ရန်ကုန် နိုဝင်ဘာ ၃ဝ
၂ဝ၁၅ ခုနှစ်အတွက် အမျိုးသားစာပေတစ်သက်တာဆု၊ အမျိုးသား စာပေဆုနှင့် စာပေဗိမာန်စာမူဆုများ ချီးမြှင့်ပွဲအခမ်းအနားကို ယနေ့နံနက် ၉ နာရီတွင် ရန်ကုန်မြို့ မြို့မကျောင်းလမ်းရှိ အမျိုးသားဇာတ်ရုံ၌ကျင်းပရာ ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဦးမြင့်ဆွေ တက်ရောက်အမှာစကားပြောကြားပြီး အမျိုးသားစာပေတစ်သက်တာဆု ရရှိသူများကို ဆုများပေးအပ်ချီးမြှင့်သည်။
ဆုချီးမြှင့်ပွဲအခမ်းအနားသို့ ပြည်ထောင်စုဝန်ကြီးများ၊ ရန်ကုန်တိုင်းဒေသကြီးဝန်ကြီးချုပ်၊ ရန်ကုန်တိုင်းစစ်ဌာနချုပ်တိုင်းမှူး၊ တိုင်းဒေသကြီး ဝန်ကြီးများ၊ ဌာနဆိုင်ရာအကြီးအကဲများ၊ မြန်မာနိုင်ငံ စာရေးဆရာအသင်းဥက္ကဋ္ဌ နှင့် အလုပ်အမှုဆောင်များ၊ ဆုရွေးချယ်ရေးကော်မတီဝင်များ၊ ဆုရစာပေ ပညာရှင်ကြီးများ၊ ၎င်းတို့၏မိသားစုဝင်များနှင့် ဖိတ်ကြားထားသူများ တက်ရောက်ကြသည်။
ရှေးဦးစွာ ဒုတိယသမ္မတ ဦးမြင့်ဆွေက မြန်မာတို့၏ စာပေယဉ်ကျေးမှု အနုပညာ အဖြာဖြာသည် ရှေးနှစ်ပေါင်းထောင်ချီကတည်းက ဖြစ်ထွန်းပေါ်ပေါက်ခဲ့ပြီး ယနေ့တိုင် ရှင်သန်ဖွံ့ဖြိုးစည်ပင်လျက်ရှိကြောင်း၊ မြန်မာတို့သည် ထေရဝါဒဗုဒ္ဓဘာသာ ကိုးကွယ်ကြသူများပီပီ ရဟန်းစာဆို၊ လူပုဂ္ဂိုလ် စာဆိုကြီးများက လောကပါလတရား နှစ်ပါး၊ (၃၈)ဖြာ မင်္ဂလာတရား၊ ကိုယ်ချင်းစာတရား စသော ကောင်းမွန်မြင့်မြတ်သည့် နှလုံးသားကို အခြေခံလျက် စာကောင်းပေမွန်များ အမြောက်အမြား ရေးသားဖွဲ့ဆိုခဲ့ပြီး မြန်မာ စာပေယဉ်ကျေးမှု အဆင့်အတန်းကို မြှင့်တင်ပေးခဲ့ကြကြောင်း။
စာပေဆိုသည်မှာ ရုပ်ရှင်၊ ဂီတ၊ သဘင် စသည့်အနုပညာရပ်များ၏ ပင်မမဏ္ဍိုင်ဖြစ်သောကြောင့် အမျိုးသားရေးစရိုက်လက္ခဏာ၊ ယဉ်ကျေးမှုရေးရာ အဖြာဖြာတို့ ပေါင်းစုံထင်ဟပ်ရာ နယ်ပယ်ကြီးဖြစ်ကြောင်း၊ ထို့ကြောင့် ''စာပေ မြင့်မှ လူမျိုးမြင့်မည်''ဟု ဆိုကြခြင်းပင်ဖြစ်ကြောင်း၊ နိုင်ငံတော်က မြန်မာ စာပေဖွံ့ဖြိုးတိုးတက်ရေးအတွက် အားပေးသည့်အနေဖြင့် မြန်မာ့အမျိုးသားရေး စရိုက်လက္ခဏာများကို ထင်ဟပ်ဖော်ပြနိုင်စွမ်းရှိသော စာကောင်းပေမွန်များကို နိုင်ငံတော်အဆင့် အမျိုးသားစာပေဆုအဖြစ် ရွေးချယ်ပြီး