ မူတည်ပါတယ်။ ကောင်းကောင်းမွန်မွန် မှန်မှန်ကန်ကန်သုံးစွဲရင် တန်ဖိုးရှိပြီးတော့ မမှန်မကန်သုံးစွဲရင် အန္တရာယ်ဖြစ်လာမယ် ဆိုတာကို ကျွန်မတို့အားလုံး သိပြီးသားလို့ မျှော်လင့်ပါတယ်။ ရန်ကုန်တက္ကသိုလ်နဲ့တကွ တက္ကသိုလ်အသီးသီးမှာရှိတဲ့ ပညာရပ်တိုင်းကို ဟန်ချက်ညီညီနဲ့ ဖွံ့ဖြိုးတိုးတက်စေဖို့ အားပေး လုပ်ဆောင်သွားကြရမှာ ဖြစ်ပါတယ်။ ဘာသာရပ်အသီးသီးက ကျောင်းသူ ကျောင်းသားတွေကို ထူးချွန်ထက်မြက် လာအောင် ပြုစုပျိုးထောင်နိုင်မှ နိုင်ငံတော် ကဏ္ဍအသီးသီးရဲ့ တာဝန်တွေကို ထူးချွန် ထက်မြက်တဲ့ ဒီလူငယ်တွေက လက်ဆင့် ကမ်းပြီး ဖွံ့ဖြိုးတိုးတက်တဲ့ နိုင်ငံဖြစ်လာအောင် ဆောင်ရွက်သွားကြရမှာ ဖြစ်ပါတယ်။
ကျွန်မတို့နိုင်ငံဟာ ဖွံ့ဖြိုးတိုးတက်တဲ့နိုင်ငံ မဖြစ်သေးပါဘူး၊ ဖွံ့ဖြိုးဆဲပဲဖြစ်ပါတယ်။ ကျွန်မတို့ရဲ့ လူငယ်တွေအပေါ်မှာ တာဝန်တွေ အများကြီးရှိသလို နိုင်ငံရဲ့အကျိုး ထမ်းဆောင်ပုံ အခွင့်အရေးတွေလည်း အများကြီးရမှာမို့လို့ ဝမ်းသာစေချင်ပါတယ်၊ ဂုဏ်ယူစေချင်ပါတယ်။
မကြာခင်မှာ ကျရောက်တော့မယ့် ရန်ကုန် တက္ကသိုလ်ရဲ့ ရာပြည့်သဘင်ကြီးဟာ ရန်ကုန် တက္ကသိုလ်နဲ့ ပတ်သက်ဆက်နွှယ်သူတွေ အတွက်သာမက မြန်မာတစ်မျိုးသားလုံး အတွက် ဂုဏ်ယူစရာအချိန်အခါဖြစ်ပါ တယ်။ ဒီရာပြည့်သဘင် အခမ်းအနားကြီးကို အောင်အောင်မြင်မြင် ကျင်းပနိုင်ဖို့အတွက် လုပ်ငန်းကော်မတီ ၁၇ ခုကို ဖွဲ့စည်းထားပြီး ဆောင်ရွက်နေတယ်လို သိရပါတယ်။
ဒီကနေ့ စတင်ဖွင့်လှစ်လိုက်တဲ့ ရာပြည့် အကြိုကာလကစပြီး နှစ်(၁၀၀)မြောက် ပြည့်တဲ့ ၂၀၂၀ ပြည့်နှစ် ဒီဇင်ဘာလအထိ ဒီလုပ်ငန်း ကော်မတီတွေရဲ့ လုပ်ငန်းစဉ်တွေကို တစ်ဆင့်ပြီး တစ်ဆင့် အရှိန်အဟုန်မြှင့်ပြီး ဆောင်ရွက်သွား ကြပါ၊ ဒီလိုဆောင်ရွက်ရာမှာ လုပ်ငန်းစဉ်တွေ ကို မျိုးဆက်သစ်ကျောင်းသား ကျောင်းသူတွေ၊ ကျောင်းသားဟောင်းကြီးတွေ၊ မိဘပြည်သူ တွေကို ပွင့်လင်းမြင်သာစွာ တင်ပြပြီး အားလုံး ဝိုင်းဝန်းပူးပေါင်းပါဝင်လာအောင် ကြိုးပမ်း သွားကြပါ၊ ရန်ကုန်တက္ကသိုလ်ရဲ့ ရာပြည့် သဘင်အခမ်းအနားကြီးကို မြန်မာ့ပညာရေး အောင်ပွဲအဖြစ် စည်ကားသိုက်မြိုက်အောင်မြင် စွာ ကျင်းပနိုင်ဖို့အတွက် အားလုံးဝိုင်းဝန်း ဆောင်ရွက်ပေးကြပါလို့ တိုက်တွန်းရင်း နိဂုံး ချုပ်ပါတယ်။ အားလုံးလည်း ဆောင်ရွက်ပေး နိုင်ကြပါစေလို့လည်း မေတ္တာပို့သအပ်ပါတယ်” ဟု ပြောကြားသည်။