စာဆိုတော်နေ့ရောက်တိုင်း ယခုကဲ့သို့ နှစ်စဉ်မပျက်မကွက် ချီးမြှောက်ဂုဏ်ပြုနေခြင်း ဖြစ်ပါကြောင်း၊ စာပေဆုများကို ရွေးချယ်ရာတွင်လည်း ပြောင်းလဲလာသည့် ခေတ်စနစ်နှင့်အညီ ပွင့်လင်းမြင်သာမှုရှိရန် နှင့် အမှန်တကယ်ထိုက်တန်သော စာအုပ်များ၊ စာမူများကို ဆုရွေးချယ် ချီးမြှင့်နိုင်ရန် စနစ်တကျဆောင်ရွက် ခဲ့ပါကြောင်း၊ စာပေဆုရွေးချယ်ရေး အဖွဲ့ကို စာပေပညာရှင်၊ အသိပညာ ရှင်၊ အတတ်ပညာရှင်များသာမက စာပေလောကအတွင်း၌ အတွေ့အကြုံရှိသည့် စာပေထုတ်ဝေဖြန့်ချိသူများဖြင့် ပါဝင်ဖွဲ့စည်းဆောင်ရွက်ခဲ့ပါကြောင်း၊ အမျိုးသားစာပေဆု စိစစ်ရွေးချယ်ရေးကော်မတီကို စာပေပညာ ရှင် ၆၈ ဦးဖြင့်လည်းကောင်း၊ စာပေဗိမာန်စာမူဆု စိစစ်ရွေးချယ်ရေးအဖွဲ့ကို စာပေပညာရှင် ၃၆ ဦးဖြင့်လည်း ကောင်းဖွဲ့စည်းခဲ့ပြီး ဆုရသင့်၊ ရထိုက်သူများ ဆုရရှိစေရေးအတွက် ပဏာမ ရွေးချယ်မှုအဆင့်၊ ဆန်ခါတင် ရွေးချယ်မှုအဆင့်၊ အတည်ပြုရွေးချယ် မှုအဆင့်ဆိုပြီး အဆင့်သုံးဆင့်ဖြင့် ပညာရှင်များက လွတ်လပ်စွာ စိစစ်ရွေးချယ်ခဲ့သည်ကို တွေ့ရှိရပါကြောင်း။
၂ဝ၁၅ ခုနှစ်အတွင်း ပထမအကြိမ် ပုံနှိပ်ထုတ်ဝေခဲ့သည့် စာအုပ်ပေါင်း ၄၈ဝ ထဲမှ အမျိုးသားစာပေဆုအတွက် သတ်မှတ်ထားသော ဘာသာရပ် ၁၆ ခုအနက် ဘာသာရပ် ၁၁ ခု၊ စာပေ ဗိမာန်စာမူဆုတွင် ပြိုင်ပွဲဝင်စာမူပေါင်း ၂၆၉ စောင်ထဲမှ စာပေဗိမာန်စာမူဆု ချီးမြှင့်ရန် သတ်မှတ်ထားသော ဘာသာရပ် ၁၃ ခုအနက် စာမူပေါင်း ၃၃ စောင်ကို ရွေးချယ်ခဲ့ပြီး ဆုများချီးမြှင့်သွားမည်ဖြစ်ကြောင်း၊ ဆုရရှိ ကြသည့် စာပေပညာရှင်အားလုံးအတွက် ဂုဏ်ယူဝမ်းမြောက်ပါကြောင်းနှင့် နိုင်ငံ၏အကျိုး၊ အများပြည်သူ၏အကျိုးအတွက် ကလောင်စွမ်းဖြင့် ဆတက်ထမ်းပိုး ဆက်လက်ဆောင် ရွက်နိုင်ရန် ဆုမွန်ကောင်းတောင်း အပ်ပါကြောင်း။
တစ်ဆက်တည်းတွင် ခေတ်ပြိုင် မျိုးဆက်သစ် မြန်မာစာဆိုတို့ကိုလည်း ''စိတ်ကောင်းရှိမှ စာကောင်းရမည်''ဆိုသည့် ဆရာကြီးဇော်ဂျီ၏ သြဝါဒစကား အမြဲမှတ်သားပြီး စာပေတာဝန်ကို အမျိုးသားရေးတာဝန် တစ်ရပ်အဖြစ် ယုံကြည်မှုအပြည့်၊ အားမာန်အပြည့်ဖြင့် ဆထက်တိုး ရေးသားပြုစုကြပြီး မိမိနိုင်ငံ၏ ဖွံ့ဖြိုး ရှင်သန်မှုလမ်းကြောင်းတွင် တစ်ဖက်တစ်လမ်းက ပါဝင်ကူညီကြရန် နှိုးဆော်တိုက်တွန်းလိုပါကြောင်း။