ယင်းနောက် ရန်ကုန်တက္ကသိုလ် သမိုင်း ကြောင်း ဗီဒီယိုကိုပြသပြီး နိုင်ငံတော်၏ အတိုင်ပင်ခံပုဂ္ဂိုလ်သည် အခမ်းအနားသို့ တက်ရောက်လာကြသူများအား ရင်းရင်းနှီးနှီး လိုက်လံနှုတ်ဆက်သည်။
ထို့နောက် အခမ်းအနားဒုတိယပိုင်းကို ဆက်လက်ကျင်းပရာ အမျိုးသားလွှတ်တော် ဥက္ကဋ္ဌ မန်းဝင်းခိုင်သန်းက အမှာစကား ပြောကြားသည်။
ရှင်းလင်းတင်ပြ
ယင်းနောက် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီး က ရန်ကုန်တက္ကသိုလ် ရာပြည့်သဘင်အထိမ်း အမှတ် ကျင်းပခြင်းနှင့် ရန်ကုန်တက္ကသိုလ်မှ ဆောင်ရွက်လျက်ရှိသော လုပ်ငန်းများနှင့် စပ်လျဉ်း၍ ရှင်းလင်းတင်ပြသည်။
ထို့နောက် ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ဂုဏ်ပြုစကား ပြောကြားသည်။
ယင်းနောက် ရန်ကုန်တက္ကသိုလ်ရာပြည့် အခမ်းအနားအတွက် ပါဝင်အားဖြည့် လှူဒါန်း ကြသည့် အလှူရှင်များအား အမျိုးသား လွှတ်တော်ဥက္ကဋ္ဌ မန်းဝင်းခိုင်သန်းနှင့် ပြည်ထောင်စုဝန်ကြီးများဖြစ်ကြသည့် ဒေါက်တာ ဖေမြင့်၊ ဒေါက်တာအောင်သူ၊ ဦးသိန်းဆွေ၊ ဒေါက်တာမျိုးသိမ်းကြီး၊ ဒေါက်တာမြင့်ထွေး၊ ဦးကျော်တင်နှင့် ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ ရန်ကုန်တိုင်း ဒေသကြီး လွှတ်တော်ဥက္ကဋ္ဌ ဦးတင်မောင်ထွန်း တို့က ဂုဏ်ပြုလက်မှတ်များ ပြန်လည်ပေးအပ် ကြသည်။
ထို့နောက် ရန်ကုန်တက္ကသိုလ် ကျောင်းသား ဟောင်းများဖြစ်သည့်
ရန်ကုန်တက္ကသိုလ် ပါမောက္ခချုပ်(ငြိမ်း) ဒေါက်တာတင်အောင်အေး၊ ရုပ်ရှင်အနုပညာ ဖန်တီးသူ ဒါရိုက်တာဦးကြည်စိုးထွန်း၊ သဘင် ပညာရှင် စာရေးဆရာချစ်ဦးညို၊ ဂီတပညာရှင် ဒေါ်နွဲ့ယဉ်ဝင်း၊ စာပေပညာရှင် ဒေါက်တာ ခင်အေး(မောင်ခင်မင်-ဓနုဖြူ)၊ အားကစား ထူးချွန်သူ ဦးနန္ဒကျော်စွာတို့က အမှတ်တရ စကားများ ပြောကြားကြသည်။
ရှင်းလင်းတင်ပြ
ယင်းနောက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး (ရန်ကုန်တက္ကသိုလ် ပါမောက္ခချုပ်-ငြိမ်း) ဒေါက်တာအောင်သူက အခြေခံသိပ္ပံပညာ ထူးခွန်ဆုရ ကျောင်းသားဟောင်းများကိုယ်စား ကံ့ကော်တောနှင့် ကံ့ကော်ဥယျာဉ် ဖြစ်ပေါ် လာမှုနှင့် လှူဒါန်းမှုဖြစ်ပေါ်လာခဲ့ရခြင်းနှင့် စပ်လျဉ်းပြီး ရှင်းလင်းတင်ပြသည်။
ထို့နောက် ကံ့ကော်ဥယျာဉ် အလှူရှင်များ က လှူဒါန်းငွေနှင့် လှူဒါန်းမှုမှတ်တမ်းများ အား ရန်ကုန်တက္ကသိုလ် ပါမောက္ခချုပ် ဒေါက်တာဖိုးကောင်းထံ ပေးအပ်သည်။
တက်ရောက်
ဆက်လက်၍ ရန်ကုန်တက္ကသိုလ် နှစ် (၁၀၀) ပြည့် အထိမ်းအမှတ် ကံ့ကော်တောနှင့် ကံ့ကော်ဥယျာဉ် ဖွင့်လှစ်ခြင်းအခမ်းအနားကိုရန်ကုန်တက္ကသိုလ်ဝင်း အမရဆောင်ရှေ့ မြက်ခင်းပြင်၌ ကျင်းပရာ အမျိုးသားလွှတ်တော် ဥက္ကဋ္ဌ မန်းဝင်းခိုင်သန်း၊ ပြည်ထောင်စု ဝန်ကြီးများဖြစ်ကြသည့် ဒေါက်တာအောင်သူ နှင့် ဦးကျော်တင်တို့ တက်ရောက်ကြ
သည်။
ယင်းနောက် ရန်ကုန်တက္ကသိုလ် နှစ် (၁၀၀) ပြည့် အထိမ်းအမှတ် ကံ့ကော်တောနှင့် ကံ့ကော် ဥယျာဉ်ကို ရန်ကုန်တက္ကသိုလ်ပါမောက္ခချုပ် ဒေါက်တာဖိုးကောင်းနှင့် အလှူရှင်များဖြစ်ကြ သည့် ဒေါက်တာဇော်ဝင်းနှင့် ဦးစိုင်းမျိုးဝင်း တို့က ဖဲကြိုးဖြတ်ဖွင့်လှစ်ပေးပြီး တက်ရောက် လာကြသူများက ကမ္ပည်းမော်ကွန်းအား အမွှေးနံ့သာရည်ပက်ဖျန်းကာ ကံ့ကော်တော နှင့် ကံ့ကော်ဥယျာဉ်အတွင်း လှည့်လည်ကြည့်ရှု ကြသည်။
တစ်နှစ်ပတ်လုံး ကျင်းပမည်
ရန်ကုန်တက္ကသိုလ် နှစ် (၁၀၀) ပြည့် အထိမ်းအမှတ်အခမ်းအနားများကို ၂၀၁၉ ခုနှစ် ဒီဇင်ဘာလမှ ၂၀၂၀ ပြည့်နှစ် ဒီဇင်ဘာလ အထိ တစ်နှစ်တာပတ်လုံး ကျင်းပသွားမည်ဖြစ် သည်။
ယခု ရက်သတ္တပတ်တွင် ရန်ကုန် တက္ကသိုလ် အဓိပတိလမ်း၊ စာကြည့်တိုက်ရှေ့ နှင့် သစ်ပုပ်ပင်တစ်ဝိုက်တွင် ရာပြည့်အကြို အထိမ်းအမှတ် စာအုပ်ပြပွဲနှင့် စာအုပ် ဈေးရောင်းပွဲတော်ကိုလည်းကောင်း၊ အပန်းဖြေ ရိပ်သာတွင် ရန်ကုန်တက္ကသိုလ်၏ ဖြစ်တည်မှု သမိုင်းပုံရိပ်များကို ပြသထားသည့် ရာပြည့် အမှတ်သညာပွဲတော်ကို လည်းကောင်း၊ တက္ကသိုလ်နှင့်ဆက်နွှယ်သော ရုပ်ရှင် ဇာတ်ကားများ၊ စကားဝိုင်းဆွေးနွေးပွဲများဖြင့် နံနက် ၁ဝ နာရီမှ ညနေ ၆ နာရီအထိ ရန်ကုန်တက္ကသိုလ်ဝင်းအတွင်း စည်ကား သိုက်မြိုက်စွာ ကျင်းပသွားမည်ဖြစ်ကြောင်း သိရသည်။
ရန်ကုန်တက္ကသိုလ် နှစ် (၁၀၀) ပြည့် ရာပြည့်သဘင်အခမ်းအနားကို မြန်မာနိုင်ငံ ၏ ဂုဏ်ဆောင်တက္ကသိုလ်အဖြစ် ထိန်းသိမ်းမြှင့် တင်ရေး၊ ထာဝရငြိမ်းချမ်းရေးနှင့် အမျိုးသား ပြန်လည်သင့်မြတ်ရေးကို အထောက်အကူပြု စေရေး၊ နိုင်ငံတော်၏ နိုင်ငံရေး၊ စီးပွားရေး၊ လူမှုရေးစနစ်များနှင့် လိုက်လျောညီထွေဖြစ် သည့် အရည်အသွေးရှိသော တက္ကသိုလ်ပညာ ရေးကို ဖော်ဆောင်ရေး၊ ပညာအခြေပြုလူမှု စီးပွားဖွံ့ဖြိုးတိုးတက်ရေးအတွက် စွမ်းဆောင် ရည်ပြည့်ဝသော လူ့စွမ်းအားအရင်းအမြစ်များ မွေးထုတ်ပေးရေး၊ နိုင်ငံ့ကောင်းကျိုး၊ ကမ္ဘာ့ ကောင်းကျိုးကို ဖြည့်ဆည်းပေးနိုင်မည့် နိုင်ငံ တကာအဆင့်မီ တက္ကသိုလ်အဖြစ် ဦးတည် အကောင်အထည်ဖော်ရေး စသည့် ဦးတည် ချက်များဖြင့် ဆောင်ရွက်ကျင်းပခြင်းဖြစ် ကြောင်း သိရသည်။
သတင်းစဉ်