ယနေ့အချိန်အခါသည် ပြည်သူအားလုံး မျှော်လင့်တောင့်တနေကြ သည့် ဒီမိုကရေစီနိုင်ငံတော်သစ်ကို တည်ဆောက်နေချိန်ဖြစ်၍ နိုင်ငံသား အားလုံးက နိုင်ငံကြီးသားပီသစွာဖြင့် ဒီမိုကရေစီကျင့်စဉ်အတိုင်း လိုက်နာကြရန် အထူးအရေးကြီးလှပါကြောင်း၊ သို့အတွက် နိုင်ငံသားများ၏ အတွေးအခေါ်၊ အသိပညာ ပိုမိုခေတ်မီဖွံ့ဖြိုး တိုးတက်ရန်လိုပါကြောင်း၊ အာဆီယံ ဒေသတွင်းအပါအဝင် နိုင်ငံတကာ၌ ဝင့်ထည်စွာ ရပ်တည်နိုင်ရန်လိုပါကြောင်း၊ အဆိုပါတာဝန်များကို ပြည်သူအားလုံးက ပါဝင်ထမ်းဆောင် နိုင်အောင် စာပေပညာရှင်ကြီးများက အပြုသဘောဆောင်သည့် ပညာဗဟု သုတများဖြန့်ဝေကြရန် တိုက်တွန်းလိုပါကြောင်း။
မိမိတို့ အမျိုးသားခေါင်းဆောင်ကြီး ဗိုလ်ချုပ်အောင်ဆန်းက ''ကျွန်တော် တို့ပြုစုရမယ့် စာပေအရေးအသားဟာ ဒီသဘောတရားများနှင့် ပြည့်စုံတဲ့ စာပေမျိုးဖြစ်ရမယ်၊ ဒါမှလည်း ကျွန်တော်တို့ရဲ့စာပေဟာ ကမ္ဘာ့အဆင့်အတန်းကို မီမယ်။ ကမ္ဘာ့အဆင့်အတန်းမီမှ ကျပ်ပြည့် တင်းပြည့် တန်ဖိုးရှိမယ်၊ သို့မှလည်း ယဉ်ကျေးမှုစနစ်ကြီးဟာ တိုးတက် ပြောင်းလဲလာမယ်၊ ယဉ်ကျေးမှုစနစ်ကြီး တိုးတက်ပြောင်းလဲခြင်းမရှိဘဲနဲ့ အမျိုးသားခေတ်ပြောင်းတိုးတက်ရေးဟာ ကောင်းစွာမအောင်မြင်နိုင်ပါဘူး။ တစ်ကမ္ဘာလုံးဟာ ယခုအခါ ခေတ်ပြောင်းနေတဲ့ အချိန်အခါကြီးဖြစ်တယ်။ ကျွန်တော်တို့လည်း ကမ္ဘာကြီးနဲ့အတူ ခေတ်နောက်မကျအောင် လိုက်ကြစို့၊ ကမ္ဘာ့ဇာတ်ခုံကြီးမှာ ကမ္ဘာ့တေးသံကိုလိုက်၍ ကနိုင်တဲ့ မြန်မာပြည်ကြီးဖြစ်အောင် ပြုပြင်ကြစို့''ဟု ရေးသားဖော်ပြခဲ့ဖူးကြောင်း၊ ဤသည် ကို စာပေပညာရှင်များအနေဖြင့် စာပေရေးသားပြုစုခြင်းနှင့် ပတ်သက်သည့် လမ်းညွှန်မှုအဖြစ် ခံယူလုပ် ဆောင်သင့်သည်ဟု အကြံပြုပြောကြားလိုပါကြောင်း။
ယနေ့ကျင်းပသည့် အခမ်းအနားသည် စာပေပညာရှင်ကြီးများ၏ ဝါသနာပေါ်တွင် စေတနာထပ်ဆင့်ပြီး စာပေဂုဏ်မြှင့်တင်နိုင်ခဲ့ကြ၍၊ စာပေ တာဝန်ကျေပွန်ခဲ့ကြ၍ နိုင်ငံတော်က ဆုချီးမြှင့်ဂုဏ်ပြုသည့် အခမ်းအနား ဖြစ်သောကြောင့် ကာယကံရှင် စာပေ ပညာရှင်ကြီးများနည်းတူ မိမိတို့လည်း ဝမ်းမြောက်ဝမ်းသာ မုဒိတာပွားကြ ရပါကြောင်း။
မြန်မာ့သမိုင်းတစ်လျှောက် ရဟန်းစာဆို၊ လူပုဂ္ဂိုလ်စာဆို အသီးသီးသည် စာပေစွမ်းအားဖြင့် မြန်မာ့ဂုဏ် မြင့်မားရန်၊ အကျိုးစီးပွားတိုးတက်ရန် ဆောင်ရွက်ခဲ့သည့် အစဉ်အလာကောင်းများစွာရှိပါကြောင်း၊ ထိုအစဉ် အလာကောင်းများကို ဝါရင့်စာပေ ပညာရှင်ကြီးများက ထိန်းသိမ်းပြီး မျိုးဆက်သစ် ကလောင်ရှင်များကို လက်ဆင့်ကမ်းပေးကြရန် တိုက်တွန်းလိုပါကြောင်း။ မျိုးဆက်သစ် ကလောင် ရှင်များကလည်း ကျင့်ဝတ်များ၊ နီတိများကို ထိန်းသိမ်းပြီး ခေတ်ကိုထင်ဟပ်နေသော၊ အမျိုးဘာသာ သာသနာ ကောင်းကျိုးသယ်ပိုးဆောင်ရွက်နိုင်သော၊ နိုင်ငံ့ပုံရိပ်ကို မြှင့်တင်နိုင်သော စာကောင်းပေမွန်များ ရေးဖွဲ့နိုင်ကြ ပါစေဟု ဆုမွန်ကောင်းတောင်း ပါကြောင်း ပြောကြားသည်။
ထို့နောက် ဒုတိယသမ္မတ ဦးမြင့်ဆွေက ၂ဝ၁၅ ခုနှစ်အတွက် အမျိုးသားစာပေတစ်သက်တာဆုရ ဆရာကြီးဦးတင်ခ (တက္ကသိုလ်တင်ခ)နှင့် ဆရာကြီးဦးဝင်းမွန် (တက္ကသိုလ် ဝင်းမွန်)ကိုယ်စား သမီးဖြစ်သူ ဒေါက်တာလွင်လွင်မွန်(ပါမောက္ခ၊ မနုဿဗေဒဌာန၊ ရတနာပုံတက္ကသိုလ်)တို့အား ဆုများပေးအပ်ချီးမြှင့်သည်။
ဆက်လက်၍ ပြည်ထောင်စုဝန်ကြီး ဒေါက်တာဖေမြင့်၊ ဦးသိန်းဆွေ၊ ဦးအုန်းမောင်နှင့် ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း တို့က အမျိုးသားစာပေဆုရရှိသူများ အားလည်းကောင်း၊ ရန်ကုန်တိုင်းဒေသကြီးအစိုးရအဖွဲ့ ဝန်ကြီးများ၊ အမျိုးသားစာပေဆု စိစစ်ရွေးချယ်ရေး ကော်မတီဥက္ကဋ္ဌ စည်သူဒေါက်တာ သော်ကောင်းနှင့် ဒုတိယဥက္ကဋ္ဌ ဒေါက်တာခင်အေး(မောင်ခင်မင်-ဓနုဖြူ)၊ မြန်မာနိုင်ငံစာရေးဆရာ အသင်းဥက္ကဋ္ဌ ဦးကျော်ဝင်း (မနုဿ ကျော်ဝင်း)တို့က စာပေဗိမာန်စာမူဆု ရရှိကြသူများအား လည်းကောင်း ဆုများ ပေးအပ်ချီးမြှင့်ကြသည်။
ယင်းနောက် စာပေဆုရရှိကြသူ များကိုယ်စား ၂ဝ၁၅ ခုနှစ် အမျိုးသား စာပေတစ်သက်တာဆုရ ဆရာကြီး ဦးတင်ခ(တက္ကသိုလ်တင်ခ)က ကျေးဇူး တင်စကားပြောကြားသည်။
ထို့နောက် ဒုတိယသမ္မတ ဦးမြင့်ဆွေနှင့်အဖွဲ့ဝင်များသည် ၂ဝ၁၅ ခုနှစ်အတွက် အမျိုးသားစာပေ တစ်သက်တာဆုရှင်များ၊ အမျိုးသား စာပေဆုရှင်များ၊ စာပေဗိမာန်စာမူ ဆုရှင်များနှင့်အတူ စုပေါင်းမှတ်တမ်း တင်ဓာတ်ပုံရိုက်ကြသည်။
ဆုချီးမြှင့်ပွဲအခမ်းအနား မစတင်မီ ဒုတိယသမ္မတနှင့် အဖွဲ့ဝင်များသည် ဆုရစာပေပညာရှင်ကြီးများ၏ မှတ်တမ်းဓာတ်ပုံများနှင့် ဆုရစာအုပ်များ ခင်းကျင်းပြသထားမှုကို လှည့်လည် ကြည့်ရှုအားပေးကြသည်။
ဆုချီးမြှင့်ပွဲအခမ်းအနားအပြီးတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဇနီးဒေါ်ကြူကြူလှတို့က ၂ဝ၁၅ ခုနှစ် အတွက် အမျိုးသားစာပေတစ်သက်တာဆုရ စာပေပညာရှင်ကြီးနှစ်ဦးအား ချီးမြှင့်သည့် ငွေကျပ် ၁၅ သိန်းစီကို ရန်ကုန်တိုင်းစစ်ဌာနချုပ်တိုင်းမှူး ဗိုလ်ချုပ်မျိုးဇော်သိန်းက ပေးအပ် ချီးမြှင့်သည်။
ပြည်ထောင်စုသမ္မတမြန်မာနိုင်ငံ တော်သည် မြန်မာစာပေအကျိုးကို ထူးချွန်ပြောင်မြောက်စွာ တစ်သက်တာလုံး အားထုတ်ရေးသားပြုစုခဲ့သည့် ပုဂ္ဂိုလ်များ၏ ဆောင်ရွက်ချက်များကို နိုင်ငံတော်က အသိအမှတ်ပြု ဂုဏ်ပြုသည့်အနေဖြင့် ''အမျိုးသားစာပေ တစ်သက်တာဆု''ကို ၂ဝဝ၁ ခုနှစ်က စ၍ နှစ်စဉ်ချီးမြှင့်ပေးအပ်ခဲ့သည်။
၂ဝဝ၁ ခုနှစ်မှ ၂ဝ၁၁ ခုနှစ်အထိ အမျိုးသားစာပေတစ်သက်တာဆုကို တစ်နှစ်လျှင် စာပေပညာရှင်တစ်ဦး ကိုသာ ရွေးချယ်ချီးမြှင့်ခဲ့ရာမှ ၂ဝ၁၂ ခုနှစ်ကစ၍ မြန်မာစာပေဖွံ့ဖြိုးတိုး တက်စေရန် ရည်ရွယ်ကာ သုံးဦးအထိ တိုးတက်ချီးမြှင့်ခဲ့သော်လည်း ၂ဝ၁၅ ခုနှစ်အတွက်မူ အမျိုးသားစာပေ တစ်သက်တာဆုကို နှစ်ဦး ချီးမြှင့် ပေးအပ်နိုင်ခဲ့သည်။
ထို့အတူ ယခင်က တစ်သက်တာ စာပေဆုကို ငွေကျပ်ခြောက်သိန်း ချီးမြှင့် ခဲ့ရာမှ ၂ဝ၁၃ ခုနှစ်မှစ၍ ငွေကျပ် ၂၅ သိန်းအထိ လည်းကောင်း၊ အမျိုးသားစာပေဆုကိုလည်း ငွေကျပ် သုံးသိန်းချီးမြှင့်ခဲ့ရာမှ ၂ဝ၁၃ ခုနှစ်မှ စ၍ ငွေကျပ် ၁၅ သိန်းအထိလည်း ကောင်း၊ စာပေဗိမာန်စာမူဆုများကို လည်း ယခင်က ပထမဆု ငွေကျပ် တစ်သိန်းခွဲ၊ ဒုတိယဆု ငွေကျပ် တစ်သိန်းနှင့် တတိယဆု ငွေကျပ် ခုနစ်သောင်းခွဲ ချီးမြှင့်ခဲ့ရာမှ ၂ဝ၁၃ ခုနှစ်မှစ၍ ပထမဆုကို ငွေကျပ် ခုနစ်သိန်း၊ ဒုတိယဆုကို ငွေကျပ် ငါးသိန်း၊ တတိယဆုကို ငွေကျပ် သုံးသိန်းအထိလည်းကောင်း ထပ်မံ တိုးမြှင့်ချီးမြှင့်ခဲ့ကြောင်း သိရသည်။
(သတင်းစဉ်)
No comments:
Post a Comment